أخوي وحرمته المنافقه

[مشكلتي]

أخوي العود الى نحن ساكنين عنده كان معرس قبل وطلق وحسبي الله على حرمته النصره خربت سمعتنا وقالت أنه نحن راعيات مشاكل وخراب بيوت وأمي سبب طلاقها عسبت جي مخد من العيله قام يتقدم لنا مهم أخوي راح عرس على وحده لبنانيه بدون معرفتنا وبعد شهر العسل يابها وبدت المشاكل وياها أولا لاتحترمنا ولاتحترم أمي تقعد تتمشى في البيت بملابس قصيره وضيقه والبيت فيه أخواني الاثنين مايداومون وماتستحي منهم وتقعد تشيش في طابقها وأمي مره شافتها ورمستها بأدب قعدت تصارخ عليها وتقول لها ماخصج وماعرف شو بأسلوب خايس راحت أمي ردت عليها بكلمه من ضيقه لمت اغراضها وتريت أخوي عند باب وهي تصيح قالت له بطلع من البيت وأمكم تقذفني أخوي صدقها طبعا تم يغلط على أمي ويقول لها شردتي أولى وتبين تطلعين ها مسكينه بعد وازنه بذبح عمري عسيت ترتاحين وليد سوالف على ها المنافقه في رمضان كان فطور عندنا ريايل خواتي ونحن وعيالهم وكلنا بحجابنا الى هي نزلت بفستان مفصل جسمها وعطرها وتقعد تدلع على اخوي قدامنا والله شيء واحد يستحي يكتبه عقب أختي ريلها قال لها ليش أنتي مب نفسها وماتهتمين وروحي سوي حمام مغربي عسبت تبيضين جي أختي قالت له ها كله سيلكون ومب طبيعي وانه هي دوم تس وي مغربي بس ها لونها وعايبنها من هذاك اليوم وريل أختي متغير عليها وكل ما اي بيت عينه على الى ماتستحي
والمشكله الاكبر اخوي كان مواعد امي يسفرنا سنه لي لندن ويب حق أختي الى بالجامعه شنطه ماركه وأمس بكل بساطه يه حق أمي وقال لها ماعندي بيزات وتذاكر غاليه انا شايل بيت بروحي ويتفلسف و اونه خلي عيالج يداومون وقطع مصروف ها شهر عن اخواني حسبي الله وقال لو ما اشتغلو بيبيع سياراتهم الى هو شراها لهم والله اخواني مساكين يعني هم حصلو شغل وقالو لا وهو مجبور فينا عنده خير ومطلع لي حرمته سياره بنص مليون الحين يت عينه ع اخواني ومصروفهم نحن مصدومين وحاسين انه مسحور مانعرف شنسوي امي من امس تصيح من وين بتصرف على اخواني

المزيد من آخر المواضيع من نفس القسم:

• تزوجت مريض نفسي
• مشكلة حالتي بعد الأمومة
• مشكلة تقدم لي خاطب وافد
• مشكله بنتي
• زوجي تعبني بالضرب كليوم💔
• أواجه زوجي بكذباته ولا اسكت
• ريلي احبه ،، بس ماعرف شو الي حصل
• مشكلتي التعلق الزائد
• رفض ريلي للحمل
• عااااجل مشكلة واجهتني

[المراقبة العامة]

تمت الموافقة
الكلمة الطيبة صــــــــدقة

[ام نهييان]

حبيبتي الريال مطلق وحاط فباله انكم سبب طلاقه الاولي ف عدو نفسكم ضيوف عنده لا تقولون له حرمتك سوت او فيها و فيها ما يخصكم هو و حرمته ينيازوون

واخوانج لازم يدورون شغل اي شغل لين متى بيصرف عليهم حتى انتو البنات اشتغلو ولا اتمون تحت رحمته اليوم يعطيكم باجر ماتعرفوون شو بيستوي

الله يهدييه ويصلح باله

[Upscale touches]

الولد توه مزوج جديد وحابب يعمل حاله شخصية عند زوجته

قعدوا قعدة مع اخوكم وكلموه بشكل هادي وضحوا لازم يحترم امه ويخليها بعيونه .
الافضل اخوانك يتوظفوا ويهتموا بامك وفيكي واخواتك هذا الحل الانسب بالوقت الحالي .


خليكم بعيدين عنها عشان ترتاحوا من المشاكل وعورة الراس
زوج اختك كيف من الاساس يقعد بمكان وفي حرمة غريبة عشان كذا حيقد يقارن ويتغير




الله يسهل عليكم ويساعدكم

[soso9999]

خليه يأجر شقة صغيرة حق زوجته و يعيش معها و يصرف عليكم

[وجدان الفجر]

اختي أتمنى تاخذي كلامي برحابة صدر وما تزعلي منه.
إن الله لا يغير ما بقوم حتى يغيروا ما بأنفسهم .
حرمة أخوج غريبة وأنتوا كان لازم ترحبوا بها وتكسبوها بالود من البداية وبعدها تنصحوها بأسلوب راقي وطيب , لو سويتوا كذا أكيد كانت بدور على رضاكم وبتحرم الدين و العادات والتقاليد وبتتمسك فيها حتى .
أنت تقولي امي فقدت أعصابها وغلطت عليها و واللي فهمته من كلامج أنه الوالدة قذفتها و يعني تكلمت عن شرفها أو عرضها , أكيد الحرمة ما بترضاها على نفسها وما بتسكت . وأخوج يعتقد أنكم السبب في طلاقه من الأولى , يعني خايف بعد تخربوا بيته للمرة الثانية . وهو على فكرة ملزم يصرف على أمه بس أما أنتوا لو بنات وما متزوجات وما تشتغلن ففعلاً ملزم بكن كأخواته لأنكن مالكن حد غيره , بس لو تشتغلن أو متزوجات هو ما ملزم بيكن . أما أخوانج الأولاد و فهو ما ملزم بهم مادامهم بالغين وفي سن العمل ! خليهم يسعوا ويتوظفوا ويصرفوا على عمارهم . وأنت لو ما تشتغلي أختي دوري لج وظيفة ولا تكوني تحت منة أخ أو غيره .لا تزعلي مني بس أخوج مب ملزم يشتري سياير لأخوانه , حتى لو عنده خير . بس هو شرى لهم وما قصر وهذا كرم منه ونقطة لازم تحسب له والمفروض أخوانج يعتمدوا على عمارهم وأنتوا المفروض تدفعوهم لذلك .
اختي حتى العنوان أخوي وحرمته المنافقة ,المفروض ما تقولي عنها منافقة ولا تكتبي هذه التهمة وهذه غيبة لا تجوز , وهذه حرمة أخوج وصارت وحدة منكم .ونقطة أخيرة و موضوع أنكم تتجمعوا مع بعض ريايل وحريم , حرمة أخو ويا أخوانج ويا ريل اختج ! هذا أختلاط أختي , دينياً المفروض الريايل بروحهم والحريم بروحهم , وحتى لو كنتن محجبات , مايجوز ! حتى العادات والتقاليد ضد هذا . والاختلاط ضياع وتدمير بيوت والنتيجة بانت من تصرفات ريل اختج .
أخوج تواصلوا معاه بالحسني وبأسلوب طيب وأنصحوه يهتم بأمه وأنتوا غيروا أسلوبكم مع زوجته ومعه ,وغيروا طريقة حياتكم وتفكيركم , أتمنى ما تزعلي من كلامي وتفكري فيه , واعتذر لو كان كلامي ضايقج أختي .

[ريم العسووله]

المشكلة الاولى أختي أن أهلج من النوع الي يصدقون الاغراب على الاقراب !!

الحالة الاولى شباب عائلتج صدقوا طليقة أخوج مع إنها غريبة مب من الأهل و المفروض ما يصدقون اي حد يتكلم عنكم دامهم واثقين منكم و من اخلاقكم صح او لا ... و خذيها من بطريقة ايجابية .. اذا اليوم صدقوا هالغريبة و بسببها ما قاموا يتقدمون لكم فهاي دليل على انهم ما يصلحون يتزوجونكم ... فرضا لو واحد منهم خذ و تزوج وحدة منكم.. و حد غريب ياي و تكلم عنها و طلع عليها اشاعات هل معناته بيصدق الغريب عليها !!!!


و الحالة الثانية لما أخوج صدق على طول زوجته الثانية لما طلعت اشاعات عليكم و على امج ... طبعا تصرفه غير سليم ... حتى لو كانت هاي زوجته تبقى انسانه غريبة ... و انتوا اهله و عارف اخلاقكم و اخلاق امج ...


العتب على اخوج و شباب العائلة انهم يصدقون الغرب عليكم و بدون دليل او تحري ... و بالنسبة للزواج من شباب العائلة ابدا لا تتضايجين و صدقيني لو فيهم واحد عاقل ما راح يصدق الاشاعات و يصدق الغرب على اهله ... و راح يتقدم لوحدة منكم ...


اللحين بعطيج الحل ما لكم غير تجتمعون مع اخوكم العود انتي و اخوانج و خواتج و الوالدة و كل من يعز عليه و تختارون الوقت المناسب و المكان المناسب و الكلام المناسب و الطيب و بدون لا تدري زوجته ... كلموه باللين و العقل و العاطفة معاه لعله و عسى يصحى من غفلته و يلين قلبه و يتذكر بأنكم اهله ... ذكروه انكم اهله و انكم الي راح تبقون له الخ الخ من هالكلام اللطيف و المقنع و العاقل ... و تكلموا عن نقطة احتشام زوجته من غير سبها و لا شتمها ... و ادعوا له بالخير ...

اذا شفتوا بدى يتغير للاحسن كان بها... و اذا ما زال على حالته فأدعوا له بالهداية و في جميع الاحوال حاولوا لا تعتمدون عليه ... و ابتدوا تعتمدون على نفسكم ... و خلي اخوانج يشتغلون حاليا بأي مكان حتى لو الراتب تعبان و الشغل متعب ... عزة النفس اختي فوق كل شيء ... و الدنيا ما فيها خير ... لين متى بتزعلون و تصيحون على تصرفات اخوج ... ما راح يفيدكم شيء اذا هو مب ناوي يتغير و ما زال في غفلته ... لا تتريونه يضيعكم ... و لا تفكرون بموضوع السحر ... السحر احتماله ضعيف جدا و السحر له علامات معروفة... و لكن الي في اخوج غفله قوية و انجذاب سلبي ناحية زوجته الي عرفت كيف تحطه خاتم بصبعها و تتحكم فيه...
و الدليل زوج اختج الي صار ضحية ثانية لهالانسانه و تغير على اختج ... و من المستبعد تكون ساحرته هو الثاني... كل ما في السالفة انها تعرف كيف تجذب الرياييل لها من خلال استغلال شكلها و اسلوبها ...

اما عن اخوج صدقيني نهايته بيرجع لكم ندمان فخلوه على راحته و اعتمدوا على نفسكم ... الله يهديه ... الله لا يحوجكم لحد و يغنيكم عن الناس و عنه ... و هالانسانه الله يهديها هي الاخرى ...



و الشيء الاخير حاولوا لما تتيمعون .. تيمعوا بعيد عن هالانسانة او في غيابها قدر الامكان ... و اذا اخوج تكلم قولوا له ان ازواج خواتج يستحون منها و بس ... حاولوا تبتعدون عن مكان وجودها و استغلوا سفرها مع اخوج او انشغالها معاه انكم تتيمعون من غيرها او في بيت ثاني غير بيت اخوج ... و اتمنى ان الله يسهل اموركم و تسكنون بروحكم ...


و شيء اخير مهم و يمكن تشوفين كلامي غريب و لكن هالكلام يعبر عن رأيي الشخصي لا اكثر ... يمكن هي انسانه الله يهديها عليها حركات ما تعجبكم جدام الرياييل ... بس هاي ما يمنع انكم تستفيدون منها ... خصوصا خواتج المزوجات ... ليش ما يصيرون مثلها و يسوون حركاتها مع ازواجهم فقط في البيت؟ .. مب احسن من ان ازواجهم يتغيرون عليهم او تطالع عيونهم برع صح او لا عزيزتي؟ ... مب عيب و لا حرام ان اختج تسوي مثلها من ناحية لبس او دلع او او او مع زوجها فقط و امام زوجها فقط افضل من ان زوجها يتغير عليها و يمكن يطالع برع ... شو الي يمنع ؟ البياض ماله دخل دام الوحدة بكامل اناقتها و انوثتها و دلعها جدام الريال ... من حقه الريال يشوف هالنوعية من الدلع و الجرأة من زوجته ... الرياييل انواع اختي مب كل الرياييل يحبون خجل الزوجة ... في انواع يحبون جرأة الزوجة و واضح زوج اختج من النوعية الثانية ... كلمي اختج و فهميها عن هالشيء ... الله يحفظ لها بيتها و زوجها ...


الله ييسر اموركم ان شاء الله اختي ... لا تتضايقون الدنيا دوارة و ما في شيء يبقى على حاله ... ادعوا الله .. دعوة المظلوم مستجابة ...

[غزالة AD]

وجدان كفت ووفت

[mouzan7mod]

اولا هذا بيته و حتى لو انتو خواته وأخوانه
ثانيا لو هو عنده خير ما يخصكم في خيره ربي يزيده ويبارك فيه و يرزقكم مثل ما رزقه
انتوا البنات دوروا لكم شغل ، و الأولاد بعد لازم يدورون شغل
في اكاونتات بالانستا و تويتر تعرض وضايف للمواطنين بس
و حرمة أخوكم عادي توز أخوكم عليكم ويطردكم

[ورقة ناعمة]

في لبنانية نسره ’’’ اصدق أي جنسية بس اللبنانيات احس انعم واهدئ ,,, الله اعلم

[مالتيزرس]

اختي فيه مثل يقول اخذ من الشين الزين ..اللي اقصده ..ليش خواتج مايستفيدن منها يعني اتقربو منها خلوها تحبكم شوي شوي مب كل شي بيي بيوم وليلة لا اختي اسعو ..والموضوع يباله صبر منكم

يوم بتنزل لاتحسسنها غريبة وتطالعونها بنظرات حسسوها انها منكم وفيكم صدقيني بتحس انكم تحبونها لا تنسي انها متغربة عن اهلها يعني مالها غير اخوج واليوم انتو اهلها .


خل خواتج المتزوجات يسالونها كيف تهتم بجسمها وشو الخلطات هل يتعلمون منها عادي مافيها شي بالعمس يمكن هالشي يقربكم منها ..
ترا الدين المعاملة .

سوو طبخة وطرشولها ..وعقب اسالوها عن رايها ..حببوها فيكم ..حبوها عسب تحبكم .

الله بستر عليها ويهديها

[sa7el]

اخوج فيه عيون ويشوف ويعرف الاصول والمذهب
انتوا لا تدخلون فيها دام اخوكم راضي
اما عن اليلسات ،، افضل تفصلون،، غريبة اصلا تيلسون حريم ورياييل مع بعض يلسو الحريم مكان والرياييل مكان ثاني ،،،

[غلآ نفسي]

باختصار

محد يتحمل حرمه الولد او حرمه الاخو لو شو ما كانت

بس لو اختكم او بنتكم كنتو بتعطونها مليون عذر

هذي الدنيا

اما انها طلعت بدون شيله وووووو

الغلطه غلطتكم كيف الرياييل ييلسون ويا الحريم ؟

حتى ب حجاب بعد مب زين

لا تزعلين من كلامي في وايد اشياء غلط في حياتكم

وحرمه اخوكم خلوها ف حالها

اتسوي اي شي برايها

وخل اختج تقول حق ريلها مكانك الميلس

مادري كيف رياييلكم يدشون بيت اهلكم

عيب

حدهم الميلس

بالتوفيق

[almal3ka1]

اول شي انتي و اخوانج و خواتج مالكم حق تحاسبون عالخير اللي عند اخوكم و هو من حقه يسحب السيايير اللي معطيكم إياها لانها ماله و بفلوسه و محد له كلمه عليه

ثاني شي امج مالها حق تغلط عليها و مرت اخوج الحق معاها انها ترد و تدافع عن نفسها و شي طبيعي اخوج يتصرف هالتصرف معاكم

و عن سالفه المصروف معاه حق كل شي عليه و هو ملزوم بامج و انتو لازم تدورولكم وظيفه بدون منه حد

و عن سالفه السفر لندن و شنطه الماركة لاختج معاه حق , لانه شنطه المالركه مب اقل عن 12000 و سفره لندن مكلفه غير المصرف + تذاكر + تكاسي + الاكل ................الخ

وحليلها حاسدين الفقير عموتته اليمعه حاسدينها عشان تدلعت عاخوج , المفروض تكونون مستأنسين ان تدلع اخوكم , و عن اختج المفروض تهتم بنفسها مب تطلع سلبيات الحرمه



و امج و انتو غلطانين ما يخطكم فيها حتى لو بتتمشى بالبيت بهاف بو خطط , دام ريلها راضي

انتو ما يخصكم مب عايبنكم طلعو من البيت

و عفكره مرت الاخو شو ما تكون و شو ما تسوي اتم هي الشينه و الرمسات بتطلع بتطلع

[ام حمده 77]

اختي فتحوا معاها صفحة يديدة

واكسبوها بالكلمة الطيبة وبتنحل المشاكل كلها