أمهات هالزمن

[mouzan7mod]

السلام عليكم ورحمة الله وبركاته


الأمهات و بالذات أمهات البنات ، لوين تبون توصلون ؟
وين الرقابة على عيالكم و وين الخوف و الحرص على عيالكم ؟ وين الإهتمام بمستقبل عيالكم ؟
ولا برامج التواصل الإجتماعي غسلت مخكم ؟ ركزوا .. عيالكم في ضياع
خافي الله في عيالج ..

البنت اليوم مب مثل بنت أمس ، جسمها يكبر و يبرز و انتي بعدج تلبسينها قصير !!!
الولد الي دوم ويا الرياييل مب نفس الولد إلي دوم لازق بأمه و لا ماسك الأيباد !!!
البنت الي تحط الميكب و بعدها صغيرة شو تترين تطلع بالمستقبل ؟
الولد الي همه ينزل آخر اغنية باليوتيوب ترى مب مثل الولد الي فايز بجائزة القرآن الكريم في صفه أو على مدرسته


خافن الله في عيالكم ، ركزن على عيالكم ..
براكج التواصل الإجتماعي مابتنفعكم يوم بيطيح الفاس بالراس ..


وين مانروح مع عيالنا نلاقي العيون حوالينا .. و بالذات الي مغتربين عن أهاليتهم
لا تنسون العمالة الوافدة ترى بالنهاية أوادم و لهم رغبات و ميول .. لاتخلين عيالج هدف لآنظار العمالة ..

كم سمعنا عن جرائم التحرش و الإغتصاب ؟ كم سمعنا عن تعذيب خادمات لعيالنا ؟
كم شفنا فيديوهات لخدم يستغلون عيالنا و يبتزونهم علشان بس رغبات و شهوات

راقبي عيالج ، بطلي عينج عليهم .. لا تغرج الموضة و أمور الديكور و الطبخ !!
حطي في بالج .. كلكم راع و كلكم مسؤول عن رعيته .. اللهم بلغت ف إشهد

السموحة على الإطالة لكن جد بديت أشوف الشي صار عااادي و الامور طيبة عند الأمهات
الله يهديهم

المزيد من آخر المواضيع من نفس القسم:

• السلام عليكم
• فرق و اختلاف محتوى Netflix الامريكي و العربي
• عيدنا ليس هنا ................لعبدالحليم...
• مطلوب توظيف مندوبة تسويق في عجمان
• مطلوب توظيف سكرتيرة في العين
• مطلوب توظيف سكرتيرة في ابوظبي
• مقومات الدول الإسلامية في حالة ما إذا إتحدت
• حجامة
• الرقابة من الأهالي ضرورية قبل خوض مواقع...
• مجرمون بثياب كثيرة،،،،لعبدالحليم الطيطي

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[bodour27]

موضوع مهم الله يهدي الناس وًيوفقنا و يوفق الجميع على التربيه الحسنه بشوف بالمول مناظر بتاسف على الامهات وًبتسغرب كيف يخلون بناتهم بعمر صغير يحطون مكياج و لانسز و رموش انا ضد اني اجيب لبنتي موبايل وهي بعمر صغير النت يخرب العقول الله يهدي الجميع و يوفقنا اننا نربي جيل ماسس على اخلاق الدين مشكوره عالموضوع حبيته

[~شوق~]

لا حول ولا قوة إلا بالله العلي العظيم

اللهم هب لنا من ازواجنا وذريتنا قرة أعين واجعلنا للمتقين إماما

[المعآني]

والله صدق كلامج الزمن تغير ومب نفس اول
انا ولدي عمره سنتين وكالعادة راجعة الشقة متعودة اخليه يتنطط حولي لين افتح الباب وبيتي في الزاوية يعني يوم أسير افتح الباب ما أبين اني موجودة لو حد واقف في الممر ماينتبه لوجودي وولدي واقف بعيد عني مترين هو مايروح بعيد يتم واقف كن جيه اتطمن ولا فجأة اسمع صوت يزقره يقوله تعال وهو يفهم هالكلمة ومن الوناسة بيسير لحقته بسرعة ودخلته وانا مصدومة ليش يزقره!! وكانت نبرة صوته فيها خبث ما ارتحت مووول للعلم هالشخص كان واقف برع الابراج والباب مفتوح كيف يزقر طفل من هالمسافة ويقوله تعال!! شو يبا فيه مثلا
انا للحين راسي يدور من السالفة


انتبهوا حق عيالكم النفوس مريضة والجرايم انتشرت

[hamoudmam]

شكرا لصاحبة الموضوع عالطرح القيم
موضوع في الصميم ..
بالنسبة للشغالة مهما تكون ثقتنا فيها لازم نحذر منها و نخاف على عيالنا منها ..باختصار الأم و الاب يراعون عيالهم و ما يرمون الي واجب عليهم على غيرهم ..اذا هم الي والدين لهاليهال و قصرو و رمو المسؤولية علي غيرهم شو يتوقعون من هالغير الي ما يخصه فيهم ..
و تراه دين و ينرد باجر هم بعد لا شعوريا بيفرون والديهم عالشغالة و السايق ..

حتى بالعيادة يوم الدكتور يقدم توجيهات للام تحفظها عسب تطبقها للياهل لين يقوم بالسلامة تأشر للشغالة عشان تحفظ يعني حاطة فبالها حتى بالمرض بتخلي الشغالة تهتم بالدوا و مواعيده ..
اعذروني انا عاد شعبت الموضوع بس فالنهاية ترا عدم اداء المسؤولية كما ينبغي اتجاه الابناء متشعب الحالات و متشعب العواقب ..

[sa7el]

كل كلمة قلتيها صح

الحين الامهات غلطانات ومستقويات بعد
لو نصحتيها تقول ربي عيالج مالج خص في عيالي لا شفتي عيالي لفي راسج

وحدة مرت بهالموقف وخبرتني صدق انقهرت انا منها بطلب لها الشرطة

البنات كبار ماشالله يوم الخميس مادري ليش البنات يتيمعون في المول ومعظمهم مرحلة الاعدادية،،، لبسهم ومكياجهم وصوتهم العالي والمشكلة بروحهم بدون امهاتهم،،،،

الله يهديهم،، عقب ايون يعرضون مشاكلهم يدورون حل لمشاكلهم

سبحان الله الدين هو حل لكل المشاكل،، بس ما يبونه

[almal3ka1]

الدنيا نفس ما هي ما تغيرت

الناس نفسيتاهم ما عادت شرات قبل

ليش ما نتقبل بعضنا !! ترى كلنا مختلفين

انا و انتي و ..................الخ

ركزو حياتكم خلاص مالكم خص بحد

و ترى البنت يوم تتمكيج و تكشخ مب معناته هي مب زينه و ليش تحكمون عالناس !

ترانا نحن مب كاملين بعد و لا تقذفون الناس و لا تتكلمون عنهم دامهم كافين خيرهم و شرهم عنكم


ترى الدين امرنا يجنب الغيبه و انتي صاحبه الموصوع تسوين شي مخالف

معناته ما في حد كامل


و اللي عندها عمال او مربيات هي عارفه الإيجابي و السلبي و تعرف شو يالسه تسوي


خلج بنفسج


انا و حده اكشخ و عايشه حياتي و بناتي بعد نفسي



ترى الله اللي يحاسب مش البشر

[ام مهاووي]

والله ه الزمن صار يخوف الله يحفظ بناتنا واولادنا أمهات هالوقت مالهن بارض لتربية عيالهن همهن إلا شغل وليسن وطلعات وعراسات وسوق انا عندي جي حريم عيال ريلي يزاقرن إلا خدامه لعيالهن غسليه سبحيه وقدام الخلق نحن عيالنا ما نخليهم للخدامه نحن ما انمن للخدامه استغفر الله الله يهدي الجميع ويخليلنا عيالنا

[sa7el]

رد على تعليق الأخت الملعقة،،،،

_________________________________

من متى أختي استوى الحل للمشاكل خليج بنفسج

غلط هالكلام الله يهديج حبيبتي

الدين نصيحة صح وللا لا؟

وقال الرسول عليه الصلاة والسلام ( من رأى منكم منكرا فليغيره بيده، فإن لم يستطع فبلسانه، فإن لم يستطع فبقلبه، وذلك أضعف الإيمان)

هالحديث أختي وهذا اللي درسنا وتربينا وكبرنا عليه

نسمع كلام الله ورسوله وللا كلامج؟

اتقي وخافي الله ياختي،، مب يعني لو أنتي متكشخة وبناتج الكل يكون جي،، فكري شو يالسة تكتبين ترى كل كلمة الله بيحاسبنا عليها (ما يلفظ من قول إلا لديه رقيب عتيد)

الصح صح حتى لو قل العدد والغلط غلط حتى لو الدنيا كلها سوته

فكري بكلامي بارك الله فيج

[ليندااااا]

الله يهدي الجميع
الحياة اختلفت عن زمن اول
واتوقع العلة من الامهات
الحين مشاغل الحياة ومواقع التواصل الاجتماعي. والدوام الطويل ووجود اكثر من خدامة بالبيت
هالامور كلها حدت من علاقة الام مع عيالها وانشغلت عنهم
يرحم زمن اول
كان هم الام كله في عيالها وبس

[تفاحتي]

ليش جي
لو كلنا نفكر ونحب بعض وحتى لو مانعرف بعض
اقل شي تسوينه اذا مابتنصحين تدعين له
ولكن كلمه الحق تنقال


زمان الناس تستحي اتقول انها تسوي العيب
قبل اللي تكشخ ماتكشخ من بيتها تطلع تروح تتعدل ف المول
وتسوي للي تباه
وكانت تلحف نص ويها
لانها تعرف مسويه غلط


احينا لا
صار فخر للوحده تقول انهاتكشخ وما شا الله تعلم بناتها الكشخه

زين حلوه الكشخه بس ل منو اذا شي تأثمين فيه اشحقه
الدنيا يومين
واللي يرضى ربه هو اللي بيرتاح
واللي يدور وناسته وراحته
هو الخسران دنيا واخره



اللي ينكتب هني ترا ينكتب ف صحيفتج
مو لازم تشاهرون بالغلط
اذا بليتم فاستترو
اقل شي تسووونه
واحسن شي لما الواحد يكتب هني او اي مكان
يقول كلام ينصف دينه
مايكون عولمي




الله يهدينا اجمعين

[almal3ka1]

و لله الحمد انا وحده اركز عنفسي و الباجي براحته او بمعنى اصح انا مب نشاده عن الباجي

انا مب متفيجه شراتكم اراقب الناس و استوى انصح الناس

المسلم من سلم المسلمون من لسانه

[تفاحتي]

محد درابج الله يهداج
كل الناس ف حالها
وحده فتحت موضوع والناس تتناقش محد خص حد ف السالفه
كل واحد يكتب بحريته وكل واحد يراقب نفسه وبس اقل شي الواحد يسويه

[Brown Caramel]

وين اللي يسمـــع؟؟؟؟؟؟
الوضع صاير مأساوي
الله يحفظ عيالنا
صدق الدنيا تغيرت ما عادت مثل أول

[غلآ نفسي]

و لله الحمد انا وحده اركز عنفسي و الباجي براحته او بمعنى اصح انا مب نشاده عن الباجي

انا مب متفيجه شراتكم اراقب الناس و استوى انصح الناس

المسلم من سلم المسلمون من لسانه

صحيح محد يراقب حياه الناس

بس ما تدرين يمكن وحده من الامهات الي مب داريه عن عيالها تشوف الموضوع وتحس انها اتسوي شي غلط وترد تهتم ف عيالها

ما تدرين

الذكرى تنفع المؤمنين اذا تبيني اييبلج اياها من الناحيه الدينيه

حتى انا ما يخصني في حد ولا اراقب هذي شو ملبسها بنتها والا هاي عيالها ويا الخدم فالمول

بس مثل هالمواضيع للتذكير فقط


بالتوفيق