زوجي وبنت عمه !

[مشكلتي]

السلام عليكم ورحمة الله وبركاته



بقول لكم قصتي وانتوا عطوني رايكم
أنا متزوجة وعندي عيال والحمدلله وأحب زوجي وزجي يحبني وحياتنا الزوجية كانت ماشية بهدوء لين بداية هذه السنة.
زوجي عنده بنت عم أمها روسية وكانت عايشة بروسيا , وقررت تي تعيش هنا في الامارات السنة بس ليش ؟ يقولوا علشان تبي تكون في وطنها وتعيش مع أخوانها من الاب
ما همتني سالفتها لين أتصلت فيني أخت زوجي من كم يوم وقالت لي زوجج( أخوها يعني ) مهتم وايد ببنت عمنا الروسية ! قالت لي : متحمس وايد ليها وكل يوم و الثاني رايح يخلص لها أوراقها أو متطلباتها علشان التقديم على الشغل , وهذه حالة زوجي من يوم ما جات بنت عمه من روسيا , وقالت لي أخته : أنتبهي لزوجج أنا ما مرتاحة مع أني ما شفت شي على البنت والبنت جداً محترمة بس ما مرتاحة لإهتمام زوجج الزايد ! نسيت أخبركم , زوجي طبيب وبنت عمه هذه بعد طبيبة بس متخرجة من الطب قريب, عازبة في العشرين من عمرها وزوجي في الثلاثين من عمره .
بنت عمه هذه علاقتها بأخوانها وخواتها سطحية مثل ما عرفت لأنهم ما متقبلينها وهم أخوانها وخواتها من الأب وعمرهم ما شافوها إلا السنة هذه مع معرفتهم بوجودها وأبوهم صار له متوفي قريب الخمس سنوات. أنا ما شفتها للحين لأنه العيلة ما عرفتنا عليها ولا سوا حفلة استقبال لها ولا شفتها بعزايم العيلة للحين !أنا ما مهم عندي قصتها أو عايلتها أنا بس يهمني زوجي وبيتي , بدأ الشك ياكل قلبي ويلعب بتفكيري ! اللي عرفته أنه البنت جميلة جداً ( على قولة أخت زوجي : تشبه باربي !) بس خلوقة .
الغريبة أنه زوجي ما جاب لي سيرتها خير شر! وهو ما متعود يخبي علىَ شي , ليش ما قال لي أنا أروح أخلص أوراق بنت عمي أو أساعدها ؟!!!! ما سألته لأنه هذه الفترة مسافر , بس من يرجع ناوية أسأله , هل تنصحني أني أفتح الموضوع وأسأله أو أتم ساكتة ؟ هل أنا مكبرة الموضوع ؟ مرات أقول لنفسي : يساعدها لأنها أكيد ما محصلة حد يساعدها وهي غريبة مع أنها بوطنها بس ما كانت عايشة هنا وأخوانها بعدين عنها , بس متضايقة لأنه خبى عليَ. ومرات أقول هو المفروض ما يخصه بها ولا له شغل والمفروض ما يتقرب مهما كان . صرت استرجع تصرفات زوجي الفترة اللي فاتت ما لاحظت شي متغير عليه . ما أدري يمكن أنا ما منتبه والماي يجري من تحتي وأنا ما حاسة !!!!
أنتظر ردودكن خواتي ونصايحن القيمة .

المزيد من آخر المواضيع من نفس القسم:

• كرهت حياتي
• مطلقة و اريد اعيش لحالي
• مشكلتي الفراغ
• مضغوطه وفقدت الامل
• تزوجت مريض نفسي
• مشكلة حالتي بعد الأمومة
• مشكلة تقدم لي خاطب وافد
• مشكله بنتي
• زوجي تعبني بالضرب كليوم💔
• أواجه زوجي بكذباته ولا اسكت

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[المراقبة العامة]

تمت الموافقة
الكلمة الطيبة صـــدقة

[Dr.nurse]

السلام عليكم الغالية
عساج طيبة

حبيبتي انا مو متزوجة ولا عندي هالخبرة في الحياة الزوجية
بس انا من وجهة نظري ان لا تحاتين الموضوع واايد
الوسواس من الشيطان
ومدامج انتي وريلج سمن على عسل
حطي بالج عليه و على عيالج وبيتج
ولا تعطين للشيطان ثغرة يدخل عليكم منها ويخرب لكم بيتكم
الشك والوسواس ياما هدم بيوت

[تفاحتي]

اخت ريلج يعني وايد تموت عليج
عشان جي تفتح مداخل الشيطان حقج



اللي ف الجدر بيطلعه الملاس
عيشي حياتج وخل عنج باربي ع قولتها

[almal3ka1]

لا تخلين أي حد يدخل بينج و بين ريلج


و ممكن اخت ريلج تغار منها او أي سبب 2


اهم شي انتي ركزي عريلج و حياتج دامه زين معاج

و اذنيج سكريها من داخل عشان ما تسمعين وايد

[غلآ نفسي]

شوفي انا غير وانتي غير

ريلج غير وريلي غير

بس لو ريلي ما كنت برضى يخلص امور بنت عمه لان عندها اللي يخلص اوراقها

ريلي ما يرضى اطلع جدام عيال عمي كيف انا ارضى اهتمامه ببنت عمه

يمكن البنت وحليلها وايد زينه وخلوقه

بس زينه وخلوقه حق نفسها واهلها والله يحفظها

بس عني انا ما برضى الصراحه

خصوصا انه ما ياب سيرتها

ف لو مكانج كنت بقوله اني اغار وماحبه يحتك فيها ولا في غيرها

بالتوفيق

[أم خليفة11]

للأسف في هالزمن الناس لا قامت تسوي خير و لا حتى تترك و تساعد الآخرين لى فعل الخير.
يا عزيزتي البنت غريبة فالبلد بالرغم من انها بنت البلد،، ريلج يمكن فيه الخير اللي مب في ناس ثانيين.
حطي في بالج انه البنت تربت برع و عاشت و درست برع يعني تفكيرها مختلف عن اللي محن متعودين عليه،، ثاني شي لو اخوانها و خاوتها فيهم خير ماكانو تركو المجال حق ولد عمها،،
عموما انتي ثقي في زوجك و خل عنج وساوس الشيطان و لو اخته هاي فعلا تبغي لج الخير كانت هي بنفسها ساعدتها و لا انها شوشت على تفكيرج و خلتج توسوسين.
توكلي على ربج و صدقيني موضوع تخليص المعاملات و هالسوالف ماراح يستمر طول العمر يوم من الأيام راح ينتهي كل شي و تعتمد على نفسها البنت.
والباربي اكيد حركت الغيرة في قلوب البعض و تبا الكل يحس نفس الاحساس .
في نظري تقدرين تناقشين ريلج في موضوع البنت لكن تبينين له انج بالعكس واثقة فيه و في اخلاقه.
ولو هي احتاجت شي بالعكس انتي بعد اوقفي معاها لعل ربج يسخر لج من يوقف معاج في محنةز ترى الدنيا ديون و اليوم عندي باجر عندج.

[حتشبسوت]

لاتخونين ولا تأمنين

سواء كانت نيته صافيه ولا فيها شك خلي عيونج مفتوحه

[mouzan7mod]

عن نفسي انصحج تسوين للموضوع طاف
اخوانها ما ساعدوها لان ممكن متحسسين من موضوع من موضوع هاي أختنا الجديدة
خلي ريلج يساعدها ، و انتي في نفس الوقت لا تغفل عينج ترى الشيطان موجود
خليج واعية بس مب معناتها تشكين فيه لالا ، ركزي على ريلج و بيتج و عيالج

[khaleejiya]

اختي نصيحه لا تتأثرين بكلام الناس لانهم يحبون يزودون بهارات والموضوع عادي
انتي وثقتج بزوجج وانتي ادرى به اكثر من غيرج
تتوقعين منه هالشي؟
واسأليه ليش لا لكن خلي اسألتج عاديه لا تنفعلين وتعصبين وتحاسبينه
وانا لو منج بطلب منه يعرفني عليها وانا بذكائي بتصرف وياها واصرفهم عن بعض بس بطريقه غير مباشره

[المعآني]

تعرفي عليها وذكري ريلج أنها غريبة عنه وخل تعاملك معها بحدود

[غلآ نفسي]

ليش هالتناقض فالردود ؟

لو الحرمه بوجود ريلها وبحجابها وبالغلط شافت ولد عمها جان ريلها ما رضى ويمكن يعصب او يزعل

عيل ليش الحرمه تقولون لها ما عليه وتعرفي عليها وخلي ريلج يخلص امورها ؟

لو الحرمه سوت جي جان قلتو انتي غلطانه وكيف تسمحين حق نفسج وهذا ولد عمج

عيل الريال ليش دوم عاطينه الكرت الاخضر ؟؟

[Yazi.90]

للأسف في هالزمن الناس لا قامت تسوي خير و لا حتى تترك و تساعد الآخرين لى فعل الخير.
يا عزيزتي البنت غريبة فالبلد بالرغم من انها بنت البلد،، ريلج يمكن فيه الخير اللي مب في ناس ثانيين.
حطي في بالج انه البنت تربت برع و عاشت و درست برع يعني تفكيرها مختلف عن اللي محن متعودين عليه،، ثاني شي لو اخوانها و خاوتها فيهم خير ماكانو تركو المجال حق ولد عمها،،
عموما انتي ثقي في زوجك و خل عنج وساوس الشيطان و لو اخته هاي فعلا تبغي لج الخير كانت هي بنفسها ساعدتها و لا انها شوشت على تفكيرج و خلتج توسوسين.
توكلي على ربج و صدقيني موضوع تخليص المعاملات و هالسوالف ماراح يستمر طول العمر يوم من الأيام راح ينتهي كل شي و تعتمد على نفسها البنت.
والباربي اكيد حركت الغيرة في قلوب البعض و تبا الكل يحس نفس الاحساس .
في نظري تقدرين تناقشين ريلج في موضوع البنت لكن تبينين له انج بالعكس واثقة فيه و في اخلاقه.
ولو هي احتاجت شي بالعكس انتي بعد اوقفي معاها لعل ربج يسخر لج من يوقف معاج في محنةز ترى الدنيا ديون و اليوم عندي باجر عندج.

[رسايل غلا]

اختي لا تسمعين رمسة حد حتى لو بين لج انه خايف عليج دام ريلج ما سوى شي غلط ولا حسيتي انه متغير
اتعوذي من ابليس ولا تيلسين تفكرين وتفتحين ع نفسج باب يمكن ما ترومين تسكرينه عقب وعيشي حياتج ويا ريلج بهدوء

[ام مصطفى..]

!!!!!!!!!!!!!!!!!!!
موضوع يحير والله
ماشفتوها ولا تعرفون شي عنها وريلج يساعدها ليش هو منو ؟
اخوها ؟ زوجها ؟ اللهم ولد عمها ليش يدخل ف موضوعها اصلا ضروري تسالينه