ميلس بيت العمر....تجمع للي يبنون بيوتهم حياااكم

**الحمدلله رب العالمين** · 2016-01-11, 08:32

السلام عليكم ورحمة الله وبركاته
شخباركم سيدات الامارات

بما اني توني بادية في سوالف البناء والتخطيط حابة نسوي تجمع لكل وحده تبني بيتها حاليا او حتى خلصت البنا ونشوف الافكار عشان نستفيد

وحتى الاخطاء في البنا اللي واجهتوها وكيف تغلبتوا عليها

واي وحده عندها افكار لتخطيط الفلل والتصاميم خلونا كلنا نتشارك هنيه ونستفيد مع بعض ونحط صور

واذا حبيتوا نسوي تجمع في الواتس اب للخصوصيه اكثر وتشارك الصور بعد حاضرين

وياليت الكل يشارك ونستفيد من بعض

ونبدا نجاوب على هالاسئلة مثل

في اي امارة تبنون
كم مساحة الفيلا
كم دور
سعر البناء
مدة البناء

واي معلومة ممكن نستفيد منها

نبدا على بركة الله

بسم الله

المزيد من آخر المواضيع من نفس القسم:

**الحمدلله رب العالمين** · 2016-01-11, 09:38

وينكم بنات مافي حد يبني

**ام زايد21** · 2016-02-14, 11:45

وياكم بالتجمع ونتمنى من بنات التجمع السابق ينضمون لنا ويفيدونا بتجاربهم

**mayat** · 2016-02-14, 20:10

بالتوفيق

**احتاجك..** · 2016-02-18, 22:02

انا ف عيمان والحمدلله شطبناها خلاص
دورين
بنينا ف سنتين و شوي بعد لان المقاول واااايد تاخر الله يهديه

**khaleejiya** · 2016-02-22, 10:28

السلام عليكم
اللي يبنون عطونا من خبراتكم
شو شركة المقاولات اللي تنصحون فيها وبالنسبة للاستشارات الهندسيه اي مكتب تعاملتوا معاه
شو نصايحكم للي توهم يبنون

**الحمدلله رب العالمين** · 2016-02-22, 22:46

مرحبا فيكم بنات
نحن بعدنا في اول المشوار وتوهم سوروا الارض وبيبدون البنا ان شاء الله
اختي احتاجك بما انكم شطبتوا خلاص ياريت تخبرينا تجربتج وشو كانت الاخطاء اللي واجهتوها ان كانت موجوده
نحن نبني في الشارجه

**الحمدلله رب العالمين** · 2016-02-22, 22:47

اختي خليجيه اهم نصيحه هي انج تركزين وايد في مخطط بيتج حتى لو طولتي بس لازم تعدلين عليه وتستشيرين المهندسين بالمخطط اللي يناسب احتياجاتج
انا تميت سنه كامله لين استقريت على المخطط بعد التعديلات الكثيرة

**khaleejiya** · 2016-02-25, 15:56

مشكوره الغاليه عالنصيحه وان شاءالله ببدأ بتصميم بيت العمر دعواتكم لي
شو احسن استشاري تنصحوني فيه؟؟ وشركة مقاولات
اهم شي الامانه في شغلهم والخبره الطويله

**الحمدلله رب العالمين** · 2016-02-28, 23:58

الله يوفقكم يارب وييسر لكم امور البنا وتشوفين بيتج مخلص
انا من الشارجه تعاملت مع مكتب الشارقه للاستشارات هم صممولي مخطط بيتي اغلب الاهل والمعارف متعاملين معاهم ويمدحونهم اما من ناحية المقاولات فتعاملنا مع الربوع للمقاولات

**um marrim** · 2016-02-29, 11:01

توهم عطونا الارض في دبي وبعدها البلديه مامسحت الارض
وحاطه في بالي اتريا سنه وعقب ابني ان شاالله اللي في دبي وبدو يبنون ممكن على الخاص

**[..دانــة..]** · 2016-02-29, 12:56

ما بنيت بعدي بس من تجارب اهلي
أهم شي مخطط البيت خذي وقتج فيه ولفي كذا استشاري
جوفي احتياجاتج ونمط حياتج كيف وعليه وزعي الغرف والصالات والمطبخ إلخ
.
.
- ركزي ع مساحة الغرف وافهمي حجمها بحيث يتناسب مع العايله كل ما كبرت
- ابتعدي عن الغرف المصممة بأشكال غريبة دائري وغيره، المربع والمستطيل كجدران أفضل
- غرفة الغسيل تكون ف نفس طابق غرف النوم عسب ما تتلعوزين في الغسيل والكوي
- احسبي حساب الخدم وغرفهم
- سويلج صالة بوسط غرف النوم للعايلة غير عن الاستقبال للضيوف
- كل غرفة بحمامها وماستر أفضل وسوي الكبتات ف الجدران

وبالتوفيج

**khaleejiya** · 2016-03-03, 15:17

المشاركة الأصلية كتبت بواسطة [..دانــة..]

ما بنيت بعدي بس من تجارب اهلي
أهم شي مخطط البيت خذي وقتج فيه ولفي كذا استشاري
جوفي احتياجاتج ونمط حياتج كيف وعليه وزعي الغرف والصالات والمطبخ إلخ
.
.
- ركزي ع مساحة الغرف وافهمي حجمها بحيث يتناسب مع العايله كل ما كبرت
- ابتعدي عن الغرف المصممة بأشكال غريبة دائري وغيره، المربع والمستطيل كجدران أفضل
- غرفة الغسيل تكون ف نفس طابق غرف النوم عسب ما تتلعوزين في الغسيل والكوي
- احسبي حساب الخدم وغرفهم
- سويلج صالة بوسط غرف النوم للعايلة غير عن الاستقبال للضيوف
- كل غرفة بحمامها وماستر أفضل وسوي الكبتات ف الجدران

وبالتوفيج

بالضبط نفس افكاري

شو رايكم بمطبخ تحضيري فالطابق الاول تشوفونه عملي والا ما له داعلي؟؟

**الحمدلله رب العالمين** · 2016-03-05, 11:43

شكرا خواتي على تفاعلكن
خليجيه ضروري المطبخ التحضيري في الطابق الاول حق الاشيا الخفيفه ريوق او عشا نص الليل لانج ما بتقدرين تنزلين تحت وتصعدين كل شوي خصوصا حق اليهال بتستفيدين منه حطي فيه المغسله ومايكرويف صغير وثلاجه صغيرة مع طاولة طعام صغيرة بكراسيها

**الحمدلله رب العالمين** · 2016-03-05, 11:47

انا للاسف ما سويت غرفة غسيل اللاندري فوق سويتها بس تحت حتى الستور في الطابق الارضي والحينه يوم فكرت فيها فعلا بحتاج غساله فوق عند غرفة نومي حق ثيابي الخاصه مثلا ما بخلي الشغاله تغسلهم فمب عارفة شو اسوي شو رايكم احط الغساله في الحمام ولا ما يحتاي شوروا علي

الموضوع: ميلس بيت العمر....تجمع للي يبنون بيوتهم حياااكم

أدوات الموضوع

عرض