امي .. هل انا بنتج فعلا؟

[مشكلتي]

صباح الخير ..

بكل اسف اقولها امي دمرت حياتي ونفسيتي وقرارتي

صدقوني شخصيتي ضعيفه بسبب امي وتسلطها مب بس عليه حتى على اخواني وخواتي لكن انا بالذات رغم اني بجرها الي المفروض اكون اقرب عيالها لها! ماشوف غير كرهها وسبها ودعاويها لدرجه اوقات اشك اني بنتها !

تعبت من تحملي واصبري واعذريها هاي امج بالاخير ! ولانها امي صابره ومتحمله اكثر عن اي حد بالعايله وتعبت وانا اعذرها,

جبرتني اوافق على شخص ماكنت موافقه عليه او بالاحرى بدون ماتشاورني بس عشان ولد فلان وعلان ومابترفضهم انزين على حساب سعاده بنتج؟ ونهايتها انفسخت , لين اخر خطوبه او ملجه ’ ملجت مجبوووره حاولت اتقبل الريال وارتبط فيه واعيش حياتي وياه بس ماشي توافق بينا , وتطلقت

وعشان تكونون بالصوره لان ممكن تفسرون رفضي للخطوبات ان في شخص بحياتي , لا خواتي انا مالي بهالامور لكن كيف ارتبط بشخص مارتحت له واوافق عشان امي ماتتفشل منهم؟ ومتى شاورتني من الاساس؟ ترفض وتوافق بدون ماتاخذ بشوري .. وهذه النتيحه

وبعد الطلاق عشت الويل كل انواع الاهانات والسب والدعاوي حتى بالموت ! في ام تدعي على بنتها بالموت ؟ لاني تطلقت مب انتي الي جبرتيني عليه؟ انزين شو عني انا وعن حياتي واختياري وسعادتي؟ انحبست سنه او اكثر بالغرفه لين دخلت بحاله نفسيه واكتئاب

على فكره زوجت اخواني على ذوقها وتروح تخطب باختيارها بدون ماتشاورهم مع ان كم واحد منهم كان يحب ووده يرتبط بلي اختارها ! لكن طبعا ياويله يا سواد ليله اذا حد قالها لا وبخصوص البنات وحده توفقت الحمدلله وماكان في مجال انها ترفض اساسا والثانيه كانت مجبوره على واحد من الاهل وفسخت الخطوبه وعلى حظها ياها واحد ثاني على طول وعشان من ضمن الي امي بتسعد بنسبهم فلتت من العقاب ولو انها خذت نصيبها من السب والدعاوي, والله يعين باجي خواتي

حتى الوظايف تتدخل فيها .. وها انا يالسه فالبيت تجاوزت الثلاثين ماشوف غير اشوف عمري يمر جدام عيني وانا ماسوي شي .. حتى ربيعاتي ماتخليني اطلع اشوفهم واتقابل وياهم .

بتقولون وين ابوج! مسكين ابوي يطيب بخاطري يوم يشوف معاملتها لي ماله كلمه فوق كلمه امي حتى انه ما سلم منها ومن لسانها وكل ما ايي البيت يضاربون او يكبر عقله ويروح لان يعرف مابيوصل لشي ولا تاخذ رايه بشي يخصنا تسوي الي تباه بس وطبعا ابوي متزوج على امي والسبب ان ماشاف الراحه وياها

بتقولون حاولي تكلمينها وتتفاهمين وياها لان هالشي الي كنت اسويه طول عمري بس ماشي فايده مب بايدي غير ادعي لها انا مب عاقه يا خواتي والله اني بنت هاديه ومطيعه ولا سويت شي غلط بحياتي عشان تسوي وياي جيه ومارفض لها طلب والنتيجه نفس ما كتبت .. ماكان ودي اتكلم واكتب عن امي بس انا تعبت والله تعبت حاولت وياها بشتى الطرق رغم كل هذا احبها وادور رضاها

لا تفسرون تصرفاتها خوف وحرص , ماشوف امهات الناس جيه يسون ف عيالهم؟ لدرجه اغار من ربيعاتي على معامله امهاتهم وياهم ..

اسمحولي عالاطاله

المزيد من آخر المواضيع من نفس القسم:

• تزوجت مريض نفسي
• مشكلة حالتي بعد الأمومة
• مشكلة تقدم لي خاطب وافد
• مشكله بنتي
• زوجي تعبني بالضرب كليوم💔
• أواجه زوجي بكذباته ولا اسكت
• ريلي احبه ،، بس ماعرف شو الي حصل
• مشكلتي التعلق الزائد
• رفض ريلي للحمل
• عااااجل مشكلة واجهتني