ريلي يعاملني جني واحد من الشباب

[مشكلتي]

مساء الخير ...
ماعرف كيف ابتدي بمشكلتي بس مليت من تصرفات ريلي ،، نحن مالجين من اربع شهور والعرس عقب العيد ،، ريلي طيب الحمدلله ويحاول ما يزعلني بس ماقد حسسني بالحب او انه مهتم يعني جي احس انه يعاملني جني واحد من ربعههه ،،، انا اهتم فيه واقوله كلام حب بس ما احصصل رد منهه ،، وقد عزمته على الغدا وخذتله ورد وحطيته ف موتره بدون لا يعرف وكنت كاتبه ف البطاقه جي كلام حب وجي وما علق غير بكلمه مشكوره حبيبتي 😐بس جي حسيت ان ما استانس ،،،

انا ارمسه ع الواتساب وايد بس عالفون لا يعني كل ثلاثه ايام او اسبوع مرك وبهالمكالمه اتنرفز وايد لاني احس اني واحد من الشباب 😂ودوم احاول اتهرب ف المكالمه عسب ما يحس اني مترفزه او شىء انا احبه بس ما اروم اقوله لاني استحي عالفون واخاف من ردة فعله ،،


اللي ريلها جي شرات ريلي او عندها خبره كيف اتعامل ويه هالنوع من الرياييل تفيدني يزاااهاا الله خير

المزيد من آخر المواضيع من نفس القسم:

• تزوجت مريض نفسي
• مشكلة حالتي بعد الأمومة
• مشكلة تقدم لي خاطب وافد
• مشكله بنتي
• زوجي تعبني بالضرب كليوم💔
• أواجه زوجي بكذباته ولا اسكت
• ريلي احبه ،، بس ماعرف شو الي حصل
• مشكلتي التعلق الزائد
• رفض ريلي للحمل
• عااااجل مشكلة واجهتني

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[المراقبة العامة]

تمت الموافقة
الكلمة الطيبة صـــدقة

[تفاحتي]

لا تستعيلين هو شو جاااف منج عشان يقولج كلام الحب ما يي الا عقب العرس


قبل العرس بس الا كلام

مو مشكله هذي ابدا اشيا عاااديه
لا تكبرين الفكره ف راسج انج واحد من الشباب
الريال ما يبا ياكل قرصه وهو نيئ

[almal3ka1]

لا تستعيلين هو شو جاااف منج عشان يقولج كلام الحب ما يي الا عقب العرس


قبل العرس بس الا كلام

مو مشكله هذي ابدا اشيا عاااديه
لا تكبرين الفكره ف راسج انج واحد من الشباب
الريال ما يبا ياكل قرصه وهو نيئ

[عنجهيه]

السلام عليكم ورحمة الله وبركاته

حبيبتي تعوذي من ابليس وحطي الرحمن في صدرج
كفايه انج قلتي انه انسان طيب و زين ومايزعلج

بما انكم ما تتكلمون دوم وبعدكم مالجين
هذا شي عادي لانه الريال اكيد بعده ماتعود على هالوضع

عطيه فرصه لا تستعيلين الحياه جدامكم وان شاء الله بتشبعين من سوالف الحب و الله يألف بين قلوبكم ان شاء الله ويرزقكم حياه حلوه تسعدون فيها

وخذيها نصيحه .. لا تتنرفزين على كل شي .. انتي ماتكلمينه الا مره او مرتين فالاسبوع
استغلي هالمكالمه .. اسعدي نفسج فيها .. مب لازم تكون هالمكالمه كلها كلام حب و غزل
كفايه فالبدايه يكون بينكم احترام و الباقي ايي عقب مع العشره

لا تبدين حياتج بهم و نكد بنيتيها على افتراضات و افكار وهميه
عيشي فترة الملجه تراها ايام حلوه و ماتتكرر


و بس .. الله يسعدكم يارب

[ماحد شراتي]

مع العشرة كلشي بيتغير ان شاءالله
لا تتضايقين وربي يتمملج على خير

[عذآب المزآين]

ههههههه حبيبتي اسمعي محاضرات خليفه المحرزي
يقولج للحريم الي يتشكون عن ريايلهم الي مايقولولهم كلام حب عقب الزواج /السبب يكون الكلام مخلص ففترت الملجهوالريال مابيتم يعد نفس الكلام
يعوي خلي كلام الحب حق العرس احسن من انه يكون بس ففترت الملجه /و ريلي كان نفس ريلج مايقولي كلام حب بس محترم وحبوب ويحبني وهالشي بين بعد الزاوج الحمدالله

[المعآني]

ما اشوفه يعاملج كربيعه
قالج مشكورة حبيبتي وين المشكلة شو كنتي تتريين أكثر منه هذا وايد منهم اصلا
لو أنه دفش في تصرفاته وياج هني ممكن تقولين كأني ربيعه
لو مضايقج الوضع وايد نغزي له أنه تغزل فيني

[mouzan7mod]

مع العشرة كلشي بيتغير ان شاءالله
لا تتضايقين وربي يتمملج على خير

[بنت الشوامخ]

عادي حبيبتي هذه مب مشكله
هذا طبع ريلج
والحمدلله يكفي انه طيب ويحبج
مب شرط يبين الحب بالكلام
اهم شي الفعل

ولما قال لج مشكوره حبيبتي ترى هالشي زين ولا انه مايعلق
لا تتوقعين ابدا انه الريال نفس الحرمه ردة فعله قويه ويتم يشكر ويشكر ويمدح
هو داخل قلبه اكيد فرحان بس هم يعبرون باختصار ويعطيج المفيد والمختصر

خلج ويا ريلج مثل ما انتي
عوديه عالكلام الحلو
يمكن مع الايام يتعود ويقلدج
واذا ماتعود عادي
اهم شي انه يحبج باهتمامه وافعاله

انا بعد مرات ريلي يعاملني جني واحد من الشباب وما اشوفها مشكله

المهم انه يحبني


صح نحن الحريم تهمنا الكلمه الحلوه بس الحياة الزوجية اكبر عن جي
الحياة ماراح توقف على هالشي
المعامله الحلوه اهم مليون مره

وصدقيني لابد بتسمعين منه كلام حب وغزل
خاصه بعد الزواج ، في العلاقه الخاصه مثلا

والله يسعدكم ويسخركم لبعض

[ورقة ناعمة]

مع العشرة ومع الأيام ومع العيال كل شي بيتغير حتى لو ماتغير مع تقدم العمر بيتغير


الرياييل يبالهم صبر وطولت بال

[S99_]

اول شي ترى الوضع جدا عادي ،
حبيبتي شوفي طبعا نحن البنات معروف عنا انه نحن نحب الكلام الحلو والغزل والرومنسيه والحب عندنا يعني هالاشيا وهالشي يفرق عن الريال بهو يشوف الحب انه سعطي حرمته ويسصرف عليها و يسويلها هذا عنده مفهوم الحب ... بس طبعا انتي بنفسج بيدج كل شي تقدرين تغيرين الويال نفس ما انتي تبين بعد ما تتعرفين عدل على شخصيته ، وعلى كثر ما تردددين عليه الكلام الحلو هو بيتعلم منج وبيصير نفسج ولو قالج كلمه حلوه حسسيه انج استانستي والا ليش تحسسيه قوليله انا وايد استانس يوم اتقولي جيه و احس انه ياحظي قيك هو بيصدق عمره وبيزيد 🙊 و شكرا

[ام مصطفى..]

الله يكووون في عونج

[بسمة فجر]

يا عروسة اهتمي بأمور عرسج و التجهيزات و لا تشغلين بالج بهالشي
دام الاحترام موجود بينج و بين ريلج الامور طيبة
بعد العرس بتعرفين إن ريلج يحبج مب من الكلام بس لأن كلام الرياييل قليل
بتعرفين من التصرفات و تعبير الريال عن الحب يختلف عن تعبير الحرمة
اقريي كتاب رجال من المريخ و نساء من الزهرة
بتوضح عندج الصورة
و الله يتمم فرحتكم على خير

[الموهبة]

اول شي بعدكم بداية المشوار مع الايام بتجوفي كيف الدلع من ريلج فطبيعى يتهرب لما يحس انج زعلانه لانه مايبغى مشاكل ولا يبغى يخسرج
تقولي انج تحبيه لكن تستحى تقولي له ليش تخفي المشاعر منو قال لج انه بزعل لو قلتي تحبيه هذا حلالج مو غريب
وثانى شي خليج ذكيه اتصلي فيه لما يكون في الغرفه لحاله يمكن لما احد معاه صعب يرمس اختاري وقت الليل وقولي له في رساله واتساب قبل لاتنام حابه اتصل فيك