الزوجة الثانيه

[cuteya muna]

السلام عليكم
انا بكتب قصتي باختصار وارجوا منكم النصيحه لاني صدق ضايجه ومهمومه من التفكير
انا عمري 28 متزوجه من شخص كنت اعرفه اكثر من سنتين وبعد ما حبيته اعترفلي انه متزوج وعنده ولدين والثالث جاي المهم انا طبعا انصدمت ان ليش ما خبرتني من إلبدايه ليش خليتني أتعلق فيك وآخر شي تطلع متزوج ولا عندك عيال المهم انا وافقت لاني ما اتخيل نفسي مع احد ثاني أبدا وأحبه لدرجة الجنون ادري بتقولون غلطانه وانا ادري اني غلطانه ويتعب في حياتي بس المشكله وقتها القلب اللي يتحكم حتى لو العقل يعرف ان اللي أسويه غلط
المهم المشكله مب هني المشكله ان كان عنده شرط ان زوجته ما تعرف لان ما يعرف ردت فعلها ويخاف ينهدم بيته وتطلب الطلاق وقال اذا وصلت للطلاق انا بختار اني أطلقج انتي

الحين نحنا متزوجين من 4 شهور وهو على فكره اهله كلهم يدرون وسويت عرس بس لين متى بتم عايشه وانا مهدده بالطلاق اذا عرفت حرمته
ساعدوني شو أسوي هل ممكن احصل حل وأخلي زوجي ما يطلقني وهل تقدر زوجته تطلب الطلاق وتوافق المحكمه مع انه أبدا مب مقصر في حقها وفي حق عياله وانا مستعده أتنازل عن وايد من حقوقي بس ما يطلقني

المزيد من آخر المواضيع من نفس القسم:

• طرق تجنب الزوجة تدمير حياتها الزوجية
• افضل الطرق للتعبير عن حبكِ لزوجكِ
• جارتهم فرقت بين اخي وبين زوجته
• طرق التعامل مع الزوج الذي يتجاهل زوجته
• افضل طرق التعامل مع الزوج الذي يهين زوجته
• افضل طرق التعامل مع غضب الزوج بذكاء
• اجمل افكار لاستقبال زوجك من السفر
• اهم العادات التي تؤدي الى تدمير الحياة...
• افضل طرق التعامل مع الزوج المستفز
• نصائح مفيدة لنجاح العلاقة الزوجية

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[قلوب حلا]

يالله والله العظيم موقفج جداااا صعب كيف قبلتي يا اختي بشخص بصريح العباااارة قالها لج لو بينج وبينها بيختارها هي وبيطلقج .. لاحول ولاقوة الا بالله العلي العظيم لا انا ولا غيري عندنا حل او جواب مفيد مالج غير تستغفرين وااايد لعل الله يحنن قلب الاولى اذا عرفت

[ام الدحمي]

سمعي حبيبتي لا تخليها تعرف اذا قدرتي ودعي الله وكثري استغفار هاتي منه عيال عشان مايطلقج ينحط الكل قدام الامر الواقع بس حتى لو جبتي عيال موضروري تدري هذيك خلج في عش الحياه الزوجيه وتركي التفكير عنج الله يكتب لج كل خير يارب

[المعآني]

كلميه وفهميه بعقل وبكل هدوء
خبريه انه الشرط مايجوز واسألي الإفتاء 8002422
وهذا مو من العدل بين الزوجتين
والله يهديكم أجمعين

[cuteya muna]

سمعي حبيبتي لا تخليها تعرف اذا قدرتي ودعي الله وكثري استغفار هاتي منه عيال عشان مايطلقج ينحط الكل قدام الامر الواقع بس حتى لو جبتي عيال موضروري تدري هذيك خلج في عش الحياه الزوجيه وتركي التفكير عنج الله يكتب لج كل خير يارب

[cuteya muna]

شو أسوي يا اختي الله يعين والله محد يدري كيف انا تعبانه ونفسيتي شو اقول بس
الحين هو قالي انا بحاول قد ما اقدر ان الموضوع ما يوصل للطلاق بس هو خايف ان المحكمه توافق وهو يقول ان يحبني مووت بس ما يقدر يهدم بيته

[cuteya muna]

شو أسوي يا اختي الله يعين والله محد يدري كيف انا تعبانه ونفسيتي زفت الله العالم بحالي
الحين هو قالي انا بحاول قد ما اقدر ان الموضوع ما يوصل للطلاق بس هو خايف ان المحكمه توافق وهو يقول ان يحبني مووت بس ما يقدر يهدم بيته

[قلوب حلا]

نصيحتي لج لاتيبين اطفال لين تتاكدين الف بالاميه انه مابيطلقج شو ذنب عيالج يتحملون اثاااار الطلاق عسى ربي يصلح الامور

[cuteya muna]

وينكم بنات مافي ردود ثانيه ابا حد يشور عليه او ادعولي محتاجه دعواتكم لاني مهمومه والله

[غلآ نفسي]

مستغربه منه
خذج من ورا حرمته
ويقول ما يبا يخرب بيته ؟
ما هو خرب بيته اول ما كلمج اصلا
لازم تكلمينه انج زوجته وان اذا طلقج بيظلمج جي
وحرام والله زوجته ما تدري الله يعينها
هالرياييل يسووون الاغلاط واخر شي الحريم اللي يدفعون الثمن

[Um Mahra24]

الله يعينج يا اختي بس أنا وحده من ربيعاتي نفس حالتج كانت بس الحمدالله عرفت كيف تحل الموضوع ممكن تتواصلين وَيَاي ع الخاص عشان أقولج التفاصيل والله يفرجها عليج

[مغليك]

الله يهديهم من رياييل اول شي بنعرس وبنعرس ويوم ايي وقت مصارحة زوجة 1 ..ينسلون راسهم ويستسلمون ويطلقون 2 .والله حرااام اللعب فبنات الناس ..

اختي انتي غلطتج انج وافقتي من دون علم 1 ..الله يهديج وهذا اكبر غلط توقع فيه الزوجة 2 وعقب اتطيح ضحية الطلاق وتتحمل الغلط ..كان منج انج تشرطين عليه انه يكون عندها علم لانه بهاالشكل بتكون لج كرامة ولا يقدر يهددج بالطلاق ..لانه بيقولج مابشتت عيالي واسهل له يطلقج لانه بهاالشكل مافي رابط بينكم عسب يكسر ظهره ..
هناك عيال 1 مايقدر يشتتهم .فانتي سهله بتكون عليه الطلاق ..واايد سكعنا نفس سالفتج وتطلقت الثانية تحت تهديد 1..
*وياختي لاتنسين صدمة قويية ع زوجته الاولى تعرف انه زوجها عرس عليها وحدة 2 راح تشارككها حياتها صعبة عليها فانتي لا تلومينها لانه جد الموقف صعب عليها الله يكون فعونها فكري بها

طبعا هو سهلة عليه انه يطلقج لانه خيفان من 1 وماشاورها لانه يعرف انها ماراح توافق ..

انتي اذا قالج بطلق روحي المحكمة وخبريهم بكل شي وشوفي شو يقولون لج ..لاتسكتين

ونصيحتي لاتحملي هالفترة اجلي الفكرة الحمل لين ماتحسين عرفت حرمته 1 وحسيتي بامان لانه حراام تييبين عيال وتغربيلنهم وياج ويعيشون ضحايا طلاق ..

واذا قال بطلق خلاص ماشي امل حطي شرووط تضمنين حقج

[khaleejiya]

كان المفروض تسألين نفسج كل هالأسئله قبل ما توافقين عالزواج
الحين ع قولتهم too late

[mrs.abk]

أخي 4 شهور كعمر زواج تراه ولا شيء .. انتي مستبقة الاحداث وايد .. توكلي على الله خلاص اللي صار صار .. أنا وحدة مستحيل اقبل بزوجة ثانية وبترك لها الجمل بما حمل لكن غيري ممكن ترضى .. وما أحكم على الاولى ترضى..

انا اقول خليج على وضعج ولا تفكرين بالاولى بالمرة .. من مصلحتج ما تدري ومن مصلحتج ان انتي تعيشين أيام زواجج الاولى براحة بال ..

الشيء الثاني موضوع الحمل أجليه شوي .. ولا تستعجلين على رزقج .. انتظري شوفي شو بيصير من الريال .. لا تحظين نفسج في موقف صعب قدام البيبي .. لأن لو طلقج الابو كل الناس بيلمونج انتي

اكسبي ريلج واستمتعي معاه .. وفي النهاية الزواج مهما كان على شرع الله مصيره بينعرف وصدقيني يوم بينعرف بتفقدين هالراحة والمحبة من ريلج .. وبيكون مهموم وعلى كتفه جبل وبيسيء معاملتج وبيطلع فيج غيظه من زوجته الاولى ,, فتجبني هالمواقف .. والله يصلح ححالج ويصبر حرمته لأن الصراحة موقفها صعب والله يربط على قلبها من الصدمة

[almal3ka1]

الريال ما غلط و كان صريح معاج ان لو حرمته عرفت ممكن يطلقج

الغلط مب منه منج لانج بعد زواج 4 شهور اكتشفتي الموضوع

عندي سووال : كيف هانت عليج نفسج ان يقولج لو حرمتي عرفت ممكن اطلقج !!

ولا بعد تبين تتنازلين عن حقوقج ! عشان منو عشان حرمته ما تعرف و لا عشان مشاعره !

هو اللي مفروض يفكر مب انتي

لا اتيبين منه عيال , و ما عليج من رمسه بعض العضوات انج تربطين الريال بالعيال ,, ماما احينه ما في شي يربط الريال و الحرمه

حبيبتي ما في حد يموت عشان حد و لا تستوين طيبه مال مقصه و شغلي كيد النسا