الدوام ومسؤوليتي كأم

[zooz.3]

السلام عليكم

شخباركم

عندي موضوع و أبي نتناقش مع بعض عنه و أحصل حلول مرضيه

أنا اداوم و الحين بستقيل .. لأني أبي أقعد مع عيالي ( عندي ولد عمره 4 سنوات بيدخل Kg .. وبنوته 10 شهور )

كنت أوديهم الحضانه .. بس الحين قلت بقعد مع ولدي و أستقبله يوم بيرجع من الروضه .. تعرفون الروضه يخلصون الساعه 12 ونص و دوامي يخلص ساعه 4 .. محد بيستقبله ومابي اعتمد على الخدامه

و غير إن لازم أرقد من وقت عشان اقوم للدوام ... بس الحين ريلي طفر يقولي استقيلي عشان تسهرين معاي ( الصبح دوام و الظهر هو يرقد و انا أقعد مع اليهال ,, و بليل ارقد معاهم من التعب ) ... وهو يسهر وايد حتى لو عنده دوام يرجع الظهر ويرقد انا ماحب رقاد الظهر وايد

أحس لو استقلت بحس بالملل ,, فكرت اكمل دراستي بس بتحوطني نفس مشكلة ولدي و ريلي

و الحين ياني عرض وظيفه ثانيه براتب اعلى و الدوام من 8-4ونص ..ولين أوصل البيت صارت الساعه 5 ونص

ماعرف أقبل الوظيفه أو لا ؟؟ و إذا هي وين أخلي ولدي ؟؟ بنتي بحطها ف الحضانه مب مشكله بس ولدي كيف ؟؟


ماعرف .. أحس ماعرف أختار ,, أنتو شو رايكم ؟؟ لو مكاني شو بتسوون ؟؟

و إلي قاعدات ف البيت كيف تقضون وقتكم ؟؟


في نقطه ماذكرتها .... أنا يوم أشوف البنات يداومون أستانس وأقول هاييل البنات الي يخدمون وطنهم ويسوون شي حتى لو كان الدوام شي بسيط المهم سوت شي لدولتها بهالشغل البسيط ...فأقول لا أنا بعد بداوم و بخدم وطني

المزيد من آخر المواضيع من نفس القسم:

• قرآن كريم
• هل هو شيء عاديٌّ ..أن نموت !!
• لكم وحشة يا عضوات المنتدي وين ايمكم
• عداوة اهلي لي
• محتاجة حليب الابل ضروري بنت تعبانة
• كيف تتحكم با بيتك عن بعد
• اعطوني نصيحتكم بنات
• وهُم قِطَعٌ في آلة الحياة
• اريد سائقة توصيل من ام القيوين لدبي
• السلام عليكم

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[almal3ka1]

دام ريلج يباج اتمين معاه دوم سمعي كلامه

و دامه مب مقصر معاج بشي ليش تعورين راسج

استقيلي الحين و يوم عيالج يكبرون ردي اشتغلي

وجه نظري و شوفي شو الانسبلج

[[..دانــة..]]

محد بينفعج غير شهادتج وظيفتج وأهلج بس!
الزوج ما تأمنين منه خير شر، ودوم القصص والعبر والدروس في الحياة تقولج
أن المرأة لازم تكون مستقلة مالياً وفكرياً،
دام عندج عرض وظيفة اقبلي فيها وتوكلي ع الله
وهاتي حد من هلج خواتج الوالدة او من عمات عيالج يجابلون ولدج لين ترجعين
لا تحاتين ودام ريلج يرد الظهر ليش ما يساعدج ويهتم فيهم بعد لين ترجعين!

وسالفة السهر مب شرط تتقيدين فيها، خلوها للويكند أو كلمي ريلج يعدل جدول حياته
يعني ليش انتي تغيرين جدولج الطبيعي ع جدوله هو؟

لا تتسرعين في الاستقالة،، فكري عدل

[يسوووورة]

السلام عليكم ورحمة الله وبركاته
قال الله تعالى
( وقفوهم إنهم مسؤولون)
يوم القيامة سيسألك الله عن ذريتك
وعن مسؤوليتك اتجاههم

فانظري ماذا ستجيبين
وعلى هذا الأساس قرري

أما بالنسبة لخدمتك للوطن
فأكبر خدمة
أن تنشأئي جيل صالح مأدب مشبع بالحب والحنان والإهتمام
والرعاية


لن ينفعك سوى رضى الله والقيام بحقه
والقيام بمسؤولياتك
(كلكم راع وكلكم مسؤول عن رعيته )
وعندما تكبرين وترين بر أبناءك بك في كبرك
كما بررتيهم في صغرهم
تعرفين أن اختيارك البقاء في المنزل كان هو القرار الصحيح باْذن الله

اما بالنسبة
كيف تقضي وقتك
استمتعي بأبناءك
باللعب معهم بقص القصص لهم
بتناول الطعام معهم بالخروج الى المنتزهات معهم
بضحكهم بشقاوتهم
أوقات ذهبية لن تعود
استثمار وقتك بهم هو اكبر استثمار


وايضاً في وقت الفارغ
امسكي كتاب الله
وابدأي بحفظه

ستجدين بركة وسعادة وخير عظيم باْذن الله

ولاتنسي الاستخارة

[ورقة ناعمة]

انتي واجب عليج تخدمين عيالج وتربينهم أولا وخدمة الوطن هي اهم شي ان نعلم عيالنا على الوطنية وحب الوطن والفداء من اجله ,,,,


اذا حاسة انج مش منسقة بين بيتج ووقتج وعملج وقفي ويلسي بالبيت لين تترتب امورج وردي اشتغلي


لاحقة عالعمل ,,, ترى الدراسة الجامعية مب طول اليوم تقدرين تنسقين مع الجامعة بالاوقات الي تناسبج

[غلآ نفسي]

حتى ونحن نربي عيالنا يالسين نخدم هالوطن ترا

استخيري وشوفي

ودامه ريلج مب مقصر معاج ف عيالج وريلج اولى من الوظيفه

وكل وحده ادرى ب ريلها يستاهل او لا

بالتوفيق

[بنت الملحم]

حسيت انج تبين الوظيفة ومتمسكة فيها بس تبين حد يشجعج ويقولج كملي دوام
لا يا حبيبتي العيال مسؤليتج وحدج وهم بهالعمر محتاجينج اكثر من اي شخص بالدنيا ونفس ما قالولج الاخوات تربية عيالج هي بحد ذاتها خدمة للوطن
وريلج شكله حس بالتقصير من تجاهج صوبه انتبهي لهنقطة زين عشان ما تيين بعد فترة وتقولين زوجي يخون
انا اشوف لو تكعدين بالبيت واجابلين ريلج وعيالج ابرك
وانتي لج الاجر وكله عشان مصلحة بيتكم
عجبني كلام الاخت يسوووورة ياليت تركزين عليه
وربي يوفقج

[ام حمده 77]

اختي انت بداية الطريق وبامكانك تعديل امورك

بتغيير وظيفتك بساعات عمل اقل مثلا

بس نصيحة لك لا تستقيلي

الوظيفة او الشهادة ضمان لك

كلنا عندنا بيوت وعيال وزوج بس الحمدلله مرتبين امورنا

ومستحيل استقيل بس عشان اسهر مع زوجي

اللي ما اضمنه انه بسهر معاي طول عمره

بعوضه بنهاية الاسبوع وبالاجازات وبعوده يشيل معاي مسؤولية العيال وتربيتهم

وبخصوص خدمة الوطن اكيد نحن نخدم وطنا ونخدم انفسنا ونخدم عيالنا

واللي تفكر بس بالزوج ورضاه وخيانته ماراح تنجز شي في حياتها

عندك اكبر دليل الوافدات في بلادنا يشتغلن صبح ومساء وما شاء الله

ظهروا عيالهم دكاترة ومهندسين وبدون خدم

الله يوفقك اختي فكري عدل ورتبي اوراقك بنفسك بالي يريحك


ودمتم سالمين

[يسوووورة]

تعليق على كلام اختي السابقة

طلعوا ولادهم دكاترة
وبدون خدم


هنا النقطة
لان ماعندهم خدم
فتعودوا على تحمل المسؤولية
الكبير يرعى الصغير
والأبناء يساعدون الام
والام مضطرة ترعى اولادها ولو كانت متعبة
كله منهم وفيهم ونفس التربية


اما وجود الخدم بذاته مشكلة
الخدم يربون الأبناء بدل الام
ويعودون الأطفال على الكسل والاستهتار
وتنحصر عند ذلك مسؤولية الام الحقيقة
على توفير الماديات لأبناءها لتعويضهم عن فقدها
وهنا تزداد المشكلة بشكل أكبر
فالوافدون يعودون اطفالهم على الحفاظ على المال والتوفير وغيره

وايضاً نهائيا
ليس معيار الدكتور والمهندس
هو النجاح في التربية

القضية قضية
قيام بمسؤوليتنا التي أعطاها الله لنا
طالما قررنا الزواج والإنجاب
يجب ان نكون قدر المسؤولية
التي ستحاسب عليها

[ام الدحمي]

اذا ريلج راتبه حلو وكريم وياج عيالج اولى بج الله يبارك لجفيعم

[Ward-uae]

هالشي راجع لج اذا انتي مقتنعه وتبين تربين عيالج بتعرفين كيف تنظمين حياتج 
بالنسبة لي صعبه قبل كان تفكيري اني بدرس وبشتغل وكل شي بيكون عادي لكن بعدين عرفت انه الضنا غالي وفلوس الدنيا ما تقدر تعوضهم عن الام عيالي صاروا حياتي
أتنوم في المستشفى وعقلي وقلبي عندهم ما اعرف انام وما ابوس واحد واحد وأحضنه اتريا متى ارجع البيت
آخر مره ربيت بنتي مع انها كانت قريب بتكمل خمس سنين حضنتني وتمت تشاهق من الصياح تقولي متى بترجعين البيت ويانا
ولدي مع انه بعد شهر بيكمل اربع سنين يقولي محد يعرف شو أحب آكل واشرب غيرج يعطوني أشياء ما احبها حلويات وشبيسات لاني معلمتنهم انه هالسوالف تسوس الأسنان وتخليهم ضعيفين
الصحة صرت اهتم بنفسي اخاف يقولون لي عندي نقص فيتامينات او شي يحتاج اني أتنوم في المستشفى فصرت اهتم بنفسي وصحتي ونفسيتي
انتي ادرى باللي يناسبج مع انه ساعات دوامي لين 2:30 وراتب الحمدالله مع امتيازات وبعد فترة قالولي اني بترقى لاني طورت القسم وحاولوا وياي يرفضون استقالتي لكن كنت اشوف المستقبل هو تربية عيالي ان شاء الله برد اشتغل لكن بعد ما اطمن عليهم ويعتمدون على نفسهم 
استخيري مره ومرتين وبتعرفين اذا امورج تيسرت خلاص ما تيسرت سبحان الله بيكون لحكمه وكملي لكن حاولي تأخذين بالاسباب وتوفرين لعيالج احد ثقة يهتم بهم

[ام حمده 77]

تعليق على كلام اختي السابقة

طلعوا ولادهم دكاترة
وبدون خدم


هنا النقطة
لان ماعندهم خدم
فتعودوا على تحمل المسؤولية
الكبير يرعى الصغير
والأبناء يساعدون الام
والام مضطرة ترعى اولادها ولو كانت متعبة
كله منهم وفيهم ونفس التربية


اما وجود الخدم بذاته مشكلة
الخدم يربون الأبناء بدل الام
ويعودون الأطفال على الكسل والاستهتار
وتنحصر عند ذلك مسؤولية الام الحقيقة
على توفير الماديات لأبناءها لتعويضهم عن فقدها
وهنا تزداد المشكلة بشكل أكبر
فالوافدون يعودون اطفالهم على الحفاظ على المال والتوفير وغيره

وايضاً نهائيا
ليس معيار الدكتور والمهندس
هو النجاح في التربية

القضية قضية
قيام بمسؤوليتنا التي أعطاها الله لنا
طالما قررنا الزواج والإنجاب
يجب ان نكون قدر المسؤولية
التي ستحاسب عليها

اختي انا ام لسبع ابناء

وموظفة قبل ما اولدهم كلهم


وعندي دائما خدامتيين

بس عيالي السبعة ما رميتهم على الخدم ابدا


ادوام ويكونوا بالحضانة او عندي والدتي الله يرحمها

وعائلتي كل الحريم موظفات خواتي وحريم اخواني وحمياتي وحريم حمياني


الحمدلله ربيتهم على تحمل المسؤؤلية


وانا فخورة بيهم لانهم حفظت القراءن بالاضافة الى تفوقهم الدراسي وحسن تربيتهم


واعتقد اني قد المسؤولية وايد حريم مثلي واحسن مني وصلوا لاعلى المناصب


درسنا وتعلمنا عشان ننفع نفسنا وننفع دولتنا


هذا اللي تربينا عليه في بيت اهلنا


المراة تقدر تتحمل المسوؤلية وتدير بيتها وعيالها


وانا حبيت ارد عليك عشان تغيير نظرتك السلبية مب كل وحدة توظفت يعني رمت مسؤؤليتها

في ربات بيت اسواء تكون من موظفة ام

[حرم الحميري]

ماجوفج متضايقه من دوامج ليش تستقيلين العكس دوامج سند لج انا نفس حالتج ولدي الحين عمره 7 شهور وحاطتنه عند الخدامه وقريب بدخله الحضانه عشان يتعود عاليهال الدنيا جي ماشيه الحين انا ريلي يوصل 2 انا دوامي يخلص 3 واوصل اربع ومن اوصل اشل ولدي نتغدا ونرقد لين ست او سبع وفليل نسهر عادي انا وريلي نرقد 2 ونش الصبح مصحصين وثانيا فكري بعيالج صح ريلج يشتغل بس بعد اليهال مصاريف راتبج يخفف عليه شوي واذا جانج تبين تستقبلين ولدج حطي كيمره ومن يوصل عطول رمسيه فيديو انا جي مسويه كيمرتي فويه الخدامه وارمس منها بعد ما يحتاي ادق وقعدت البيت ممله لو تقولين يقعد بجابل عيالي بتلاحضين عمرج خملانه ومالج خلق لشي وربيعاتج يداومن ومالهن وقت لج لانج فاضيه وريلج قعدي وياه يعني اسهري حاولي جربي ترومين تتحملين ولا لا شغلو فلم ارمسو فشي لانه اذا بتمون ساكتين بتملون وبترقدين
وفكري فباجر العيال كل ماكبرو زادت مصاريفهم الريال كم بيحط وانتي اصلن لج مصاريف راتبج عالاقل يسد مصاريفج نحن الحريم وايد نصرف والبيت والعيال نفر مصاريفهم عالريال والحمدالله مب مقصرين دام فيه تفاهم

[يسوووورة]

جزاك الله خيرا اختي ام حمده على كلامك الجميل
ماشاء الله على ولادك
أهم شي في الدنيا القران
أظن ان الله حفظهم لك
ببركة القران الذي كنت سببا في حفظهم له
ولكن كم من الأمهات تفعل ذلك ?


إهمال الأطفال موجود لدى الموظفات وغير الموظفات


انا لست ضد الوظيفة بحد ذاتها

انا أتكلم عن موضوع الحياة بشكل عام

قال الله تعالى
(وما خلقت الجن والإنس إلا ليعبدون )
والعبادة فسرها العلماء
انها
اسم جامع لكل ما يحبه الله ويرضاه

اي اننا خلقنا فقط لنرضي الله تعالى

فهنا
يبدأ الموضوع
كل شخص يجب ان يقيس كل شيء يفعله في حياته
هل هذا مايرضي الله ؟

طبعا كل شخص له مهمة ومسؤولية في هذه الحياة
يرضي الله من خلاها

حتى لا نتشعب في الموضوع كثيرا
ندخل في دور المرأة
وبالذات بعد أن قررت الزواج والإنجاب
أصبحت مسؤوليتها تختلف عن التي لم تتزوج بعد

قال رسول الله صلى الله عليه وسلم

قالَ رَسُولُ اللَّهِ صَلَّى اللَّهُ عَلَيْهِ وَسَلَّمَ: إِذَا صَلَّتْ الْمَرْأَةُ خَمْسَهَا، وَصَامَتْ شَهْرَهَا، وَحَفِظَتْ فَرْجَهَا، وَأَطَاعَتْ زَوْجَهَا, قِيلَ لَهَا: ادْخُلِي مِنْ أَيِّ أَبْوَابِ الْجَنَّةِ شِئْتِ))

وقال
(والزوجة راعية في بيت زوجها ومسؤولة عن رعيتها)

وقال تعالى
(عَسَىٰ رَبُّهُ إِن طَلَّقَكُنَّ أَن يُبْدِلَهُ أَزْوَاجًا خَيْرًا مِّنكُنَّ مُسْلِمَاتٍ مُّؤْمِنَاتٍ قَانِتَاتٍ تَائِبَاتٍ عَابِدَاتٍ سَائِحَاتٍ ثَيِّبَاتٍ وَأَبْكَارًا)

وقال
(وقرن في بيوتكن ولا تبرجن تبرج الجاهلية الاولى )


فالقضية قضية مبدأ ومسؤولية وأمانة

وهنا يأتي دور كل واحدة ان تختار طريقها الذي يرضاه الله لها

وبعدها لا تلتفت رضي من رضي وسخط من سخط
فان قررت البقاء في البيت لرضى الله
لايهمها زوجها قدر لم يقدر خان لم يخن

وان قررت العمل وهي متأكدة ان هذا مايرضي الله
فلايهمها ايضا ردة فعل المحيطين


ولكن أنا برأيي الشخصي ان الدنيا أخذ وعطاء ومسؤوليات ودار الاختبار والعمل والصبر
فكلنا نحب ان نتوظف ونخرج ونستقل ماديا ونثبت ذاتنا و كل الايجابيات الموجودة في الوظيفة
ولكنني اعلم ان المرأة دورها الأكبر في المنزل
ومن ترك شيئا لله عوضه الله خيرا منه

وكل إنسان يجب أن يفقد شيئا ويحصل على شيء
مستحيل ان يحصل على جميع الأمور
الوظيفة ، الأمومة ،الراحة النفسية والجسدية والمادية ، بر الأبناء ،رضا الزوج ، قرب الأبناء الاستقرار في البيت ووو

يجب ان يحصل على البعض ويخسر البعض

وهنا يأتي دور كل واحدة
لتختار
على ماذا تريد ان تحصل
وما الذي ستفقده مقابل ذلك

وهنا يرجع الموضوع لاختلاف السخصية والثقافة والبيئة والتربية الدينية واختلاف الاهتمامات والأولويات

لذا هذا الموضوع لن يكون فيه قرار معين

كل واحده ستختار طريقها الذي
ترى بانه هو الذي يرضي الله به عنها
فتكون قامت بما خلقت من أجله

[بنت الملحم]

ماشالله عليج يسوووورة كلامج درر