مشكلتي مع بنتي

**مشكلتي** · 2016-05-07, 21:42

السلام عليكم
خواتي الصراحة ما اعرف كيف ابدأ ... مشكلتي مع بنتي .. هي في عمر 16 تقريبا ...
مع أنها في هالعمر الا اني لحد الحين ما سمحت الها تشيل شنبها

... يمكن لأن أول عيالي اولاد و هي وحيدتي .. فما عرفت اتعامل هيها

... انا قلت بخليها تشل شنبها بخيط .. و شو الحل مع باقي ويهها ؟؟؟..
مع العلم هي بيضاء و يبين شعر ويهها

...
لا تقولون لي شاوري حد من أهلج ... شاورت اختي و قالت لي أسويلها سوفت لايت

.. و مستحيييل أخلي وحيدتي تسوي ليزر من هالعمر

...

افيدوني ....

المزيد من آخر المواضيع من نفس القسم:

**المراقبة العامة** · 2016-05-09, 10:49

تمت الموافقة
الكلمة الطيبة صـــدقة

**بقايا العود** · 2016-05-09, 10:57

عزيزتي سوفت لايت ولا المدلايت مايأثر
كلنا نسوي واشوف العياده وايد حريم اييبون بناتهم وعمرهن 10 سنوات
حق الليزر لانهن مشعرات وايد

انتي بتريحيها من هم ازاله الشعر

وبالاخير القرار لج

**ماحد شراتي** · 2016-05-09, 15:49

ما فيها شي الغاليه

بالعكس اشوفه نظافه واهتمام .. سويلها سوفت لايت ولا ليزر

**المعآني** · 2016-05-09, 16:25

عادي خليها تسو ويها بين فترة والثانية دام مشعرة مسكينة ليش أتم جيه بشنبها و16 عمرها حلوو ابدي عوديها

**M-Alshehhi** · 2016-05-09, 16:38

بالعكس السوفت لايت أريح لج ولها أولا الخيط يسبب مسامات وحبوب اذا تحسست بشرتها ولازم كل اسبوعين بالصالون السوفت لا جلسه كل شهر وعقب كم من جلسه كل خمس او ست شهور حسب كثافة الشعر وهذا رايي و الله يحفظها لج يارب ❤

**فوحة الفل** · 2016-05-09, 17:34

حبيبتي الله يحفظها لج

انا كنت اتمنى اتيي امي و انا صغيره و تعلمني هالسوالف بدال عدم الثقه اللي كنت عايشتنه ، مادري بعض الامهات ما يهتمون لهالموضوع ، بس انا كنت مشعرررره وووايد وووايد و لا حد يا و علمني شو اسووي لين يت وحده ف المدرسه و قالتلي انتي حلووه بس مخرب عليج شعر ويهج و كنت ف الاعدادي قالتلي ليش ماتروحين الصالون و تشلين بخيط ؟ انا ما اخفيج كنت اشوف نفسي اني مشعره بس صغيره ما بيدي شي ، الدور الاكبر على الام و امي الله يسامحها ماعلمتني ع هالسوالف ، يمكن زمنا يختلف عن الحين بس بعد لازم تشوفين لها حل و الله حررام يكفي احساسها اكيد انها تبا تشله ، السوفت لايت حلووو و مريح و بعد يحافظ ع الويهه صااافي ، بلا مشاكل الخيط و الالم .... لا تهملينها اختي ، الله يخليها لج ان شاء الله

**almal3ka1** · 2016-05-09, 19:14

المشاركة الأصلية كتبت بواسطة فوحة الفل

حبيبتي الله يحفظها لج

انا كنت اتمنى اتيي امي و انا صغيره و تعلمني هالسوالف بدال عدم الثقه اللي كنت عايشتنه ، مادري بعض الامهات ما يهتمون لهالموضوع ، بس انا كنت مشعرررره وووايد وووايد و لا حد يا و علمني شو اسووي لين يت وحده ف المدرسه و قالتلي انتي حلووه بس مخرب عليج شعر ويهج و كنت ف الاعدادي قالتلي ليش ماتروحين الصالون و تشلين بخيط ؟ انا ما اخفيج كنت اشوف نفسي اني مشعره بس صغيره ما بيدي شي ، الدور الاكبر على الام و امي الله يسامحها ماعلمتني ع هالسوالف ، يمكن زمنا يختلف عن الحين بس بعد لازم تشوفين لها حل و الله حررام يكفي احساسها اكيد انها تبا تشله ، السوفت لايت حلووو و مريح و بعد يحافظ ع الويهه صااافي ، بلا مشاكل الخيط و الالم .... لا تهملينها اختي ، الله يخليها لج ان شاء الله

**بنت الشوامخ** · 2016-05-13, 00:27

بخصوص الشنب وديها الصالون تشله بالخيط
او علميها عالملقط او مكينة ازالة شعر الشنب حلو وتستعمله اي وقت
بس بخصوص انها تشل شعر ويها ليش ماله داعي اختي
الا اذا كان واضح و كانت مشعره وايد

يعني اذا مب واضح ماله داعي
انا حتى حق عرسي ما شليت شعر ويهي مع اني بيضا بس الحمدلله خفيف مب واضح
و اذا شليتي شعر الويه لا تنسين احتمال تطلع الشعر اغلض واقسى عن قبل و يمكن تطلع حبوب
ف مول ماله داعي تشلين شعر ويها
بس اذا كانت مشعره وشعر ويها يبين هني احسن سوي لها سوفت لايت
هو اخف و اتوقع اأمن عن الليزر

والله يحفظها ويخليها لج وتشوفينها احلى عروس يارب

**ملاآك قلبكـ،،** · 2016-05-14, 00:59

لانها بنتج ووحيدتج
اهتمي فيها دلعيها
لا تخافين بنتج مب صغيره
خلاص مابقالها شي وتبدا مشوار الجامعه
وتجوفينها عروس

**ام نهييان** · 2016-05-16, 15:21

ماشالله 16 يعني مش صغيره حرام وديها الصالون لشنبها ترا البنات يتعايرن ف المدرسه حتى شعر ايدها والمناطق الحساسه لازم تعلمينها ع النظافه.. ختيه عمرها 12 سنه وتروح الصالون وتسوي خيط وحلاوه عادي فديتج انتي شوي مكبره الموضوع لانها وحيدتج

و السوفت لايت وااايد اوكي وتاكدي عزيزتي لو يضر ترا العياده نفسها او المركز ما بيرضون يسوونه لبنتج

**Ward-uae** · 2016-05-17, 01:00

الشنب خلها تشله بخيط اما ويهها خليه واذا تحسينها بزياده شعرانية وديها عند دكتور او دكتورة غدد بس تتأكدين من الهرمونات انها طبيعية ونسبة الدم
وخليها تكثر اكل السمك والاكل الصحي شرات الخضار والفواكه وتتجنب الفاست فود والدياي والحلويات والغازات
علميها تسوي ماسكات طبيعية شرات الروب والخيار وماي الورد هالسوالف تحافظ على البشره وتجنبها تظهر لها حب الشباب ويخف الشعر
الله يحفظها لج وتشوفينها عروس

**Yazi.90** · 2016-05-17, 07:08

عادي حبيبتي ليش لا الليزر اريح بوايد من الخيط،
وبخصوص شعر الويه لو كان يبين تشله ولو كان خفيف ومايبين عادي تخليه،

**khaleejiya** · 2016-05-18, 09:40

امي كانت تشقر ويهنا
سويلها التشقير حاليا ويوم تكبر اكثر خلي تسوي ليزر

**almal3ka1** · 2016-05-18, 10:19

التقشير يخرب الويه

الموضوع: مشكلتي مع بنتي

أدوات الموضوع

عرض