مفنش من الجيش وحاط حرته فينا

[بنت الشوامخ]

حبيبتي حاسه فيج
الريال لما ينضغط ويكون عنده مشاكل يطلع حرته بأهله
و يحطون اللوم عالحرمه في بعض المشاكل خاصة الماليه
لانه يفكر فيج وفي عياله واسرته ويحس بعبء ثقيل لانه هذه مسئوليه كبيره مايقصر معاكم ويوفر لكم الحياة الكريمه
ف لاتلومينه وتضغطين عليه

بالعكس الحين في هذه الازمه راح يبين حبج له وصبرج وتضحيتج
حرام كيف تروحين بيت اهلج وتخلينه بهذه الحاله
اللي فيه مكفيه واعرفي انه ماسوى اللي سواه الا عشانكم

تحملي نفسيته لانه صدق خاصة الامور الماليه والديون وسالفة الدوام وااايد وااايد تأزم وتضايق الريال وتخليه مهموم وماينام الليل ونفسيته تستوي صفر وبيعاملج مب على طبيعته وعادي تشوفينه ماله خلق ولا يضحك

مب معناته مايحبج ولا ما يباج بس غصباً عنه والله

ريلي ياما مرت ايام اشوفه مبوز وزعلان ويطلع حرته فيني مع اني مول ماسويت شي بس بالاخير يخبرني انه يمر بضغوط بالدوام ويطلب مني اتحمله واصبر عليه لانه غصبا عنهم هالشي

اصبري اختي خلج له نعم السند
خلج له الزوجه والام والصديقه وكل شي
سانديه في ازمته هذه و لاتتضايقين وتزعلين جدامه على هالوضع وتشتكين ترى بيزيد اللي هو عليه

بيني له انج راضيه وانه مايقصر وياكم وانج راح تكونين معاه لين اخر لحظه وتساندينه بكل لحظه

يمكن انتي تحنين عليه وتبينين ضيقج عشان جي هو تحصلينه دوم متأزم

اللي عليج تسوينه الحين هو الصبر والدعاااء باستمرار وكثرة الذكر
الصبر مر لكن ثماره حلوه

وفي ناس تصبر سنين مب سنه ونص
وقصص ناس قراب مني مروا بأخس عن حالة ريلج بمليون مره

دوم قارني وضع مع اللي اسوأ عنج وقولي الحمدلله

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[cute uae]

اختي هو في الرخاء ما قصر عليكم و تسلف عشانكم... و اللحين في وقت الشدة تتشكون منه بدال ما توقفون معاه !!؟

خففوا طلباتكم ... علمي عيالج مب كل شيء يبونه يوصل لهم ... الدنيا تتغير و الحال يتغير ... لازم الواحد يعود نفسه و يأقلمها على التغيير ...

هالفترة حاولوا تخففون من طلباتكم و خذوا الاساسيات الي تحتاجونها و مب شرط تاخذين نفس الاغراض الي تاخذينهم كل رمضان ... اللحين وضعكم تغير لازم تراعين ريلج شوي لين ما الله يفرجها ...

المشكلة ان في ناس ما تتنازل للاسف و لا يتحملون الظروف المادية و يبون الشيء يوصل لهم مهما كانت الظروف بدون مراعاة الغير ...!!

اختي الديون مب شيء بسيط ... و واضح ريلج انه انسان ما يحب يحط في ذمته شيء ... لازم تشجعينه على هالتصرف ... لان في بعض الناس ياخذون ديون و ياخذون ديون بدون لا يهتمون و اهم شيء عندهم انهم يعيشون و ذمتهم وسيعة !! ...
الواحد ما يضمن حياته ... و الدين يبقى في رقبة الانسان لي يوم الحساب ... لا تظنين المسألة سهلة ... في مثل يقول الدين هم و لو درهم ...

و دايما تذكري ان زوجج عمره ما قصر عليكم قبل لا يفنش ... و كله الي سواه و الي قاعد يسويه عشانج و عشان عيالج ... حطي نفسج مكانه ... لا وظيفة و فوق هذا ديون و بيت و عيال و متطلبات !! كم الواحد يتحمل


و اللحين انتي و زوجج تحت اختبار من رب العالمين ... اوقفي مع زوجج و سانديه لين ما رب العالمين يفرجها عليكم ... بدال ما تحاتين رمضان و اغراض رمضان و اغراض العيد ... حاتي ريلج و الديون الي تتراكم عليه عشانكم و صحته و اعصابه ... و خذي رمضان فرصة للعبادة و الدعاء ان ربكم يفرج كربتكم قريب و تنحل كل اموركم ...

و تذكري دوام الحال من المحال و ربنا قال في القران ان مع العسر يسرى ..

[الرمضا]

من الطبيعي بأننا لا نملك لمثل وضعكم الا الدعاء
إلا إنكِ غاليتي تمتلكين الأكثر عنا ،، تدبري في هذة الآية الكريمة

فَقُلْتُ اسْتَغْفِرُوا رَبَّكُمْ إِنَّهُ كَانَ غَفَّارًا . يُرْسِلِ السَّمَاءَ عَلَيْكُمْ مِدْرَارًا . وَيُمْدِدْكُمْ بِأَمْوَالٍ وَبَنِينَ وَيَجْعَلْ لَكُمْ جَنَّاتٍ وَيَجْعَلْ لَكُمْ أَنْهَارًا ) نوح/10 - 12 .





1

[غلآ نفسي]

من الطبيعي بأننا لا نملك لمثل وضعكم الا الدعاء
إلا إنكِ غاليتي تمتلكين الأكثر عنا ،، تدبري في هذة الآية الكريمة

فَقُلْتُ اسْتَغْفِرُوا رَبَّكُمْ إِنَّهُ كَانَ غَفَّارًا . يُرْسِلِ السَّمَاءَ عَلَيْكُمْ مِدْرَارًا . وَيُمْدِدْكُمْ بِأَمْوَالٍ وَبَنِينَ وَيَجْعَلْ لَكُمْ جَنَّاتٍ وَيَجْعَلْ لَكُمْ أَنْهَارًا ) نوح/10 - 12 .





1

احلا رد