ازمة حياتي.. طباخة

[مشكلتي]

أحس فيني غبنة وصيحة .. موضوعي سخيف في نظر البعض كبري في نظري لأنه مسبب لي أزمة ..

أنا موظفة من يوم صغيرة وتقريبا باقي لي 3 سنين للتقاعد ابو 20 سنة خدمة

عرست من 5 سنين وربي رزقني بنتين وحامل

ريلي مطلق وعنده ولدين عايشين معاي ..


اموري طيبة مع العيال ومشكلتي موب معاهم

أنا وريلي بينا انسجام وتفاهم ولله الحمد ..


مشكلتي الحقيقية الحين في اني موب محصلة طباخة تطبخ للعيال ,.. أنا موظفة وما اروم اجهز لهم غدا .. بناتي واولاد ريلي متبهذلين .. وكل ما يبت خدامة وعلمتها طلعت فيها علة ورديتها ..

يبت فلبينية وكانت زينة تمت سنتين وسافرت وقالت خلاص ما ابا ارد بنيت بيت وخلاص ..

يبت سيلانية كانت زينة وتطبخ طبخ عادي بس نفسها في الاكل موب لذيذ ما يبون ياكلون من طباخها

يبت اثيوبية ما تعرف تطبخ مول وتصبرت بس لان ما عندي حد يغسل

كل ما يبت طباخة تطلع ما تعرف ابد .. موب ان تعرف وبعلمها زيادة لا ما تعرف ومهما احاول اعلم تتعلم شيء تضبطه يوم و 10 لا ..

الوحيدة اللي تعلمت الطباخ الفلبينية ..

الاندونسيات يبت طباخة ممتازة قعدت 3 شهور وعقب كشفت عليها شيء ما ارضاه ورديتها ..

يبت وحدة تطبخ بس اسبوع ما تتسبح وما تغسل المواعين اول باول وبيتي خس صراصير


هلكت ابدل البشاكير .. وسالفة الطباخ ما اروم لها الحين ما عندي مكان له ..


تعبت وايد .. أنا حامل وفي رمضان كنت اداوم من الساعة 7 علشان ارد البيت الساعة 1 واسوي الفطور لأن دوم عندي ناس وضيوف والنتيجة المشيمة نازلة وتعب علي ..


الحين انا بتحمل التعب الجسدي .. بس التعب النفسي ..

ريلي هلك نفسيتي من عقب رمضان وهو متذمر .. أيبب الشغالة وأعلمها حتى كوب شاي حليب ما تضبطه او ما تبا تضبطه ..

الصبح يبا ريوق عدل ما اييب راسه سلايس وجبن .. يبا ريوق شعبي .. منو بيسوي له ؟؟؟! حاولت اغير الفكرة رافض .. مقتنع انه هو يبا جيه .. ويبا كم صنف حتى لو ما ياكل ..

يبا فواكه ويبا طبق حار وشاي وعصير .. نظام الفنادق .. بس أنا اقوم واركض اجهز بناتي اوديهم الحضانة ..

الغدا صعب اطبخ .. وتوني سامعة كلام كله تأفف ..

العشا اسوي ومحد ياكله بس اسوي تجنبا للنكد


أنا قلبي يعورني وسمعت كلام عن الاهمال وانتي عيبج بس الطبخ والبيت يباله حرمة تطبخ و و و ..

الحين انا موب طايقة الخدامة وابا اطفرها وجابرني اتحملها .. وكنت ابا مربية اضمن انها تساعدني في نفاسي لكن والله ما اريد الحين الا طباخة تنقذني من هالمعمعة ..

كرهت الطبخ وعفته وطفرت طفرت من الكلام المزعج

تتخيلون لي فوق السنة وانا مشكلتي بس الطبخ .. يقول لي العيال ما ياكلون والعيال اكلهم سم وأنا ما الومه اللي عندي اصلا مالها بارض تغسل صحن علشان يكون لها بارض تطبخ


احس مشكلة سخيفة بس والله مسببة لي ارق وصداع


اللي تعرف لي حل تساعدني ..

المزيد من آخر المواضيع من نفس القسم:

• تزوجت مريض نفسي
• مشكلة حالتي بعد الأمومة
• مشكلة تقدم لي خاطب وافد
• مشكله بنتي
• زوجي تعبني بالضرب كليوم💔
• أواجه زوجي بكذباته ولا اسكت
• ريلي احبه ،، بس ماعرف شو الي حصل
• مشكلتي التعلق الزائد
• رفض ريلي للحمل
• عااااجل مشكلة واجهتني

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[ميميه88]

تمت الموافقه

[سوسو 92]

مافي غير حل واحد هو انج تتركين الشغل وتتفرغين للعيال وزوجج والطبخ، لا تقولين باقيلي 3 سنين واتقاعد واحتاج الفلوس راتبك كله راح عالخدم وعيالك متبهدلين دوري وظيفة ثانية دوامها اقل او استقيلي ولا بيتزوج عليج وحدة تطبخ وراعية بيت.

[Ward-uae]

ما عندج احد مثلا امج او عمتج خبريها تطرش لكم وانتي عطيها مبلغ لمير البيت شرات الدياي والعيش والسمك
او فيه حريم يطبخن لشهر بمبلغ معين دوري في الانستا او في المنتدى اقرب لبيتج
او جهزي اكل انه بالليل تطبخين المرق والعيش علمي البشكارة ولما ترجعين من الدوام طلعي الدياي او السمك وحطيه بالفرن او اقليه
او اشتري قدر الضغط حطي كل الخضرا والدياي مع البهار بنص ساعه بيجهز كل شي
ما أداوم لكن اهتم بأكل عيالي وأحب يكون صحي اذا تبين وصفات سريعة وصحية خبريني

[dxb_love]

اطلبي طباخه او نزلي اعلان فدبيزل للطباخات

في شركات توفر طباخات

جربي طباخهن الي تعيبج خذيها ومع السلامه

لا تعورين راسج وايد

[mouzan7mod]

واعمري عنج ، عندج التاجرات ترومين تسوين أشتراك مع وحدة
تروم تطبخ لج إلي تبينه يوميا بدال ما تعقين فلوسج على خدم ما يتمون إلا بالعافية
و بخصوص غسيل المواعين عندج غسالة الصحون وايد زينة لهالشي
بخصوص تنظيف البيت بالإسبوع 3 مرات بالإسبوع تنظيف شامل
و لازم تعلمين الصغارية على الترتيب و النظافة من هم وصغار

[mrs.abk]

مافي غير حل واحد هو انج تتركين الشغل وتتفرغين للعيال وزوجج والطبخ، لا تقولين باقيلي 3 سنين واتقاعد واحتاج الفلوس راتبك كله راح عالخدم وعيالك متبهدلين دوري وظيفة ثانية دوامها اقل او استقيلي ولا بيتزوج عليج وحدة تطبخ وراعية بيت.

لا حرام شو تفنش.. أنا باقي لي 6 سنين على التقاعد ومستحيل أفكر استقيل كيف هي .. ماللي تعودت على الراتب 17 سنة صعب تقعد تتريا العطايا ..

اللي أشوفها عيالها موب وايد حاسين .. على اساس انها متزوجة من 5 سنين يعني عيالها صغار .. عيال زوجها يمكن اللي حاسين وهذي مسؤولية الزووج يدور خدامة بيرفكت او يوفر لهم أكل ..

بعد موب منطقية سالفة تفنش علشان ما يتزوج عليها وتضيع جهد السنين خوفا من هالشيء .. أعتقد لازم تشوف خيار ثاني ..

[mrs.abk]

أختي صاحبة المشكلة .. أنا أشوف حلول البنات تنفعج في وقت الغدا .. لكن شكلها مشكلتج في كل وقت .. لأن حتى الريوق والشاي شكله ريلج يباج انتي تسوينه ..

الحين بما انج حامل فمافيه حلول غير الصبر شوي .. وحاولي ترقعين الوضع سوي فوالة خفيفة وعشى سنع والغدا ماعليه سوي شيء سريع يوم ترجعين البيت .. لو رمتي او وصي من عند تاجرة ..

بس الريوق لازم تغيرين خدامتج دام انج موب راضية عنها .. أنا عندي مبدأ إذا حسيت عمري تنرفزت من الشغالة مرة كل اسبوع في فترة التجربة اردها المكتب .. ما اروم احط شخص يوترني وينرفزني في البيت ..

رديها اختي وهاتي حد ثاني وربي يسهل لج

[احلى بعفويتي]

مادام عندج تيبين هالبشاكير اختصري المشكله
ويبي ثنتين
وحده للطبخ و الترتيب
وحده للغسيل ومساعدتج بالاطفال

وصح الخدامات يبالهم بارض ويبالهم تطنيش الخدامه موب متيتينه على شغل معين مثل الروبوت
لازم طنشينهم وايد

يبي اندونوسيه عوده حق الطبخ
ويبي اثيوبيه حق الخدمه وانش الله الموضوع يتيسر
واذا على الرياييل تراهم ما يشكرون الا يوم تطلع عيونهم هيج الساعه يعرفون
وانتي لا تمين تحطين اللوم على نفسج تراه يقدر يساعدج
مارعف الرياييل ياكلون ويمشون ايدهم بالطوفه

[ماحد شراتي]

اطلبي طباخه او نزلي اعلان فدبيزل للطباخات

في شركات توفر طباخات

جربي طباخهن الي تعيبج خذيها ومع السلامه

لا تعورين راسج وايد

لا حرام شو تفنش.. أنا باقي لي 6 سنين على التقاعد ومستحيل أفكر استقيل كيف هي .. ماللي تعودت على الراتب 17 سنة صعب تقعد تتريا العطايا ..

اللي أشوفها عيالها موب وايد حاسين .. على اساس انها متزوجة من 5 سنين يعني عيالها صغار .. عيال زوجها يمكن اللي حاسين وهذي مسؤولية الزووج يدور خدامة بيرفكت او يوفر لهم أكل ..

بعد موب منطقية سالفة تفنش علشان ما يتزوج عليها وتضيع جهد السنين خوفا من هالشيء .. أعتقد لازم تشوف خيار ثاني ..

[Upscale touches]

حاولي ادورين وحدة طبخها نظيف ومرتب بالانستجرام وتعاملي معاها
او انك تجهزين من الصبح وترتبي حق اليوم كامل بشكل سلس حيسهل عليج وايد اشياء
او اتعلمي طبخات سهلة ما تاخذ وقت كثير بالطبيخ

حاولي تهدي اعصابك عشان خاطر البيبي الرجال دائما كذا حاولي سايريه
والله يسهل عليج

[المعآني]

حتى لو يلستي في البيت بتنشغلين مع اليهال والنونو اليديد وبيطلع سوالف يديدة يتشكى منها

[بنت الملحم]

الله يعينج والله حاسة فيج والموضوع صعب دام الريال يبى فطور مشكل ملون وعيال وراهم دوام وخدامة مب زينة وانتي ادوامين
الله يعينج والله

[ريم العسووله]

مافي شيء كامل ... اذا بتدققين بكل صغيرة و كبيرة في الخدامات ... ترى عمرج بيضيع و لا راح تحصلين خدامة كاملة 100% و مثالية ..
لازم تتقبلين بعض العيوب الي فيهم او تحاولين تغيرينها ...

عالعموم انا اتفق مع الاخت ورد ... مب لازم تيبين طباخة من المكتب ... في وايد حريم ربات بيوت محتاجات فلوس و بتلقينهم في الانستغرام اكثر شيء ... طباخات و نفسهم حلو بالطبخ و يطبخون لج الي تبينه ... و بعضهم عربيات و يعرفون يطبخون الي يبيه ريلج ... دوريهم و بتحصلينهم ... بدال مب معورة راسج مع الخدم ... بالعكس بهالطريقة اوفر لج ... بس تدفعين فلوس الطبخ .. و اذا محتاجة لخدامة حق شغل البيت غير الطبخ ... انتي في حالتج تناسبج خدامة نظام ساعات ... يعني تيي تنظف و تروح ... في شركات يوفرون خدم نظام ساعات ... حتى طباخات نظام ساعات ... اوفر لج و افضل لج ... موفقة .

[sa7el]

ان شاء الله تحصلين دوري في كل المكاتب بالتلفون ان شاء الله بتحصلين مشكلتج بسيطة ان شاء الله

0553621866

هاي حرمة اسمها كريمة من مكتب ماعرف شو اسمه
قوليلها شروطج ان الطبخ شي اساسي وعطيها مدة وان شاء الله بتحصل
ومكتب متميزة في دبي بعد وااايد اوكي يدورون على شروطج وراعي المكتب اماراتي وايد زينين مال المكتب