أنا وأمي وأهل ريلي

[مشكلتي]

السلام عليكم

مشكلتي معقدة شوي لأن فيها أطراف لكن كلها محورها شيء واحد شعوري
انا .. أنا مجهدة وتعبانة وللأسف هالتعب من أمي ..

أمي ما أعرف بالضبط شو وضعها معاي .. على مدى عمري كانت تشوفني اني سبب كل أزمات حياتها .. لأني البجر ولأنها على ما تقول صبرت على أبوي علشاني .. مع العلم انها يابت عقبي أكثر عن 10 عيال .. ما أعرف ليش أنا السبب ..
كنت في الثانوية يوم قالت لبنت خالي بحضوري أنا أكرهها وأتمنى تموت علشان ما أشوف ويهها ..
مرت سنين ومات أبويه وتحملت أنا كل الظروف علشان العايلة تستقر
انخطبت كمن مرة .. وكان فيه شيء غريب أمي تتحمس للفاشلين الي يخطبوني أو اللي فيهم عذاريب .. ويوم أرفض تزعل وتدعي علي .. والله العظيم أنها كانت تضغط علي علشان أرضى بمدمن مخدرات كل الفريج يعرفون عنه وقد دخل السجن كم مرة ..
وغيره واحد بخيل وكذاب عووود
وغيره وغيره


المهم خطبني ريال هي تحترمه وايد ومعروف ومسماي في جماعته تقريبا شيخ قبيلة .. وكانت مشكلته الوحيدة انه مطلق وأنا عقب استخارة رضيت .. وقفت في ويهي وقالت هذا ازوجه اختج .. وأختي تقول ما أباه .. وصارت سالفة عقب رضت ., ويوم عرسي سوت مشكلة كبيرة والله كنت أتصور وهي تتصل تغلط علي وتزاعج ,, ويوم دخلت أمشي صوب الكوشة وقفت وسط الحريم تهزبني !

مرت الايام والله أثبت لي أن الريال اللي خذته ذهب وأن أهله أطياب ما يتخايرون عنه .. ومشكلتهم الوحيدة إنهم ما يخالطون الناس وايد .. والله أعلم كم حاولنا أنا وريلي ندمج العايلتين وأقدر أقول نص نجحنا ..

أم ريلي طيبة وحكيمة لكنها راعية شرهه .. بسرعة تتشره لو حد قصر في مواجيبها .. وأمي راعية واجب الله حق .. لكل الناس إلا أم ريلي ! وهالشيء أستغربه لأنها ممكن تركب طيارة وتسير بلاد ثانية توجب عرب لكنها تستكثر ترفع التيلفون وترمس ام ريلي

أنا أحاول أوطد العلاقة وأجمع بينهم وأمي كل ما تلاقت بأم ريلي تحول الكلام كله سب فيني وعذاريب لدرجة أم ريلي حليلها اتم تدافع وتقول ما أشوف في فلانة هالأشيا .. وأمي تقول هيه ترا تعرف تمثل عليكم



أنا يوم أكون بروحي مع أمي وما فيه حد في القعدة أمي تعاملني عدل وتحسسني بالطيب بس لو حد من أخواني أو ريلي أو حتى البشكارة بتغلط علي .. هالشيء وايد أستغربه


في نفاسي سرت عندها مضطرة وأنا أترجى ريلي ما أسير بس هو يقول علشان ما تزعل أمج وكانت تحرض بشاكيرها علي لدرجة أخر يوم أقول للبشكارة شلي الكوب من على الطاولة جان ترفعه وتفلعني به .. تخيلوووااا وأمي ابتسمت وشلت عمرها وراحت عني ..
وحتى ما دقت تتطمن علي أنا لميت أغراضي وروحت .. وعقب عرفت انها هي اللي قايلة للبشاكير ضربوها !


المهم قلت شيئ بسيط وايد مواقف ما تنعد ..

الزبدة أم ريلي صار لها 3 أسابيع تعبانة وتقريبا كل يومين يرقدونها .. وأنا قلت لأمي مرتين أمي كلميها تطمني .. وهي تطنشني .. وتوني قلت لأختي ذكريها جان تحتشر على أم ريلي وتعق كلام أونه أم ريلج ناسية نعالها في بيتنا من كثر ما اتينا .. وكلام كلام

انا ضاقت بي الوسيعة وسكرت الخط .. لكن غمضتني أم ريلي .. قبل كم أسبوع واحد من أخواني سوا حادث وما تعور وأم ريلي مسكينة حشرتني وحشرت أمي تتطمن عليه ..

أقول في خاطري ليش والله ريلي ما يقصر بأمي يخدمها قد ما يقدر ويراكض لأخواني ولأمورهم ويتدخل لهم قد ما يقدر ..
يعني مذهب لريلي على الاقل أو مذهب لبناتي هذي يدتهن ..

صدق ما أعرف شو أسوي بأمي .. أمي كل كم شهر تطردني من البيت وتسيء معاملتي .. أنا الحين أتصبر بس لو كبروا بنياتي صعب أروح لها وأخليهم يشوفوني أنهان لدرجة ان البشاكير يضربوني بأمرها

كل يوم أذكر نفسي بالبر .. كل يوم أستغفر وهدي نفسي غصب كل يوم أقول باب الجنة كل يوم كل يوم .. لكن نفسي ما عادت تحتمل .. كل مكالمة أنسب فيها ,, وكل ما أزورها أطلع مكسورة .. لو رحت لها وطولت 3 أيام تقول بينج وبين ريلج مشكلة .. ولو خفيت عنها تقول ما فيها خير ..
مرة صار بيني وبينها موقف وطردتني من البيت كالعادة وأنا رديت بيتي وما رمست هي اتصلت بريلي وقالت له كلام وايد ومن ضمن ما قالته ( فلانة مسوية عمرها شريفة مكة جدامك .. أنا ساترة على بلاويها !! ) ريلي قال لها أنا أشوفها شيخة الحريم وما أرضى حد يرمس عنها ولولا إنج أمها واللا كنت بتصرف تصرف ثاني
وياني يقول أمج بلاها لهالدرجة تعق عليج كلام انتي شو مسوية ..
تتخيلون بس لأي درجة أمي تسيء معاملتي


ما أقول تكرهني لأن أحس أحيانا بطيب من صوبها . .ومستحيل حد يرمس عني جدامها لأن مالي أعداء ولأن أخواني يدافعون عني ويرحموني أصلا من كثر ما تسيء معاملتي ..
شو اللي يخليها جيه تسوي ما أعرف جد ما أعرف .. أحيانا احس بيأس وأحيانا أتذكر .. فوادي يشب نار ., كنت أتصل لها كل يوم الصبح أتبارك بصوتها .. عقب قامت ما ترد علي .. وعقب عرفت أنها تتضايق من اتصالاتي ..
كنت أروح لها في أيام الاسبوع مع اني موظفة وبيتي بعيد عنها .. عقب استوت من أدخل تلبس عباتها وتطلع عني

كنت أروح لها ف يالويك أند وأستوت تطلع عزايم وبيوت الأهل علشان ما تقعد .. بس يوم ايون خواتي تعتذر لأي حد يدق لها وتقول بناتي عندي فلانة ياية من العين ..


ما أقدر أستمر على مبدأ الطيب الغبي اللي مخلني ملطشة ..

أقسم بالله مرة رحت وياها عزا بمنطقة بعيدة وحجزنا في الفندق الصبح قمت أسوي لها ريوق وهي بدون سبب تصارخ علي لأنها شافت فطاير وتقول ما خبرناها إن فيه فطاير وأنا ورب العزة كنت عازمة عليها كم مرة وهي قالت ما أبا ، وعقب بنتي كسرت كوب وأنا كنت متوترة من الوضع شليت بنتي بسرعة عن الزجاج ويات هي وراي تضربني وتكفخني .. وأنا مصدومة وأقول لها ليش ليش .. يعني أنا عمري فوق 30 سنة ليش تضربني وأناما سويت شيء الله يشهد بس ارفع بنتي بسرعة عن الزجاج .. وتقول بكسر راسج ..

بنتي كان عمرها سنتين ونص والحين عمرها 3 .. قبل كم يوم تقول لي بخبر عليج يدوه تضربج في راسج وانتي تقولين ليش ليش !!!


تتخيلون إن بنتي انحفر في راسها الموقف ..

أحس بالغبنة بنات .. والله اني احاول انسى واحاول اتجاهل وهي ما تساعدني أبد ..


سبحانك اللهم وبحمدك أستغفرك وأتوب إليك .. ربي يربط على قلبي ويصبرني ..

اتمنى منكم الدعاء على الاقل ..

المزيد من آخر المواضيع من نفس القسم:

• تزوجت مريض نفسي
• مشكلة حالتي بعد الأمومة
• مشكلة تقدم لي خاطب وافد
• مشكله بنتي
• زوجي تعبني بالضرب كليوم💔
• أواجه زوجي بكذباته ولا اسكت
• ريلي احبه ،، بس ماعرف شو الي حصل
• مشكلتي التعلق الزائد
• رفض ريلي للحمل
• عااااجل مشكلة واجهتني

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[المراقبة العامة]

تمت الموافقة
لاحولا ولاقوة إلا بالله
الله يفرجها عليج من سابع سما

[تفاحتي]

من اغرب ما قرأت



ادعيلها بالهدايه


زيديها الهدايا والفلوس جوز ترضى
بعض الامهات يهدي نفوسهن البيزات
جربي


وكان الله ف عونج

[سماءالأفق]

الله يهديها ويصلحها معك ويقدرك علي برها
لا حول ولا قوة إل بالله.

[أهلي عزوتي]

الله عوضج بريلج و أهله ،،تقربي منهم اكثر و قومي بواجبهم على اكمل وجه عشان ما يشوفون منج الزلة و يصدقون كلام امج

و أمج الصراحة غريبة لو منج ما اروح لها الا مرة في الأسبوع ساعة و بس و من دون عيالي ..يمكن يمكن و يمكن تفقدج

الله يفرج همج و يعوضج خير و يرزقج بر عيالج

[ملاآك قلبكـ،،]

خلج بعيده عنها
مو كل ام ام ولا كل ام تحت اقدامها الجنه
اعتبري ام زوجج هي امج وبريها واكسبي رضاها

وهي خليها برايها زوريها فالاعياد والمناسبات بس
واذا سويتي عزيمه او شي لا تعزمينها
خلي علاقتج معاها سطحيه

[صبصب]

لا حول ولا قوة الا بالله العلي العظيم
الله يحنن قلبها عليج

[love rak]

لا تسيرين لها وايد خليها تشتاق لج ... ا تصدقين امج اتسوي جي لانج يمكن ضعيفة الشخصية ...
انقهرت من السالفه بس تستوي مثل هالسوالف وفي أمهات قلوبهم حجر ... احس يمكن أبوج كان يعاملها مب زين وهي كانت تحط حرتها فيج واتعودت ع هالشي

[love rak]

عطيها فلوس وهدايا يمكن تحن عليج ... طمنينا عليج فديتج. .

[mouzan7mod]

دام ريلج بلسم على الجرح ، خلي أمج بين فترة لفترة أوصليها
و لاتقصرين فيها ، حاولي تزورينها العصر و تطلعين من عندها عقب ساعة أو ساعتين المهم وصلتي لها
و تمي ادعي ان الله يهدي النفوس و يهديها

[almal3ka1]

دام ريلج بلسم على الجرح ، خلي أمج بين فترة لفترة أوصليها
و لاتقصرين فيها ، حاولي تزورينها العصر و تطلعين من عندها عقب ساعة أو ساعتين المهم وصلتي لها
و تمي ادعي ان الله يهدي النفوس و يهديها

[ام الدحمي]

لا حول ولاقوه الا بالله يمكن مريضه ويمكن مب امج الام ماتسوي جيه بس ابتعدي مالازم تروحي وتسوي خلاص الحرمه بيتها بيت ريلها احين انتي وحدج عندج بيت ومملكه خاصه حتى عيالنا نربيهم ولا نعرف بطلعو بارين فينا والا والا
المهم نسوي اللي علينا والباقي عالله
انتي مالازم تصلحي وتسوي خلج بعيده وخلج طيبه ويا الطيبين امج عامليها كامج حتى امنا نحن مب دايم وياها ازعجناهم ونحن صغار بعد نزعجهم وهم كبار ومرات البعد احسن وهم يحبونا ونحبهم
بس تخلي الخدامه تفلعج ليش ماضربتي الخدامه وين موقفج !!!!
المهم الباب اللي تجيك منه الريح سده وستريح

[تناهيد جرح]

خلي علاقتج سطحيه بأمج وقومي بالواجب لها وادعي الله يهديها دايما والله يهديها

ودام انتي متزوجه وزوجج ينحط ع الجرح ما شاء الله ،، الله الغني عن الباقي

الله يصلح الامور ويهدي امج ويحنن قلب ريلج ويالف بينكم دوم

[ركروكة راك]

انتي ضعيفة الشخصيه ودليل ان الشغاله بعد تضربج.. خلي عندج شوي عزة نفس واحمدي ربج ان ريلج زين ..وفي رياييل ما يحبون الحرمه الضعيفه وانتي الصراحة ضعف شخصيتج ينرفز.. استانسي بالاشيا الحلوه اللي عندج وعيشي حياتج .. وامج خففي من زيارتها خل تحس وتشتاق لج

[غلآ نفسي]

اللي صار وياها اياام ابوج خلاها تكون شخصيه سلبيه عليج

مرات اذا الام شافت الويل في حياتها تقول مابا عيالي يعيشون اللي عشته تكون ايجابيه يعني

بس امج استوت سلبيه عليج

شي نفسي يعني

انتي عامليها زين والباقي ع الله

وربج عوضج بزوج وام زوج عوضوج اللي شفتيه من امج

ف سايري امج

بالتوفيق