تغيرت وايد عشانه .. شو الفايده ؟؟؟

[مشكلتي]

السلام عليكم ورحمة الله وبركاته


انا معرسه صارلي 4 سنين و نص و الحمدلله حياتي انا وزوجي ويا بعض زينه وطيبه و متفاهمين ولله الحمد وكلما ياها حياتنا تكون افضل و نفهم بعض اكثر

لكن عندي مشكله وياه حاولت طول هالسنين اني اغيرها فيه بس ماقدرت



انا قبل ما اتزوج كنت وايد اجتماعيه ووايد احب اطلب و ازور اهلي و اطلع وياهم و نسافر و نسير مطاعم و سينما وسوق .. وكنت اعرف كل شي وكل حد من اهلي يوم يبا يسير مكان يسألني انا .. كانت حياتي كلها ويا اهلي و اعترف كانت في اشيا غلط مثلا .. وايد احب آكل فالمطاعم .. وايد اسير السينما عادي مرتين فالاسبوع .. وايد احب السوق بس مب لدرجة الجنون يعني ..


من ملجنا .. وريلي ابدا ما عارض هالأشيا .. كانت يسير ويرد وياييه وحاب انه يستكشف الأماكن .. لانه كان انسان مايحب بطلع مووووول ولا يحب يسير سوق او سينما او مطاعم الا فالسنه احسنه ..

عرسنا و مازلنا نطلع وجي بس مب واااااااايد يعني خففنا شوي يعني تقريبا مره فالاسبوع نطلع و ان كثرنا مرتين و احيانا كان بروحه يقول لي شرايج نطلع .. يعني ماعارض و عودني على هالشي و انا عيبني هالشي

وعودني انه وين ابا اسير هو بيوديني .. بس مايباني اسير و يا اي حد ثاني .. حتى اهلي ما قمت اجوفهم وايد ولا اطلع وياهم كله وياه هو ..

بعد فتره قمت اقلل من الطلعات لانه قمت اشوفه يتضايج احيانا من الطلعات يعني شوي بدا يتغير من هالناحيه .. و انا قلت عادي يعني مابضغط عليه عشان طلعه و بدينا نخفف واااايد طلعاتنا

انا وايد غيرت في نفسي خلال هالأربع سنين عشان خاطره .. وبدون مايطلب مني هالشي ..

بس اللي مضايجني انه للحين .. يجوفني انا اللي توه ماخذنها .. يعني مثلا ..

وايد يقول لي

انتي كل يوم تحبين تسيرين المطاعم ( علماً اخر مره سرنا مطعم قبل 3 شهور )
انتي ماتخلين شي الا وتبين تشترينه من السوق ( علماً اخر مره اشتريت شي قبل شهرين و كان لبس واحد للعيد )
انتي وايد هيزه وماتتحركين ( علما انه من خذني نزلت من وزني 24 كيلو و كل يوووووم اسير النادي )
انتي مافيج صبر ( علماً اني هالشي اللي اجوفه فعلا تغيرت فيه 180 درجه وقمت كله اسكت و اتحمل )

و هالأشياء ما يقولها وهو معصب .. لا .. احياناً حتى يوم نسولف ويا بعض عادي .. وهالشي وايد يكسرني والله .. مع انه جدام اهله وايد يمدحني ويقول لهم ماشي شراتها ..


وكم مره كلمته بهدوء و قلتله يضايجني انك ماتشوف فيني التغيير .. وعادي مايقول اي شي


تعبت صدق .. يالسه اقول ليش انا تغيرت ؟؟ ليش ابتعدت عن الناس ؟؟ ليش ماقمت اسير عند اهلي ؟؟ ليش ابتعدت عن ربيعاتي ؟؟ ليش سويت هذا كله واخر شي مايطلع في عينه شي ؟؟؟

المزيد من آخر المواضيع من نفس القسم:

• كرهت حياتي
• مطلقة و اريد اعيش لحالي
• مشكلتي الفراغ
• مضغوطه وفقدت الامل
• تزوجت مريض نفسي
• مشكلة حالتي بعد الأمومة
• مشكلة تقدم لي خاطب وافد
• مشكله بنتي
• زوجي تعبني بالضرب كليوم💔
• أواجه زوجي بكذباته ولا اسكت

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[المراقبة العامة]

الكلمة الطيبة صـــــــــــدقة

[تفاحتي]

حبي


اللي سويتيه شي طبيعي فديتج لان اللي تعرس طبيعي هالاشياء تخفف عنها جدا
لان الزواج مسؤليه


ثانيا هو ماكان يعرف تفاصيل حياتج بس انتي خبرتيه بكل شي وماكان له داعي حتى لو كانت الاشيا عاديه

ف النهايه الرجل اذا حط فكره صعب يغيرها هم جي مخلوقين
انا معرسه ومكمله سبع سنين وف اشيا زووجي يتم يعيد علي نفس الموال من اول الدواج


ولا تهزني ولا افكر اني ارجع استايل حياتي القديمه لاني مرتاحه معااه


وهذي هفات الرجال الللي ماتخلص

[mouzan7mod]

الي سويتيه طبيعي و هذا الي يباه الريال العاقل و الحرمة العاقل
وماشاءالله عليج انتي كاملة و الكامل الله
بس في غلطة إقترفتيها بحق نفسج ، أهلج ليش ماتزورينهم ؟
لاتخلين حياتج كلها في محور زوجج و العيال و البيت
يفوت عمرج و مابتلقين عقب لنفسج وقت بتحسين عمرج كبرتي 10 سنين جدام
حبيبتي لا تهملين نفسج و علاقاتج الإجتماعيه علشان رضا زوجج ، أنا ما أقول إعصيه أو إكسري بكلامه لا و ألف لا بالعكس كوني إجتماعية كوني مع العالم و التطور بحدود رضا زوجج
و الله يوفق بينكم و ييسر أموركم

[Nooraabdalaziz]

السلام عليكم ورحمته تعالى وبركاته
يا اختي طالما انتو متفاهمين ولله الحمد لا تشغلي نفسك بهالكلام .صدقيني بكون مجرد كلام ما يطلع من قلبه بس هم كده يحبون المعانده ولو اصلآ يقصد كان قاله قدام اهلك لكن هو الحمد لله يمدحك قدام اهلك .اعتبريه كلام سخيف وترفعي عنه .
اتمنى لك دوام السعاده

[khaleejiya]

كل التغييرات اللي تقولين عنها ايجابيه الا شي واحد
ليش ابتعدتي عن اهلج؟؟
انا جدا استغرب من البنات من تعرس خلاص ماتعرف اهلها ولا تهتم فيهم بحجة انها مشغوله بحياتها
الله امرنا بصلة الارحام فما بالكم بالوالدين!!

[وجدان الفجر]

كل التغييرات اللي تقولين عنها ايجابيه الا شي واحد
ليش ابتعدتي عن اهلج؟؟
انا جدا استغرب من البنات من تعرس خلاص ماتعرف اهلها ولا تهتم فيهم بحجة انها مشغوله بحياتها
الله امرنا بصلة الارحام فما بالكم بالوالدين!!

مع الأخت .

[ماحد شراتي]

ليش تغيرين حياتج عشانه ؟ اقصد الايجابيه من زياره الاهل؟ تواصلج مع ربيعاتج ؟ لو هو ما غير شي واحد
مع الوقت بتمين وحيده لا ربيعات ولا حتى اهل .. غلط يا اختي ردي علاقتج مع اهلج وربيعاتج

وطنشي كلامه لا يكسرج ولاشي دام انه يمدحج جدام اهله واموركم مستقره لا تخلين هالشي يعكر جو حياتكم