زوجي .. يحبني .. و اعشقه .. ولكن ..

[مشكلتي]

السلام عليكم ورحمة الله وبركاته


انا متزوجه من 3 سنوات تقريباً

زوجي هو اللي اختارني .. عن قناعه ..
يقرب لي و خذاني وهو مقتنع فيني


يحبني و انا احبه
واحترمه ويحترمني
وعلاقتنا ولله الحمد جدا ممتازه
احمد ربي كل يوم على هالحياه الجميله وياه

لكن في مشكله حاولت اني اعدلها طول هالثلاث سنوات ولكن ماشي فايده
تعبت و ياليت القى الحل عندكم


زوجي اذا شاف شي ما عيبه .. فيني انا .. ما يتكلم ..
ابسط شي يسويه انه يسكت عني و شوي يتجاهلني
مش يتجاهلني .. يعني يعاملني كأني اخته او انسانه عاديه

اللي يخليني الاحظ هالشي
انه هو يومياً طبيعي وياييه و يظحك ويسولف ويتمصخر طول الوقت
يعني يعاملني ك حبيبته و زوجته و حتى كصديقه

ولكن من يتغير شوي انا اعرف انه شي مستوي
بس مستحيييييييييل يقول اي شي
حتى لو اساله الف مره ما يقول شي كله يقول لي " مافيني شي "
و توصل حتى انه مايكلمني اسبوع كامل

تكلمت وياه و فهمته الف مره ..
نحن متزوجين وعايشين ويا بعض والحمدلله علاقتنا زينه
مافيها شي اذا ييت وقلت لي ترى انا شفت هالشي
او استوى هالشي و ماعيبني

وانا والله مب من النوع اللي يضارب او يعلي صوته
بالعكس يعرفني اني احب اتكلم واتفاهم بكل هدوء
وكل شي يقوله لي حتى لو قال لي شي باسلوب ماعيبني
ما اقول غير " ان شاء الله حبيبي "

انا مابقول ان هالشي متكرر وايد
لا يمكن كل شهرين او ثلاثه مره
بس انا ما احب هالشي يستوي

تعرفون يوم في حياتكم شخص واحد بس
هو اللي يسوى كل شي و تتكلمون وياه بكل شي
وهو يبادلكم هالشي
وفجأه يسكت عنكم بدون اي سبب تعرفونه
" صدق تعبت من هالشي "

زوجي مب ياهل .. كبير فالسن .. فوق ال 30
وبيتوتي ما يسير مكان وطول الوقت وياييه وين ما نكون
وانا واثقه فيه ثقه كبيره
" مابغي وحده تقول لي الرياييل لا تثقين فيهم ومن هالكلام "
في تفاصيل ما ابغي اتكلم عنها بس انا واثقه فيه


و المشكله انه فالنهايه يطلع موضوع وايد سخيف وتافه
و نحله في دقايق
بس هالشي كله يستوي ليش ؟؟
يقول لي انا ريال وعندي عزه و كرامه و ما اقدر ايي اقولج
او اقولج شو فيج او اي شي

تعبت والله رمست وايد و تكلمت و فهمته وكله بهدوء
بس ماشي فايده


ياليت تشورون علييه
او تنصحوني بمستشارة علاقات زوجيه
او اي شي

و فالنهايه ياليت تدعون لي


" اللهم يسر امورهما و بارك لهما في حياتها و اجمع بينهما دوماً على خير "

المزيد من آخر المواضيع من نفس القسم:

• تزوجت مريض نفسي
• مشكلة حالتي بعد الأمومة
• مشكلة تقدم لي خاطب وافد
• مشكله بنتي
• زوجي تعبني بالضرب كليوم💔
• أواجه زوجي بكذباته ولا اسكت
• ريلي احبه ،، بس ماعرف شو الي حصل
• مشكلتي التعلق الزائد
• رفض ريلي للحمل
• عااااجل مشكلة واجهتني