طفلي والعناد

**مشكلتي** · 2016-07-18, 06:03

السلام عليكم ورحمة الله وبركاته
شحالكم حريم
مشكلتي و يا ولدي تعبانه وايد منه ما عرف كيف اتصرف معه تعاملت معه بالضرب وأحين إذا اضربه صار الضرب معه عادي يرجع ويكرر الغلط وايد عنيد وما يسمع الكلام أبد وأنا وايد عصبيه لازم اضربه خدامتي تقولي مازين مدام وايد تضربيه ريلي يقولي الولد تخبل وانتي السبب .....
كيف أتعامل معه ارجوكم ساعدوني أوقات أصير معه طيبه لكن ما يرحم عمره لازم يسوي شي غلط من كم يوم مطيح التسريحه كانت شوي ويطيح ع أخوه ويضرب أخوه وايد ما عرف كيف أتعامل معه نصحوني خواتي

المزيد من آخر المواضيع من نفس القسم:

**المراقبة العامة** · 2016-07-18, 10:26

تمت الموافقة
مب كل شيء حله الضرب ترى كثر الضرب استوى معه عادي
ياليت لو تخبريني جم عمره لأن كل فئة عمرية طريقة تعامل مختلفة
واتركي العصبية ترى الولد جذي يكرهج ومابيحن عليج لاكبر
يفيدونج الاخوات

**Ward-uae** · 2016-07-18, 10:40

ما كتبتي عمر ولدج؟
بشكل عام اشوف الأولاد ما شاء الله عليهم عندهم طاقه واذا ما حصلوا شي يشغلهم يتضاربون عكس البنات تعطيها كراس وألوان وتسكت
حاولي تشركين الولد بانشطه في نادي او تودينه الحديقة او يلعب في الحوي خليه يتحرك واذا شفتيه بعده يضرب اهنا كلميه وخليه يختار عقابه مثلا ما بتوديه الحديقة او ما بتشترين له حلاو عطيه كذا خيار وخليه يختار عقابه لانه الضرب مب حل
فشرات انتي ما تضربيه هو يضرب اخوه عامليه انه ريال وامدحيه انه هو الأكبر وخليه يساعدج مثلا لما اتعايز اصعد الطابق اللي فوق اسوي سباق لعيالي منو اشطر واحد ييب لي بامبرز للصغير ويلا الركض هذا يخفف الطاقة اللي فيهم
وما غير نوعية الاكل حاولي تخففي عنه الشيبسات والحلويات والفاست فود نظمي أكلهم يكون فواكه وغدا وعشاء والحلويات استبدليه بكاستر او فواكه او حلاوة لكن قطعه وحده مب اكثر ووقت معين مثلا العصر

**تفاحتي** · 2016-07-18, 10:43

ما ماتو اللي يضربون عيالهم

ضرب الولد جريمه
لاتزعلين يوم يكبره وتشوفينه عاق او متمرد عليج

الضرب زمان اول كان عادي للن الناس نفوسها طيبه والحياه بسيطه

انا اولادي متعبيني وايد حركييين ولززززززقه وخنقه ومع ذلك اتفاهم معاهم
انا مارفع ايدي اقرص هي صح بس نادر ولو سبب قوي ممكن لو نزل سرواله

مجرد ماترفعين يدج الطفل يوخي راسه حتى لو ما تبين تضربينه بيتم يوخي لان تعود الضرب

باجر بين ربعه لو حد ضحك ورفع يده بتلقين ولدج ينضحك عليه لان توخى

حبي الغلط فيج مو ف ولدج

الطفل يخرب ويكسر عاادي الاولاد حركيين وتعبين
وهو يضرب الصغير لان يغار منه بس انتي مو فاهمه

حاولي تعاملين انه كبيره وعطيه المسؤليه حتى بو ماتجاوز الخمس سنين

دايما فهمي ان انت رجل والرجال مايسون جي

لاتضربينه حرام عليج بيي اليوم بتشوفين النتايج
قبل كل شي ادعي الله ان يسهل عليج تربيته ويعينج ويقويج

**mrs.abk** · 2016-07-18, 10:58

انتي وايد عصبية !! هذي مشكلتج انتي موب مشكلة البيبي ولا مشكلة اي حد .. هذي صفة سيئة بغيضة صاحبها مكروه ومنبوذ تحمليها بروحج موب في الفقير الطفل ..

حلي مشكلتج وارحمي ضعفه .. تستقوين عليه لأنه ضعيف ما يقدر لج .. استقوي على نفسج وارجعي ادبيها ..

جد تنرفزني الوحدة اللي تقول انا عصبية وما تحمل .. انتي عصبية لا تعرسين قعدي سلقي بيض في بيتكم .. العصبية موب صفة امومة ولا صفة زوجة محبة ولا صفة حضن دافي ..
العصبية صفة رياييل مخوخهم ناقصة لأن الريال الرزين موب عصبي ..

**almal3ka1** · 2016-07-18, 11:30

انتي عندج نعمه بس متبطره

لو اعرفج بسير ابلغ عليج انج تضربين ولدج

مب كل شي بالضرب سيري استشيري مستشار بالأطفال

**غزالة AD** · 2016-07-18, 12:17

مثل ما قالوا الخوات
انتي عصبية مش مشكلة ولدج هاي مشكلتج
حلي مشكلتج مع العصبية
لكن لا تطلعين حرتج فالولد المسكين
ما بتحصلين ولد هادي وما يسوي شطانه
انتي باسلوبج هذا بتخلينه يزيد فالعناد
عالجي عمرج
واعرفي كيف تتصرفين مع الولد..بيهدا
اقري كتب او استشيري حد
لا تخلين عمرج جي
العيال امانه عدنا

**مغليك** · 2016-07-18, 15:16

اختي استهدي بالله ..كل ما اتحسي انج راح تضربينه امسكي ايدج بدل الضرب النصح خذيه بالنصح الولد عنده طاقات فرغيها باللعب ..بالتعزيز اشتري له هدايا.يعني صح انا بنتي لما تخبل بي اقرصها شوية ع جتها او خدها او اخبطها شوي ع جتها بس مب بالقوة تأديب ..حاولي تحضنينه اخذيه فحضنج
الطفل محتاج لحضن الام والاب لانه له دور ايجابي ..حاولي تتقربين منه استوي ربيعته سولفي وياه كأنه شخص كبير ..قبل النوم اشتري له قصص اقري له ..راقبي شو يتابع فالايباد.
بس الضرب يزيد عناده فما ررح تستفيدين تطلعين غيظج بالضرب .
الطفل امانه

بس اتحملي تضربينه جدام الخدامة باجر بتستقوى عليه وبتضربه فغيابج

**ام الدحمي** · 2016-07-18, 18:57

انا بعد اضرب وكل يوم اقول مابضرب خخخخ الله يحفظهم بس مثل ماقالن الخوات يبون الالعاب نشاط طاقه عندهم ربي يبارك لنا فيهم شوي شوي بكبرون وعقلون ان شاءالله واظن ولدج البجر هذا؟!

**Upscale touches** · 2016-07-19, 18:12

كافي صراخ وعصبية
شفتي بروحك صار وضعه اسوء
يبيغي اهتمام حب وحنان
اكيد تهتمي بالي اصغر عنه اكثر منه مليون مرة فعطاكي اشارة وانتي ضربتيه
غيري اسلوبك
ابنك امانة
طلعي معاه كلميه احضنيه
مع الايام حيتحسن

**tatlishome** · 2016-07-20, 11:12

مرحبا اختي مارح اقولج ليش ضربتي وماعرف شو البنات ماقصرن

الحل

تعالي عنده وهو نايم اتأملي برائته وضعفه
اتذكري القسوه اللي ضربتيه فيها
المسي أصابعه شوفي كيف ناعمه بعده يعتمد عليج ويناديج في كل حركه
وانتي تتأملينه تخيلي الأمهات المحرومات كيف رح يعاملونه لو كان ولدهم
اكيد ارحم صح ؟
العناد ماينحل بالضرب
الحل شلي فكرة انه ولد عنيد من راسج وبدلي هالفكره بانه طفل مقهور ومسكين مايعرف يعبر عن نفسه
وانتي واقفه ع راسه تتأملينه فكري لو صارله شي كم بتندمين ؟؟ هل كان يسوى انه ينضرب ؟؟هل كان فيه حل ومالجاتي له من الكسل لان اسهل حل الضرب ويفرغ الطاقه عندج !!!
تخيلي لو انتي صارلج شي ؟؟؟ شو رح يتذكر عن امه ؟؟ اكتبي 10 أشياء بينج وبين نفسج رح يتذكرها ؟
قربي منه وشمي ريحته وحسي بجسمه الناعم وبعد ها كله صدقيني انتي ثاني يوم بتتغيرين مش هو
رح تضمينه اكثر وتحنين عليه اكثر وتحبيه اكثر بعدها لانج كلما بترفعين يدج بتتخيلين شكله وهو نايم ومسكين لاحول ولاقوه

والله يهديكم لبعض
.
.
"تاتلز"

الموضوع: طفلي والعناد

أدوات الموضوع

عرض

طفلي والعناد

المزيد من آخر المواضيع من نفس القسم:

رد: طفلي والعناد

رد: طفلي والعناد

رد: طفلي والعناد

رد: طفلي والعناد

رد: طفلي والعناد

رد: طفلي والعناد

رد: طفلي والعناد

رد: طفلي والعناد

رد: طفلي والعناد

رد: طفلي والعناد

المواضيع المتشابهه

طفلتي والعناد الحقوني ؟؟؟؟؟؟؟؟؟؟؟؟؟

انا و طفلي

طفلي حبيبي ( مرثية في طفلي بعد اجهاضي )

طفلي

بنتي والعناد