تعقيب 1/ انا تغيرت .! ��

[مشكلتي]

السلام عليكن خواتي ،، شحالكن ..
https://forum.uaewomen.net/showthrea...A-%F0%9F%98%9E

سلام الله عليك ورحمته تعالى وبركاته
لا حول ولا فوه الا بالله كلامك قطع قلبي وما نملك غير الدعاء لك ربنا يعينك طاعتك لوالدتك وبرك لها شي كبير عند الله وجزاءه في الدنيا فبل الآخره اصبري يا اختي عليك بالصبر في كل شي لان هذا هو حال الدنيا هنالك امور نعجز عن تغييرها وليس لنا إلا الاحتساب والصبر .قومي بما يرضي ربك اكيد شغل البيت ما يخلص لكن لازم تساعدين الوالده لانها اكيد هي كمان تعبت المهم يا اختي ما عليك الا انك تعملي المطلوب منك وححدي زمن لكل شي عشان تخلي زمن لنفسك وانصحك يا اختي وسائل التواصل الحاليه لو ما مسكتي نفسك وانتبهتي للزمن راح تغرقين فيها طالما انك تحبي العلم تعلمي من الايباد تقدرين تنتسبي لاي جامعه وتدرسين عن طريق النت وتحققي احلامك اذن اختي عليك بالصبر والعمل ارضاءآ لله اولآ والتوكل عليه سبحانه ان شاء الله بكره بكون احسن وبعوضك ربي خير

وعليــكم السـلام ورحـمة الله خيتي ،، امين الله يسمع منج ،، خبريني الغاليه شو هالجامعات اللي ممكن اني انتسب لها من النت

مجتمع ذكوري ، قوانين ذكورية انفرضت على البنات ، لدرجة ما صار للبنت اي كيان و لا اي استقلالية و لا حتى لها رأي انها تحدد مستقبلها بنفسها !!!

و للأسف و مع احترامي لج أمج الله يحفظها ينطبق عليها المقولة الي تقول المرأة عدوة المراة و أنا بصراحة ما ألوم أمج لأنها تربت من صغرها على هالتفرقة بين البنت و الولد و على هالقوانين الذكورية الي تقدس الولد و تقلل من البنت ...

و لهالسبب تلقين أمج واقفه في صف اخوانج ضدج ، لأنهم في نظرها الأولاد المقدسين ، أما أنتي في نظرها البنت الضعيفة الي مالها حقوق و لا مسموح لها يكون لها رأي أو قرار !!!!

و أنتي في نظرهم كفاية عليج تعرفين تكتبين و تقرين فقط ما تحتاجين للجامعه مكانج البيت و المطبخ فقط لين ما يي لج نصيبج و عقب ما تتزوجين تقضين طول حياتج في ارضاء و تقديس زوجج على حساب نفسج و تصيرين له كالجارية و حتى لو غلط و خان لازم تصبرين و تتعلمين الرقص علشان تملين عينه !!

و أنتي في نظرهم شرف العايلة الي يحافظون عليه و شرف أبوج و أخوانج و عايلتكم كلها بين ريولج مع احترامي الشديد لج و اعتذر عن الجرأة في كلامي و لكن هذا هو الواقع و انتي تمثلين المئات من القصص المشابهه لقصتج في مجتمعنا العربي !!


لين متى و احنا على هالحال مب عارفات شنو لنا و شنو علينا من الحقوق ؟؟؟ ترى الدين الاسلامي بريء و بعيد عن الممارسات الي تمارس علينا كنساء و بنات ...


ودي اقول لج تمردي و طالبي بحقوقج و طالبي بحقج في الدراسة الجامعية و لكن ما اقدر اشجعج على التمرد خصوصا انج بروحج و ما في حد قوي واقف يمج اخاف اسبب لج الضرر و يستقوون عليج اهلج اكثر ما لج الا الصبر حاليا ...


سبحان الله على هالتطور الي وصلنا له و لكن ما زالت هناك فئة من النساء و البنات مظلومات و مسلوبة حقوقهن ، يا ريت ينحط قانون ينطبق على حالتج ، قصدي اجبار الاهل في حالة منع البنت من اكمال تعليمها ، لانج انسان و من حقج تتعلمين و محد له سلطان عليج دامج ما سويتي شيء غلط أو اجرامي ...


و يمكن فعلا في قوانين طلعت و احنا ما ندري ، حاولي و ابحثي عن الموضوع ، يمكن تقدرين تشتكين بمكان يوقف بصفج و يخليج تكملين تعليمج و يوقف أهلج عند حدهم رغم اني متأكده ما في ..

والله ان امسات لما سوو يوم المراة الاماراتيه والله تضايجت وايد قلت انا ويني عن هاليوم ! ي ليت لو كان في جهة تدعم ،، الحين الوضع زاد سوء ف بيتنا ،، صار اي شي يصير ع طول يربطونه فيني حتى لو مو انا السبب وغير عن انها الوالده تقارنني ف بنت ربيعتها كل يوم ،، تقولي فلانه تقوم الفير تسوي ريوق لامها وتروح الجامعه وترد تسوي غدا وتنظف البيت كله وتغسل الملابس وماعندهم خدامه ،، واصلا انا م اشوف ان يبالهم خدامه خاصه ان ف بيتهم بس ثلاث انفار الام والبنت والولد والولد بعد ماشاءالله عليه يساعد امه واخته ف البيت غير عنا نحن غير عن طبيعه عيشتنا وام هذي البنت تتصل لامي وتقول بنتي وبنتي وبنتج وبنتج لين م تعبت من هالكلام وعصبت بصراحة وقلت اني بكلم هالحرمة لانها قامت تسوي مشاكل انا م اتدخل ف حياه حد ونا م يخصني ف بيوت حد هم اشويه اشخاص ثلاث اشخاص ف البيت وكل هالفخر لانها اشتغلت البنت ونحن عددنا اكثر الله يحفظنا والشغل اكثر وغير عن ان اخواني اييبون ربعهم البيت ويقلبون الميلس فوق تحت

من صغري انحرمت من اشيا المفروض تكون من حقي ، بس لان الوالده مطلقه ابوي ف كانت تقول ان انا ادرس ف ما ينزلي مصروف ولما خلصت الدراسه قالت انا م ادرس عشان جيه م ينزل المصروف ونا بنفسي اسحب لها والفلوس كله تصرفه ع اهلها

ترا هذا السبب قالو لي مب لازم تكملين دراستج خلاص درستي 12 سنه شتبين بعد ترا مردج المطبخ

مثل ما قالت الاخت ريم لازم تطالبين بحقك فالدراسة وها اقل شي ممكن انك تسوي , حاولي تكلمين امك بالطيب قوليلها خاطري اكون انسانة مفيدة فالمجتمع اتعلم واداوم ومابيكون راسك الا عالي كل ما حد تكلم عني قدامك يا امي , حاولي تحنني قلبهااا حاولي شو المشكلة , المسلم الصحيح مب لي يسوي عباداته بس وينسى دوره بالمجتمع. ربك أمرك باصلاح الارض واعمارها بالعلم والتفكر والبحث ... انتي مش خادمة عند اهلك انتي انسانة لك كيان مستقل وعندك واجبات بالمجتمع لي انتي فيه !!!!!المواطنات صارو وزيرات وسفيرات وولا وحدة فيهن طلعت متفصخة يعني الانجاز ما يخصه بالالتزام والحشمة واكيد اهلهم يخافون عليهم لكن واثقين من تربيتهم واخلاقهم وفتحو قدامهم مجال الحرية لانهم عارفين بناتهن زين..... يمكن كمان انتي شخصيتك ضعيفة قدام اهلك بس صدقيني لو غيرتي اسلوبك وطريقة تعاملك معاهم رح يحترموك ويتغيرو صدقيني بس انتي شايفين اهلك انك مستسلمة للامر الواقع عشان كذا متساهلين بالاممور ومطنشين !!! كل يوم حاولي تفتحين الموضوع لين ما يملون ويقولولك روحي والجامعات للمواطنات ببلاش يعني ما شي اعذارر والمواصلات تتسهل وممكن تداومين بالجامعة بعدين وييجيك مصروف شهري بدل المذلة لي انت فيها !! كل يوم ادعي ربك واستغفري ولو صار شي جديد اختي يا ليت تعلمينا , بالتوفيق

القهر يا اختي ان ع اخر سنه الوالده بنفسها حببتني ف الحياه الجامعيه و ف الشغل ، كانت لما تشوف معلمه تقول ابيج تصيرين نفسها وتشوف دكتوره تقول ابيج تصيرين نفسها وفعلا درست اخر سنه من الخاطر ونجحت وقبلوني ف كذا جامعه والله ، ولما يا وقت امتحان السيبا قبل بكم يوم خالتي قعدت تحاول وياي اشكثررر والله يمكن ساعه كامله قاعده تحاول وياي تقولي ي فلانه ش تبين تدرسين خلاص مو لازم تكملين مردج للمطبخ باجر بيتقدم لج ريال زين بتتزوجين وبتجابلين عيالج وشو بتسوين ف الشهاده بتعلقينه ع اليدار ،، واقولها خالتي انا احب الدراسه انا بقعد ف البيت شو بسوي وقعدت واايد وايد تحاول تقنعني ونا زعلت، وايد والله ،، صح شخصيتي ضعيفه اذا ييت ابي اتحرطم ع طول اصيح وتخنقني العبره )':
ونا ع اساس ان باص بيوديني الكليه وباص اللي بيردني م كنت مفكره اتعب اهلي ابد معاي كنت اقول نفس م كنت اروح المدرسه وارد بروح الكليه وبرد ،، والقهر ان خالتي هذي اللي تفلسفت ساعه كامله هي بنفسها دخلت بنتها الجامعه ومتعبتهم يودونها ويردونها وناويه تدخل الثانيه بعد وامي انتبهت لهالشي وقالت ان خلاص كملي دراستج بس طبعا فات الاوان ،،، رحت الكليه عقب سنين من القعده وامتحنت الايلتس والحمدلله نجحت من المره الاولى لا خذت دورات ولا شي بس علموني كيف طريقه الامتحان والحمدلله نجحت ، بس بعدها قعدوا يطلعون امتحانات اصعب وشي موظفه هناك دوختنا وايد الله يدوخها كانت تطرشنا اماكن تقولنا روحوا هالمكان عشان تمتحن البنت ونروح من الصبح وندور ولما نلقى نسالهم يقولون ايوا هذا هو المكان بس م نقدم امتحانات نحن ولما ردينا كلمناها تقول لا سيرو مكان ثاني تعطينا اسم ثاني وقعدت جذا تدوخنا الظهر اخر شي قالت خلاص روحوا البيت ارتاحوا ،، يعني حبطتني واايد شافت بنت طموحة وتبي تكمل بس لانهم يعطون الاولويه لخريجات السنه شو يبون فيني انا المتعفنه ف البيت ��

انا عكس الخوات طبعا كلامهن ماعليه قصور بس عكسهن في انج تشتكين او تتكلمين لانه واضح انه ماشي فايده من الرمسه وانا متاكده ان نطقتي بيزيد وضعج سوووء اكثر عن ما هو عليه .. هم هلج فالنهايه عليج تصبرين وتصبرين وتصبرين

ادعي عزيزتي قددددد ماتقدرين بالزوج الصالح ماتعرفين يمكن هو يكون جنتج فالدنيا ع صبرج وتحملج لامج واخوانج


الله يعينج ويرزقج لي يعزج ويعرف يقدرج و يسعدج فحياتج يارب

خوفي يختي الريال يعايرني باجر ويقولي انتي بغيتي تكملين ومحد وقف معاج ونا خليتج
امين وياج

أنا نصيحتي لو كان عندك حد من العائلتين أو الجدة ممكن تسندك
بأن تكملي تعليمك , لان الشهادة مهمة واللغة كمان ,,,يا ما ناس كملوا فلوسهم ولقوا علمهم
حاولي تعملي حصالة وتجمعي مال , إقرائي على متطوعات يعلموك ويساعدوك مجاناً وماتنسي اللغة
إبحثى في الإنترنيت على الجمعيات الخيرية وجمعية سيدات الاعمال تواصلي معهم بالايميل
بس لو تكوني نفسك بشهادة ولغة ,تتواصلي مع المجتمع بعدها لو امكن بوظيفة

أولاً الحمد لله انك تعرفي الكتابة والقراءة وعندك اي بد
ثانيا حقوقك ماتتنازلي عنها وانت عمرك هو عمر التعليم والتكوين ومحد يقعد لحد يعني حتحتاجي الشهادة والتعليم لضمان مستقبلك وحفظ كرامتك
ثالثاً عليكي بالإستعانة بمحاميين الدولة أو محاميات وهم يعملوا مجاناً واكيد في اماكن خاصة بالبنات
لكن إنتبهي اوراقك الشخصية كلها مستندات قانونية تحتاجيها
ماتجازفي وتطلعي نهائي من البيت قبل الشهادة وأوراقك القانونية ومبلغ من المال وإستعانة تسندك من جهات حكومية او خيرية

يعني أختصر عليك أولاً الشهادة ,قليل من المال تجمعينه, أوراقك الثبوتية القانونية
إنتي لو عندك شهادة ما ينخاف عليك حتى لو تزوجتي ويارب يكون إبن حلال وعلى خلق ويخاف الله فيك
الشهادة حتقويك لانك حتحصلي عمل بها ويصبح عندك دخل
ياستي اضعف الإيمان في التدريس

عليكي بالقران والدعاء لتجنب شر أمك وأهلك حتى تكملي شهادتك
مافي شي يستاهل تخسري نفسك بالإنتحار إنشاء الله الحلول موجودة ,بس حطي هدف التعليم وأوقفي على رجليك وتشتغلي وإنشاء الله مافي خوف عليك
بس لو ممكن تقوليلي في اي مدينة موجودة حضرتك
لازلت نكرر لك ما تطلعي وتهجي لا لا لا
الشهادة أولا وجمعي قرشين حطي هالهدفين امامك وتحاشي المواجهات مع أفراد العائلة وماتنسي الدعاء في السجود ربي يباعد شر أي مخلوق عنك

انا عندي خوات من الاب بس مابينا تواصل ابد واخواني مب راضين اتواصل مع حد من اخواني او خواتي من الاب،، المهم عندي اخت الله يحفظها لها هيبه وسمعه زينه ف الدوله ورمستني عقب فتره طويله من قعدت ف البيت وهزبتني ليش م كملت الدراسه وتقولي لو تكملين كنتي بتقدرين تصيرين مديره مثلي وراتبج جذا وجذا بس للاسف لو كانت واقفه وياي من البدايه لكان وضعي غير وما كنت اشكي عندكم ههههه

انا يحليلي وين والمحامين والمحاميات وين ،، ودي يكون عندي مشروع او عمل استفيد من وراه واحوش لي مبلغ استفيد منه ف المستقبل لو شي هالشي ونا قاعده ف البيت كان زين بالمره اقضي وقتي ف شي مفيد واستفيد منه

شو سبب رفض اهلج؟
خلج صريحة نسبتج ساعدتج تدخلين اي جامعة؟
لو قلت انج بنتهم الوحيدة عندج خالات وعمات وبنات عّم وغيرهم
سمحيلي ما صدقت سالفة انهم ما يبونج تكملين دراسه عيل جيه من اول واحد خطبج كان ما شاوروج وعرستي
امج تحبج وتبي تقعد معاج يوم تقولج 24 ساعة ماسكة الايباد يعني هي مهتمه فيج غيرج تطلع وتدخل واهلها ما يدرون عنها هذي بحد ذاتها نعمة
الشي الثاني لو تبين تكملين دراسة مب شرط مع اهلج عادي من تعرسين اقنعي زوجج بيخليج بس حطي في بالج انه اهلج ما بيفروج لأي واحد مازين خاصة انه عندج اخوان اولاد بتلفون واحد بيطلعون اخباره وعلومه من تحت الارض
ونصيحة مني اذا تقدم لج احد استخيري مرة ومرتين لا تتوقعين بتعرفيه
كل شي يبين بعد العرس

امي كانت تحب تقعد ويا الجيران ،، والحريم خربوا مخها قالو لها ان شي شباب ينقزون من فوق يدار كليات البنات ويخطفون بنات ، ومن صوب خالتي تقول ان يكفي درست 12 سنه شو بسوي ف الشهاده بعلقها ع اليدار !؟ وان مردي المطبخ ومب لازم اكمل
نسبتي اخر سنه كانت 88 ،، قبلوني ف جامعه الامارات وف الكليات و جامعه حمدان
م علي حبيبتي ،، يمكن الشي غريب عليج ،، بس هذي هي الحقيقه وليش بجذب ونا ابي حد يقوي عزيمتي ويخفف علي وفعلا ع طاري ان يزوجوني لاول شخص يتقدملي فعلا خطبت وخلاص حجزوني له وهم طبعا م سالو عن الريال ابد وامه عاد تمدح فيه شكثر و ع حظي ع وقت القصاص لما يو ،، مر واحد ولد الحلال يدام بيتنا وشاف هالريال صوب بيتنا وكلم اخوي وقال شو يسوي هالريال عندكم قاله جذا وجذا قاله لااا ابوي تحملللوا توافقون هذا ماخذ اختي قبل ونفسية وكان يضربهاا دوم

انا اصلا م يمديني اقعد معاهاا لما اقعد معاها تسب وتلعن ف الناس ونفس الكلام تكرر ونا بصراحة م احب جيه ولو قعدت ابي اسولف او شي تشغلني ع طول تعطيني اي شغله اسويها روحي سوي ها وقومي سوي ها وعقب م اسو اخلص اقعد بروحي ع ايبادي تيي تقولي انتي 24 ساعه ع الايباد

امسات بصراحة انفجرت لان قلنا لو تهزبني ف البيت بس لا لما يتصلن ربيعاتها تحش فيني بنتي وبنتي وانفجرت عقب قلت عيل بيت شكبره والشغل فيه م يخلص منو يشتغل معاج ف البيت اذا انا 24 ساعه ع الايباد ،، جني ف البيت ينظف ويغسل ويعدل ويسقي الزرع ويغسل مواعين ؟! اذا انا 24 ساعه ع الايباد عيل متى ارقد انا متى اصلي متى ااكل متى اروح الحمام ،،

انزين الغاليه وهالريال لين متى اترياه ، ولا انا اطلع ادوره ؟ ونا فاضيه الحين لا وراي عيال ولا ريل شو اسوي عطيني فكره ،، باجر اخاف اقول بكمل وفعلا يخلني اكمل ولا حملت ويبت بيبي وصارله شي لا سمح الله يذلوني لاني كملت الدراسه ولاني مو قاعده ف البيت عشان اجابله

ياما تقدمو لي يختي وقربت املج ونا م اعرف حتى اذا الولد يبغاني ولا وراضي ولا مغصوب علي ولا اعرف عنه ملتزم ف صلواته ويدخن ولا ،، لانهم والله ابد ابد م يسالون عن الرياييل اللي يتقدمون بحجة ان حتى لو سالو الناس يسترون ع بعض وما يقولون الصج ،، ونا اهل الريال يسالون عني قد م يبون وما يلقون شي يرفضوني بسبته ،، حتى اللي يتصلون علينا نبي بنتكم هم يسالون كل شي عني بس وامي ترد بس ما تسالهم شو اسم الولد شو قبيلته كم عمره معرس ولا لا ابددد ماشي ولما يقولون لي شي ناس يبونج وشي ريال وجذا اتكلم اقولهم انزين شو اسمه كم عمره ما نعرف مانعرف ويسحبون علي]

المزيد من آخر المواضيع من نفس القسم:

• تزوجت مريض نفسي
• مشكلة حالتي بعد الأمومة
• مشكلة تقدم لي خاطب وافد
• مشكله بنتي
• زوجي تعبني بالضرب كليوم💔
• أواجه زوجي بكذباته ولا اسكت
• ريلي احبه ،، بس ماعرف شو الي حصل
• مشكلتي التعلق الزائد
• رفض ريلي للحمل
• عااااجل مشكلة واجهتني

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[المراقبة العامة]

الزمي الدعاء والاستغفار.... وحاولي ولاتيأسي
والله يكتب لك ماتتمنين ويعطيك حتى يرضيك

[Noura93]

بعض من الي مريتي فيه مريت فيه بس وضعج اصعب الله يعينج ..
بما انج تقدرين تدخلين النت هاي نعمة الحمدلله ..
وايد ناس ما يعطون عيالهم ايباد او يوفرون لهم النت حتى ..
استغلي هالنقطة بانج تاخذين دروس و حصص اون لاين .. في جامعات عالمية اجنبية توفر تخصصات اونلاين ..
لا تحطين عذر لكل شي .. استغلي كل نقطة ضعف و حوليها نقطة قوة لج ..

الزواج جزء من الحياة لا اكثر و لا اقل .. لا تربطين احلامج بريال أو بزواج .. اخبرج عن تجربة و عن مواقف ناس اعرفهم شخصياً ..

الزواج ممكن يبنيج صح و يوصلج السما و النجوم .. و ممكن فيوم و ليلة يهدم كل احلامج ..

ابني شخصيتج و تعلمي تستغلين الظروف عسب تبنين احلامج .. لو تقرين قصص وايد من صناع النجاح في العالم اغلبهم كانت حياتهم تعيسة و ما وصلوا لنجاحهم بسهولة ..

و اكبر مثال نبينا عليه الصلاة و السلام .. سبوه و شتموه و طردوه .. وجاهد لين قال لنا " اليوم اتممت لكم دينكم "

اقري قصة يوسف عليه السلام .. اقري تفسير السورة و سبب نزولها .. و بتحسين وقتها انج في نعمة .. و بتبدين ان شاء الله تفكرين كيف تعيدين ترتيب حياتج بما يتناسب مع وضعج و حياتج ..

الله يوفقج الغالية و يسهل امورج و يهدي الوالدة ..
اذا احتجتي شي نحن في الخدمة ..

[Nooraabdalaziz]

السلام عليكم اختي بعطيك موقع خاص بالجامعات في الامارات انتي اتصلي فيهم وشوفي وين ممكن تحصلين انتساب وان شاء الله تتيسر امورك بس توكلي على الله
www.degreeinuae.com
بالتوفيق ان شاءلله