مشكلتي اختي مغروره

[مشكلتي]

السلام عليكم ورحمة الله وبركاته

خواتي عندي مشكله ماحس انها بسيطه وصدق مضايقتني عندي اخت اكبر عني ب11 سنه ومب معرسه وانا مطلقه وعندي ثلاث عيال السالفه ومافيها انه اختي هذي من شفت دنيا وهي انانيه ومسيطره ومستحيل تسوي لج شي الا بمزاج .. ف بداية كانت امور عاديه بس عقب ماتوفت امي حسّيت بتعب خصوصا اني ما اشتغل ولا عندي سياره وعايشه وَيَا اهلي ف بس عندي نفقة عيال وشغاله واعتمادي على دريول اخوي وسيارته اختي كل ماحست اني مستانسه ومستقره بحياتي تحب تضايقني وتقلب الكل علي وانا بصراحه بديت انهار نفسيا تخيلوا خواتي ف ولادتي ماكانت تسير وَيَاي ولما عرست ماتساعدني كنت اعتمد على حرمة اخوي وهي ولا كانها اختي وخواتي اصغر عني ثنتين مثلها بالضبط يقلدونها حتى تمنعهم يسون لي شي ويوم امي الله يرحمها تحاتيني كانت تقول لامي خليها تعتمد على نفسها والله خواتي خاطري اسوي منظار تخيلوا سوت لي مشاكل وَاخوي عسب اني ماقدر استخدم دريول وهي عندها سياره وموظفه وبما انها كبيره ف دايما يثقون فيها ويصدقونها رغم انها مب مسويه لهم شي ولا تدفع لهم شي بس تحب تعطي اوامر وتسيطر عليهم عشان امورها شخصيه وعقب الجاء الي ربيعاتي تحاول بقدر امكان تفرق بيني وبينهم عسب وتجرب اخواني يمنعوني بحجة اني مهمله ف عيالي وانه قلبها على صغار عسب ما ألاقي حد يساندني ولا يوقف وياي وأتم وحيده وتحرض خواتي ثانيات علي حتى تخيلوا مافي بينا اي تواصل وفي عزا امي طلبت من اختي الي عقبي تساعدني وساعدتني وهي مغصوبه عقب تمت تتحرطم قالت خليتني شغاله أصب للحريم قهوه ؟!!!!! شو رايكم بهذا اُسلوب الغريب احسن منهن بمليون مره والحمدالله اني للحين ماصارت لي حاله نفسيه بجد ماشي فايده ولؤم وعتاب مبالغ فيه يحسسوني اني لازم اتم اهتم فيهن واراعيهن طول حياتي وإلا يويلي بيسون لي مشاكل واانا خلاص طفرت اتم اسير بتكاسي وهي تحدد لي انه صبح واخوي كم مره سوى مشاكل عسبت هذي سالفه لانه مصدقها ويتحرى انه كلامها صح عقب دخلت يدتي وخالي واخوي العود ف سالفه والحمدالله كانوا ف صفي وامي الله يرحمها دوم ف صفي تحس اني مظلومه وَيَا اختي وتعرف اختي حاسده بشكل كبير ف كانت دوم تدعيلي وصدق احس بوحده بوسط اهلي ويقيدون حركتي بشكل ومن سنه ادور على وظيفه ولا حد فكر يساعدني ولا يدور لي بس فالحين يتدخلون بحياتي حتى محد فيهم سالني اذا محتاجه مصروف ولا ناقصج شي كل حد ف حاله وشو حل وياها؟ مطنشتها ولا معبرتها وعقب مامنعني اخوي من دريول هي ارتاحت وصارت اوكي ماقول غير حسبي الله وتعم وكيل فيها

المزيد من آخر المواضيع من نفس القسم:

• تزوجت مريض نفسي
• مشكلة حالتي بعد الأمومة
• مشكلة تقدم لي خاطب وافد
• مشكله بنتي
• زوجي تعبني بالضرب كليوم💔
• أواجه زوجي بكذباته ولا اسكت
• ريلي احبه ،، بس ماعرف شو الي حصل
• مشكلتي التعلق الزائد
• رفض ريلي للحمل
• عااااجل مشكلة واجهتني

[المراقبة العامة]

الكلمة الطيبة صــــدقة

[mouzan7mod]

عزيزتي ، إعتمدي على نفسج
محد هاليومين يتكفل بغيره
دوريلج وظيفة و ربي عيالج روحج
اعتمدي بالسواقه على نفسج و ان شاء الله تاخذين سيارة على قدج
و إستقلي ببيتج انتي وعيالج ، و دام طليقج موفر مصروف العيال وفري جزء منه للمستقب و الباقي صرفيه على اللازم للعيال
و انتي كوني مع الله في أمورج و الله يسخر لج أمور الخير
ولاتنسين ( اللهم يا رافع السبع السماوات إرفعني درجة )
وحتى لو أخوج منع عنج الدرويل أو التكاسي في حريم يسوقن بالأجرة ترومين تطلبينهم
أو اطلبي تاكسي الحريم .. الله ييسر أمورج

[almal3ka1]

اختج مب مغروره اختج تحب نفسها و هالشي مب غرور ولا تسمح لاي حد يتطاول عليها

[almal3ka1]

انتي مريتي بتجربه و المفروض تكونين متوقعه كل شي

الصراحه خواتج و اخوانج مب مجبورين يساعدونج

فهالحاله دوريلج و ضيفه و مصدر رزق


معاها حق تستخدمين سيارتها و اغراضها و حتى لو هي ما تباهم ترى بالاخير مالها

لا تتوقعين ان الناس بيعاملونج بالطريقه اللي انتي تبينها , لا المفروض تتوقعين أي شي من أي حد حتى لو كانو امج و ابوج

[تفاحتي]

انا مابحكم ع اختج من كلامج
لان ف النهايه دايما الانسان المكسور يحس نفسه
مظلوم
وكل اللي حولينه ظالمين
بعض النظر عن اختج

خلج سياسيه اول شي
تقربي منها

وامدحيها مدح لييين السما وصليها
هالنوعيه يحبون جي ماتخلين شي فيها ما تمدحينها
من جهتج دوري وظيفه

ومن جهه ثانيه لو هي رضت عليج الكل بيرضى عنج وبتتحررين من القيود
نحن عرفنا مشكلتج
انتي تبين حل
ما تبين حد يطبطب عليج
برأيي سايريها لانها دام هي المسيطره ع الكل ف الكل
تقربي منها وونسيها وبتشوفين اول ماتحس بانكسارج رح تونسج
واهم شي تتوظفين عشان تتحرين من القيود



وادعي الله يرزقج وظيفه مرتبه

[المعآني]

مع كل ها اختج كسرت خاطري واشفقت عليها أحس صار لها عقدة نفسية من عدم الزواج وحابة تبرز نفسها احسن من الكل
انا أشوف تسايرينها ولاتفكرين وايد ودبآي امورج بأجر عيالج ب يكبرون ومابيقصرون معاج ومالها حق طول عمرها تتحكم فيج
الله يكون بعونج

[الموهبة]

اهم نقطه اجوفها تشتغلي
هل يعاملون عيالج بحب ان نعم لاتشيلي بقلبج عليهم وحاولي تجلسي اياها بدون تدخل احد وقولي لها انج تحبيها ودج تكون سند لج وهى عزوتج لانها اختج

ابحثي عن وظيفه هى الاهم اجوفها الان

[ليندااااا]

مشكلتك مب بس في اختج
المشكلة مع كل اخوانج الظاهر
والسبب هو انج تعتمدين عليهم
يااختي الحين الوضع تغير وكل واحد يركض ورا مصالحه وهذا الشي الطبيعي
دوري وظيفة اشتغلي اعتمدي على نفسج بالحياة
انتي تعرفين الطلاق صعب وهذي نتايجه
حاولي تشتغلين وتوفري سيارة على قدج وربي عيالج بدون مساعدة من احد الحين كل واحد اللهم نفسي

[ماحد شراتي]

والله يا عزيزتي هذا حال الزمن الحين .. اعتمدي على نفسج وحاولي تكسبينها دام انكم ساكنين في بيت واحد.. الا ما تحصلين وظيفه تسدين فيها عمرج وحاولي طرين الجو عندكم فالبيت عسب تكسبين الكل