why؟ ليش جيه؟

[خاطري بشوفته و لقياه]

السلام عليكم

هذي اول مشاركه لي في المنتدى. و اول شي ابا اكتبه اني اطلع اللي في خاطري ، هذا المكان الوحيد اللي اقدر  افضفض فيه ، ليش؟ لانه العالم اليوم بتقراه و باجر بتنساه . لكنه بيتم في قلبي و بعيش وياه و مابنساه. ادري في ناس بتواسي و ناس بتعاتب لكن الله يعلم بحالي . مابطول عليكم .
صار لي مده طويله و انا على هالحال. من كنت في الثانويه و امي تمنعني من كل شي . انا ملامح ويهي تخليني صغيره مع ان عمري حاليا 30 سنه . لو ابا اروح النادي مع رفيجاتي تقولي لاتروحين. سوالفي مع اخواني كله رسميات و فوق هذا كانت تقول عني انتي راعية خراريف و علوم هذا و انا في الثانويه.بتشجيع من خالتي دخلت الجامعه ، اهلي كانوا يبوني اتزوج بس الحمدلله اني ماتزوجت لانه ماكان عندي خلفيه في امور و خرابيط الزواج ذيج الايام. و انا في الجامعه بنت  خالتي قامت طلع عني خراريف و تقول لاهلها اني اكلم شباب و انا والله كملت شهرين تقريبا في السكن بدون موبايل . اتكلم مع اهلي من تلفون السكن. لو انها بنت خالتي بس والله انها تذل الشخص و طلع عليه كلام مع اني كنت طيبه معاها و على نياتي اسولف وياها.

 تخرجت من الجامعه و قعدت حوالي خمس سنوات في البيت ، اكيد بتقولون مرتاحه و مبسوطه ، بس طلع العكس طول هالفتره امي تقول عني انتي منحوسه مب مره و لامرتين اكثر، تقلي انتي مالج حظ لا في الوظيفه و لا في الزواج ، و اذا بروح مع اهلي مكان يقولون لي امورج مو متسمحه انتي منحوسه. و الله العظيم يابنات اني تعقدت نفسيا كله قاعده في غرفتي ما اطلع منها، اخواتي ماكنت اجلس اسولف معاهم. اختي الصغيره تزوجت قبلي حتى انها ماراوتني زهبتها خير شر ،ليش؟ كان على بالها اني اغار منها لانها تزوجت قبلي ، والله العظيم عانيت معاناه لايعلمها الا الله . انا كثير من الاشخاص تقدموا لخطبتي بس  ماكنت اعرف ، رفضتهم لاني ابا اكمل دراستي طموحي و مستقبلي . لقيت على وظيفه في قطاع خاص و توظفت مباشره ، يا غير فرحه ماتمت قدمت استقالتي بعد ماكملت سنه و كم من شهر بسبب سوء معاملة الموظفات و قلة الاحترام و يتكلمن عنك من ورا ظهرك . قسما بالله يابنات اني تعقدت و كرهت الشغل ، و امي الله يهديها لما اشكيلها عن حالي في الدوام تروح و تخبر الفريج كله تفشلني عندهم . الدوام الحين يطالبني بمبلغ 54000 الف درهم تقريبا لاني قدمت استقاله قبل نهاية فتره العقد . الحمدلله اني ماصرفت راتبي . مع انه كان في خاطري اخذ اشياء و ادلع نفسي لكن وين ؟ يا فرحه ماتمت صدق منحوسه على قولة امي . هذا و انا استقلت من نفسي قامت الناس ترمس عليه ، اهلي نفسهم يرمسون عليه. شو اسوي ياناس والله العظيم اني تبهذلت في حياتي كابه و عصبيه و مزاج متعكر حتى طلعات ماقدر اطلع .

شاركت في احد المهرجانات و فتحت دكان صغير لبيع الحلويات و العصاير. اكيد بتقولون اهلها شجعوها ؟ بالعكس قاموا يتمصخرون عليه خاصة اخويه الكبير و امي . اخويه قام يطنز عليه جدام حرمته اللي هي بنت خالتي اللي كانت معايه في سكن الجامعه. و يقولي يوم مالقيتي شغل سرت تبيعين للناس حلويات . و امي تشجع كلامه . شو تبوني اقول ؟شو اسوي ؟

انا مب محتاجه الحمدلله خير الله وايد، انا بنت ناس و عرب، بس ليش الاهل جيه ؟ ليش يقولون عني منحوسه و مالي حظ ؟ امي لو كانت تهتم فيني و تحاتيني ماكانت خلت بنتها محبوسه في البيت خمس سنين  ؟ ضاع عمري وانا قاعده في البيت ، ماشفت غير المذله و الاهانه. لو حد يا و خطبني مابتقلي بيقررون بروحهم و انا مالي شور ؟ و الله العظيم خاطري اتزوج و اكون انسانه ناجحه و اغير من حالي للافضل .اشياء كثيره و كثيره مايعلم بها غير رب العالمين . (ان الله يرزق من يشاء بغير حساب) .

السموحه منكن خواتي طولت عليكن مع انه في اشياء ثانيه ماتكلمت عنها، تقدرون تعلقون على كلامي و ان شاءالله القى في تعليقاتكن حل  لمشكلتي و حالتي  ، و ارتاح من همي و حزني .
السموحه اذا الخط غير واضح لانه كتبت الموضوع بالموبايل.

اشهد ان لا اله الا الله
و اشهد ان محمدا رسول الله .
استغفرك اللهم و اتوب اليك

المزيد من آخر المواضيع من نفس القسم:

• حساااب لبيع الانتيك الاشيا الاثريه القديمه
• ساعدوني .. محتاجة لدكتور قلب اطفال في دبي
• السلام عليكم
• المانيكير الاسلامي
• ترتيب ادوات المنزل
• أبا هالبرقر
• عجبني هالفستان من موقع فلوري داي
• عجبني هالفستان من موقع فلوري داي
• علاج ادمان المخدرات
• ديجي فاضل في أبوظبي

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[تفاحتي]

حبيبت قلبي


عادي طنشي الاهل دوم جي يبون لبنتهم احسن شي بس عندهم سوووء في التعبير



ادعي الله وتعبدي واستغفري
واطلبي يرزقج اللي ف خاطرج

[اشراقة أمل]

غريبه كاني اقرا قصتي مع اختلاف التفاصيل .. هو اختي التوفيق من عند الله سبحانه وتعالى

مثلا الوظيفه ممكن تحصلينها مثل ماحصلتيها بس مشاكل مع زميلات العمل او المسؤولين

في ناس مستمرين بس مرضوا من المشاكل ..

وصح في ناس ماشاء الله متيسره الامور يعني شي يناسبهم ..


بس كل واحد له حكمه ..


انتي وانا مثلا من الفئه الغير ميسره امورها ظاهريا على الاقل عشان الواحد يتفاءل بالخير


بس ماتعرفين متى رب العالمين بيرزقك وتنسين كل شي ..

حتى الناس الكانت تذكرك بمشاكلك يمكن تتغير من ناحيتك او تنسينهم او ينسونك


وشكلك فاهمه شاركتي بدكان وحاولتي تحسني من نفسك


دوري وظيفه ثانيه لو بسيطه

والله كريم

[almal3ka1]

المفروض ما تستقيلين دام وضعج بالبيت جي


لا تتاثرين فيهم و طبعا تقوين ثقتج بنفسج


امج و ابوج لا تراددينهم , لو حسيتي انج متنرفزه نشي غيري مكانج


ولازم تساعدين نفسج


ترى الاهل يكونون متربين عشي معين و بيئه معينه فلا تتوقعين بين يوم و ليله كله بيتغير

[خاطري بشوفته و لقياه]

شكرا خواتي على ردكن و تفاعلكن، كلامكن فيه تشجيع و اثبات للذات، ياليت لو اني اسمع هالكلام دايما كان تغير الحال. و اكيد التوفيق بطاعة الرحمن.و الله المستعان.

[hnmydsm70]

حبيبتي لاتخلين اللي حواليك ياثروا على شخصيتك ويكسورو من معنوياتك..دامك درستي وخذيتي الشهاده الجامعيه واشتغلتي يعني ماشاء الله عندج طموح وكفاءهزماعليج من ناس

[سماءالأفق]

دايما قولي بنفسك فصبر جميل والله المستعان علي ما تصفون
قوي نفسك بيقينك بالله ,,والامور اللي نمررها ليقيننا بالله تكون أروع بكثييييير من الأمور اللي نفكر فيها بعقلنا ونحسب ألمنا بالعقل ..وهذا الكلام تجربه مني شخصيه,,لأن حياتي بين الإثنين..
فصبر جميل والله المستعان علي ما تصفون..ردديها في كل لحظة ألم ..

[ورد السعادة]

"وَبَشِّرِ الصَّابِرِينَ"

"فَإِنَّ مَعَ الْعُسْرِ يُسْراً * إِنَّ مَعَ الْعُسْرِ يُسْراً"

"وَآتَاكُمْ مِنْ كُلِّ مَا سَأَلْتُمُوهُ"

"

وَقَالَ رَبُّكُمْ

ادْعُونِي أسْتَجِبْ لَكُمْ"

" أَلَيْسَ اللَّهُ بِكَافٍ عَبْدَهُ"

كلها آيات تستحق التأمل .......
دآمج تصبرين تذكري مافي عسر في هالدنيا بدون يسر.. اختي حبيبتي على كثر العسر ياج "اليسر" و أي شي تسألين الله و تدعينه صدقيني بيعطيج في الوقت المناسب و الظرف الأنسب لا مب بس بيعطيج الا بيعطيج و فوق ما تتصورين بععد" ... ربي يالغالية اذا عطاج بيذهلج في عطاءه !! و بيخليج تبكين فرح بإذن الله :") ..

الحيآة مآتمشي على وتيرة وحده .. لازم فيها مطبات وعطفات فالحياة ... كلها مؤقته ماهي بثابته عمرج جفتي فالدرب أعمال صيانة دايمة ما كانت الا فترة مؤقته الى ان يتمهد الدرب لنا .. انتي و حياتج جيه نفس هالمطبات و العطفات و الانحناءات صدقيني هي "الي بتصنع منج انسانة أقوى بشخصية أحلى" .. قوي قلبج اسمعي و طلعي من الأذن الثانية كلها فترة مؤقته و مافي شي دايم و على حاله ثابت الا تغير للأفضل و الأحسن ... !!

على كثر ما تتمنين من ربج ادعي ادعي ادعي انتي و كل البنات اللي يقرون مافي شي مستحيل ع الله و عسير ربي اذا عبده دعاه أحبه و أحب صوته و هو يدعوه
همج افرشيه ع السياده صدقيني دعواتج بتجلب لج أشياء انتي حتى ما عمرج توقعتها و تخيلتيها و بالنسبة للأهل ع كثر ما يقولون لج انتي تبرمجتي على كلامهم و يأستي"

أبد بالعكس كل ما قالوا لج كلام سلبي اعكسيه قولي في قلبج الحمدلله أنا زينه و ربي راضي عني و أهلي كلهم يحبوني و أنا ذكيه شطورة و أمي تحبني أمي دومها تشجعني أمي اطالعني اني أحسن وحده الناس تمدحني خواني يحبوني" هالرسايل رسايل ايجابية على كثر ما ترددينها بينج و بين نفسج و تبتسمين لهم صدقيني والله ترسلين لهم اشارات ايجابية موجبة و يتصرفون على طريقة احساسج لنفسج "جفتي علم النفس كيف خطير" البرمجة الايجابية مهمة " ...

الله يرضى عليج الله يشرح صدرج و يسعدج و بيعوضج الله في ريل فيه الخير و الصلاح و يكون لج نعم السند و وظيفة فيها الخير و البركه من راتب و رفقة خير بإذن الله لا تزعلين و لا تكدرين خاطرج كلنا نمر بفترات حرجة و ضيقة ... لكن سبحان الله ربج اذا شاء يفرجها في يوم و ليلة و حالج فيها يتغير للأفضل "كل ما اشتد الضيق اشتد الفرج" .. حافظي على صلواتج و تلاوة القرآن لأنها الدواء الشافي من كل شي و كثررري استغفار و الصلاة على النبي بتلاقين التغير واضح في حياتج فععععلا" ان شاء الله ماهي الا أيام و تبشرينا بإن حالج تغير ان شاء الله ^^

تحياتي اختج ورد السعادة ^^

[خاطري بشوفته و لقياه]

مساء الخير بنات . الصراحه انا منصدمه من الردود اللي قاعده اقراها ، و الله العظيم مب مجامله. كلامكن فيه تفاؤل ثقة بالنفس و التوكل على الله ، كلامكن يدل على انكن ناجحات في حياتكن و مريتن باللي انا مريت فيه، الله يكثر من امثالكن و يوفقكن في حياتكن ان شاءالله ، و راح اطبق كلامكن و ابشركن باخباري ان شاءالله.يزاكن الله الف خير و في ميزان حسناتكن ان شاءالله .

خواتي ادعولي انجح في اختبار الليسن باجر ، رسبت مرتين و باجر التراي الثالث ، انا اعرف اسوق بس الشرطي يرسبني ^_^.

[ورد السعادة]

الثالثة ثآبتة ان شاء الله و انتي قدها ربي يوفقج ^^

[almal3ka1]

3 ثابته و بتنجحين

[ماحد شراتي]

حبيبتي والله

الله يهديها الوالدة .. ما اعرف ليش بعض الامهات ما يعاملن بناتهن على اساس انهن صديقات؟!

ما عليه الغاليه .. انتي اصبري وطولي بالج وحاولي انج دورين لج على وظيفة وربي يوفقج بحياتج وتنجحين فالتراي وطمنينا عليج

[خاطري بشوفته و لقياه]

هلا بنات. رسبت في اختبار الليسن للمره الثالثه على التوالي بس الحمدلله. اكيد فيه ناس بتقول منحوسه او سوء حظ . بس كل تاخيره فيها خيره. والله اني استانس لما اقرا تعليقاتكن و الردود لانه فيه امل و ناس تشجع و ترفع من معنوياتك . امي تيها حالات احيانا معاج و احيانا ضدج. مب معاي انا بس حتى مع خواتي المتزوجات لدرجة انهن صار مايحبن يزورن بيتنا اخر الاسبوع ،عشان امي وعشان عيالهن يسوون ازعاج و يضايقون الاهل . بس عيال اخوي ، الوالده ماترضى عليهم هاذيلا اونهم اهدا عيال ......

الله المستعان و ربي يفرجها و يزاكن الله خير على تفاعلكن ماقصرتن.

[mouzan7mod]

لا ترضين بالنقد الهادم ، إبني نفسج من نفسج
بيع الحلويات و السويت مب عيب ،العيب نمد الإيد لغير الي خلقها

[totoo]

ياحبيبتي عارفة .. من زمااان ماعلقت على موضوع .. ولا كتبت ..
بس شدني موضوعك .. تصرفات الأهل أحيانا غريبة
لدرجة بتحيرك .. اهلي يحبوني أو لا !؟
بس الحياة ما بتوقف عند كلام ولا زواج ولا وظيفة ..

وانا بالنسبة لي بإيمان كامل اقول مافي شي اسمه حظ او نحس ..
في شي اسمه قدر .. فوضي أمرك لرب العالمين وبس ..
ربنا ادرى بمصلحتنا .. ادرى براحتنا .. وادرى بمشاعرنا

مارح أطول بكلامي.. بس اذا قبلتي نصيحتي ..
خلي الاستغفار على طول على لسانك
ودايما صل على رسول الله .. وربنا يغير الحال للأفضل