أرجوكم ساعدوني برأي صائب

[مشكلتي]

السلام عليكم 
بطرح مشكلتي بشكل مختصر قدر المستطاع

كان عمري 15 سنة اول مرة اشوف ولد خالتي ،،، هو اكبر عني ب 8 سنوات ،،، و كنّا معزومين عندهم عالغدا
بهالوقت كان له أسبوع بس مالج
اول مرة اشوفه و يشوفني ،، تعرفون احساس الخوف اللي اييج يوم تشوفين شي ،،، هذا الإحساس اللي حسيته بس أهو ما كان خوف هو أظن كان حب من اول نظرة

بنفس الزيارة ليس وَيْا خالتي و أمي و يلس يترجى أمي توافق أنا نتزوج بس طبعا الوالدة رفضت بضحك و قالوله البنت بعدها ما خلصت مدرسة و فوق هذا انت مالج ،،، و سكرت عالموضوع و انتهت السالفة ،،،

عقب 8 سنوات يمكن ،، شفته لثاني مرة ،،، نفس الإحساس و نفس الوقفة وقفناها تسمرت مكاني كأن حد صفعني و هو تم يطالعني بنظرات حب غريبة ،،،
يلس أسبوع فبوظبي و كان كل يوم ايي بيتنا تعلقت فيه وأيد مع ان كلامي وياه محدود جدا ،،،

لين ما كلمني في مرة و قالي أنا أحبج تتزوجيني؟؟؟

انصدمت لأَنِّه معرس و الحين عنده عيال،، و أنا مب متقبلة الفكرة ،،، قتله روح حق حرمتك و عيالك هم يبونك اكثر

بعدها بكم يوم قالي وأفقي و ما بتحسين انج الثانية و لا بقصر وياج او وياها بس وأفقي
قتله لا
قالي عمرج ما بتنسيني بتم في قلبج و عقلج لا تعذبين عمرج و تعذبيني وأفقي ما بتندمين

لكن ردي كان الرفض مع أني موافقة بيني و بين نفسي لكن في شي يمنعني يمكن انه معرس و بؤ عيال يمكن خوف ما اعرف ،،،
مرت السنين و عرست ،،، إنسان دمرني تلف أعصابي ،،، ما عنده استعداد يتحمل مسؤولية كلللللللللل شي على راسي حتى لو اخترب شي فالبيت لازم أنا اللي أسير اشوفلي عامل تعبت و كل ما اتعب كل ما أفكر في ولد خالتي

استويت ريال بعد ما كنت بنت مدللة في بيت هلي،،، و اللي رابطني و كسر ظهري بنتي فديتها الله يحفظها لي ولا كنت اتطلقت من زمان
كله يلعن و يسب الزواج واللي يسمعه يقول انه وأيد متحمل مسؤوليات و مضغوط ،،،، مع العلم ان حتى عمي ابو ريلي كله يهزبه سبت الاهمال و اللامبالاة اللي هو فيها

تخيلو مرة من المرات تهاوش وياي لأَنِّي دشيت الصالة أقوله أني بسير اييب أغراض البيت و هو يالس يلعب بلاي ستيشن،،،
تخيلو انه سواها هواشة كبيرة و اخرها يقولي سيري مكان ما تسيرين روحي شلي ملابسج و اطلعي برة البيت

أتخيّله ريال يطرد حرمته من البيت شو أقول بس ،،، و كنت وقتها حامل في شهري الاول بالطفل الثاني و كثر ما صحت ياني نزيف و طاح الياهل ،،،،،

و ياني عمي و تم يترجاني أتم فالبيت و انه بينصلح بس ماااااااا في فايدة

اليوم أنا عمري 30 سنة ضاع عمري وَيَا إنسان مب مال زواج ،، و بنفس الوقت و برغم الفترة الطويلة اللي مرت بدون ما اشوف ولد خالتي الا أني احس حبي له كل يوم يزيد و اول ما اسمع سيرته ارتبك و أتمنى لو بس اشوفه بس مستحيل

أنا تعبت مب عارفة شسوي أرجوكم ساعدوني ،،، اعرف دمرت نفسي بنفسي ،،، لأَنِّي كنت اريد أنسى حبي المستحيل بزواج ويهال و سبحان الله ياني نصيب وَيَا إنسان ما يعرف شو يعني زواج و حرمة و مسؤولية

فكرو وياي شو أسوي مالي حد فالدنيا غير أمي و ما اقدر اثقل عليها و اقولها شو يالس يسوي ريلي و بنفس الوقت ما عندي حد أروم أكلمه بوضوح شرات الحين و يساعدني

شورو علي أنا تعبت والله تعبت و أعصابي تعبت من الصياح ،،، ادعي ربي بكل صلاة انه يفك عني تعبي و يتقدملي اللي فيه الخير ،،،

هذا حالي ،،، و الطموحة عالاطالة

المزيد من آخر المواضيع من نفس القسم:

• كرهت حياتي
• مطلقة و اريد اعيش لحالي
• مشكلتي الفراغ
• مضغوطه وفقدت الامل
• تزوجت مريض نفسي
• مشكلة حالتي بعد الأمومة
• مشكلة تقدم لي خاطب وافد
• مشكله بنتي
• زوجي تعبني بالضرب كليوم💔
• أواجه زوجي بكذباته ولا اسكت

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[ميميه88]

تمت الموافقه

[المعآني]

باختصار انسي ولد خالتج وحاولي تصلحين حياتج
يلسي مع ريلج فهميه انج مب راضية عن أسلوبه وانتي كلميه بكل احترام قولي له أنا بتم احترمك لأنك أبو عيالي ولاتسوين آشيا مب مطلوبة منج خلي دوره عليه لاتتحملين عنه حاولي معاه بالعقل قولي له الحمدلله الله رزقك بالزواج وعندك حلالك هاي نعمة لازم نشكر الله عليها وغيرنا يتمنونها
قولي له انا ما بقصر وياك وعارفة انك مابتقصر وياي
اشكريه اثني عليه هالكلام من صوبج وايد بيغيره لما يشوف اهتمام من هالنوع يمكن يتغير ويحاول يرضيج
لا تتراددينه أو تلومين تقصيره تمي فترة ع الأسلوب التخفيزي وبتشوفين تغيير بإذن الله
ودام اهله طيبين الحمدلله
الله وحده عالم بالغيب والحياة اختبار بالعكس الحياة كزوجة ثانية صعب صعب صعب
و لا يوهمج الشيطان انه بيعدل بينكم الله تعالى في كتابه قال لن تعدلوا ولو حرصتم ما عليج من وعوده ذاك الوقت و شدراج كيف الغيرة بتكون في قلبج لأن زوجج يشاركج فيه وحدة ثانية
بالعكس ربنا كتب لج الخير وزوجج لج انتي وحدج وانتي الأولى في حياته ادعي ربج يتغير وحاولي مافي شي مستحيل القلوب كريشة تتقلب وتتغير سريعا ..
انسي اوهامج و هذا ابتلاء وانتي قدها بالصبر والشكر والمحاولة ربنا ترك لج بشارة وبشر الصابرين
صلي ركعتين و ادعي ربج يغير عليكم الحال لاحسنه وحبي زوجج من قلبج وحاولي تكسبينه وتغيرينه و الله يسعدج الغالية لآخر العمر

[mao]

الاخت يلي فوقي كفت ووفت

[بنت الشوامخ]

حبيبتي
انا بالضبط ويا الاخت اللي ردت اول شي

خلاص ولد خالتج انسيييه حالياً
هو متزوج وعند عيال وانتي متزوجه وعندج بنت الله يحفظها
الحين ركزي على ريلج وحياتج

دوام الحال من المحال و رب العالمين سبحانه قادر انه يغير ريلج ويصلحه
ادعي له دوم ولا تيأسين من رحمة الله
دام ريلج يصلي ومب راعي خرابيط ومايمد ايده
بس انه مب راعي مسئوليه ماعليه اصبري عليه
لانه هالعيب مب كبيير لدرجه تنفصلين عنه

يعني تذكري شو حسناته وايجابياته
لاتركزين بس على عيوبه ولا راح تتعبين

بعدين اختي يمكن انتي عودتيه انج تتحملين المسئوليه بداله
يعني لا تسوين شي مول خليه هو يسوي ويصلح بالبيت واذا ماتحرك انتي لا تسوين
كلمي عمج
او كلمي اهلج
بس مول انتي لاتتصرفين ولا ترى بيتعود عقب كل شي عليج

تصدقي بنية اصلاح ريلج واكثري من التسبيح والاستغفار والذكر
اكثري من الدعاء في جوف الليل

ولا تقنطين من رحمة الله

دايما الصبر مر لكن نتايجه طيبه


اذا شفتي في ريلج بذرة خير ركزي عليها واسقيها

و راقبي تصرفاتج وياه
يمكن هو محتاج اسلوب وطريقه معينه للتعامل

[تفاحتي]

قصتج تشبه قصص المراهقين اللي كل ماصار شي لهم قالو كنا ويا ليت بس غلطنا





حبي ماتو اللي يقولون هالسوالف من زمااااااااااااااااان
ثلاثين مو شوي ترا فكري صح
اصلا شو يثبت لج ولد خالتج كان بيسعدج


متوهمه الله يهداج
يوم تبين تحلين مشكلتج
طلعي من راسج هالامور المضحكه احبه وكان بيموت يباني
ركزي ع زوجج كيف تعدلين مخهه وكيف تسعدين روحج

[almal3ka1]

الغلط منج لانج ما قلتي لا

الريال معروف شو اللي لازم يسويه و حتى الحرمه


ريلج موضوعه سهل , عندج دورات ناعمه الهاشمي و عسى تفيدج باذن الله و الله يصلح اموركم

[دودوالحلوة]

تعلقج بولد خالتج سابقا هو اللي اثر على حياتج حاليا بالاضافة لتصرفات ريلج اللي فيها إهمال و عدم اهتمام
اللي أباً أقوله انج يالسة تقارنين بين ريلج و ولد خالتج لا شعوريا مع انج ما تعرفين تفاصيل حياته يكفي انه بالرغم من سعادته وَيَا حرمته الاولى كان يبا يعرس عليها الثانية هذا ابسط شي

لا تفكرين انج تركتي الجنة ما تعرفين خبايا الأمور و الحياة

اللي عليج انج تحاولين تصلحين ريلج باي طريقة لانج اليوم ام و مسؤولة

و صدقيني ولد خالتج ما هو الا وهم تهربين بالتفكير فيه يوم ما تعرفين تتصرفين فالواقع وَيَا ريلج
كوني لينة و حاسمة في نفس الوقت
مطيعة لكن مب ذليلة الحرمة لها كرامتها
خلي بنتج محور تفكيرج هي مالها غيرج إنتي و ابوها يمكن اليوم مب حاس ببنته لكن أكيد بداخله حب و تعلق لها و لج اعرفي كيف تظهريه و تكبرين هالحب اللي بينكم و عقبها بتشوفين كيف امرج بتتغير للاحسن و طعم الحياة بيكون احلى

الله يصلح حالج و توصلين لتفكير صائب و يهدي ريلج يا رب

[غلآ نفسي]

دايما نحب الممنوع ونتعلق فيه

وطبيعي اهمال ريلج يخليج تفكرين ب ولد خالتج

بس ولد خالتج حتى لو خذتيه كنتي بتعانين

طبيعي بين كل زوجين في نقص مرات في اهمال وعدم اهتمام

يمكن بعد انتي عودتيه انج اتسوين كل شي

حاولي وتابعي تصرفاتج معاه بالمعامله الحلوة والاحتواء

عطي مشاعرج حقه وكأنه هو ولد خالتج

يمكن يحس بحبج ويتغير

بالتوفيق

[mouzan7mod]

ركزي على حياتج ، و خلي ولد خالتج
حاولي تدعين لريلج ان الله يهديه

[مالتيزرس]

وانتي شو يضمنج ولد خالتج إذا خذج ما ياخذ عليج 2 ..بتتحملين صدقيني ما راح تتحملين ..سبحان الله دايما الانسان ينظر للشي البعيد ويتمناه يكون عنده ..اختي لو كان فيه خير الزواج من ولد خالتج كان الله كتبه من نصيبج ..لكن ماتعرفين كيف حياته مع مرته الله يستر عليهم .