حرمة اخوي

**مشكلتي** · 2016-07-12, 03:47

السلام عليكم ورحمة الله وبركاته
اول شي ادعولي خواتي الله يرزقني بزوج صالح عشان انا تعبت من مشاكل بيتنا وانا مب صغيره
المشكله اخوي متزوج وحده عربيه وهو مواطن وتزوجها عشان المواطنات ما قبلن فيه لانه ما كمل تعليمه وراح وتزوج هذي وهي مب صغيره عمرها 25 وهو 30 المشكله ان عليها حركات مستفزه ونحن انا وامي وخواتي ما نحب المشاكل في حالنا وما نحب ندخل في حياة اخواني بس صراحه هالحرمة من دشت بيتنا وكل يوم مشاكل انا من كبر المشكله دخلت اشتكي واكتب فالمنتدى لأَنِّي تعبت هالحرمة من يوم ما يت ما نشوفها تصلي وليل نهار أغاني ومناكير حتى استغربنا وقت الاذان تحط أغاني وننصحها يا فلأنه صلاه يا فلأنه ليش ما تصلين تقول نسيت وبعدين حملت ويابت بيبي ونحن عايشين ف بيت واحد ما عندنا خدامه يبنا خدامه وشردت ومطبخ واحد تدخل المطبخ تطبخ حق اخوي وما تنظف وكل وحده فينا انا وخواتي تنظف مواعينها وكلمت اخوي عشان مابا مشاكل قال هي ما تسوي شي قلت له كيف ما تسوي وتسوي حقك الغدا والعشا !!!! في اي شي يدافع عنها ويطلعنا غلطانين وهالشي اتكرر اكثر عن مره ومحد بيغسل مواعينها وينظف ورآها واليوم قامت سوتله ريوق وقلبت المطبخ وامي شافت المطبخ تمت تصارخ وانا طرشت مسج حق اخوي عشان تعبنا صراحه وقلت له قول حق حرمتك تنظف اللي توسخه عيب مارد وسوا طاف وهي دشت المطبخ مره ثانيه تسوي حق بنتها أكل وما نظفت شي وبعدين نشيت ع صوت امي امي فيها السكر الله يشفيها وما تحب تشوف البيت مب نظيف وانا قلت ما بنظف خلي حرمة اخوي تنظف وساختها انا نظفت صحوني فأمي قعدت تصارخ علي وهي تدري ان حرمة اخوي الغلطانه مب انا انا صراحه ما قدرت استحمل وسرت دقيت عليهم باب الغرفة طلع اخري معصب ويبى يمد آيده علي ويقولي ليش حاطتها فراسج قلت ليش احطها ف راسي وحده تخيس تنظف خياسها محد بينظف ورآها عيب نحن عايشين ف بيت واحد جان يعصب ويصارخ ع امي ويقول بكسر المطبخ والبيت و يدخل غرفته ويصك الباب شو الحل برأيكم تعبت صراحه انا مليت من هالمشاكل وحرمته مستفزه والله ما ابى اتكلم عنها عليهاىايد حركات تقهر واخوي يسكت عنها حتى النقاب قالها تلبسه ولما يسير الدوام وتطلع مكان ويانا تشل النقاب ومره سارت المول وما لبست النقاب وهو رد يدورها فالبيت قلت له فالمول وراح المول لقاها بدون نقاب وزعل منها بس عادي ترد تفسخه مره ثانيه وهو مب موجود وعادي عندها ما تحشم لا ريال ولا حد السموحه طولت كنت ابى افضفض والله شاهد علي ما كتبت الا من ضيقتي وتعبئ من هالمشاكل اللي ما تخلص

المزيد من آخر المواضيع من نفس القسم:

**المراقبة العامة** · 2016-07-12, 11:30

تمت الموافقة
الكلمة الطيبة صـــدقة

**khaleejiya** · 2016-07-12, 12:09

اوكي في امور مايخصكم فيها مثل صلاتها شعليكم منها صلت والا ما صلت منو بيتحاسب عن ذنوبها هي والا انتوا؟ والنقاب بينها وبين ريلها لا تشيشون الريال على حرمته هذا شي
مايمنع انكم تنصحونها بطريقه حلوه بس يكفي نصيحه مره وحده مرتين عقب خلاص ما لكم دخل
موضوع غسيل الصحون حد منكم كلمها مباشرة؟ والا بس تنغزونها؟
كلموها قولولها بطريقه لطيفه بعد
يمكن هي تتعمد تستفزكم عشان اخوج يتضايق وفي النهايه يطلع من بيتكم
نصيحه لاتخسرون اخوكم بسبب مشاكل تافهه
حلوها بهدوء واكسبوا جميع الاطراف

**almal3ka1** · 2016-07-12, 12:17

اول شي انتو ركزو عنفسكم و ما يخطك فيها بصلاتها و تسمع أغاني ...........الخ

لا تدخلين بشي , بس ركزي عنفسج دام و صلت المواصيل ان علاقتج باخوج بتخترب

ممكن انتو تحرونها بسالفه صلي و سوي و لا تسوين .......الخ

**أم حور26** · 2016-07-12, 12:46

الله يعيينكم حبيبتي

**مغليك** · 2016-07-12, 13:16

الله يعينكم عليها صراحة ..
حبيبتي اشرطو ع اخوج يبني لي مطيبخ صغيروني تطبخ وتنفخ فيه بروحها .ع كيفها ..
واذا تحيدينها دشت المطبخ تطبخ دشي وياها سولفي واضحكي وييبيعا معاها برزح حلوة قوليلها فلانه حبيبتي ساعديني فغسل الصحون يعني تساعدو معاها يمكن هي حاسة عمرها غريبة وماحد يسولف وياها ..واخوج الله هداه ماله حق يزاعج ع امه عسب خاطر المدام مهما كان مايستوي يعلي صوته عليها حراام هاي امه

**Upscale touches** · 2016-07-13, 22:03

الحل الأمثل التطنيش
عيشي حياتك وتوكلي على الله ولا ترفعي ضغطك ابد
الموضوع كامل تحول عناد
واللحين اخوكي واقف معاها .

ادعي الله يفرج عليكم كثري صدقة وادعية
كلميها بهدوء شديد
بحالة امك بدت تعصب من وضع المطبخ حاولي تنظفي عشان خاطر امك بس وتحصلي اجر
مع الايام حتحس بحالها وان الي قاعدة تعمله غلط

كلمي امك خليها تهداء مافي شي يسوى وصحتها اهم شي عندكم
اخوكي حاسس حاله بين طرفين كلميه بهدوء وحطي النقط على الحروف

الله يفرجها عليكم

**ام الدحمي** · 2016-07-14, 01:39

حبيبتي كلنا يوم فبيت اهلنا نظفنا وتزاعنا ويا حريم خوانا بس اقولج نصيحتي انتي مب متزوجه فاضيه اكثر عنها وهي عندها طفل عادي نظفي عنها تراه بيتكم ولج اجر وماتدري يمكن الله يكرمج لهذا السبب وانتي ادعي يارب ارزقني لاني اساعد امي وابي ارضيها ورددي لاحول ولاقوه الا بالله العلي العظيم اللهم اجرني في مصيبتي وخلف لي خيرا منها وعسى الله يفرجها عليج

**ماحد شراتي** · 2016-07-14, 09:02

يمكن حرمة اخوج حست انه محد متقبلنها فالبيت وانكن دوم مطنشينها وتعقون عليها كلام .. نصيحه الكلمة الطيبه والاسلوب الطيب دوم ييب نتيجه .. حتى مع الاطفال فما بالج مع شخص كبير .. كلموها باسلوب حلو ..
سوي مره كيكه وطرشي لها حسسيها انها محبوبه وانها شرات اختكم ... مستحيل تعاند منه والدرب .. وبالنسبة للصلاة وغيره هذا شي شخصي بينها وبين رب العالمين وريلها .. نصحتوها مره وخلاص ..

**بسمه دبي** · 2016-07-14, 09:21

هذه شو تتعمد ؟؟!!

اقووولج زخيها وكلميها بهدوء شوفي شو مشكلتها ف الحياه ولا خل اخووج ايب لها خدامه تنظف وراها

اخوج ما بيسوي شي غسلي ايدج منه .. كلميها وانتي بنفسج حاولي تتقربين منها وخلج وياها يمكن الله يهديها وتهدي النفوس

الله يعينج ويوفقج حبيبتي

**ورقة ناعمة** · 2016-07-14, 09:21

يبو شغالة حقج انتي وامج وتشتغل حقكم بس وهي تشتغل حق عمرها

طلعيها من راسج بترتاحين

**المراقبة العامة** · 2016-07-16, 00:03

تنبيه هام
أخواتي كل واحدة تحط مكانها مكان صاحبة المشكلة
ولنضع ردود منطقية إيجابية لحل المشكلة
أما تضخيم المشكلة فهذا أمر سلبي وقد يتسبب
في مشاكل لصاحبة المشكلة بسبب رد سلبي طُرح هنا
تذكروا الكلمة الطيبة صـــدقة

**المعآني** · 2016-07-16, 00:47

حبيبتي انا أحس اسلوبكم مخلنها جيه تسوو
أحس هي متضايقة من معاملة امج تقولين ماتحب ابد البيت يكون مب مرتب وتقعد تصارخ عليها
هالشي غلط
هي بعد لها احترامها شو ما كان محد يصرخ عليها طبيعي بالتالي هي بتنرفزكم
وما في زوجة تحب اليلسة في بيت أهل ريلها هاي حقيقة
وسالفة أنها تسو من ورا اخوج اطلعي منها مالج شغل نهاءيا
واخوج اكيد عنده سبب يخليه يوقف وياها مب ظلم وخلاص
ارجعي فكري مرة ثانية
وانتي حطي نفسج مكان حرمة اخوج
ترا المتزوجة ماتعرف على شو تلحق
زوجها ولا تتعدل ولا ترتب عمرها ولا ولدها ولا حجرتها
صعب عليها طول الوقت تراضيكم وتنظف في نفس الدقيقة
انا ما أدافع عنج ولا أدافع عنها
ارجعي فكري مرة ثانية واذا انتوا اسلوبكم مول ما ضاربتوها ولا

**تفاحتي** · 2016-07-16, 01:07

المعامله الطيبه اختي تغير الانسان حتى لو كان كافر
حتى لو هي غلطانه

عاملوها معامله طيبه خلاص ام حفيدكم
كلميها بالطيب والامور بتمشى مثل ماتبون

الموضوع: حرمة اخوي

أدوات الموضوع

عرض