خدمة الامين

[ladygaga love]

السلام عليكم بنات بليز ردو علي عسب هاي الخدمة قررت اشتكي على طليقي لأن قام يشهر فيني بكل مكان وانا ما اقدر اتحمل كل ها تعبت منه الصراحة وما منه فايدة ابغي يكف شره عني واهلي رمسو اهله بس ماشي فايدة وانا ابا هالشي يكون سري يعني ما ابغي اهلي يعرفو اني اشتكيت عليه

المزيد من آخر المواضيع من نفس القسم:

• قرآن كريم
• هل هو شيء عاديٌّ ..أن نموت !!
• لكم وحشة يا عضوات المنتدي وين ايمكم
• عداوة اهلي لي
• محتاجة حليب الابل ضروري بنت تعبانة
• كيف تتحكم با بيتك عن بعد
• اعطوني نصيحتكم بنات
• وهُم قِطَعٌ في آلة الحياة
• اريد سائقة توصيل من ام القيوين لدبي
• السلام عليكم

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[الوردة الجورية]

وعليكم السلام والرحمة


بالنسبة لخدمة الأمين اذا واحد غريب يعاكسج او يهددج او يستبزج ممكن يساعدونج بسرية تامة مجرد اتصال

لكن لو كان طليقج ماعتقد.. مابفتي.. لكن اكيد بيتواصلون معاه، و دام انه طليقج اكيد بيخبر اهله و بيوصل لاهلج

اذا عندج شهود مستعدين يشهدون ان الريال قذفج او اساء لسمعتج او دليل محسوس تقدرين تشتكين عليه مثل نشر كلام عنج عن طريق مسجات او صور او مواقع ممكن.. لكن اذا ماعندج دليل؟!!!! كيف بيحاسبونه؟؟


أنا أقولج فرشي سجادتج و قومي صلي ركعتين قبل أذان الفجر و اطلبي الله ان يكفيج شره وشر لسانه واشتكي لربج انه يشوه سمعتج واطلبي الستر و قولي ربي فوضت أمري إليك أنت حسبي لا إله الا انت عليك توكلت وأنت رب العرش العظيم


والله الأمر اللي ايي من السماء قاطع وماتتوقعينه ولا يخطر على بالج

[ماحد شراتي]

لا حول ولا قوة الا بالله

ما عندي فكره اذا خدمه الامين تقدر تساعدج بهالموضوع لانه طليقج ! بس ان شاءالله البنات يفيدنج

الله يعينج

[almal3ka1]

وكلي امورج لله

هو اللي بياخذ حقج

[mouzan7mod]

اعتقد بيساعدونج بس اذا تسيرين مركز الشرطة يكون افضل بيكتبونه تعهد و بيتأدب

[Yazi.90]

اعتقد بيساعدونج، ولو كان لا

اشتكي عليه فالشرطه خير ان شاءالله وين عايشين؟

[أم محمد1988]

مابي أحبطج ولكن انتي غلطتي و هذي نتيجة التصرفات الخاطئة اللي سويتيها .. وترى هالشي يبيله وقت لين ينسونه الناس أو حتى طليقج .. والبنت مب شرات الريال .. وفهالزمن المجتمع ترى ما يرحم ..

تبين نصيحتي ادعي ربج واستغفري .. ماله داعي الفضايح والشرطه .. وان شاء الله بيرزقج بالزوج الصالح اللي يستر عليج

[hamoudmam]

الغالية الي هو يسويه تشهير و طبعا ممنوع دينيا و قانونيا هالي سواه و يسويه ..
سامحيني هذا عرضج و شرفج ..اذا اهلج ما يبون يدافعون عنج ..دافعي عن نفسج ..
تقدرين تسيرين مركز الشرطة التابع لفريجكم و قدمي شكواج ..عطيهم رقمه بييبونه ..و بيوقعونه تعهد بالكف عن التشهير بج ..و الكلام عنج ..

خلاص دام فشلت كل المحاولات ..جدامج الشرطة ..خله يتعلم يخلي لسانه فحلجه ..
اهلج يمكن يعرفون بس بعد ما تكونين خلصتي الموضوع و وقع التعهد ....
قولي الهم ما دافعتو عني دافعت عن نفسي ..عاقبج بالطلاق ..خلاص انتهى ..

و ترا موقع تعهد ما يتكلم عليج يعني حتى سالفة انج سحبتينه على مركز الشرطة المفروض ما يقولها ..لانه خلاص لازم ما يتكلم عنج .و ممكن تطلبي هالشي من الشرطة يطلبونه منه ..

قال الله تعالى :[ يَا أَيُّهَا الَّذِينَ آمَنُوا إِذَا نَكَحْتُمُ الْمُؤْمِنَاتِ ثُمَّ طَلَّقْتُمُوهُنَّ مِن قَبْلِ أَن تَمَسُّوهُنَّ فَمَا لَكُمْ عَلَيْهِنَّ مِنْ عِدَّةٍ تَعْتَدُّونَهَا فَمَتِّعُوهُنَّ وَسَرِّحُوهُنَّ سَرَاحاً جَمِيلاً }الأحزاب49

مب من السراح الجميل التشهير و تشويه صورة الحرمة او الريال

[كراميلا1]

ربيعتي نفس الشي طليقها يلس يتكلم عليها واخر مره قال عنها تتطلع بالسياره مع شباب ماتحملت وسارت الشرطه وكتبوه تعهد انه مايتعرض لها ودفع غرامه وعقب رفعت عليه قضيه طعن بشرفها