أستقيل ولا ؟

[مشكلتي]

السلام ع ليكم ورحمة الله

انا حاليا موظفة و حامل بشهوري الأخيرة ، الحمدلله أموري تمام و لا عندي مشاكل مع الناس
لكن مشكلتي بدت من هالفترة ، أبا أستقيل و أفكر دوم بيلست البيت و العيال
ماعندي خدامة و لا أفكر أيب لآن سوالفهم و بلاويهم كثيرة و ريلي بعد معارض وماحاب موضوع خدامة في البيت من السوالف الي يسمعها

أنا أداوم شفتات و عيالي أخليهم عند أهل ريلي يوم أكون بالدوام ، أحس يتحرطمون من وراي يوم أي أخذ عيالي من عندهم مع إن يبينون لي شي ثاني ، بس بعد أحس يطفرون من طفاسة و شطانة عيالي

وأمي بعيدة عني ماقدلا أخلي الصغارية عندها ، و الحضانات ماتستقبل اليهال لين الساعة 8
من غيري ما قادرة أسوي كنترول على العيال لآن مستوين دلوعين و طفسين بسبب دلع يدتهم و عماتهم
مع ان أحس بداخلي إن هم طفرانين من عيالي و دوم أشوف عيالي ثيابهم وسخة من الكاكاو او العصاير ومافي إهتمام دوم من هالناحية و كل شي عادي عندهم

خلال هالفترة فكرت بالإستقالة و إني أربي عيالي و أهتم فيهم ، و الحمدلله عندي مصدر دخل بسيط من بزنس خاص فيني ، و كلمت ريلي قالي براحتج إذا تتمين على دوامج او لا لان بيتكفل بالمصاريف ، لآن حاليا أنا أساعده بالمصروف .


أنا صليت إستخارة و ما عرفت شو أسوي ؟ هل أطلع او لآ ، مع ان أدري إن الأغلب بيقولون الوظيفة أمان ، لكن أنا أشوف إن عيالي بيتبهدلون أكثر عالفترة الياية ، ف ماعرف شو أسوي .. شورو علي دخيلكم ..!!!!

المزيد من آخر المواضيع من نفس القسم:

• كرهت حياتي
• مطلقة و اريد اعيش لحالي
• مشكلتي الفراغ
• مضغوطه وفقدت الامل
• تزوجت مريض نفسي
• مشكلة حالتي بعد الأمومة
• مشكلة تقدم لي خاطب وافد
• مشكله بنتي
• زوجي تعبني بالضرب كليوم💔
• أواجه زوجي بكذباته ولا اسكت

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[المراقبة العامة]

الكلمة الطيبة صـــــــــــــدقة

[غزالة AD]

استقيلي وقعدي مع عيالج.
عيالج بيكونون تحت عينج ومطمنه عليهم.
انا في اغلب ردودي ما اشجع الحرمة على الاستقالة.
ولكن يوم قريت مشكلتج حطيت عمري مكانج وخصوصا انج بدون خدامة والعيال تحطينهم عند اهل ريلج ودوامج شفتات لين 8 فليل والوضع صعب محد الحين يجابل عيال حد. يوم عندج بشكارة الوضع غير. حتى لو كنتي مخلية اليهال عند اهل ريلج على الاقل خدامتهم وياهم بداريهم.

اذا ما تبين بشكارة عيل فنشي من شغلج وجابلي الياهل احسن. وبييج بيبي قريب بعد بتحطينه عند اهل ريلج؟ والله حرام هاليهال جي متلتهين.

استقيلي حبيبتي وجابلي العيال احسن. الله يحفظهم لج يارب.

[تفاحتي]

ربي عيالج

الفلوس ماتيب الادب والاخلاق والدين للعيال

الام اللي تربي فديتج
دام تحبين عيالج يصيرون احسن الناس اقعدي وجابليهم

انا عندي شهاده ومتعلمه وراتب وظيفتي 49 الف خليتهم ماباهم
ابا عيالي حوليني


خلي زوجج يتحمل لان دوره
وانتي تعرفين وين مكانج الاصلي بين عيالج

الله يحفظهم

[غلآ نفسي]

عيالج اهم

[وجدان الفجر]

عيالج هم الأساس وتربيتهم والاهتمام بهم وظيفتج الحقيقية.الله يقدم لج الخير

[Nooraabdalaziz]

وعليكم السلام ورحمته تعالى وبركاته
ربنا يتمم لك على خير وتربي بالسلامه اختي انصحك بعيالك هم الاهم استقيلي وخليك معهم احسن تربيك ووجودك معهم في هذي الفتره هو الاهم والحمد لله انتي ما محتاجه للفلوس ربي عيالك وعلميهم هم مستقبلك والله ما تسوى الفلوس شي ولا ليها فيمه اذا طلعو عيالك جاهلين الام هي الاساس ما في حد يقدر يسد مكانها خليهم لحدي ما يكبرو شوي وممكن ترجعين لشغلك بس الحين ركزي معهم ابني اساسهم عبشي معهم طفولتهم هم محتاجين لوجودك اكتر من اي شي تاني ربنا يحفظهم ويبارك لك فيهم

[ام نهييان]

لا تستقيلين بدون اقتناع لانج بتدخلين ف نفسيه كبيره وكله بيرد فالعيال صعب ترا تكونين متعوده ع دخل ويقل

بعدين عزيزتي الخادمه ضروووووووريه مش لليهال للبيت ولمساعدتج فيه يعني ابدا لاتخلينها تمس اليهال بس تنظف وتغسل وتكوي عامليها بالحسنا ما بتسويبكم شي انشالله

في الزين منهم ترا مثل ما في الشين ومافي حد يتحمل عيال حد حتى لو هلج بعد لازم عيالج معاهم الخدامه اقل شي تنظف وصاختهم فبيت الناس صح ولا غلط


ردي استخيري وشاوري عمرج

[حرم الحميري]

لا تستقيلين وتقصين ع عمرج تراج تقولين تساعدين ريلج لا تظغطينة عيالج ترومين تربينهم وانتي فشغلج انتي مب عارفه ترتبين امورج انا عندي خدامة حاطتلها كيمرا مجابلتنها ومجابلة عيالي بس فتره اني فالدوام من ارد البيت اشل عيالي عنها واخليها تكمل شغل البيت لا وديتهم بيت امي ولا بيت هل ريلي كبار فالسن محد يتحمل روحهم يبالهم مجابل ومحد بيقول لا بس الواحد يحس ع الاقل هاتي مربيه وهديها عندهم بيت هل ريلج عشان ما تقولين يردون طفسين ثيابهم وصخه ولا مب ماكلين وغيره وشي حضانات لو تبين تفتح قبل الثمان دوري وبتحصلين بس بعد مصرف اذا عندج اكثر من ياهل فكري عدل قعدت البيت مب حل عذر بجابل عيالي بربيهم احسن من دوام مش مقنع دام مب موفره شي لمجابل عيالج

[ام احلى بنات]

زوجة و ام ، حامل و عندها عيال و بدون بشكارة؟؟؟ ما شاء الله تبارك الرحمن عليج
المرأة الحديدية ، ياريت لو نكون ربعج،،،

اختي ، برأي لا تستعلين و تستقيلين، اذا سويت شي بعدين لا قدر الله ندمتي بيكون وايد صعب انج تحصلين دوام ثاني بنفس المميزات اللي عندج الحين.

الافضل اتريثي ، استخيري و استشيري بس لااااااااااااااازم بشكارة

يعني انا استغرب ليش كل ها الخوف من البشكارة ، اذا انت بتعاملينها معاملة زينه و بتخلينها ويا الياهال بروحها و بتحطين كاميرات مراقبة في البيت بيكون سهل عليج ضبط تصرفاتها.

البشكارة بتشل عنج وايد امور من تنظيف البيت و ترتيبه كوي الملابس و غسيلها و ترتيبها و ترتيب الياهال و متابعتهم في بعض امور النظافة هذا غير انها بتساعدج في التحضير للاكل "مش الطبخ" اللي هو اكثر ما يهلك و ياخذ وقت، البشكارة سلاح ذو حدين اذا احسنا ادارتها بتفيدنا وايد،،،

و بخصوص شغلج ، حاولي تقدمين اجازة طويلة بعد الولادة ، حتى لو بدون راتب بس لا تستعجلين بالاستقالة

اتوقع ممكن توصل لين 6 اشهر لو انت في الحكومة و لو في الخاص شوفي اطول فترة ممكن تاخذينها ، منها تريحين و تعيدين ترتيب اوراقج.