تغذية للطفل بعمر 5 شهور

**شغف أنثى** · 2016-07-16, 05:44

السلام عليكم ورحمة الله وبركاته
شحالكن خواتي ؟

فديتكم الامهات المجربات بغيت منكم تنصحوني ، بنتي كان وزنها عند الولادة تقريبا 2كيلو وشي يعني ضعيفة ، وكنت ارضعها طبيعي وصناعي بس احس وزنها يزيد بالعافية. المهم عند تطعيمها الممرضة قالت ان وزنها وايد نازل وقريب من الرقم اللي يمثل خطورة ، وانا فعلا حسيتها جذه مع اني ما كنت مقصرة برضاعتها قالتلي حاولي تبدين وياها اكل خفيف بيساعدها . بديت وياها من اسبوعين تقريبا اعطيها خضار مسلوقة . بس خاطري اعطيها تمر احسها تحبه . حاولت اعطيها بالمرضعة شوي بعد ما اهرسه ما تباه اعطيها حبة في حلجها واحس طعمها عاجبها ، ودي اهرسه ليها واعطيها بالملعقه بس ما ادري شلون ممكن احضره لها ، مسلوق او عطول اعطيها جذا بعد ما اهرسه بالشوكة؟

بغيت منكم الفزعة خواتي…
اللي عندها خلفية تساعدني يزاها الله خير بمعلومة مجربة ، شنو اقدر اعطي بنتي بهالفترة ؟ انا احس انها تيوع لانها بعد ما ترضع تحط ايدها بحلجها وتصيح .
من بديت اعطيها خضار مسلوقه حسيتها مرتاحه . اعطيها شي بسيط ملعقه او ملعقتين ، بس ابي انوع لها .
يعني فكرت في التمر . وبعد ابي اعطيها أرز . بس اخاف انه يضرها . وفرفرت في المنتديات لقيت ان الموز ثجيل عليها بهالعمر .

عاد قلت بشوف خواتي بالمنتدى هني ما بيقصرون
خصوصا اني فعلا محتارة وياها . اول مرة بعيالي يصير معاي جذه وما عارفة شلون اتصرف .
مع اني كنت يايبة توأم اوزانهم ضعيفه كانت عند الولادة 2 وشي . بس كان وزنهم يزيد بشكل طبيعي عند كل مراجعة . حتى ما شاء الله صايرين أطول من اليهال اللي بعمرهم وحالهم زين الحمد لله .

اسمحولي ع الاطالة بس شسوي عودتوني افضفض لكم ، ودومكم ما تقصرون وياي .

وعسى توصل بنتي للوزن الطبيعي ، دعواتكم خواتي ،،،

المزيد من آخر المواضيع من نفس القسم:

**ام فــطــامي** · 2016-07-17, 05:00

هلا حياتي الله يخليلج البنوته انا بنتي شراتها طايحه كيلوين ونص وعقبها يبت اخوها ثلاثه ونص طايح الله يحفظهم
انا من يكمل الياهل اربعةشهور اسويله حليب وسيريلاك مع بعض في مرضغه
يعني تسسويلها مثلااا رضعه الصبح او فليل اتحطين حليب وسيريلاك مع بعض سيريلاك قمح وعقب تحطيلها قمح وعسل وقمح وتمر
تخضينه وتعطينها بتشبع
بس كم ملي تعطينها حليب يمكن ما تشبع
انا كنت اعطيهم 200 ويخلصونها
والاكل في الخمس شهور يعني بالتدريج خضار مهروسه بس كل مره نوووع
عقب في الست شهور ادخل العيش ويا الخضار بس مع الروب عمري ما عطيتهم بلا روب
انا ولدي احينه جريب السنتين ولين يومج يشرب حليب وسيريلاك الصبح
والي يشووفه الله يحفظه ما يقول طايح في الثامن الله يباركلي فيه
فجربي معاها الحليب والسيريلاااك
وربي يحفظها ويخليها لج

**mouzan7mod** · 2016-07-17, 08:30

ترومين تحطين لها في المرضعة بسكويت الأطفال أنا كنت أسوي في ولدي جي من كان عمره 3 لآنه كان وزنة 2,8 كيلو يعني وااااااايد ضعيف و صغير ، و ترومين تحطين نص أو ربع حبة موز مع الحليب في الخلاط و تعطينها بالمرضعة لآن فعلا الموز ثقيل بهالعمر

**شغف أنثى** · 2016-07-18, 10:21

مشكورات خواتي ع الردود .
بس شلون احط السيرلاك او البسكوت مع الحليب ؟
يعني احط ماي حار بالمرضعه مع حليب وسيرلاك ؟
او اجهز كل واحد بروحه وبعدين اخلطه ؟
والموز فكرت اعطيها شوي شوي بس بغيت طريقه للتمر اذا بعطيها كوجبه .

هي تشرب ألحين 120 مل بالعافيه حاولت ازيد لها بس ما تكمله . المفروض تشرب 210 مل .

اخاف اضغط عليها صراحه ، هي كل شوي ترجع شوي شوي حليب بعد الرضعه ، وابوها يقولي لا تكثرين رضاعتها البنت شبعانه وانا اقوله ما اظن لان رضاعتها ضعيفه وطول الوقت اتحط ايدها في حلجها .

والاكل شوي شوي تتقبله ، هي نازله ضعيفه حتى براسها العظم كان ما ملتحم . وفي براسها كتلة لينة مثل الغضروف قال دكتور الاطفال ان هذي بتصير عظام بس ما اكتملت لانها نازله قبل موعدها .

عسى خير ودعواتكم لها خواتي العزيزات…

**فوحة الفل** · 2016-07-30, 15:37

هلا حبيبتي

انا كنت اعطي ولدي يوم كان بعمر بنتج منقوع التمر ووووايد يحبه و يريح بطنه من الامساك كنت احط سبع تمرات اغسلهم و اهرسهم بايدي شوي و احطهم ف كوب ماي مغلي و اخلطه شوي بالملعقه بعدين اصفيه ف الرضاعه ، و عادي اعطيه مرتين ف اليوم و الماي تقريبا يكون 200 مل مع سبع تمرات ، ووايد مفيد و احسه زاد وزنه بسبته ، و التمر حلو ويا العيش اهرسي العيش مع حبتين تمر ف الخلاط الحين الروب ثقيل ع معدتها حطيلها ماي ويا العيش عشان تروم تبلعه و ما يغص لها بعيد الشر عنها ... الله يحفظها لج حبيبتي

الموضوع: تغذية للطفل بعمر 5 شهور

أدوات الموضوع

عرض

تغذية للطفل بعمر 5 شهور

المزيد من آخر المواضيع من نفس القسم:

رد: تغذية للطفل بعمر 5 شهور

رد: تغذية للطفل بعمر 5 شهور

رد: تغذية للطفل بعمر 5 شهور

رد: تغذية للطفل بعمر 5 شهور

المواضيع المتشابهه

اسباب تعذيب الام للاطفال بعمر شهور

شو أأكل بنتي بعمر ال 6 شهور

تتوقعون البيبي بعمر 8 شهور يحــس ؟؟

ألعاب الياهل بعمر 8 شهور