عمري قاعد يضيع

[مشكلتي]

السلام عليكم ورحمة الله وبركاته

مشكلتي عمري 25 سنة بحياتي ما انخطبت ولا حد تقدم لي من الاساس ومعظم المزوجات صاروا يخافوا مني ويبتعدوا عني يخافوا اخذ زوجهم وانا بالاساس ما افكر فيهم واخر همي صرت وحيدة ما عندي صديقات ولا شي .
طبعا بيتنا ممنوع نروح الاعراس ممنوع نزور الصديقات ممنوع نسوق ممنوع نطلع
صرت انطوائية ثقتي بنفسي مهزوزة مرة خجولة لاخر درجة ما اقدر اتكلم مع حد اخذ فترة لين اتعود على الناس .بيتنا كل حد اللهم نفسي كل حد يجري ورى مصلحتهم وقفت معاهم وقفات وان صارت لي مشكلة الكل يتخلى عني .

وصلت لمرحلة اقول انا لين متى حستمر على هالطريقة عمري قاعد يضيع وانا واقفة بمكاني
كل ما افكر اعمل تجديد بحياتي الكل يحبط فيني ويحسسوني وجودي بالحياة ماله داعي من الاساسي
وبرغم كل هذا يريدوني مبتسمة ومتفائلة كيف وزني وصل لمرحلة الخطر تعديت السمنة صرت ارمي حزني بالاكل تعبت من وضعي وتعبت من كل شي

المزيد من آخر المواضيع من نفس القسم:

• تزوجت مريض نفسي
• مشكلة حالتي بعد الأمومة
• مشكلة تقدم لي خاطب وافد
• مشكله بنتي
• زوجي تعبني بالضرب كليوم💔
• أواجه زوجي بكذباته ولا اسكت
• ريلي احبه ،، بس ماعرف شو الي حصل
• مشكلتي التعلق الزائد
• رفض ريلي للحمل
• عااااجل مشكلة واجهتني

[المراقبة العامة]

تمت الموافقة
الكلمة الطيبة صــــدقة

[الموهبة]

بوضح لج شي عن اسلوب اهلج كل شي ممنوع هم يحبونج ويخافو عليج

لكن في حل لما يكون عرس تكون الام معاج واطلعي معاها من اجل الناس تتعرف عليكم بدون زيارة الحريم والجيران ما بعرفون بيت فلان فيه بنات للعرس
لكن لما تطلعى مع امج تزوري الناس اكيد اهلج ما بمنعوج مو معناه عدم ثقه لكن من اجل ايجاد حل

[الفجر الساطع]

ابداً بوضح لك اشياء غايبه عنك
كونك مؤمنه بربك وتصلين وبصحه هذي لحالها نعمه يبي لها شكر
ان اهلك حاكرينك بالبيت هذا مفهوم غلط عند بعض الاهالي ان هذا من المحافظه عليهم وهو على العكس لازم يكون فيه لو شوي ثقه في بنياتنا ويعطونك شويه حريه بحدود
نجي لثقتك بنفسك هذا الشي عامليه على انه شي ثمين لاتسمحين لاحد يهز ثقتك في نفسك وثقي انه في الف مين يتمناك لكن النصيب لم يحن وقته ولاتعلمين قد يكون في هذا خيره لك من الله وتكلمي مع امك عن الوضع بهداوه واحترام قولي لها الوضع كذا يتعب نفسيتنا
على الاقل يكون فيه مره بالشهر نزور احد نأجر شاليه وتكون طلعه عائليه تحت عيونكم
وان شاء الله يفتح الله على قلبها
وبعد لو تستعينين بأحد صديقاتك ولو يكون الامر فيه شوي سريه كلمي خطابات وحطي بياناتك عندها مافيها شي ابحثي لك عن زوج صالح واذا احد تقدم لك اسألو عنه والله يكتب لك الخيره
اخيراً لاتهملين نفسك وجسمك اهتمي بنفسج وعاملي نفسك بشويه دلال واذا ناظرتي المرايه قوله وه فديت الزين 😄
والله يرزقك بالزوج اللي يملي حياتج سعاده
ويرزقك بالذريه الصالحه

[الفجر الساطع]

وبعد نسيت اذكر لك شي ترى توك صغيره الحياه قدامك ان شاء الله والعمر كله

[سماءالأفق]

حقق الله لك أمانيك وأحلامك ..كرري لا حول ولا قوة إلا بالله ....,واستشعري قوة الله بصدق وان كل شيئ بأمر الله وبإذن الله تلين لك الأمور وبتشوفين اختلاف..امرك كله بيد الله تمني واحسني الظن وانتظري الخير

[Mrs.Engineer]

و عليكم السلام و رحمة الله و بركاته

اختي في البدايه ما اتوقع ان سبب ابتعاد ربيعاتج عنج هو انهم خايفين منج على ازواجهم مثل ما انتي تظنين .. يمكن ابتعدوا بسبب مشاغل الدنيا و بشكل عام اغلب البنات يوم يعرسون علاقاتهم تخف وااايد مع ربيعاتهم
لا تحطين ف بالج ان الحريم يتحرونج خطافة رياييل .. احنا عايشين بين بنات مب معرسات و اكبر من عمرج عمري ما حسيت ان المعرسات يخافون منهم على ازواجهم
اما اذا ربيعاتج لمحولج او قالولج انهم يخافون على رياييلهم منج فالمشكله فيهم مب فيج .. و صدقيني مثل هالبنات فرقاهم عيد..

اما بخصوص الباقي .. ما اقدر غير اقولج لا تخلين الدنيا اكبر همج و دايما ادعي ربي لا تجعل الدنيا اكبر همي .. صدقيني كل مشاكلج بتهون .. اذا تقدرين كملي دراستج او اشتغلي .. افتحي مشروع ف البيت ، حاولي تشغلين باي شي ..
و صدقيني حياتج انتي بيدج تخلينها حلوه او ممله .، مشاكلج بسيطه و الحمدلله مافي مشكله معقده ممكن تدمر مستقبلج او شي .. غيري نفسيتج و نظرتج للحياه بتتغير حياتج 180 درجه ..

الله يوفقج و يحقق لج امانيج ان شاء الله

[بسمه دبي]

لا تهدمين كل شي بايدج وانتي بعدج صغيره

حاولي تشغلين عمرج

[ام يوسف 82]

صباح الخير
الله يوفقك في حياتك ويرزقك ربي بالزوج الصالح اللي يستاهلك وتستاهلينة ويرزقك ربي بالذريه الصالحة
بعدك صغيره ع فكره ع شان تفكري هادا التفكير اصبري وربي راح يبعتلك نصيبك
خلي ايمانك برب العالمين اكتر من هيك
يسعد اوقاتكم جميعا

[mrs.abk]

بس أبا افهم على أي اساس حكمتي ان خايفين منج على ازواجهم .؟؟ ليش هالفكرة موجودة في رووس البنات أصلا .. خاصة بنات الجيل اليديد .. يعني العيايز فهمنا وضعهم وأفكارهم القديمة بس الجيل اليديد ليش.؟؟



أختي ممكن تلتفتين لنفسج وتشوفين شو المقومات اللي بتخلي حد يخطبني ؟؟ يعني انتي تدمرين جسمج وتترين حد يمدحج ويخطبج ؟؟ تدمرين بشرتج بالسهر والقلق والوسواس وتبين حد يخطبج ؟؟ تدمرين نفسيتج بالافكار السلبية ..

أختي قومي من نومج وجابلي نفسج وكوني ايجابية وادعي واتصدقي حتى على الطيور في حوش بيتكم

والله يرزقج الخير

[Upscale touches]

الله يرزقك بالزوج الصالح

توكلي على الله دائما