انا و ريلي و فارق العمر

[مشكلتي]

السلام عليكم


انا صار لي معرسه من خمس سنين و عندي طفلين

أنا أصغر عن ريلي بعشر سنين

ماحس انه يعطيني حب مب حاس اني بنت صغيره و أحتاج حب وشوق ..
هو يحبني و يهتم فيني بس ما يعطيني الحب الي ابيه ..
اغلب وقته يلعب مع اليهال او عنده اموره يخلصها ..

يعني انا اول العشرينات ,, تعرفون البنات بهالعمر يبدون يحبون و يعيشون قصص حب وعقب يعرسون..

اقرا قصص عن الحب احس اني ابي اعيش مثلهم بس مع ريلي لاني صج احبه

هو يسافر و يرجع بحكم شغله , الفترة الي يكون مسافر فيها اقعد المح له اني ابي اعيش قصة حب يسألني كيف اقوله ماعرف يقولي خاطري اعرف شو الحب الي تبينه بس ارد عليه ماعرف ,, تضارب على هالموضوع ومرات اطوف بس اكون منكسره لاني ابي هالشي , وهو قام يتحاشى انه يسولف معاي بموضوع الحب

كيف اقوله نحب بعض وعقب نعرس او نفترق شهرين اونه مب طايقين بعض وعقب نرجع لبعض , صرت احلم بهالشي بس عشان اعيش هالاجواء


كنت اداوم و اشوف العالم كيف منعجبين فيني و بأخلاقي استانس اقول ليش ريلي ما يشوفني نفسهم , وانا مهتمة بعمري

احس اني ندمت اني خذت واحد اكبر عني بوايد , لانه ما يعرف احتياجاتي او انه كبر ومب مال هالسوالف

ومرات اقول مافي انسان كامل , دامه يحبني و موفر لي كل شي خلني اعيش بالي عندي

قلت يمكن من الملل و قاعده فالبيت و ما عندي شي اسويه , قلت برجع اداوم او ادرس بس ريلي رافض لان عيالي محد معاهم و مافي مجال اخليهم عند حد

اعتبروها فضفضه . لان ماتوقع في حل

المزيد من آخر المواضيع من نفس القسم:

• تزوجت مريض نفسي
• مشكلة حالتي بعد الأمومة
• مشكلة تقدم لي خاطب وافد
• مشكله بنتي
• زوجي تعبني بالضرب كليوم💔
• أواجه زوجي بكذباته ولا اسكت
• ريلي احبه ،، بس ماعرف شو الي حصل
• مشكلتي التعلق الزائد
• رفض ريلي للحمل
• عااااجل مشكلة واجهتني

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[المراقبة العامة]

القصص اللي كنتي تقرينها تراها كلها مجرد ترويج لااكثر
هالشي خيال مو واقعي وانتي واضح عليك عايشة احلام ورديه وتفكري انك لما تتزوجي بتحققي هالاحلام
قولي الحمد لله زوجك مو مقصر ويحبك وحتى لما خبرتيه خاطره يوصل للي براسك
لازم تكوني انضج من كذا وفكرة انك اخذتي رجل اكبر عنك هذا قرار اتخذتيه بإرادتك
ومو معناته لو تزوجتي اصغر بتحصلي ترى احيانا عمر الرجل مهم لاستقرار الحياة الزوجية
ترى لو عرف عن فكرك يمكن يقول ليتني مااخذت وحده صغيرة فكرها محدود وصغير .... انتبهي
قولي الحمد لله ترى ماعندك مشكلة المشكلة بس انك اخذتي فكرة عن الحب وان نهاية الحب الزواج
مثل ماقلتي : كيف اقوله نحب بعض وعقب نعرس او نفترق شهرين اونه مب طايقين بعض وعقب نرجع لبعض , صرت احلم بهالشي بس عشان اعيش هالاجواء
ترى مادمر الحياة الزوجية غير هلأفكار اللي نشوفها من المسلسلات والقصص
ولاحظي عنوان مشكلتك انا وريلي وفارق العمر ... انتي على بالك هي المشكلة والصحيح المشكلة في تفكيرك انتي
اقربي من زوجك وحتى بمجال عمله تثقفي عشان تكوني اكثر قرب منه

[ليلى24]

متاثرة بالافلام التركية والهندية.. الحب الحقيقي لي هو بعد الزواج مب قبل الزواج , كوني واقعية اكثر وعلى فكرة.. ريلج مب كبير والفرق عادي جداا وبالعكس حلو وهالمطلوب واتوقع كنت عارفة بفارق السن قبل الزواج.. وفي حريم فرق بينهم وبين الريال 20 سنة واكثر وما قالو شي يمكن يكون من سنج ويتصرف نفس الشي العمر مب مقياس .. انتي الحين عندج عيال مفروض تكونين رزينة اكثر.. بس كلامج كلام مراهقات

[ام يوسف 82]

مسا الخير

من وجهة نظري فرق العمر لازم ع شان الرجل يدلع زوجته

[ام مصطفى..]

مايخصه العمر موول .. في ريااييل جي طبعهم جافيين ويا حريمهم

[ام الدحمي]

مب وايد فرق بينكم انتي تدلعي وطلعي اللي فخاطرج ولا تتضاربي ويا ريلج مايفيد الزعل عيشي الحب بينكم وعفكره بدايه الحب خلاف

شكله ماعندج يهال باجر مع اليهال يتغير الوضع للافضل ان شاءالله ويكذبون عليج اللي يمثلون الحب جدامج او انتي تشوفي علط صدقيني لو دشيتي حياه هالاثنين بتقولي حياتي ويا ريلي افضل ولحمدلله

تقربي من الله ومن زوجج والله يصلح ذات بينكم

[[..دانــة..]]

الريال يسألج عن الحب اللي تطرينه وانتي اجابتج ماعرف!
اذا انتي مب عارفة الحب اللي تبحثين عنه كيف تبين ريلج يفهم احتياجج ورغبتج،
قوليله بصريح العبارة ووضحيله اللي ف خاطرج، انتي مشكلتج مب "قصة الحب"
انتي مشكلتج التواصل مع ريلج، بدون تواصل فكري وعاطفي ما راح توصلين لنتيجة،،،
تكلمي معاه بوضوح مب بغموض، جنج تبينه يعرف الاجابة بدون ما يعرف الاجابة
ترا الحل عندج ..

[تفاحتي]

حبيبتي اول شي
انتي مو بنت
ثانيا انتي مو صغيره
الصغيره هي تكون مو مالت الزواج قاصر
ودام تجاوزتي هالمرحله وعرستي انتي حرمه عوده موب ياهل

اساسا انتي حاطه ف بالج فكره انج صغيره وماخذه واحد عود ب عشر سنين

انا بيني وبين ابو عيالي عشر سنين ومافكرت ابدا بتفكيرج

تبين حب اوك ماف مشكله انتي خلي جوج حب معاه
انتي علميه ليش لا

شفتي قصص وافلام طبقي سوي اللي يسوونه اللي بين العشاق
مافيها شي حلالج
يمكن هو يعيبه ويستانس ويبادلج الشعور
يعني بدال لا يتم داخل قلوبكم عبرو بتصرفاتكم
بس
انج انتي تقولين ابا اعيش واناصغيره والبنات ف سني انتي غلطانه

واذا انتي ما بتقدرين تعبرين له عن حب لا اطالبينه اول شي بالتعبير

ابدئ وبعدين شوفي النتيجه

[مالتيزرس]

اقري فقوقل بتحصلين وايد أفكار .اثقفي اشتري كتب ..
اقري روايات..

حاولي لما ايي من الدوام عقب فترة تشتاقين له تبيني شوقج له وانه اول واخر واحد فحياتج ..
كلام الحب فالعلاقة الحميمة يلعب دور كبير وممكن اتطيحينه فشباكج بالحلال اذا كان هالشي مهم عنده .
انتي ابدي بهالشي دامج تبينه بادري لاتتريين منه لانه مب عارف انتي شو تبين ..حافظي ع النعمة اللي انتي فيها

[Ward-uae]

يعني تبين طيحين من الجبل وهو تحت يمسكج
ولا تبينه يصبحج بكف ويمسيج ببوسه
او يرفسج من الدري ويشلونج بالإسعاف للطوارئ وهو يركض في الشارع شرات المينون لين يوصل المستشفى
الله يرزقج بياهل يملي وقتج وما يكون عندج وقت تشوفين المسلسلات

[ريم العسووله]

لا حول و لا قوة الا بالله ناس من الفضاوة تبي تسوي لنفسها مشكلة من ولا شيء ... الله يهديج بس لا تعليق ...

[احلى بعفويتي]

واي منج انتي


الحب انا احسه تعامل اكثر من كلمتين
تبين تحبيه روحله وحطيله اغنيه رومنسيه واخر مقطع قوليله احبك ..

هو بتشجع ان يغازلج ههههههههههههههه

انا ما احبذ فرق العمر لان وااايد ريال يوم يكبر الحياه بعينه تكون اكثر وتينيه واكثر التزامات واكثر جديه
بس في مثل يقولج خذي شيبه يدلع

[ام نهييان]

حبيبتي المشكله مش فالعمر المشكله فطبع ريلج في رياييل جافين وفي رياييل مايعرفون يعبرون انتي كوني رومنسيه وياه يمكن يسااايرج وتلقين لي تبينه مافي حد كامل

انا نفس حالتج بس انا ما افتقد الرومنسيه افتقد اني اعيش حياه زوجيه بدون عيال ماتهنيت مع ريلي عرست وعلى طول يوني عيال بس بعدني اقول الحمدلله غيري مش لاقي

قولي الحمدلله ع النعمه لي عندج ولا تتبطرين وعن انكم تتفارقون تراج تقولين ريلج يسافر كل سفره عديها فراق بينكم تيدد الحب والشوق وخلي نفسج غييير كل مايرد من السفر سوي لج اجوواء غيري الروتين لي عايشه فيه يمكن يتغير ريلج و تستانسين وتلقين لي تبينه وان مالقيتي حبيبتي نصيحه مني اقتنعي بللي عندج لانه واضح من رمستج انه يحبج وطيب

[أم محمد1988]

ياختي فارق العمر ما يخصه .. هذا هوو الزواج حبيبتي .. مب طول الوقت كلام حب وحنان هذا كان تفكيرنا لما كنّا نشوف المسلسلات .. ولكن ف الواقع غيير

لو سألتي اي وحده بتقولج حالتها نفس حالتج .. لا تتوقعين انه في زوجين أحسن عنج .. دام مافي بينكم مشاكل ومتفاهمين هذا دليل على حبكم ل بعض .. ولما ريلج يتقرب منج ولما يلبي طلباتج دليل على حبه لج .. مب لازم يقولج أنا أحبج بصريح العباره يكفي هالأشياء اللي يسويها تدل على الحب .. والحب مثل ما يقولون أفعال مب أقوال بس

واذا ريلج موجود دوم حاولي تغيرين من روتينكم أو تروحين عند أهلج كمن يوم والله بتلاحظين فعلا أنكم بتشتاقون ل بعض ..

[غلآ نفسي]

الحب اللي تبينه واللي في بالج والشوق والانتظار وانه ما يروم دقيقه عنج

هذا كله تحصلينه قبل الزواج

انا ما اشجع البنت تحب قبل الزواج لا لا انا اللي اقصده دامكم صرتو في بيت واحد هالحب بيتغير شكله

ما يتم هذاك الحب اللي في بالج

حتى لو الريال رومانسي او جاف ما تفرق

والحب الحقيقي اللي موجود وما يروح ابد ابد ابد هو هالشي اللي بينكم الحين

يسالج شو الحب اللي تبينه .. شو احتياجاتج .. هذا الحب الحقيقي ان نشوف شو الطرف الثاني يباه ونحاول نسويه

اما الحب اللي تطرينه مب موجود فالحياه الزوجيه لو اتمين طول عمرج تدورينه

ف صارحي ريلج باللي تبينه

لا تقولين ماعرف قولي ابا جي وجي وجي وهو ينفذ

في احلا من جي ؟

ومع الايااام مفهومج للحب بيتغير صدقيني

دامه مب مقصر ومتمسك فيج معناته يحبج

بالتوفيق