نقطة الصفر

[مشكلتي]

خواتي اتمنى كل وحده تقرا موضوعي اتشاركني باي كلمه لان نفسيتي عدم خلاص كارهه نفسي مشكلتي بدات منذ الصغر انا اخر العنقود لي اخت وحده اكبر مني قدري اني اجمل منها من يوم كنت صغيره الكل يقول هذي احلى من اختها بوااايد وهي كانت تنقهر مني بدون سبب كبرنا وكل منا له طبع انا طبعي هاديه عاقله هي لا اتحب تمشي مع البنات الي الصراحه مب متربيات وكانت تدخل في مشاكل مع اخواني الكبار بسبب سلوكها المهم تزوجت رجل اعمال غني ولد قبايل وشاء القدر اني تزوجت رجل على قده مب فقير الحمدلله يشتغل في الجيش بس على قدنا اهني تغيرت معاي بطريقه قاتله صارت تكره جيتي عندها في البيت في البدايه كذبت مشاعري وقلت اختي الوحيده مستحيل اكيد انا غلطانه لكن تكررت الحركات صارت تعزم ناس كبار وماتعزمني تعزم حريم اخواني وانا لا ماتحب زيارتي لها البيت يوم اولد في المستشفى اتسافر على طول علشان ماتزورني ومن معاملتها لي صاروا حريم اخواني يتهربون مني كلمت امي تدخل صدمه امي اتخاف منها خوف رهيب اتقولي كيفها خليها على راحتها الحين اعيالها اكبروا وعرسوا مادريت الا من الجرايد اعيالها مايحترموني طرشت اعيالي لها طردتهم من عند الباب حتى ابوي صار معاها ضدي ماعرف ليش معقول فقري عيب تستعر منه اختي الوحيده بناتها ماعرف اشكالهم قلبي يحترق حاولت اكلمها اكثر من مره اتقولي انتي ماتهميني ماتهميني ليش طيب مع الوقت حسيت اني غريبه بين اهلي اشوف استهزاء حريم اخواني علي وعلى اعيالي تخيلوا حرمة اخوي عطت بنتي لبس مستعمل انصدمت راتب زوجي 30 الف الحمدلله يعني مانطر بس اختي زوجها ملياردير نفسيتي تدمرت وبدات اكره نفسي فعلا اصعب شي لما اهلج يتحدون عليج شئ محزن

المزيد من آخر المواضيع من نفس القسم:

• تزوجت مريض نفسي
• مشكلة حالتي بعد الأمومة
• مشكلة تقدم لي خاطب وافد
• مشكله بنتي
• زوجي تعبني بالضرب كليوم💔
• أواجه زوجي بكذباته ولا اسكت
• ريلي احبه ،، بس ماعرف شو الي حصل
• مشكلتي التعلق الزائد
• رفض ريلي للحمل
• عااااجل مشكلة واجهتني

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[المراقبة العامة]

تمت الموافقة
الله المستعان

[سماءالأفق]

حبيبتي لا تزعلين حالك ,,لا تقهرين نفسك علي تصرفات البشر ,,
وكل شيئ يضيق صدرك منه لك الأجر من الله عليه,, والشيطان ينزغ بين الإخوه بالكثير...
وياحبيبتي كل ألم تحسيه يكون فيه عوض من رب العالمين ,,لا تتخيلين إنه إحساسك يروح هباء,,والله ما يضيع
أجرك عند ربك ,,ودموع ألمك ماهي إلا دقات علي باب الرحيم ..فلا تحزني ,,دايما قولي أجري علي الله
بعفوك وبقلبك الطيب ,,
وإسألي عليها صلة رحم حتي لو بدون روحتك ببيتها..والشيطان يدخل لنا من هذا الباب ليضيق بنا الرزق
الشيطان يعدكم الفقر,,يحاول يدخل من كل مدخل يوصلو لفقرنا..ويمنع عنا رحمات الله بردود فعلنا علي أذي الآخرين لنا.
أجرك علي الله الرحيم,,
أجرك علي الله

[um abdalaziz]

الله المستعان
أختي لا تقهرين نفسك دام أنك سعيدة مع زوجك وأولادك احمدي الله واهتمي بعائلتك
وأهلك وأختك بيجي يوم بيعرفون قدرك
وادعي بهذا الدعاء اللهم ألّف بين قلوبنا وأصلح ذات بيننا وأهدنا سبل السلام
الله يألف بينكم ويصلح ذات بينكم

[almal3ka1]

اول شي لا تقهرين نفسج , عشان منو !!

اللي يبا ايج حياه الله و اللي ما يباج ربي يحفظ الكل


خيبه تسوين ها كله عشان هي ما تباج !


خلج واثقه من نفسج , عليج من امج و ابوج

[ماحد شراتي]

تعرفين انتي احسن منها بوااااااااااايد .. المهم انج مرتاحه مع ريلج .. صدقيني الفلوس مب كلشي يمكن عندها الفلوس لكن الله اعلم بحالها .. لا تتضايقين .. اثبتي نفسج وحضورج وقوي شخصيتج .. لا تسمحين لاي حد يتمادى او يطاول عليج او على بيتج .. لبسي عيالج افضل لبس .. اكشخي .. تقدرين تكشخين وتلبسين احسن عنها بميزانيه جدا بسيطه .. بس كلشي يبدا من عندج .. الله يهديها ..

[mouzan7mod]

حبيبتي والله ، لا تزعلين و تضايقين بعمرج ، إلي عطاهم هالنعم في غمضة عين يشلها عنهم ، و يمكن يدور الزمان و إي اليوم الي إختج تحتاجج إنتي بدل كل الي حواليها علشان الفلوس و المصالح ، إختي مب كل شي ترى الفلوس تروم تسويه ، انتي اذكري الله و كل شي فيه حزن بالنسبة لج تراه خيره لج ..!!

[غلآ نفسي]

انتي ليش جي حارقه عمرج ؟؟

زوري اهلج واذا حد غلط عليج ردي عليه الحمدلله اموري طيبه طلباتي مجابه ومرتاحه مع ريلي

30 الف حلو مب على قد حالج حبيبتي الحمدلله

اما اختج حاولتي وايد تتواصلين معاها دامها ما تباج برايها

زوري امج وابوج وطلعي سيري بيت ريلج اللي معززنج ومكرمنج

ولا تييبين هالطاري حق ريلج ابد ابد ابد

بالتوفيق

[almal3ka1]

حبيت ردج غلا نفسي

[sa7el]

عيشي حياتج مع ريلج وعيالج
الله عاطنكم الخير والصحة والعافية ،، عندج عيال وبيت،،
انتي عليح تصلين امج وابوج ،، بس
اللي ما يباج لا تذلين عمرج ولا ريلج ولا عيالج الا العيال الدنيا توقف عندهم والله

سيري اشتغلي لو حابة سافري استانسي مع ريلج وعيالج ليش يالسة تقارنين وادورين اخبارهم هي اختج صح بس لو هي ما تباج خلاص الله يوفقها ويهديها وعيشي حياتج

[Yazi.90]

تعرفين انتي احسن منها بوااااااااااايد .. المهم انج مرتاحه مع ريلج .. صدقيني الفلوس مب كلشي يمكن عندها الفلوس لكن الله اعلم بحالها .. لا تتضايقين .. اثبتي نفسج وحضورج وقوي شخصيتج .. لا تسمحين لاي حد يتمادى او يطاول عليج او على بيتج .. لبسي عيالج افضل لبس .. اكشخي .. تقدرين تكشخين وتلبسين احسن عنها بميزانيه جدا بسيطه .. بس كلشي يبدا من عندج .. الله يهديها ..

[الطواشة]

صدق الفلوس تغيير الانفوس ..
اختي عليج بالاستغفار وكلي أمرج لله سبحانه و تعالى
عيشي حياتج و لا تركضين وراهااا
اهنا هي اللي بتنقهر .. و راتب ريلج هب اشوية عسب تتصدق فيج ..حسبي الله و نعم الوكيل ..

و اتذذكري و خله هالجمله في بااللج
*( الدنياااا دواارة )*

و كما تدين تدان انتي بس وكلي امرج بييد ربنا ..
و قيام الليل ..

[بدوية والنعم]

حبيبتي انتي مب على قد حالج انتي مرتااحه الحمدلله راتبه زين ... هي غنية ماشاء الله بزياده تواصلي وياهم بالمعروف ولاتشغلي بالج برايها ..انتي سوي اللي علييج من صلة رحم ومولازم تعرفي كل شي عنها

[بنت الشوامخ]

بصراحه غريبه اختج الله يهديها ويصلحها
صدق الفلوس تغيير بعض الناس اللهم لا تبلانا

الحمدلله انتي رب العالمين فضلج عليها بالعقل بالجمال واظن وايد امور ثانيه يعني مبين الفرق الكبير بالشخصيه

الرزق مب بالفلوس بس
الرزق بوايد امور ثانيه غير

الحمدلله دامج مرتاحه مع ريلج هذا اهم مليون مره من انه ملياردير بعدين احس كل ماكان الريال غني انشغل بالتجاره واعماله وحلاله وصار همه الفلوس
بعدين لو بينت انها مرتاحه ماتعرفين شو يستوي بالبيوت ترى البيوت اسرااار

خلكم مرتاحين بسطاء وبنظري عيشتكم احسن من عيشة اختج والحمدلله راتب ريلج وايد اوكي

اما حرمة اخوج ويا الحركه اللي سووتها عطت بنتج لبس مستعمل
يعني شو كان قصدها من هالشي
يعني مرات حريم الاخوان مثل الاخوات عادي نتبادل الملابس
انا مرات اذا عندي شي ما لبسته وايد ونظيف اعطيه حرمة اخوي اذا حابه وهي بعد نفس الشي تعطيني من اغراض بنتها لبنتي

بس اذا قصدها شي ثاني
هني وقفيها عند حدها بس لازم تتأكدين من نيتها

المهم اختج هي الخسرانه
واهلج واقفين وياها لانها راعية فلوس الله يهديهم
انتي اللي عليج سويتيه
خلاص سوي طاف لا تذبحين عمرج عشانها
ماتباج ولا تبا عيالج خليها بحالها هي الخسرانه
عيل انتي اختها الوحيده كيف قلبها يطاوعها جي تسوي
ترى الملك زايل ولا نست قصة هارون

وعيشي حياتج ولاتتضايقين
وادعي لها عسى الله يصلحها ويهديها

صح ومثل ماقالت الاخت فوق
انتي اكشخي والبسي وكشخي عيالج
واطلعي احسن عنها بعد
ترى والله مب كل شي غالي يبين حلو
في اشياء سعرها معقول وتطلع اكشخ واحلى بوايد
انتي خلج اذكى واطلعي اكشخ عنها وبيني لها انج تعرفين الكشخه مب بس هي