مشكلتي مع أهل زوجي

[مشكلتي]

السلام عليكم ورحممة االله وبركاته


اخواتي انا صار لي 5 شهور تقريبا من عرست وساكنه في قسم في بيت اهل زوجي
زوجي من النوع الهادي
مشكلتي بدت مع اهله في اول ايام زواجي غصب احضر كل المناسبات . انا قبل وانا بنت مول مااحضر الا لاهلي بس . هذول يبوني احضر لكل الناس اللي يعرفونهم ومناسباتهم وايد يعني عادي خميس وجمعه وسبت و حتى الاحد مناسبات ورى بعض واذا قلت ماابي تروح امه تقول لزوجي الناس يسالون وين حرمتك ليش ماتحضر وخلصت من هالمشكله طلعت لي بمشكلة ثانيه تقول لريلي ليش مرتك ماتنزل تقعد معاي وليش ما تاكل من اكلنا وخلصت من هالمشكله يت تقول لريلي لا تخلي مرتك تطبخ فوق في قسمكم خليها تطبخ تحت وانا ادري هي تباني اطبخ لها ولعيالها بس طبعا قلت لزوجي مستحيل
والحين اخر مشكلة في رمضان هذا
حتى في رمضان مناسباتهم ماتخلص
ف انا عشان ماارد الناس واجامل صرت احضر بس اطلع بدري وسويتها مره وحده رحت عزيمة بيت خاله وطلعت رحت المول مع ريلي

وبعدين يوم ثاني كان في عزيمة في بيت اخته وحضرتها وطلعت بدري

واليوم اللي بعد عزيمة اخته .. اتصلت امه واخته عشرين الف مره يبونا نفطر في بيت اخته !! قلت له لا تونا امس كنا في بيت اختك !!!
ورحت انا وياه بيت امي وفطرنا عند امي ..
قلبو الدنيا عليه وانقهروو وايد لدرجه لين 12 فليل يتصلون عليه يحاسبونه!
وقالو له ان ليش مانحضر العزايم و الناس تقول ليش نحضر شوي ونطلع بدري وليش مرتك ماتاكل الناس تقول ماتاكل هو يصدق امه انه هذا كلام الناس بس انا اعرف انه هذا كلام امه!!! المشكله زوجي مايوقفهم عند حدهم الف مره اقوله هذذي خصوصياتنااا محد له خص فينا

بموت قهر شو اسوي فيهم ينكدون حياتي حسبي الله عليهم

المزيد من آخر المواضيع من نفس القسم:

• كرهت حياتي
• مطلقة و اريد اعيش لحالي
• مشكلتي الفراغ
• مضغوطه وفقدت الامل
• تزوجت مريض نفسي
• مشكلة حالتي بعد الأمومة
• مشكلة تقدم لي خاطب وافد
• مشكله بنتي
• زوجي تعبني بالضرب كليوم💔
• أواجه زوجي بكذباته ولا اسكت

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[المراقبة العامة]

تمت الموافقة
الكلمة الطيبة صــــدقة

[ام غاية 123]

الله يعينج ياختي وصبرج ارضى الناس غاية لاتدرك

[وجدان الفجر]

مبارك عليج العرس اختي والله يسعدكم .
في مثل شامي ( على ما أعتقد ) يعجنبني وايد وهو فعلاً حكمة : كبريها تكبر , صغيريها تصغر . بمعنى أي شي تكبريه بيكبر أكيد وبتصاعد ويمكن يوصل لمرحلة صعب السيطرة عليها , والعكس صحيح لو الامور ما عطيتيها أكبر من حجمها بتصغر وبتتلاشى .
أختي أنت بعدج عروس جديدة , جديدة على زوجج وأهله وهم بعد جديدين عليج .بتحتاحوا لوقت طويل لين تفهموا بعض وتتعودوا على بعض . الموضوع حله بسيط و الكلمة الطيبة حسن المعاملة وحسن الظن بهم . أنا معاج زياراتهم مبالغ فيها و بس هذا اسلوب حياتهم , ما يقدروا يفرضوه عليج صح , ولكنج لأنج صرتي فرد من العائلة واجب تتقبلي الاندماج معهم . هم أكيد يبوج تكوني معاهم لأنهم حبينج تكوني معاهم و فخورين فيج ويبوا الناس تشوف حرمة ولدهم . وجودج معاهم في كل حفلة او عزيمة يبين انج وحدة منهم .
نقطة الأكل ك معظم الناس تظن انه لو ما كلتي انج مريضة , أو ما عاجبنج الأكل و بعد من منطلق انهم يحسوا أنهم مسؤولين عنج فيبوا يطمنوا انج كلتي ومب يوعانة , وأنا بصراحة عانت من هذه النقطة في بداية زواجي ليش ما تاكل واكلها قليل , بس الحمدالله فهمتهم اني هذه طبيعتي , آكل كمية أقل بس أخذ وجبات أكثر ومع الوقت تفهموا هذه النقطة .
أختي , بالكلمة الحلوة مع عمتج تقدري تكسبيها , العزيمة اللي ما تقدري تحضريها واعتذري لعمتج قبلها بوقت وخبريها انج ما تقدري تحضري , وبعد قعدي معاها وقولي لها :انج تحبيهم وتقدريهم وتحبي تكوني وياهم بس ما تقدري تحضري كل عزومة وعطيها اسباب , مثل و احس بارهاق ,او لو كنت مشغولة بدراسة او وظيفة قولي لها اكون مرهقة من الشغل او الدراسة وما ألحق ارتاح .
أختي لاتزعلي مني بس تصرفج في العزيمة الأخيرة كان غلط , ما تبي تروحي العزيمة كنت اعتذرتي لعمتج وقلتي لها عموه سامحيني باكر ما بقدر اروح معاكم لأني معزومة عند أمي .
ونصيحة شجعي زوجج على بر والديه وأهله ,لأنه هذا سبب بركة وسعادة الحياة الزوجية , وهذا بيخليج تكبري في عينه أكثر .المعذرة طولت عليج , ربي يوفقج .

[ياسمين الحبيبه]

شكلهم يغارو منج.يبون يخربو عليج...اطلعي مع ريلج في اي وقت تحبين.عيشي بداية زواجج.ما احلى ايام الزواج.عقب بتبين العيال كل شي يتغير..تنشغلين وايد..حطي عمرج مثل الاطرش في الزفه.انا ام ريلي تقهرني..بحركاتها..شوفي مرات اوديها في السياره اتم تزاعج.وتبا هي تراويني الدرب.وتم تضرب الجامه.تقول يمين يمين لفي يمين.. انا من القهر الف يسار.. تقولي ليش لفيتي يسار.. اقول لها اتحرا هذا اليمين.. جي مرات تخليني اعاملها بروووود.ما اقول لها ليش تصارخين وتضربي الجامه.. انا اعرف اليمين من اليسار .عشان انت صارختي انا سويت عكس كلامج..انا مب دريول. المهم انت قولي ما اقدر اسير .تعبانه..ما احب اكون ثقيله ع الناس.اخترعي اي شي من مخج...هم جي يبون الحد يتعامل وياهم..مب كله على نياتج.مب كله سمعا وطاعه...الله يوفقج في حياتج الخاصه والزوجيه...

[touty]

الحياة الزوجية تختلف تماماً عن حياتج سابقاً
ف اتوقع انه من الطبيعي انهم بينادونج ف كل المناسبات لانج يديده عليهم و يبون يعرفونج عالعايلة ..
وبعدين مافي ام ماتبي الخير لولدها فلاتحطين ف بالج انها تبي تخرب عليج او تتدخل ف خصوصياتكم و
حبيبتي لازم توجبين اهل زوجج و اتطولين بالج معاهم ..
اتكلم عن تجربه و بالتوفيج

[ماحد شراتي]

ما عليج منهم الغاليه .. دام ما ياج عتاب من ريلج فخلاص امورج فالسليم .. وهو يعرف هله عسب جذيه ما يقدر يقول لهم شي .. عيشي حياتج .. ربي يسعدج

[مغليك]

ماعليه فديتج ادري انه فالبداية صعبة عليج بس عقب بتتعودين ..
انا كنت جذا ويا اهل ريلي قمت فالبداية اجاملهم واروح وياهم وعقب يوم تعبت قمت اتعذر واتحجج واقولهم انا مب متعودة ع الدوارة والحواطة ..لانه كل مرة عزيمة عند خوات عمتى واهلها وابوها وخيلانها وبيت عم ريلي قلت عقب ستوب ..وحتى الرحلات يطلعون البر ويتمون لين فالليل قمت اطنش .


وع الاكل فديتج اكلي ساعات وياهم دشي المطبخ عاوني عمتج بس لا تعودينهم الطبخ دووم عليج لانه بيعتمدون عليج عقب ..
مثلا سوي لهم سويت ودي صوبهم او اكله خفيفة طرشيهم حسسيهم بوجودج وبالكلمة الطيبة اكسبيهم


أما العضوة ياسمين الحبيبة ضحكتني بردها ..وياعمتها يوم تدق الجامة وتلف بها يساار ويمين خذيها بالتي هي احسن حرمة كبيرة شكلها

[Ward-uae]

مشكلتج عاديه
اذا ما تبين اعتذري بطريقة حلوه اليوم عمتي عندي مشوار بسيط وجيه
حاولي ما تدخلين ريلج في مشاكلج مع اهله
اهلك جيه واهلك سوو جيه اتجنبي لا تقولين ريلي ولازم يصدقني هذيلا اهله شو ما كان ما بيرضى عليهم الحين انتي عروس وبيحاول يهديج بعدها بيقلب عليج وبيتمنى اليوم اللي ما خذاج
الحين انتي خفيفه تقدرين تطلعين وتزورين باجر بيكون عندج عيال وبيت خاص ويالله تسيرين لحد تعرفي على اهله اجتمعي وياهم هالفترة رمضان والجمعات حلوه

[المعآني]

حاولي تكسبين عمتج وبتنحل امورج

[Jasmin44]

سوي اللي يريحج هاي حياتج مب حياتهم و خلاص انتي مسؤوله عن نفسج ، انا لو مكانج بتخبل لانه احب الخصوصيه و احب انه تكون لي كلمه ، محد يتدخل فيني لا امه و لا خواته ، و حتى في الاكل مب مجبوره اكل شيء ما ابغيه

و حتى في طلعاتي انا و ريلي محد له حق يسال وين سايره وين راده لانه وصلت لمرحله انا بدير شؤون عايله و محد له شور علي غير ريلي العزيز لا غير

ساعات الواحد يبغي يرتاح و يبتعد عن الناس و ساعات يبغي يسير و يسلم بس مب عاد مناسبات ورا بعض كل يوم هذا اوفر بالنسبه لي

تفاهمي مع ريلج و اهم شيء انتو الاثنين

الله يسعدكم و يهنيكم في حياتكم و يبعد عنكم هالتدخلات اللي مالها داعي ابدا

[ريم العسووله]

اختي لا تلومينهم ... شكلهم ناس وايد اجتماعيين و وحدة مثلج ما تروح مناسبات بالنسبة لهم شيء غريب مب متعودين عليه ... و توج عروس من خمس شهور فيحتاجون وقت لين يتعودون ع طبعج ... و دامج عروس يديد فأكيد يبون يفرحون فيج و يتباهون فيج جدام أهلهم و معارفهم ... و أكيد أهلهم و معارفهم بيسألون عن العروس هالشيء طبيعي ... بعدين مب لازم يعرفون وين تحركاتج مع ريلج و وين رايحة و وين رادة تجنبا عن المشاكل ... هم اللحين بتصرفاتج على بالهم انج مب مرتاحه وياهم خصوصا لما رحتي بيت امج و طنشتيهم ... اصبري عليهم و بيتعودون عليج ... و كلمي ريلج يخبر اهله بأنج خجولة و مب متعودة عالعزايم و تستحين ... عشان يخففون عنج الدعوات ... حمدي ربج ان اهل زوجج يبونج في مناسباتهم و يمعاتهم ... غيرج من المتزوجات ... ام زوجها و خواته و اهله يسوون كل شيء و يطلعون و يدشون و هي آخر من يعلم ... حتى عادي يسوون حفلة بدون لا يعزمونها و يحسسونها بأنها منبوذة ...

[ام مصطفى..]

سوي مثلي اسمع من الاذن اليمين وطلع من الاذن اليسار وحياتي مستمره ..

[bnooota]

الله يعين

[mrs.abk]

شكلهم يغارو منج.يبون يخربو عليج...اطلعي مع ريلج في اي وقت تحبين.عيشي بداية زواجج.ما احلى ايام الزواج.عقب بتبين العيال كل شي يتغير..تنشغلين وايد..حطي عمرج مثل الاطرش في الزفه.انا ام ريلي تقهرني..بحركاتها..شوفي مرات اوديها في السياره اتم تزاعج.وتبا هي تراويني الدرب.وتم تضرب الجامه.تقول يمين يمين لفي يمين.. انا من القهر الف يسار.. تقولي ليش لفيتي يسار.. اقول لها اتحرا هذا اليمين.. جي مرات تخليني اعاملها بروووود.ما اقول لها ليش تصارخين وتضربي الجامه.. انا اعرف اليمين من اليسار .عشان انت صارختي انا سويت عكس كلامج..انا مب دريول. المهم انت قولي ما اقدر اسير .تعبانه..ما احب اكون ثقيله ع الناس.اخترعي اي شي من مخج...هم جي يبون الحد يتعامل وياهم..مب كله على نياتج.مب كله سمعا وطاعه...الله يوفقج في حياتج الخاصه والزوجيه...

الله يعينج على نفسج .. كيف تتعاملين مع حرمة كبيرة جيه ..
هذي موب بنتج تعاندينها وتمشين كلامج .. والله لو امج تسوي بها حرمة اخوج هالحركات جان سبيتيها سب ...


اختي راعية المشكلة لا تتبعين كلام المخببات اللي مثل هذي .. اللي تحرض على ام الززوج لأن ام زوجها موب عاجبتنها مالج شغل فيها .. وربي يرزق كل حد على نيته