انا وريلي ومشاكل

[مشكلتي]

السلام عليكم
بنات انا ماعرف اروح اشكي لامي او اختي او اي احد ماحب اشغل تفكيرهم
وانا وايد كنت متردده اكتب هنيه واشكي لكم بس تعبت ابي نصايح وتجاربكم
انا تعبت من ريلي يزعل ع اشياء تافه وايد ويكبر الموضوع
هو يوم يزعل خلاص مايشوف جدامه يتم يسب ويواجع ،ماهمه حد ويوم يكون راضي ماشي احسن منه ويحس بتانيب الضمير مرات
مره صار موقف في السوق وعصب عليه ان ليش عباتج فيها شغل عن اليد انا مايعبني ووووو وكلام يعور القلب وصرت البس ساده اتجنب المشاكل

هووايد مزاجي انا تعبت نفسينا من عصبيته ماعرف كيف اتعامل معاه عطوني رايكم
ومايحب يوم اروح بيت امي ماعرف ليش احسه يكرهم وصرت اروح مره في الاسبوع حتي ماطول وايد عندهم وهو عارف ان انا مااصبر عنهم وعادي اضحي علي اي شي بس مانحرم من شوفتهم
وايد مواقف تافه اتصير وحتي اذا بطرش ولدي مع حد او اهليه يبونه يروح معاهم مكان يعصب اونه ليش مايستاذن مني ويقولي روحي بيت امج وشلي ولدج وياج ،،،، احس ماله داعي اروح واكبر الموضوع وادخل الاهل في مشاكل ان مكبره عقلي بس المشاكله هاي التافه مب طايعه اتخلص ومادري من وين تتطلع فجاه وانا ادري اتصير مشاكل بين الزوجين بس الحمدالله ع كل حال
حتي مرات اكون تعبانه ومن هد حيلي احط راسي فليل برقد ايي عندي وياخذ الي يباه ويكمل رقاده لو قلت له تعبانه بيزعل مني وبيعصب ... يتم يقول انتي ماتعطيني حقي وبعرس عليج ،،،،كيف اتصرف وياه ومرات حتي اقول اريد اروح عن طبيبه نفسانيه اتساعدني
الله كريم
الله يهديه ويهديني يارب
اتمني احصل الاجابه منكم

المزيد من آخر المواضيع من نفس القسم:

• كرهت حياتي
• مطلقة و اريد اعيش لحالي
• مشكلتي الفراغ
• مضغوطه وفقدت الامل
• تزوجت مريض نفسي
• مشكلة حالتي بعد الأمومة
• مشكلة تقدم لي خاطب وافد
• مشكله بنتي
• زوجي تعبني بالضرب كليوم💔
• أواجه زوجي بكذباته ولا اسكت

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[المراقبة العامة]

الكلمة الطيبة صــــدقة

[بنوته ظبيآنيه]

اختي انتي عشتي معاه فتره من العمر شفتي فيه ايجابيات ريلج وسلبياته ،،، اذا كانت عصبيته هي الجانب السلبي الوحيد فيه فتقدرين تتكيفين معاها انج تتجنبين اللي يزعله او يضايقه موقف العباه صح الريال ما يحب اللبس اللي فيه لفت نظر ،،، وبخصوص ولدج فهذا ولده هو ما قالج ما يروح مع اهلج هو ذكر سالفة الاستئذان وهذا من حقه لانه ابوه و هو ولي امره ولازم يكون عنده علم ،، اما انج يوم تروحين لاهلج ما يحب او تحسينه متضايق فانا اقولج لا تفكرين فيه و خليه يتضايق من اليوم لبعد سنه هذيلا اهلج سندج و عزوتج و اهلج اللي ربوج وما قصروا فيج لازم تروحين لهم وتقعدين معاهم ،، وليش يتضايق هل هو ما يروح لاهله او يزورهم ؟؟

طاعة الزوج واجبه لكن لها حدود والله يوفقكم ويسعدكم

[الموهبة]

واضح انج ذكيه لكن نقطه واحده هى تنظيم وقتج وتخصيص وقت حق ريلج
وعن يزور اهلج اكثر الرياييل الحين يزورو فقط وقت المناسبات دام انتى تزوري حتى لو في الاسبوع مره حلو

[ليندااااا]

احسج عاقلة وهو بعده مراهق او مزاجيته وعصبيته تسوي مشاكل بينكم
مشاكلكم بسيطة وهو واضح انه يغار زيادة شوي
انتي خلي الاستغفار باب لحل مشاكلكم
والله يهون عليج يارب

[احلى بعفويتي]

عادي تمي يالسه في بيتج موب كل شويه رايحه بيت امج صح كلامه
واذا هو زين في امور لازم بيكون شين في امور اخرى
وجوفي غيرج ساكت على الظلم وصابر انتي اهون بكثير
احتسبي الاجر ترى موب كل شي سعاده ..
في يوم حلو وفي مر المهم انتي ةعيالج بصحه وامان

[حرم الحميري]

انا استغرب من الريال لي يمنع حرمتة من اهلها يعني وين تروح تهيت فالشوارع يعني لا معطي سبب ولا حجه واليهال شخصهم بعصبيتك اهله تراهم الحرمة لو تعرس وتروح بيت ريلها ما تقدر تقطع امها وابوها لانها سند لهم مب نفس الريال لي عرس نسا اهله وايد حريم لاحظت قامن يهملن هالشي يعني عشان ريلج لا يزعل خلاص بروح ساعه عالسريع ومره وبرد ما يسوى عليهم عيل ليش يايبينج باجر حد يمرض يستويله شي منو بيفيدج ريلج لي قال لا تسيرين عيل هو ما يقصر في امه وابوه ولا العذر العصبيه والخبال وحليلها الحرمة كم بتسكت ماتعرف ترضي منوه وللاسف لو ترضية بيتم مثل ماهو اذا ما حصل عذر فالاهل بيقول انتي فيج العيب اسلوب النقاش معدوم حد يسكت وحد يلوم مافي محاورة وتهديد بعرس عليج زاهب عندهم وتم الحرمة تولول بعد لو رمسته زينه بنقول بتحمل بعد لا رمسه ولا اسلوب ومخلنها جسد بلا روح الله يعينج اختي حاولي تيلسينة وتجوفين عذره فاهلج شو وان ما عطاج شي واضح ومبرر قوليله اهلي ما بقطعهم عيبه عيبه ما عيبة كيفه واذا عنده عيوب فيج خيقولج بتعدلينها غير هذا هو يدور الحجه عشان يغثج بس ويكون الاقوى هاي حياه زوجيه لازم تفاهم فيها يمكن يفيد الحوار معاه عادي لو يصارخ تحملي

[sa7el]

ما احسه اختي وااايد معقد الحمدلله احسن عن وااايد غيره

انتي احيانا عاتبيه تعرفين متى الوقت المناسب اللي ريلج مستعد منج،،هالوقت عاتبيه قوليه ليش تغلط وتسبني انا اعاملك بكل احترام وانت تغلط وتسب وتقول الفاظ تجرحني بتوصلني مرحلة يمكن ما احس معاك لا حب ولا احترام وجي يعني خليه يستوعب ان السب شي غلط وابد مش مقبوووول

عن الولد مش غلط جان بيسير مكان مع اهلج خلهم يكلمونه عادي مالعكس المفروض يستاذنون منه،، مثلا اخوج مطلع عياله العاب يتصل في ريلج ويقوله حاب اشل ولدك مع عيالي بيلعب بيساتس وان شاء ما بنتاخر لا تحاتيه بالعكس ما بيمنع

عن زيارتج لاهلج اذا هو ما يحب هالشي قولي لي انتي تسيرين بروحج هاليوم عند اهلج،، هو لو حاب يي وعقب الغدا يبا يطلع مشوار او مكان وعقب يرجع ياخذج،، مب تيلسين بيت امج دوم مال ساعة وخلاص مهما كان هذيلا اهلج ومالج غنى عنهم،، ولو عندج غرفتج الخاصة في بيت امج عادي لو ريلج حاب يقيل او يرتاح شوي في غرفتج ،، يعني سووا توازن المهم انتي مرتاحة وهو مرتاح

شوفي مثلا يوم تسيرون بيت اهله كيف يكون ريلج هناك،، نفس الشي انتي بعد محتاجة بيت اهلج بيت فترى وثانية

بالتوفيق اختي

[ريم العسووله]

أنتي ما تحتاجين طبيبة نفسية و لا شيء ... هو الي يحتاج طبيب نفسي الله يصلحه و يهديه ...

المفروض يبوس يده ورى و جدام و يحمد ربه مليون مرة بأن الله رزقه بزوجة طيبة و على نياتها مثلج ...


عالعموم أختي مثل ما قلتي هو وقت الروقان أحسن منه ما فيه .. حاولي تستغلين هالوقت و تكلمينه و قولي له طلباتك أوامر و كل الي تبيه بسويه بس ما أبيك تعصب و ما أبي بينا مشاكل ... و شرحي له الي في خاطرج و سمعيه شو يرد عليج ... موفقة

[موجوع قلبي]

اختي المشكلة الي إنتي فيه مب صعبه
ترا اغلب الازواج كذيه اهلج مهما كان يعصب ولاتقطعينهم
وعندي لج علاج عجيب وخليج من دكتور نفسي الاستغفار وكلمه لاحول ولاقوه الابلله عن تجربه ولوتقدرين اقرأ سوره البقره وشغليها بلبيت راحه عجبيه ماشاءالله عليج عاقله حاولي تذكرين الله وقت عصبيته وعطيه ابتسامه وقولي مايصير الا لي يرضيك ياتاج راسي ان شالله أكون افدتج كلامي ملخبط

[~شوق~]

انتي كتبتي الاشياء لي تغير مزاجه تجنبيها ... ويالاضافه ناقشيه عليها في وقت المناسب... وبخصوص اهلج تناقشي معاه شكلج فالاسبوع وايد تطلعين من البيت .. وجودج في بيت ريلج هو الواجب ..يباج كل ما رد يحصلج موجوده..
حددي أوقات معينه ...
الله يفرجها عليكم ويجمعكم على خير

سبحان الله وبحمده سبحان الله العظيم

[Ward-uae]

انتي لو تقلبين الموقف بتشوفينه يسوي هالشي لصالحج
مثلا سالفة العباة اخذيها بمبدأ الغيرة يمكن أصابع ايدج ما شاء الله حلوة وتلفت
عن سيرة بيت اهلج بعضهم عادي لكن ما لدرجه تبات خلاص تعود على وجودها جدامه ما يقدر يدخل بيته وانتي مب موجوده بتقولين ابالغ شفت يدي الله يرحمه كان جيه مع يدتي مع انه وايد يتضاربون لكن ما يقدر ينام وما يشوفها جدامه او يتخيل البيت بدونها
عن ولدج اشوف انه من حقه تستأذنين يمكن مجهز طلعه مع بعض او اللي طالع معاهم ما يبي يثقل عليهم او ما فيه احد بيهتم فيه انتي وابوه
انتي ادرى بريلج ومادام يحس معناته فيه الخير وحاولي حياتج الخاصه تخليها خاصه

[Hanady-alkaabi]

اصبر عزيزتي وان شاءالله مع الوقت بتغير ريلج وبحس بقيمتج...

[Oyster]

عمر الحرمه يمر بالمشاكل والنكد بسبت هالريل وبعد تقولولها اصبري

المهم

كيف حاله ريلج الدينيه؟ ملتزم بصلاته؟

وهل هو من البدايه جيه؟ والا باخر فتره

لان باين ان ريلج مب مرتاح نفسيا والبعد عن الله يسبب الشي هذا وانا اقول الشي هذا عن تجربه شخص حولي والعصبيه من الشيطان

شجعي ريلج اقلها على قراءه القران والرقيه عشان تهدي نفسه وانتي بعد رقي نفسج وريلج وبيتج وخلي سوره البقره شغاله فالبيت والتزمي الاستغفار

والله يهديه ان شاءالله