المشكلة فيني ولا في حياتي

[مشكلتي]

السلام عليكم سيداتي اتمنى كل من تقرا مشكلتي تدعيلي بالفرج القريب
والله ما اعرف من وين ابتدي بس بعطيكم شوي عن شخصيتي انا خجولة جدا وانطوائية شوي يعني ما احب الجمعات والاعراس والمناسابات
ومشكلتي اني ساكنة مع ام زوجي لانها كبيرة وزوجي ولدها الصغير فما يقدر يطلع ويخليها بروحها
وبصراحة ام زوجي حبابة وطيوبة وما بينا اي مشاكل
بس المشكلة فيني اني مو قادرة اتعايش مع هالوضع احنا ساكنين بشقة من غرفتين وصالة وزوجي عنده 5 اخوان كلهم متزوجين وببيوتهم واخته باوروبا متزوجة, كانو يتجمعون عندنا كل جمعة بعدين صار كل مرة يجي واحد منهم يعني بالاسبوع مرتين او ثلاث ضيوف واخته تجي مرتين بالسنة تقعد عندنا شهر اهي وعيالها وصرت اتعب من كثرت جيتهم ادري انهم اولادها ومن حقهم يزورونها بس انا وش دخلي احس نفسي مثل الخدامة كله اطبخ واجابلهم مليت والله وحتي اخته تجي تقعد عندنا شهر بطوله روتيني يخترب وضيوف داشين وطالعين طول هالشهر ومصروف البيت كله على زوجي
يعني والله حاسة نفسي اني انا الضيفة بهالبيت ما اقدر ىخذ راحتي لا بلبسي ولا مع زوجي ولا بنومي ولا بشي عادي اكون نايمة حتي اسمع احد يتكلم اقوم الاقي احد منهم جاي وتراهم يجون بأي وقت ومرات يججون بوقت الغذاء واكون مسوية كمية قليلة على قدنا واقوم اطبخ من جديد والله احس حوسة بهالبيت ما في نظام ابد
على عكس بيتنا وانا اصلا حتى امي اللي هي امي وكنت استحي منها ما كنت اسشور شعري قدامها واذا حبيت اسوي تنظيف للبشرة واحط ماسكات وكذا انطرها لين تطلع من البيت واسوي اللي ابيه براحتي
والحين ام زوجي بيتوتية ما تطلع ابد من البيت والضيوف ما يوقفون وما تدري متي يدش عليك احد فمو ماخذة راحتي ابد
وهالشي صار يأثر على نفسيتي وصرت اتنرفز اذا جاء احد من اخوانه او اذا كان خاطري بشي وما اقدر اسويه مثلا انا احب المنكير جدا وما اقدر احط بسبب الصلاة ولما تجيني الدورة يكون بخاطري احط بس ما اقدر استحي تشوفه ام زوجي وتفهم انه فيني الدورة احس حياتي ما فيها خصوصية كل شي يصير بالبيت الكل يعرف ابسط شي نسويه كلهم يعرفون كمثال قبل رمضان سويت تجليد للمطبخ ولما جاء اخوه شافه وعجبه وخبر بنت خالته وجات وشافته وسألتني بكم و من وين وكذا بعدها اتصلت زوجة اخوه الثاني بعد تستفسر وبعدين خاله بعد لما جاء بالعيد دش للمطبخ مباشرة يقول ابي اشوف التجليد يعني كل العائلة تعرف باي شي يصير بالبيبت وهذا من ابسط شي لأكبر شي
المهم اني صرت نفسية واتنرفز على ابسط شي وطبعا زوجي هو الضحية كل زعلي عليه وهو ماله دخل وما بيده شي وصارت تصير مشاكل بيننا بسبة هالموضوع صارلي 3 سنين متزوجة وعندي بنت ولا قدرت اتأقلم مع الوضع هذا ولا اتعودت علي هالعيشة
امانة عليكم ادعولي الله يفرجها عليا الدعاء بظهر الغيب مستجاب ان شاء الله

المزيد من آخر المواضيع من نفس القسم:

• كرهت حياتي
• مطلقة و اريد اعيش لحالي
• مشكلتي الفراغ
• مضغوطه وفقدت الامل
• تزوجت مريض نفسي
• مشكلة حالتي بعد الأمومة
• مشكلة تقدم لي خاطب وافد
• مشكله بنتي
• زوجي تعبني بالضرب كليوم💔
• أواجه زوجي بكذباته ولا اسكت

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[المراقبة العامة]

الله يفرج همك وهم الجميع
يفيدونك الاخوات ان شاء الله

[ريم العسووله]

مشكلتج الاساسية الخجل ، هالخجل ما راح يفيدج بشيء ، اول شيء انتي ملزومة بزوجج فقط مب ملزومة تطبخين لحد ثاني ، انتي الي حطيتي نفسج في هالموقف و خليتهم يعتبرونج خدامه ، قولي حق ريلج انا زوجتك مب خدامة و مب ملزومة بخواتك و اخوانك ، امك على عيني و راسي و البقية مالي خص فيهم ، ترى هالشيء من حقج و لا تخلين الخجل حاجز ... ما راح يفيدج الخجل راح يكسر ظهرج والله


النقطة الثانية بخصوص الماسكات و الاهتمام سويهم في حجرتج و اقفلي الباب على نفسج ، ماظنتي حد بيدخل لج لين الحجرة قولي لهم حاطة مساكات بويهي و ماحب حد يشوفني !!، حتى بخصوص المنكير و الزينة تزيني لنفسج ، شكلج وحدة عايشة على كلام الناس و كل همج كلام الناس و ظنونهم ، و اذا ام زوجج شكت ان فيج الدورة خير يا طير !!؟؟ هي مب حرمة نفسج و كانت تيي لها الدورة ...

خجلج مبالغ فيه و سلبي ، في حد يستحي يسوي استشوار ؟؟ راجعي نفسج خجلج مب طبيعي حاولي تتغلبين عليه ...

[Nooraabdalaziz]

السلام عليكم اختي الله يفرج همك ويرزفك السعاده مشكلتك فعلآ مشكله لانه صرنا في زمن التاس ما تقدر فيه احد كل ما الواحد كان طيب يستغلون طيبته المفروض اخوانه يكون عندهم دم و احساس مش عشان انتي انساته طيبه خلاص ياخدون راحتهم
متل ما قالت لك الاخت المشرفه انتي مسوؤله من زوجك وامه هي امك اما الباقيين ما بقولك كوني متلهم لكن اعملي ما بوسعك لا يكلف الله نفسآ الا وسعها.
اللي تقدري تسويه لهم سويه لكن مش على حساب نفسك و زوجك واوصيك اختي في الله بالصبر ثم الصبر فهو مفتاح الفرج و ربنا عالم بحالك ان شاء الله يعوضك وزوجك بابناء بارين بكم متل ما زوجك بار بامه. ان شاء الله ربنا يعوضك خير ويجزيك كل الخير على عملك
اتمنى ان يفرج الله همك ويرزقك السعاده في الدارين

[mouzan7mod]

عزيزتي لازم تغيرين من نفسج
مايستوي تستحين من كل شي
اهل زوجج لازم يقدرون ان انتوا عائلة ولكم خصوصيتكم
عزيزتي كلمي زوجج أن يفهم أمه أن البيت له حرمته مايصير كل شي في بيتكم على لسان العائلة كلها
بخصوص إهتمامج في نفسج خليه في غرفتج (ماسكات / لبس/ إستشوار...الخ)
بخصوص ان تنجبرين تطبخين كمية أكبر للضيوف بالعكس الضيوف حطي لهم سويتات و عصاير مب عيش و ذبايح و مشاوي .. أكرمي ضيوفك بالذي تقدرين عليه ، بخصوص أخت زوجج إنها تزوركم شهر كااااامل عطيها نبذه قبل لا إتي إنكم بتسافرون أو بتروحون مكان ..الخ لآن مومعقولة شهر كامل تخرب عليج