ابي رايكم بدون تجريح

[مشكلتي]

السلام عليكم
حبيت اكتب سالفتي هي مب مشكله بس ابي نصيحه او اقتراح او مساعده او حتى دعوه بس لو سمحتو بدون تجريح او اسائه انا ادري ان في ناس ما بتتقبل سالفتي بس الدعوه احسن من التجريح
انا بنت عمري 25 سنه تعرفت ع شاب من دول الخليج نفس عمري ونحن مع بعض من 4 شهور وكانا ماخذين الموضوع بس صداقه لا اكثر ولا اقل بس قبل شهر طلب مني الزواج فالبديه رفضت لاني قلت اكيد كلام وما بيصير شي بس هو اصر و قالي اطلبي اي شي تبيني اسويه علشان اثبتلك نيتي وبصراحه ما طلبت شي وقلتله بفكر وهو فاجئني من يومين انه قاعد يدور شغل فالامارات علشان ينقل عندنا وحسيته جدي فالموضوع مع ان للحين انا ما عطيته رد ولا هو فاتحني فالموضوع لانه قالي بخليج ع راحتج ومتى ماتبين تجاوبيني خبريني فصدمني يوم راواني العروض يلي لقاها عندنا فما عرفت شو اسوي طبعا هو قالي كل شي عنه وخبرني بظروف اهله وان ابوه عليه ديون وهو يلي شايل البيت وان هالشي مستحيل يتغير قصده بعد ما نتزوج بيتم شايل اهله و هالشي وايد عجبني فيه انه ريال شايل مسئؤليه اهله ويعتمد عليه فانا محتاره مب عارفه اذا كان صادق ولا لا مب عارفه افكر وبنفس الوقت لو كان صادق ما اعرف موقف اهلي شو بيكون خصوصا انه خليجي ومب مواطن و احتمال كبير يرفضونه وانا شرحتله هالشي مع اني اشوف حتى المواطن ما منه فايده بس اسم فارجو انكم تساعدوني وتقولولي كيف اتصرف مع العلم هو ما يعرف اي شي عني ولا حتى شافني واذا ممكن في طريقه اعرف انه صادق يعني اطلب منه طلب معين علشان اتاكد من نيته؟ و اشكر كل وحده ترد علي بدون ما تجرح فالكلام و شكرا

المزيد من آخر المواضيع من نفس القسم:

• تزوجت مريض نفسي
• مشكلة حالتي بعد الأمومة
• مشكلة تقدم لي خاطب وافد
• مشكله بنتي
• زوجي تعبني بالضرب كليوم💔
• أواجه زوجي بكذباته ولا اسكت
• ريلي احبه ،، بس ماعرف شو الي حصل
• مشكلتي التعلق الزائد
• رفض ريلي للحمل
• عااااجل مشكلة واجهتني

[المراقبة العامة]

الكلمة الطيبة صـــــــدقة

[مالتيزرس]

حبيبتي اول شي تفكرين فيه عياالج منها الخليجي طبعا بيكونو من دون جواز الا استوفو الشروط وهاي تقدرين تتصلين فالجهة المسؤولة وهم يفهمونج كل شي وفالنهاية وقبل كل شي الراي الاول والأخير راي اهلج لانهم عزوتج واللي ربوجوهل باجر اذا ظروفه ماسمحت راح تكوني معاه لازم تتفقون ع هالشي مكان السكن .وثاني شي رايج ..ولج بالاستخارة ..واذا حسيتيه صادق خليه يدق الباب وشوفو ردة فعل اهلج وافقو كان بها وفالنهاية هم ادرى بمصلحتج وا
.واهم شي تسالون عن اخلاقه وصلاته مب منه والدرب هو خبرج عن العروض وانتي ماصدقتي خبر ترا وايد سوو جذا وعقبب لعبو ع البنات فلا يغررج هالشي حبيبتي انتي الافضل تسالون وتاخذون وقت مب خذوه فغلوه ترا هامصير واسرة وعيال باجر..والله يجدم اللي فيه خيير ..

[مالتيزرس]

وانا اللي مستغربة منه انه هد ديرته واهله وهو اللي يعيلهم عسب ايي عندج وليش وين شغله الاولي ومنو يصرف ع اهله الحين ويا وطلبج بدون مايجوفج حطي خط تحت هالموضوع كيف ترك اهله وي اهنه وترك شغله ع قولتج هو يصرف ع اهله.

[وجدان الفجر]

أختي , الزواج قسمة ونصيب صح ومحد بعترض على هذا الشي ,ولكن مثل ما قالت الأخت قبلي ,بيطلبج وهو ماشافج !! وكيف انت تقولي انكم مع بعض من اربع شهور , كيف يعني ؟؟يعني تقصدي تتواصلوا بالواتس اب ووسائل التواصل ولا شو ؟ وليش يبي يخلي بلده وجالس يدور على عروض وظايف ويبا زوجة من برع بلده ؟؟؟
أختي ,تريثي وفكري بشكل محايد بعيد عن العاطفة , وبعدها لو شفتي انه جاد وانت مقتنعة به ,لازم يتقدم لأهلج وأهلج يسألوا عليه عدل واذا وافقوا ,على بركة الله
وحطي في بالج انه يمكن تعيشي ببلده بعدين فهل انت مستعدة لهذا الوضع ؟
أخي ما أبي أحبطج او أكرهج في الزواج منه , وانا ما ضد زواج الاماراتية من خليجي ولكن شفت بعض الحالات من بعض الخليجين انهم يبوا يتزوجوا اماراتية (أي اماراتية ) بس علشان هم ينتقلوا للامارات ويصير عندهم عيال اماراتين مثل ما يعتقدو وأنهم يظنوا انه هذا أفضل لتحسين وضعهم المادي ويكون لهم مستقبل أفضل .ما قلت الكل , أقول البعض ,أكيد الزواج بيكون مشاركة ومصالح متبادلة ولكن اللي بتزوج علشان هذه الاسباب فعند اي ازمة او عند انتهاء المصلحة ممكن يتخلى عن زوجته ويتركها تتبهدل .

[بقايا العود]

أختي , الزواج قسمة ونصيب صح ومحد بعترض على هذا الشي ,ولكن مثل ما قالت الأخت قبلي ,بيطلبج وهو ماشافج !! وكيف انت تقولي انكم مع بعض من اربع شهور , كيف يعني ؟؟يعني تقصدي تتواصلوا بالواتس اب ووسائل التواصل ولا شو ؟ وليش يبي يخلي بلده وجالس يدور على عروض وظايف ويبا زوجة من برع بلده ؟؟؟
أختي ,تريثي وفكري بشكل محايد بعيد عن العاطفة , وبعدها لو شفتي انه جاد وانت مقتنعة به ,لازم يتقدم لأهلج وأهلج يسألوا عليه عدل واذا وافقوا ,على بركة الله
وحطي في بالج انه يمكن تعيشي ببلده بعدين فهل انت مستعدة لهذا الوضع ؟
أخي ما أبي أحبطج او أكرهج في الزواج منه , وانا ما ضد زواج الاماراتية من خليجي ولكن شفت بعض الحالات من بعض الخليجين انهم يبوا يتزوجوا اماراتية (أي اماراتية ) بس علشان هم ينتقلوا للامارات ويصير عندهم عيال اماراتين مثل ما يعتقدو وأنهم يظنوا انه هذا أفضل لتحسين وضعهم المادي ويكون لهم مستقبل أفضل .ما قلت الكل , أقول البعض ,أكيد الزواج بيكون مشاركة ومصالح متبادلة ولكن اللي بتزوج علشان هذه الاسباب فعند اي ازمة او عند انتهاء المصلحة ممكن يتخلى عن زوجته ويتركها تتبهدل .

كفت ووفت الاخت

الغاليه يباج وسيلة للوصول للامارات والعيش فيها وتحسين وضعه
لو اذكر لج مواقف لوايد من ربيعاتي تبهدلن والي تتطلقت والي ولي... بيشيب شعر راسج

اباج تراجعين نفسج عدل

[غلآ نفسي]

يمكن تربى فالخليج وهو مب خليجي دامه رضى ع طول انه يسكن الامارات

تاكدي من هالشي وبعد حطي في بالج ان ممكن في يوم من الاياام تروحين تسكنين عندهم لازم تعرفين حاله واحوال بيت اهله

واستخيري قبل كل شي واسالو عنه عدل

بالتوفيق

[الجوري و]

السلام عليج

انا بصراحه ماقدر انصحج مباشرة عشان ماظلم حد

ولكن لو كنت فمكانح لما وثقت في واحد ماعرفه ولا يعرفني الا من اربع شهور!!! ولا شافني و يبا يخطبني!!! هذي تدخل اي عقل عفواً؟ انا اطلب منج انج تنتبهين لان الواحد ف هالزمن مايثق في حد و لكن السالفه ابدا مب واقعيه الله يستر عليج يارب و مثل ماقلتلج كيف يخطب وحده يعرفها من اربع شهور و لا شافها ولا يعرف عنها شي و يبا يخطبها! اي تورط هذا؟اتمنى انه مايكون يجذبج بهالاسلوب او يستغلج الله لا يقوله انتبهي لنفسج اختي و للمره الاخيره اقولج و انصحج الشي ابدا مب واقعي و انتي فكري فيها صراحه انا ماشوف اي واقعيه فالموضوع فكيف تثقين

تحياتي❤