ريلي خاين وكذاب

[مشكلتي]

السلام عليكم شخباركم

حبيت افضفض لكم والله احس اني بموت مب رايمه اتحمل كل هذا وماعندي حد اشكيله ولا احب اقول سري لـ حد وقلبي مكسور والله انه مكسور

انا ملجت من شهرين وبعدنا ماحددنا العرس ..

ف فتره الخطوبه كنت اراقب خطيبي ع الانستقرام واشوف اللايكات من بنات طبعاَ استغرب يعني هو مب ضايف ولا بنت فالانستقرام لكن سبحان الله كل اللايكات من بنات .. حلف لي وقالي مايعرف ولاوحده فيهن وانهن مجرد لايكات لا اكثر .. تقبلت الوضع وسكت ..

يوم ملجنا قمت انا اسوي لايكات لـ اي صوره ينزلها وكان ينازعني ليش تسوين لي لايكات مابا الشباب اللي عندي يضيفونج يقصد ربعه ... والا عقبها ب ساعات وحده اطرشلي رساله ع الانستقرام .. فيها صوره ريلي , تقولي اتعرفين هذا الريال ؟؟ قلت لها هذا ريلي انتي منو!

قالت لي انه يحبها من سنين وبينهم علاقه وامس كان عندها ومن هالكلام .. انصدمت ويتني نفضه ماعرفت شو اسوي ... ف سيده اتصلت به .. قلت له في وحده جي جي تقول هاي منو ومن وين تعرفها .. حلف لي انه مايعرفها وانه كلامها جذب وامس كان فالدوام مناوب وانها جذابه تبا اتخرب من بينا ...

عقب يوم طرشت لي البنت مسج .. قالت لي ع فكره انا ربيع ( ريلج ) بس حبيت اسوي فيكم مقلب ...


وانا على نياتي طنشت وقلت هذا اكيد اربيعه صدق ويبا يسوي مقلب ف ريلي

المهم .. مرت شهور ع هالسالفه ..

وتيني اضافه من واحد يقرب له .. اولا انا ماكنت اعرف انه ريال لانه حاط صوره ورده واسمه كان عباره عن ارقام وحرف واحد .. قبلت الاضافه .. وقالي كل بلاويه, وشو يسوي ريلي .. وكيف كاذب عليه بكل شي...
ويرمس هذي وذيج ويقردن هاي وذيج , ويكلم كل الفئات .. بنات عرب وبنات ديسكوات ..

وقالي عندي اثباتات .. وطرشلي صور محادثاته ويا البنات .. وطرشلي اشياء غير .. انا بس اطالع واصيح .. قالي انا اعرفج انتي بنت عرب واصيله ومن الحين اقولج تراه مايستاهلج وانا حبيت ابلغج ولاتخربين بيني وبينه لان مهما كان هو منا وفينا ... وسيده حذف كل الصوور والكلام اللي طرشه ..

لا وبعد عنده 4 ارقام ماعرف عنهم .. حق البنات والترقيم .. والله ي بنات كان يحلف لي ويحلف براس امه انه مايرمس غيري واني كل شي ف حياته .. واخر شي يكلم مليون غيري ويغازلهن ويطلع وياهن ويحجز لهن ف ارقى واغلى الفنادق ..

انا الحين حياتي مسوده... ما اقدر اخبره منو قايل لي الكلام لانه بيجلب السالفه عليه ويقول لي انا اللي رمست فلان وانا اللي ادور من وراه ... هو حاليا خارج الدوله , كلمته ع الفون وانا غبيه مازخيت عمري قلت له كمل لعبانك ويا البنات انا خلاص عرفت كل شي , وهذي تربيه اهلك بينت فيك .. ماشاء الله عليك . قالي انا متربي غصبا عنج . وانا جذاب وخاين , وبعدين؟؟ لوين تبين توصلين ؟؟
قلت له مافي بينا كلام خلاص .. قالي هذا لي تبين توصلين له من زمان .. وان كان هالشي يسعدج فمان الله والله يحفظج ..بكل برود وبكل سهوله وبند عني ..

وكل شوي ينزل سنابات ويا ربعه يتمشون ف لندن ومستانسين ويصور الاكل وانا اصيح ولا اروم اكل مصدومه والله اني مصدومه رقاد ما اروم ارقد كله اصيح .. حالتي النفسيه تعبانه وكله فالبيت لا ابا اظهر ولا ابا اشوف ناس .. والله اني صبرت عليه وايد وتحديت الكل عسبت اخذه .. والحين ها اللي احصله؟
طلعت من الجامعه لانه مايباني اكمل دراستي ف جامعه مختطله .. ولا يباني اداوم وانا وافقت ع كل شروطه وضحيت عشانه .. واخر شي يخون ويلعب ..

ويقص عليه يقولي انه فالدوام ومناك هو طالع ويخون وانا احاتيه ومابا اضايجه بكلمه اقول حرام بروحه مداوم تعبان...

بموت ضيج ما اعرف شو اسوي .. ماخبرت اهلي ولا شي .. وما ابا اخبرهم بيتشمتون فيني وروحي مب ناقصه

المزيد من آخر المواضيع من نفس القسم:

• كرهت حياتي
• مطلقة و اريد اعيش لحالي
• مشكلتي الفراغ
• مضغوطه وفقدت الامل
• تزوجت مريض نفسي
• مشكلة حالتي بعد الأمومة
• مشكلة تقدم لي خاطب وافد
• مشكله بنتي
• زوجي تعبني بالضرب كليوم💔
• أواجه زوجي بكذباته ولا اسكت

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[المراقبة العامة]

الكلمة الطيبة صـــــــــدقة

[تفاحتي]

لو صدق فيه دليل وصدق ف صور شفتيها بعينج


ليش ميته عيل
خلاص الحمدالله ما دخل عليج وحملتي منه


خله يولي


انسيه
واللي يابه ياب غيره
باجر احتفالات الدوله احتفلي معااااهم وامسحي اسنابه وفهمي هلج
وطبيه

[قلب إلهام]

عشان كذا ما ابغى اتزوج بصراحه اغلبهم انذال وسلوبهم زفت فليش اجيب لي واحد يمرضني

[غلآ نفسي]

مستغربه

كيف صدقتي الريال وجذبتي ريلج ؟

ما فكرتي شو مصلحه هاللي يقرب له يقول عنه جي

يايب نكج ويدور عليج عشان يقولج عنه ؟

حتى ربيعه كلمج وسوالج مقلب

السالفه مب داشه مخي

صلي الاستخاره قبل لا تقررين اي شي

بالتوفيق

[رسايل غلا]

ما فهمت على أي أساس صدقتي واحد مطرش لج رمسة ما تدش المخ، بعدين هل فيه ربع صدق يسوون هالشي!
ودري عنج المواقع والسوالف هاي ويلسي ويا نفسج راجعي كلامج وتصرفاتج ترى فهالزمن استوى الزواج صعب عالبنت ف لا تخلين حد يخرب عليج حياتج وزواجج
والله يوفقج

[بنت الملحم]

طيب كيف تأكدتي انه الصور الي طرشها ربيعه تخص ريلج؟ يمكن كانت هاي المحادثات حق ربيعه مب حق زوجج
وكيف تصدقين واحد يقول عنه هالكلام وتكذبين ريلج

[dxb_love]

انتي وحده ماعندج سالفه شفتي صور وسكرين شوت وكلام من واحد ماتعرفينه عن ريلج وصدقتيهم

خل يداويج عيل دامج تدورين وراه يزاج الي يصير فيج

[تفاحتي]

لو جافت صور وعندها دليل ليش تصكر اعيونها
خبله والا خبله
لو كان هو اللي لقى عليها جان قبضها ورقتها
المفروض تسالونها شو جااافت وشو لقت
يمكن من الله مرسل هالشخص

[ام نهييان]

مافي حد معصوم من الغلط ويمكن لي يابه ربيعه قديممم

بعدين هو شو مصلحته يخرب امبينكم من وين يعرفج عشان يخرب ع ربيعه ويدمر زواجه حسد يا حبيبتي حسد الله يهديج

لو شرتي امج كانت قالت لج غمضي عينج واذنج عن الغرب الناس حساده محد يبا الخير لحد

انا اقول مسحي سنابه لانه كل لي يسويه عشان يغيضج واحتفلي وسكري ع موضوعه لاتخبرين هلج ومرده بيحس ع دمه وبيراضيج وحزتها كوني لينه معاه عشان لايعاند وتخربين حياتج ع شي مش واثقه منه

والحل الثاني تخبرين هلج وتخربين كل لي بينكم القرار عندج اختي

موفقه

[ريم العسووله]

أشتري راحة بالج و خبري أهلج و أنفصلي عنه بهدوء و خلعيه ، و ردي كملي دراستج و أشتغلي ، لا أنتي أول و لا آخر وحدة تنفصل في فترة الملجة ، و انفصالج عنه اللحين أهون و أرحم مليون مرة من انفصالج عنه عقب الزواج ، و ان شاء الله ربي يرزقج بلي يستاهلج و يصونج ...


دام في ناس طرشوا لج بلاوي زوجج بالصور و الأدلة هاي بروحه كفاية ، و سالفة ان واحد من ربعه يمزح معاج أبدا ما تدخل المخ ، ما في واحد يتغشمر مع ربعه بهالطريقة و يكلم زوجاتهم و يسوي فتنة و عقب يقول انه يتغشمر ؟؟!!
من متى صارت و وين قاعدين ؟!
و أصلا ليش يتغشمر معاج ؟ يعرفج ؟ تعرفينه ؟ الميانة طايحة بينكم ؟ و حتى لو كان واحد من معارفكم ما توصل الغشمرة لهالدرجة و اذا يتغشمر بيقول لج انه يتغشمر في لحظتها مب عقب فترة من الزمن و عقب ما خبرتي ريلج ...
بعدين حتى لو زوجج عنده اعداء ، الشباب مهما كان بينهم من عداوة ، ينتقمون من بعضهم البعض بطرقهم ، ما في واحد يروح يكلم زوجة واحد من ربعه و يسوي فتنة عشان ينتقم و لو فعلا صارت جان زوجج لو فيه ذرة نخوة و رجولة ما راح يرضى و بتصير مذبحة بينهم يا قاتل يا مقتول ، بس واضح ان ورى هالسالفة بنات و هاي حركات بنات و هم الي مطرشين لج سوالف زوجح و صوره و تلقين وحدة منهم تبي تنتقم او غيرانه منج الخ الخ من حركات البنات ...


زوجج لو مظلوم ما راح يهدى له بال و ما راح يكتفي بالنكران و الحلف بالعكس راح يقلب الدنيا فوق تحت عشان ياخذ حقه و حقج و يثبت لج أنه بريء ، بس هو شو سوى غير الحلف و النكران و بالأخير طنش و سد الخط من عندج و راح يتصور سنابات و خلاج تصيحين و تحترقين بنارج ؟؟!!
الي نعرفه ان الواحد في فترة الملجة يدلع زوجته اخر دلع و ما يزعلها ابدا ، حتى لو كان هو صادق ما راح يخليج بالعكس بيشيل همج لو تهمينه فعلا ، مب يسكر الخط و يطنش و هو بهالحركة اونه يبي يثبت لج انه برىء و مسكين و هو الغلط راكبه من ساسه لين راسه ، شين و قوي عين بعد ... و سالفة أنه يحلف ترى مب كل من حلف صادق ، مروا علي ناس اشكال و الوان يحلفون عالمصحف جذب عيني عينج ...

الافضل لج تشترين راحة بالج ، مهما بلغ زوجج من جمال و مال الخ الخ ، كل هالأشيه مب مهمة ، المهم هي العشرة الطيبة بين الزوجين و الثقة و الراحة ، و هالشيء ما راح تحصلينه من ورى هالريال ، و اذا شاكة و خايفة تظلمين الريال ، كلمي حد ثقة من اخوانج ، خلي يراقبه و يسأل عنه بطريقته ، الشباب يعرفون شلون يطلعون بلاوي بعض ، و اذا طلع فعلا راعي بلاوي و خرابيط انهي الموضوع ، و لا تخافين شيء ، و لا تحاتين شماته الناس خلهم يولون ، الناس تتشمت يوم يومين و يسكتون أحسن لج من أنج تضيعين حياتج لا زوج عدل و لا شهادة و لا شغل ... الخيار بيدج ...
بس تأكدي اذا كانت بلاويه من الماضي و تركها او ما زال مستمر عليها ...

[المعآني]

أخاف ظلمتي ريلج
كيف تصدقين أي حد غريب بطرشلج محادثات وغيره

المحادثات مب دليل
انا عندي رقمين وبيلس بكلم نفسي وبطرشلج تعالي فلانة ريلج يغازل مب معقولة
ع الأقل تأكدي عقب سوي ها لفيلم كله
وأي وحدة تقولج انا اعرف ريلج وكان معاي بتصدقينها



وايد غريبة انتي
انا اللى يفتح معي موضوع عن ريلي أكبر بلوك و سيدة أراوي التلفون لريلي يمكن يعرف من هذا
لكن اني ارد وأخذ واعطي معاه ومناك اتضارب ع طوول


استغفري وربي يفرج همج

[غلآ نفسي]

أشتري راحة بالج و خبري أهلج و أنفصلي عنه بهدوء و خلعيه ، و ردي كملي دراستج و أشتغلي ، لا أنتي أول و لا آخر وحدة تنفصل في فترة الملجة ، و انفصالج عنه اللحين أهون و أرحم مليون مرة من انفصالج عنه عقب الزواج ، و ان شاء الله ربي يرزقج بلي يستاهلج و يصونج ...


دام في ناس طرشوا لج بلاوي زوجج بالصور و الأدلة هاي بروحه كفاية ، و سالفة ان واحد من ربعه يمزح معاج أبدا ما تدخل المخ ، ما في واحد يتغشمر مع ربعه بهالطريقة و يكلم زوجاتهم و يسوي فتنة و عقب يقول انه يتغشمر ؟؟!!
من متى صارت و وين قاعدين ؟!
و أصلا ليش يتغشمر معاج ؟ يعرفج ؟ تعرفينه ؟ الميانة طايحة بينكم ؟ و حتى لو كان واحد من معارفكم ما توصل الغشمرة لهالدرجة و اذا يتغشمر بيقول لج انه يتغشمر في لحظتها مب عقب فترة من الزمن و عقب ما خبرتي ريلج ...
بعدين حتى لو زوجج عنده اعداء ، الشباب مهما كان بينهم من عداوة ، ينتقمون من بعضهم البعض بطرقهم ، ما في واحد يروح يكلم زوجة واحد من ربعه و يسوي فتنة عشان ينتقم و لو فعلا صارت جان زوجج لو فيه ذرة نخوة و رجولة ما راح يرضى و بتصير مذبحة بينهم يا قاتل يا مقتول ، بس واضح ان ورى هالسالفة بنات و هاي حركات بنات و هم الي مطرشين لج سوالف زوجح و صوره و تلقين وحدة منهم تبي تنتقم او غيرانه منج الخ الخ من حركات البنات ...


زوجج لو مظلوم ما راح يهدى له بال و ما راح يكتفي بالنكران و الحلف بالعكس راح يقلب الدنيا فوق تحت عشان ياخذ حقه و حقج و يثبت لج أنه بريء ، بس هو شو سوى غير الحلف و النكران و بالأخير طنش و سد الخط من عندج و راح يتصور سنابات و خلاج تصيحين و تحترقين بنارج ؟؟!!
الي نعرفه ان الواحد في فترة الملجة يدلع زوجته اخر دلع و ما يزعلها ابدا ، حتى لو كان هو صادق ما راح يخليج بالعكس بيشيل همج لو تهمينه فعلا ، مب يسكر الخط و يطنش و هو بهالحركة اونه يبي يثبت لج انه برىء و مسكين و هو الغلط راكبه من ساسه لين راسه ، شين و قوي عين بعد ... و سالفة أنه يحلف ترى مب كل من حلف صادق ، مروا علي ناس اشكال و الوان يحلفون عالمصحف جذب عيني عينج ...

الافضل لج تشترين راحة بالج ، مهما بلغ زوجج من جمال و مال الخ الخ ، كل هالأشيه مب مهمة ، المهم هي العشرة الطيبة بين الزوجين و الثقة و الراحة ، و هالشيء ما راح تحصلينه من ورى هالريال ، و اذا شاكة و خايفة تظلمين الريال ، كلمي حد ثقة من اخوانج ، خلي يراقبه و يسأل عنه بطريقته ، الشباب يعرفون شلون يطلعون بلاوي بعض ، و اذا طلع فعلا راعي بلاوي و خرابيط انهي الموضوع ، و لا تخافين شيء ، و لا تحاتين شماته الناس خلهم يولون ، الناس تتشمت يوم يومين و يسكتون أحسن لج من أنج تضيعين حياتج لا زوج عدل و لا شهادة و لا شغل ... الخيار بيدج ...
بس تأكدي اذا كانت بلاويه من الماضي و تركها او ما زال مستمر عليها ...

لنفترض ان اللي قالها مقلب مب ربيعه .. السالفه فيها بنات

انزين واللي من معارفه ومن اهله ليش يالس يسوي فتنه بينه وبينها ؟؟؟؟؟

شو مصلحته شو يبا ؟؟

[غلآ نفسي]

لو جافت صور وعندها دليل ليش تصكر اعيونها
خبله والا خبله
لو كان هو اللي لقى عليها جان قبضها ورقتها
المفروض تسالونها شو جااافت وشو لقت
يمكن من الله مرسل هالشخص

معقوله اهلها ما سالو عن الريال قبل لا يملجون ؟؟؟

[تفاحتي]

معقوله اهلها ما سالو عن الريال قبل لا يملجون ؟؟؟

الله يهداج وكل القصص والبلاوي للحريم اللي توهم معرسات
اهلهم محد سأل عن المعرس ؟!
طبعا ف اشكال وايد وايد ماتظهر حقيقتها
ولو ظهرت من قبل جان شفت اكثر من نص البنات ماعرسن