ما أحس إني عروس

[مشكلتي]

السلام عليكم ورحمة الله طبعن انا متزوجة من شهر وشوي تقريبا فبداية زواجي كنت تعبانه وايد ومريضة ورحت تنومت بالمستشفى والحمدلله ع كل حال يعني ما مداني اتهنى بسبة مرضي والحمدلله اللهم لا اعتراض وطلعت من المستشفى وكان ودي انا وريلي نغير جو نطلع ونبات برع بس راعيته وكنت استحي أقله حتى إني ما أخذ منه فلوس المهم تميت طول هالفترة فالبيت بس نطلع انا وياه نزور أهله وأخذ أغراض للبيت وجي وبعدها رجع لدوامه وقالي فالإجازة بنسافر وقلت له ما مشكله ع راحتك وراعيت كل ظروفه هو ينزل فالويكئند بس للأسف طول هالفترة ما خصص لي يوم حقي من قبل أذان العشا هو طالع دايمن على هالحال وما يرجع الا يوم يبا ينام ويوم اترياه يرجع ما بسويلي سالفه يقولي تعبان وابا أرقد وأشل بخاطري بس أتحمل ومرة بات برع البيت وما قلت شي وبنفس اليوم كلمته قلت له ابا اقعد معاك أسولف وياك بليل وفتحته قلبي ما اشوفه اهتم وايد لكلامي اونه ع ساس انه طول الوقت معاي وحتى العلاقة الشرعية من بينا وايد خفت يقولي انه يتحسس وجي وسار يتعالج وصار له فترة على هالحال وإذا صارت العلاقة بعدها يقولي كله منج الي يستويلي 💔 وإذا اقترب منه يقولي إنتي بس تبي هالشي والله كلامه يحرجني وايد كفاية علي الي أتحمله احس مرااات هو ما يباني لانه قبل زواجنا زل بلسانه وما كمل كلامه بس حسّيت انه مجبور علي قالي انا اذا ما خذتج وفجأة سكت عرفت انه كان بقول منو بياخذج لان انا كنت مخطوبة كذا مرة وما صار نصيب لي وأم ريلي كانت تباني له وكانت تقوله ما تفشلني قدام الناس ومن فترة هو زعلانه مني وأحاول أراضيه ما منه فايدة بغيت اقترب منه يقولي انا مستعيل وخل عنج هالسوالف يعني تخيلو والله أني ما احس أني عروس تزوجت بس عشان انظف واغسل الملابس واطبخ كني خدامه بس الحمدلله ع كل حال حبيت افتح قلبي لكم واشوف ردودكم

المزيد من آخر المواضيع من نفس القسم:

• تزوجت مريض نفسي
• مشكلة حالتي بعد الأمومة
• مشكلة تقدم لي خاطب وافد
• مشكله بنتي
• زوجي تعبني بالضرب كليوم💔
• أواجه زوجي بكذباته ولا اسكت
• ريلي احبه ،، بس ماعرف شو الي حصل
• مشكلتي التعلق الزائد
• رفض ريلي للحمل
• عااااجل مشكلة واجهتني

[المراقبة العامة]

يفيدونك الأخوات إن شاء الله

[غلآ نفسي]

شو مرضج بالضبط ؟

مادري احسه مب طبيعي

وكيف يعني يتحسس؟

[ام نهييان]

يعني يمكن صارتله فطريات بعد العلاقه هذا لي فهمته

حبيبتي ردي كلميه مره ومرتين وثلاث انا مابا اظلم ريلج بس تصرفاته مش طبيعيه


ونصيحه حاولي هالفتره ماتحملين لين ما يستقر وضعكم


الله يسخرلج قلبه يا رب ويهديه

[غلآ نفسي]

لا اقصد هل مرضها يخص العلاقه الجنسيه ؟

لان هو قال تحسس

هو طبيعي هالشي مرات الحرمه تحسس ومرات الريال مب مبرر له هالشي

[وجدان الفجر]

أختي مبارك على العرس أولا والله يسعدكم .
أقعدي مع زوجج وشوفي شو سبب نفوره ,مشكلة التحسس اللي بتصير له بعد العلاقة ممكن تصير عادي ,يمكن التهابات سواء بكتريا او فيروسات او فطريات , واستخدام الكريمات وغيرها في العلاقة ممكن يسبب حساسية , كذلك لو كان بيستخدم واقي ممكن يصير عنده حساسية تلامسية من مادة الواقي . وفيه حساسية تصير للرجل بسبب افرازات المرأة والعكس صحيح ويعني المرأة ممكن يصير لها ايضا.
المهم هذها لاسباب كلها لها حل وبس تعرفوا السبب وممكن يزور طبيب .
والعلاقة الزوجية ممكن تقل بعد شهر العسل , يعني لا تقارني .
قعدي معاه وخليه هو اللي يتكلم وفهمي منه وين المشكلة ز
أتمنى لك حياة زوجية سعيدة .

[الموهبة]

مع الايام يتعود
فعلا العمل متعب ويحتاج للراحه ونوم كافي واهتمى فيه واصبري مع الايام هو بتغير ان شاء الله واهتمى بنفسك ايضا العشره تولد الحب مع الايام لكن مع الاهتمام فيه الحين لاتفكري في اشياء سلبيه ابد

[ماحد شراتي]

انتي ما وضحتي من شو يتحسس؟ اذا هو يتحسس فلازم انتي بعد تتحسسين لو عندج فطريات او غيره ؟
لا تزعلين من كلامي بس احسه مب طبيعي واذا انتي مافيج شي بس هو اللي يتحسس معناته يتعلث عسب ما يتقرب منج

ربي يسخره لج

[Ward-uae]

ليش تنومتي؟
الأسباب اللي حطيتيها مب منطقية هو فيه شي خلاه يخاف ؟؟
وحده توها عروس تمرض وتتنوم ليش ؟ انتي حامل؟ لانه بعض العرايس لو تعبت اول اسابيع عرسها تكون حامل واتييها حراره وتتعب وايد وهذا الشي يخليه بالعكس يفرح ويطير
رمسته مب منطقية وانزين لو انخطبتي مرتين اشفيها
اهم شي ما تكونين رمستيهم وانتي بنفسج قلتيله هذاك كان جيه وجيه والثاني كان جيه الريال يبقى ريال ما ينسى
فيه شي ناقص بسالفتج
وليش يقول من بياخذج في شي قاصرنج حتى يقول جيه
ردي عليه قوليله الكل يتمناني وصرت لك ردي عليه ترسي عينه لا تذمين نفسج او تشكين
وعن انج خدامة حبيبتي نظمي وقتج انتو اثنين شغل البيت بيخلص بسرعه
واتصلي له قوليله اخاف انام بروحي او تقعدين تحاتيه خليه ما يتأخر عليج

[تفاحتي]

اكتبي التفاصيل عشان نعرف نخبرج

[Bent_uae_dxb]

هيه صح شوهو نوع مرضج بالضبط؟ يمكن يكون هو السبب

[بسمه دبي]

اصلا بدون تفاصيل

احس هو يتهرب وتعب البنت ف البدايه احس انه شي ثاني مايخصه ف الي قاله انه يتحسس وجي

هذا شكله متزوج غصب او انه الي ف بالي وماقدر اقوله والسموحه


موفقه

[الشيخه .]

الله يعينج . ياليت لو اقدر افيدج لكن انا صغيره للحين ماعرست فما اعرف شو اقول غير الله يبعد عنج كل هم وان شاءالله بيرد يحبج وبيحس بقيمتج .

[mouzan7mod]

ادعي الله يغير من طبعه للأفضل
حاولي تتجنبين الحمل لين يتعدل زوجج
اذا بخصوص العلاقة خليه يتعالج اذا فيه حساسية
عادي عزيزتي اغلب الأزواج جذه

[حبر المساء]

الله يفرج همج ويسعدج يا رب ويجعلها فترة وتعدي
كلن يرسم للحياة الزوجية سيناريو رومنسي الى ابعد الحدود
والحياة الزوجية بدايتها لا يكون فيها دايما توافق وانسجام
ويأتي الانسجام مع الايام والعكس صحيح
في بعضهم أول الايام يرفعها فوووق وما تلحق تصدق عمرها ينجلب عليها الى الحلقة الخيرة
الحذر واجب والصبر والتريث ايضا واجب
اصبري عليه وشوفي الاسباب اللي خلته يكون جذه يمكن مرضج اللي ما ذكرتي نوعه ما كان عنده علم به وتفاجأ فيه
وممكن هناك مانع يجعله يكرة المعاشرة الزوجية
واسمحي لي على هذا التصريح الصريح انت تبحثين عن الحل ونحن نحاول نرشدج للي نأمل أن يكون نصح صائب
عند رائكة كريهة سواء في الفم أو تحت "
وفي امور انت لازم تعرفينها منه كلميه بهدوء
قوليله انا انسانة متفهمة واتقبل الكلام
كلمني انت ليش جذه هل في شي انت مش حابنه فيه افتحي معاه حواء صريح يكون طريق واضح امامكم انتو الاثنين
وقد يكون شخص مثل ما قلتي في حياته شخص آخر واجبر على الزواج
وللاسف شباب هذه الايام تظهر رجولته عقب الزواج قبل الزواج ما يروم يقول لهله لا
شوفي الاسباب ولا تضيجين على عمرج بالهم من البداية وتدخلين في دوامه انت في غنى عنها
انت اصبري وابحثي عن الاسباب في نفسك دون ان تأذيها
والله يسعدج ويهنيج يا رب ويفرجها عليج