التجمع الثاني لكروشات ( 7 & 8 & 9 ) بإذن الله تعالى

[ريم العسووله]

توني أشوف التجمع ... الله يسهل على الصامدات و مبروك للوالدات ...

أنا ولدت بداية شهر ثمانية الحمدلله ... و هذي أول ولادة لي ... يبت ولد و سميته تميم ^_^ الله يجعله من الصالحين ♡

و اللحين أنا أتمنى أنام 3ساعات متواصلة فقط ههههههه الحمدلله على كل شيء ♡♡♡

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[ريم العسووله]

شو يعني مثيبه.؟؟
بشوف شو بيعطونها يوم بروح المستشفى؟! والله تغمضني وايد
بسالكن: منو استوى بها اكتئاب الولادة؟ اشوف ساعات اتيني هفات كابه والله واتعوذ من ابليس واحس بضيقه وايد..؟؟

بخصوص أكتئاب الولادة ...

من وجهه نظري للإكتئاب عدة أسباب ...

أول شيء أن بعض  الحريم و ليس الكل بمجرد ما يي لها النفاس و انها ما تصلي و لا تصوم و لا تقرا القران خلاص تنسى الدين و حتى الاذكار و الادعية تنساهم !!! تخيلوا الوحدة منهم أربعين يوم ما تذكر الله شلون ما يصيدها اكتئاب ؟!

فنصيحتي عشان تتجنبون الاكتئاب لا تنسون ذكر الله ... و النفاس ما يمنع الوحدة انها تقرا الاذكار و الادعية او حتى السور الي هي حافظتهم او حتى من على شاشه فونها بدون لا تمسك المصحف ... او تسمع القران او المحاضرات و تفتح القران و هي نايمة كل هالامور ما تمنعج انج تهتمين بالرضيع لانج تذكرين الاذكار بلسانج ... و تسمعين القران بأذونج و ربنا قال الا بذكر الله تطمئن القلوب ♡♡♡



النقطة الثانية قد يكون سبب الاكتئاب زيادة الوزن و تغير الشكل ... الوحدة تكون متضايجة من وزنها الي زاد و شكلها الي تغيير و تدخل في حالة اكتئاب حادة ...
نصيحتي لها انها ما تهتم لهالشيء وايد و تتذكر ان مب هي بروحها الي زاد وزنها و تغير شكلها ... اغلب الحوامل نفس الحالة ... انسان بني ادم قاعد يتكون في احشائج لمدة تسع شهور ... لازم يتغير وزنج و شكلج هالشيء طبيعي ... و تأكدي أن الشكل ما يبقى مثل ما هو ... و راح يرجع شكلج السابق الي قبل الحمل بمجرد ما يمر ثلاث اسابيع من الولادة و راح تلاحظين ويهج صغر و صار حلو و خشمج صغر و كل شيء بدى يتعدل و يرد مثل ما كان ...
و بخصوص الجسم استغلي فترة النفاس بأنج تاكلين اكل صحي و مدر للحليب بنفس الوقت و بتلقين جسمج قاعد يضعف و اعتمدي عالرضاعة الطبيعية لانها تنزل الوزن بشكل رهيب ... و لا تحاتين بطنج ... جذي جذاك راح ينزل و تخف النفخة الي فيه ... بس لازم تشربين أشيه دافية و تسوين مساج و أفضل زيت لهالأمور هو زيت الزيتون ... متوفر و موجود بكل مكان ... و اذا ما عندج وقت تروحين النادي او تطلعين برع البيت تسوين رياضة ... ايبي جهاز رياضي في حجرة نومج ... و استغلي فترة نوم الرضيع بانج تسوين رياضة حتى لو نص ساعة باليوم ... و افضل جهاز رياضة لعقب الولادة هو الاوربتتراك ... ينقص الوزن و يشد الجسم بنفس الوقت ...


النقطة الثالثة ... صياح الياهل و طلباته ليل نهار ... و قلة النوم ...
من المعروف ان اول ثلاث شهور من عمر الرضيع غالبا ما تكون صعبة عالأمهات خصوصا الامهات الجدد و الي  ما تعرف تتصرف مع الرضيع ...
طبعا الياهل توا مولود و متغير عليه الجو و يحتاج حليب كل ساعتين و ما يميز الليل من النهار ... يرقد اي وقت و يقوم اي وقت .. غير تغيير حفاظته و ملابسه و الحرص على تغطيته و ابعاده عن الامراض و البرد الخ الخ ...

 وسيلته الوحيدة للتواصل مع امه هو الصياح ... يبي حليب يصيح ... يبي تغيرين له حفاظته يصيح ... يبي ينام يصيح ... بردان يصيح ... حران يصيح ... بطنه غازات يصيح ... مريض يصيح ... الخ الخ

هالصياح و الطلبات المستمرة تسبب لبعض الامهات الاكتئاب و بعضهم يصيحون ... انا عن نفسي بما انها اول ولادة لي كنت اصيح خصوصا لما تطلع الشمس و انا بعدني مب نايمة و ولدي يصيح اقعد اصيح معاه و كشتي كشة : (
بس اتضح اني ما عندي سالفة اصيح ... لان ولدي كمل عمره شهر و لاحظت ان  نومه بدى ينتظم نوعا ما و نظمت وقتي معاه و تعودت على طلباته و اللحين كل شيء تمام الحمدلله و احصل وقت ارقد و ارتاح ...
نصيحتي لمن تمر بهحالة من الاكتئاب انها تصبر لأن الياهل عموما بمجرد ما يمر ثلاث شهور يبتدي نومه ينتظم و طبعا هالشيء يختلف من رضيع لرضيع و لكن في النهاية كلهم ينتظم نومهم و انصحها انها تنظم مواعيد الحليب و تنظيف الرضيع و انها ترتاح الفترات الي يكون فيها الرضيع نايم ... حتى لو ما كان فيها رقاد تحاول ترتاح و تسترخي ... و الايام تمر و الياهال ما شاء الله بسرعة يكبرون و يقل صياحهم و يتعدل نومهم ... و اذا عندج حد مستعد يساعدج خير و بركة استعيني فيهم انهم يساعدونج ... و تذكري بأنج مأجورة بإذن الله ... و ان هذا ياهل ما يفهم شيء و انج في يوم من الايام كنتي مكانه و تعبتي امج ^_^

- - - Updated - - -

النقطة الأخيرة و المهمة جدا و الي انا شخصيا و من وجهه نظري الخاصة أشوفها هي السبب الأول و الرئيسي لحالات اكتئاب ما بعد الولادة ...
الا و هي حنة و رنة النسوان و فلسفتهم الزايدة و كل وحدة تسرد لنا بطولاتها في الحمل و الانجاب خصوصا اذا كانت اول ولادة لج يقعدون على راسج...
يعني الوحدة تولد و تقعد ببيت اهلها في حجرة خاصة لمدة أربعين يوم لا تطلع و لا شيء و ريلها يمر عليها مدة ساعة أو ساعتين و أيام ما يي فيها و الحجرة وقت العصر متروسة نسوان و حريم يزورونها و ازعاج و جدور الحسو و العصيدة و الحبة الحمرة و يعلفون فيج ليل نهار ... و اذا رضعتي ولدج صناعي قاموا عليج الدنيا و ما قعدوها و اذا مسكتي ولدج خطأ يصارخون و يخرعونج  ... راسه راسه !!! ايده ايده !!! ريله ريله !!! يوقفون قلب الواحد من صراخهم الياهل ما بيصير له شيء الا من ورى صراخهم و مبالغتهم في التهويل و التخويف ... و الوحدة تبي ترضع من صدرها ما تقدر تاخذ راحتها بمجرد طلعت صدرها كل منهم يطالع و يحرجونها ... و الاخس يوم يطلبون منج ترضعين طبيعي و هم يالسات !!!!!
 و غير بخور الجاوي و الحبة السودة و اليانسون و و و ... الوحدة كيف ما تبونها تتخبل و تصير مينونة من هالأجواء ؟؟!!

يمكن بعض الحريم يحبون هالأجواء و انا احترم رايهم و يمكن هالاجواء تعتبر جزء من عاداتنا و تقاليدنا و انا احترم هالشيء كذلك و لكن عن نفسي ما احبها ابدا و نبهت امي قبل ولادتي انها ما تسوي لي هالاجواء لانها تسبب لي الاعصاب و الاكتئاب و الضغط و النرفزة ...

و الي مثلي ما تحب هالأجواء و تسبب لها الاكتئاب نصيحتي انها تسوي حفل استقبال المولود في يوم واحد تعزم فيه كل النسوان و صديقاتها و تقدر تسوي العقيقة في نفس هاليوم بهالطريقة راح ترتاحين بدال ما كل يوم حد يزورج و انتي تعبانه ... خليه في يوم واحد

و بخصوص الرضاعه ما عليج من حد سوي الي يريحج تبين ترضعين ولدج طبيعي تبين ترضعين ولدج صناعي تبين ترضعين ولدج رضاعة مختلطة انتي حرة بهالشيء و الي يقول لج حليب الام يعطي مناعة هالكلام غير صحيح طبيا ... الرضيع ينولد بمناعة طبيعية ... و نص الياهال يشربون حليب صناعي و ما فيهم الا العافية ... و الي يقول لج حليب الأم يقوي الشخصية هاي كلها خرافات انا عن نفسي شربت حليب صناعي لأسباب صحية منعت امي الله يطول بعمرها انها ترضعني طبيعي و صحتي و شخصيتي مثل الحديد و الحمدلله من صغري الناس يشهدون بذكائي ...الذكاء وراثي ماله خص حليب الأم ... طبعا كلامي هذا مب معناته اني اشجع على الحليب الصناعي و لكن كلامي موجهه لكل وحدة منعتها الظروف او اسباب صحية انها ترضع ولدها طبيعي بأنها لا تخاف و لا تحاتي صحة ولدها و لا تقعد تحسس نفسها بتأنيب الضمير و تكتئب من ورى هالموضوع ...

و بخصوص اكلات الولادة الشعبية اذا ما كنتي تحبينها لا تجبرين نفسج و تاكلينها خصوصا انها مشبعة بالسعرات الحرارية ... الاجنبيات يرضعون طبيعي بدون هالاكلات ... اذا تبين صدرج يدر حليب اسهل طريقة هو اكل ملعقة كبيرة حلبة مطحونة صباحا و مساءا و اذا تبين رحمح ينظف عليج بشراب الدارسين او الحبة السودة و الزنجبيل ... بدون اللجوء لهالاكلات ...

و اخيرا بما انج والدة مب شرط و لا قانون انج تقعدين ببيت اهلج اربعين يوم ... بين اربع طوف هالشيء يسبب اكتئاب صراحة ... نصيحتي انج تطلعين لو مرة في الاسبوع لمدة ساعتين ... و حطي الرضيع عند امج او خواتج في الايادي الامينة ... و طلعي غيري جو ... حتى لو كان نفاسج غزير  ... مب شرط تبتعدين   ... طلعي حتى لو تروحين تشربين لج عصير او كوفي ... روحي عالبحر و استنشقي الهواء العليل و سوي تمارين التنفس العميق صدقيني كل هالامور تخفف الضغط عنج بصورة رهيبة ..  و اذا كنتي على وفاق مع زوجج فضفضي له و اقعدي معاه او اطلعي معاه او خليه يبات عندج عادي ... انا عن نفسي خليت ريلي يبات عندي اسبوعين و ساعدني وايد خصوصا نص الليل كان يمسك الياهل عني عشان ارتاح شوي ... و طلعت معاه و غيرت جو و ارتاحت نفسيتي وايد  ... و اذا زوجج مب من هالنوع او مب موجود مسافر مثلا ... مب شرط زوجج اي انسانه تحبينها و ترتاحين لها و دمها خفيف و لها بارض للياهال و تحبهم ...خليها تساعدج و تعاونج و ترفع معنوياتج ... خليج الناس الي ترتاحين لهم و يرفعون معنوياتج كل يوم يزورونج و لا تنسين المساج الي يريح الجسم و الاعصاب ...

و نصيحة أخيرة خواتي في الله ... مهما كانت الأسباب الي تسبب لج الاكتئاب ... و غيرها من الاسباب كمشاكل مادية او اجتماعية او خلاف مع الزوج او او او ...
اتقي الله في طفلج الرضيع لا تفقدين عقلج و تطلعين حرتج فيه وتضربينه .. لان في امهات يعميهم الشيطان و يضربون الرضيع ... تذكري هالتصرف تؤثمين عليه و هالرضيع نعمة من رب العالمين و غيرج يتمنى ظفر ياهل ... و هالرضيع لا حول له و لا قوة و ضعيف ما يقدر يدافع عن روحه فلا تستغلين ضعفه ... خافي الله فيه


اتمنى خواتي فدكم بهالكلام و تقبلوا مروري ♡♡♡

[ام نهييان]

توني أشوف التجمع ... الله يسهل على الصامدات و مبروك للوالدات ...

أنا ولدت بداية شهر ثمانية الحمدلله ... و هذي أول ولادة لي ... يبت ولد و سميته تميم ^_^ الله يجعله من الصالحين ♡

و اللحين أنا أتمنى أنام 3ساعات متواصلة فقط ههههههه الحمدلله على كل شيء ♡♡♡

الحمدلله ع سلامتكم لو انها متاخره 😅

عادي فديتج هذي معاناتنا كلنا بعد ياحيج اول بيبي من ينام نامي رتبي رقادج ع رقاده مش نحن البيبيات ينامون الصبح وعيالنا الباقين ينشون الصبح مانقدر نرقد 😩😭

[UAE prestige]

الحمدلله ع سلامتكم لو انها متاخره ��

عادي فديتج هذي معاناتنا كلنا بعد ياحيج اول بيبي من ينام نامي رتبي رقادج ع رقاده مش نحن البيبيات ينامون الصبح وعيالنا الباقين ينشون الصبح مانقدر نرقد ����

سبحان الله
وانتي الصادقة وصف دقيق للحالة اللي تصيبنا

[Noofish]

السلام عليكم
الحمدلله ربيت بطلق صناعي في اول شهر ٩ يبت بنوته و سميتها شوق وهذي اول ولادة لي
بالنسبة للدم يوم يي وايد ويوم ابدا ما يي بس بدون الام الحمدلله ، اما الخياطة وايد تلعوز و تحچني مرات ولما امشي وايد
و الاگتئاب ياني مرة وحدة بس تميت اصيح بدون سبب الحمدلله ماتم وايد لاني مواضبة على اذكار الصباح و المسا و اذكار النوم


والحمدلله على سلامة الي ربو و الفال للي ينتظرن

[ام نهييان]

السلام عليكم
الحمدلله ربيت بطلق صناعي في اول شهر ٩ يبت بنوته و سميتها شوق وهذي اول ولادة لي
بالنسبة للدم يوم يي وايد ويوم ابدا ما يي بس بدون الام الحمدلله ، اما الخياطة وايد تلعوز و تحچني مرات ولما امشي وايد
و الاگتئاب ياني مرة وحدة بس تميت اصيح بدون سبب الحمدلله ماتم وايد لاني مواضبة على اذكار الصباح و المسا و اذكار النوم


والحمدلله على سلامة الي ربو و الفال للي ينتظرن

الف الحمدلله ع سلامتج انتي والبنوته وتتربا فعزكم ياربي
ليش عطوج طلق صناعي واتريوو الويع بروحه اييج ؟؟

ماعليه حبيبتي حاولي دوم اتجففين المنطقه وتغسلي بماي وملح عشان تبرا بسرعه ولاتمشين وايد اسبوعين وبيخف الويع مكانها

الصياح بتصيحينه يوم مابترومين تنامين الليل 😅

[Noofish]

الف الحمدلله ع سلامتج انتي والبنوته وتتربا فعزكم ياربي
ليش عطوج طلق صناعي واتريوو الويع بروحه
ماعليه حبيبتي حاولي دوم اتجففين المنطقه وتغسلي بماي وملح عشان تبرا بسرعه ولاتمشين وايد اسبوعين وبيخف الويع مكانها

الصياح بتصيحينه يوم مابترومين تنامين الليل ��

الله يسلمج حبيبتي ام نهيان
عطوني طلق لان البنت نموها وقف في الرحم و مب قاعده تكبر
الحمدلله بنتي لين احين مب صياحة الله يستر عقب

[ام نهييان]

الله يسلمج حبيبتي ام نهيان
عطوني طلق لان البنت نموها وقف في الرحم و مب قاعده تكبر
الحمدلله بنتي لين احين مب صياحة الله يستر عقب

اها حبيبتي والله

هههه انشالله ماتغدي صياحه

[Queen.F]

هلا الغاليه ...ممكن اعرف في اي اسبوع ربيتي وكم كان وزنها ...انا عندي نفس الشيء ...بس ما خبروج شو سبب توقف نموها....

- - - Updated - - -

الله يسلمج حبيبتي ام نهيان
عطوني طلق لان البنت نموها وقف في الرحم و مب قاعده تكبر
الحمدلله بنتي لين احين مب صياحة الله يستر عقب

هلا الغاليه ...ممكن اعرف في اي اسبوع ربيتي وكم كان وزنها ...انا عندي نفس الشيء ...بس ما خبروج شو سبب توقف نموها....