زخيتوا بوكيمون ؟؟

[mouzan7mod]

السلام عليكم ورحمة الله


هاااه بشروني كم بوكيمون زخيتوا؟؟ >> لا الحمدلله ما وصلت لهالمرحلة من التفاهة
لعبة بوكيمون ، إلي صار صداها عالمي ، و إلي كذا حالة ماتت بسببها ، و إلي ترك وضيفته و إلي إنفصل عن أهله و إلي .. إلي .. إلخ

هل يا ترى تستاهل كل هالضجة ؟؟ شو المغزى من إني أدور بالشوارع ماعرف وين أروح

بكتب لكم آراء ناس معينين :
الدكتور أحمد قال هي لعبة مفيدة ، لييش ؟؟ لآن خلت العالم يتحرك يمشون و يركضون و يحركون جسمهم بدل الخمول و الكسل إلي عايشين فيه و بالتالي تقل النحافة ( والله الدكاترة غير آرائهم بعد)

في البريطانيا : للأسف إكتشفنا حالات وفاة لآشخاص كانو معزولين ، لآن اللاعب كان يمشي في مكان فيه شخص آخر ميت و لا أحد داري عنه و باللعبة إكتشف هالمكانو بلغ عن الجثة

في الصين : إلتقى شخصين من لاعبين البوكيمون و إنعجبوا في بعض و تزوجوا ( يلا يابنات ، لالا أسولف)

أستراليا : كثرت الحوادث و الإصابات بسبب إنشغال اللاعبين باللعبة و عدم الإنتباه للسيارت

من ناحية أخرى ، حذر العالماء الإنشغال فيها ، لآنها تشغل العبد عن طاعة ربه ، و تكشف عورات الناس و تصور الناس و بالتالي مافي اي نوع من أنواع الخصوصية ،

و إنتوا شو رايكم ؟ هل تستحق كل هالضجة ؟!!

المزيد من آخر المواضيع من نفس القسم:

• قرآن كريم
• هل هو شيء عاديٌّ ..أن نموت !!
• لكم وحشة يا عضوات المنتدي وين ايمكم
• عداوة اهلي لي
• محتاجة حليب الابل ضروري بنت تعبانة
• كيف تتحكم با بيتك عن بعد
• اعطوني نصيحتكم بنات
• وهُم قِطَعٌ في آلة الحياة
• اريد سائقة توصيل من ام القيوين لدبي
• السلام عليكم

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[jameela200]

سبحان الله امس حلمت اني ضفتها عندي ووصلت جبال الفجيرة ادورهم اهناكي...ههههههههههههههههههههههههههههههههههههههههه ههههههه

والله ماجربتها ولا بجربها احسها مضيعة وقت ..

[falcom 6ayeb]

انا اشوف فيها خطورة وما تستاهل كل هالضجه نفسها نفس اي لعبه مضيعه للوقت وتخرب اعصاب عيالنا وتنرفزهم الله يحفظهم من هالالعاب الالكترونيه قبل يقعدون جدام الكمبيوتر او الاي باد يلعبون مكانهم الحين يتنقلون من شارع لشارع الله يحفظهم

[اشراقة أمل]

اللعبه هاي فيها تجسس يعني لعبه تجسسيه تستخدم فيها تقنية تحديد المواقع لدرجه بيتوت تتصور داخليا!

يعني الموضوع ان خرايط البلد وكل التحركات ترصد بها ... يعني خطر ...

وتخلي الواحد يراقب شاشة التلفون طول الوقت حتى وهو ماشي ويتعرض للحوادث يعني تحتاج على الاقل شخص واعي كثير عشان يستخدمها .. المراهقين من غير اي شي كل شي على يلتطمون به!

[sa7el]

بعض الدول منعوها على أساس انها تجسس عالمنطقة او البلاد

هاي اللعبة تافهة وكثرة الضجة احس اللي ما يعرفها عرفها

[Upscale touches]

كل شي جديد الناس تكون فيها فضول اجربه
بس هذا هو كل الموضوع شرات البلاك بيري وبعدين الايفون والسامسونج او السناب شات ومع الايام الناس تمل ودور على الجديد

[بسمه دبي]

لووووووووووووول

احس مالها اي معنى هاللعبه ..

[ام يوسف 82]

لعبه ما الها معنا ولا اي فايده غير الخساره باي شي

[احلى بعفويتي]

اتوقع ها عندلاجانب الي ماعندهم حياه اصلا و لا دين ولا عايله
بس عندنا قاموا يستخفون احينه
انا مانزلت هاللعبة و لا ادري عنها

[[..دانــة..]]

وايد مبالغات ومغالطات في موضوع هالبرنامج
اللي ما جرب يلعبها لا يحكم عليها بناء على اتهامات مالها واقع!
.
.
أول شي اللعبة ما تتطلب الشخص يدخل بيوت الناس، والبوكيمونات يقدر يحصلها
في كل مكان وحتى بدون ما يدخل الأماكن اللي يذكرونها (بيوت، مراكز شرطة، أماكن سرية وحساسة إلخ)
واللي يتعلث بهالموضوع اسمحولي هذا إنسان فارغ ويسوي دعاية لنفسه والبرنامج بريء منه!
لأنه كلامه مب صحيح 100% واللي جرب اللعبه يعرف هالشي بكل وضوح!
.
.
النقطة الثانية، اللي يقولون تصوير للناس، ترا في البرنامج خاصية توقف الكاميرا وتقدر تلعب بدونها
وما تحتاج توقف في نفس المكان وانت تتحرك تمسك البوكيمونات!
.
.
اللي يقول برنامج تجسس، ترا البرنامج نفس خرايط جوجل Google Maps ونفس فكرة الجي بي إس GPS
اللي حتى ف المواتر، وكل البرامج اللي موجودة في العالم عندها خاصية اللوكيشن ، سناب جات، انستغرام، فايسبوك تويتر، ماله علاقة في التجسس ولا له علاقة في نظريات المؤامرة ولاهم يحزنون!
.
.
.
البرنامج فعلا خذا أكبر من حجمة من التغطيات سواء الإيجابية والسلبية، وكله يصب في مصلحة مطور البرنامج
لكن إن دل ع الشي، فإن الزوبعة اللي صايره والحملة المكثفة ع هالبرنامج بالذات والناس مصدقة الكلام فيه، دليل أن عندنا جهل كبير مب في البرمجيات، إلا جهل في ثقافة المعلومات ومصادرها، ما يصير الناس تنقل الكلام من غير ما تتوثق منه وتتأكد ، للأسف حتى الجهات اللي المفترض الوعي عندها أكبر انجرفت مع سرب الإشاعات، انتبهوا واحذروا لأنه مثل هذه الهفوات هي أساس كل المشاكل والخلافات في العالم، لأنه الناس
بس تنقل كوبي بيست في كل شي، في الأفكار والأخبار ونمط الحياة إلح، صار الأغلب بدون تفكير مستقل
ولا عنده قدرة تحليلية، يأخذ الموضوع جاهز ويركب عليه شوية بهارات ويلا هلم جرا!
.
.
.
أتمنى خواتي تحري الدقة والمصداقية في نقل أي معلومه\خبر
تأكدون قبل لا تنشرون أي حرف أو كلمة
لا تكونوا جزء من شعب "الكوبي بيست"
كونوا مستقلين فكرياً وذهنياً
.
.
ودمتم بود

[ورقة ناعمة]

حتى لو زخيته شو بستفيد منه

لا يفيدني ولا يضيف لي شي ,,,,,,,,,,,

[almal3ka1]

اللعبه حلوه

[اشراقة أمل]

هو اتصور يشجع موضوع تحديد المواقع .. انا ماستخدمته كثير بس انتشار لعبه فيها تحديد ممكن من خلالها تصير مشاكل .. مره قرأت حتى تحذير في جريده محليه من الموضوع ... لان فعلا ممكن استخدام هذه اللعبه يوصل لامور ... يعني بداية الغيث قطره ... تحديد المواقع حتى خريطة غوغل اتصور عليها رقابه وامور كثير ... ولعبه ممنوعه في بعض البلدان .. لان فعلا بتكون في ثغرات عليها ... يعني هي مو نظرية مؤامره بس قد تحصل ...

[امراه]

منكر يديد

[H A]

لعبه وايد تافهه واحس اللي يلعبونها طاير عقلهم
كيف ييري بالطريق بسبب لعبه!
وين عقله هذا