تعبت بسبب البشكارة

[مشكلتي]

ف البداية ببتدي أنا يبت بشاكير وايد واحين اخر وحده كملت عندي 11 شهر وشردت الْيَوْمَ ووايد مضايقة كل ما تشرد وحده اضايق حاولت أدور سبب فيني ماحصلت الكل يقولي وايد عصبيه وأنا صح وايد اعصب عليهن لكن مب زعيج عادي لأنهن وصخات والله عندي هوس نظافة وريلي اخس عني المهم عندي عقده من أنا صغيره دخلت ع بيت يرانا شفت ابوهم ف وضعيه خايسه مع بشكارتهم كان عمري 12 سنه صح الموضوع وايد جديم بس أنا وايد أشك وايد ماعرف شو أسوي أغار ع ريلي غيره فضيعه مب طبيعية وبخصوص البشكاره والله العظيم عمري ما حرمتها من اَي شيء واعاملها معامله زينه بس هُن وايد وصخات وايد ساعدوني خواتي ابا حل حق مشكلة الشك لأني اخاف دوم ريلي يهدني ولا شيء للعلم والله يعشقني عمره ما ضرني بس أنا المشكلة فيني وبخصوص الخدم كل ما تشرد وحده اضايق وأصيح ساعات ام ريلي مره قالت حق ريلي جدامي يمكن من حرمتك ما يلسون ماعرف شو فيني مضايقه وايد

المزيد من آخر المواضيع من نفس القسم:

• كرهت حياتي
• مطلقة و اريد اعيش لحالي
• مشكلتي الفراغ
• مضغوطه وفقدت الامل
• تزوجت مريض نفسي
• مشكلة حالتي بعد الأمومة
• مشكلة تقدم لي خاطب وافد
• مشكله بنتي
• زوجي تعبني بالضرب كليوم💔
• أواجه زوجي بكذباته ولا اسكت

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[المراقبة العامة]

الكلمة الطيبة صـــــــــدقة

[غلآ نفسي]

لا تييبين بشكاره دامج تشكين ونفسيتج تعبانه

ليش يايبه الهم لعمرج

[MiSs_DesigN]

هلا اختي انا مثلج وااااااااااااااااااايد اغار وخصوصا اني مرات اكون دوام وزوجي في البيت بروحه مع البشكاره

انا اثق في زوجي مابيسوي شي يغضب ربه بس اعرف ان نحن الحريم الشيطان بسرعه يخلينا نشك ونغار ويحط جدامنا وايد فرص للشك

عشان جي قمت ايب بشاكير اثيوبيات او اوغنديات اللي تحسينهم فيهم نوع من الخشونه واختارهم كبار شوي في العمر والحمد الله الحين مرتاحه لاني اعرف ان هالجنسيات ماعندهم واحد واثنين علي طول يعصبون اما الاندونيسيات والفلبينيات جربتهم وندمت كله يدلعون وحركات دلع

[mouzan7mod]

لا تيبين ، حاولي تعتمدين على نفسج
وفري لبيتج إلكترونيات تقوم بعمل الشغالة
نفس غسالة الصحون و المكانس القوية اليديدة
و نشافات الغسيل و غسالات الأوتوماتيك ..الخ

[[..دانــة..]]

الله يعينج .. بس فعلا لازم تغيرين من نفسج اذا تبين الخدامة أطول وياج
جوفي شي بيوت الخدم فيها أكثر من 10 سنين ويمر عليها أجيال وأجيال
بس اذا انتي مب قادرة ع هالشي ف الحل أنج تستخدمين الخدم المؤقتين -بارت تايم-

[المعآني]

الحل كاتبته فوق
لاتغارين ولاتعصبين
هاي شو ما كان تغربت عسب تأخذ مبلغ بسيط في الشهر ويمكن تاركة عيالها وتشتاق لهم
ومن ناحية وصخين ترا حياتهم مختلفة صبري عليهم وبيتعلمون
وأتم في الأخير انسانة وظروفها صعبة لو بتعصبين وتحملينها شغل فوق طاقتها لأن قلتي وايد تحبين النظافة وهالشي متعب ترا حطي نفسج مكانها شوفي تقدرين تتحملين ها لشغل
راجعي نفسج وغيري من عصبيتج وبيتمون أن شا الله

[احلى بعفويتي]

هلا اختي
انتي تعرفين عوقج .. فخلاص ريحي عمرج ولا تيبين خدامة
رتبي امورج مع شركه تنظيف كل يوم تيلج ساعتين خدامه وتنظفلج
ويبي غساله صحون عشان المواعين
ويبي غساله فول درير مع تعقيم عشان بس تسوين ستارت وهي تغسل واتنشف حتى مايبالها شمس الا شي وايد خفيف اذا تبين
ويبي لج كوايه بخار عشان ع سريع تكوين ما يباله وايد
وخلي كوي العبي و الكنادير و الغتر في الاندري
والاكل حاولي تطبخين بطريقه منظمه يعني ما طلعين 60 صحن و 50 خاشوقه و تتفنين في الغدا وتتفنين في العشى
خلج على اشيا سريعه وتشبع مثل مجبوس مثل مشواي مايباله طحنه صحون ..
واستخدمي صحون بارسل حق تحضير الاكل عقب عقيهم في الزباله عشان ما تيلسين تغسلين وايد

و استخدمي جرايد بدال لا توصخين السراميك وتمين تغسلين كذا مره
يعني حاولي مطبخ يكون نظيف و تنظيف شامل مره وحده بليل قبل النوم

وكل شهر يبي شركه نظافه ينظفون فوق الكبتات و المراوح و الصقف ويرشون الحمامات

طبعا هالخطه بتنفع لو انتي ما داومين طبعا ..
وخلي ريلج يساعدج مول لا تشلين الهم والكد والشغل بروحج بس يباله نفس طويل ولازم تعرفين ان وقتج بيكون ضيج وبتحتاجين سيرفس سمكره قصدي منكره لا اوه سوري قصدي خدمات تجميل اكثر يعني لازم كل اسبوع تروحين تسوين مساج وتريتمنت و برافين لان شغل البيت يعدم الايد و الظهر ..


ونصيحتي الثانيه لج :: ترى الريال يوم يبا يطير ما بتهمه غيرتج ولا حبج ولا اخلاصج ولا سنعج ولا بيتج ههههههه الرياييل لا طاروا محد يردم واذا بغوا محد يصدم خله في معلومج هالشي ولا تاكلين روحج عشان خدامه في بيتج .. رتى مال اول الي بيغازل الخدامه .. الحريم في كل مكان في الشارع في الدوام في المستشفى في جلسات الليزر مال لحيه في المول في السناب في الانستقرام في الشيشه في الكوفي في كل مكان .. الله يعينج على هالغيره .. واي احس مخي عورني



الله يكون بعونج وريح بالج بس ترى العصبيه تاخذ من انوثتج و الغيره تاخذ من ثقتج بنفسج