علاقتي انعدمت بـ ريلي

[مشكلتي]

السلام عليكم بنات
شحالكن
مشكلتي اني انا معرسه من 4 سنين تقريبا .. خذت ولد عمي
عرست وانا عمري 18 وهو اكبر عني
زخيته كذا مره يرمس بنات من ورايه .. واسكت واحبس هالالم كله ف قلبي
واصبر عشان عيالي وادعيله بالهدايه
حتى من فتره بسيطه .. تلفوني اخترب , قلت له ياخذ لي غيره .. عطاني فونه الجديم ..
وحصلت مسجات جديمه يكلم فيها وحده .. ويتفداها ويغازلها .. وخبرته بالموضوع قالي شوفي التاريخ متى !! انزين حتى لو من زمان يعني سويت الغلط سويته .. سار اليوم العقبه وخذالي اسويره ماركه .. عشان يصالحني .. بنات انا والله ماتهمني الهدايا .. بس انقهر وقته كله فالتلفون الله يعلم منو يرمس ولا منو .. حتى سويت لي حساب فالانستقرام مايعرفه وكلمته عليه .. بس كتبت له هلا ... تخيلو كل يوم يطرش لي شحالج ؟ وينج ؟ ليش اختفيتي ؟ ... هذا وانا بس كاتبه هلا .. الله يعلم شو بيقول لو كملت .. انا احس خلاص ماشي فايده من ها اللي اسويه .. بسكر هالحساب ومابفتش تلفوناته مول لاني يالسه اكرهه وانقهر من هذيل البنات .. هو ريال ملتزم ودوم يعتمر ويصلي .. بس مول ما استبعد عنه سوالف الرقاد ويا البنات .. احس عادي عنده وبكل سهوله يبيعني .. والله انقهر هاييل عاطنهم كل وقته وانا مايكلمني الا 5 دقايق فاليوم ..
كونه هو يداوم ف اماره ثانيه ييني بس يتغدى.. وعقب يظهر .. ويرد اخر الليل انا اكون راقده ويا عيالي ..
ولو يباني بيوعيني بـ غرض تفريغ شهوه لا اكثر
انا تعبت وما احب اخبر مشاكلي ل اهلي .. اباه يتغير
انا مب مقصره ف شي اتعدل له دوم واتحمس لكل شي يقوله واشجعه ع السفر وكذا ..
خواتي والله حتى لو حجزنا للسفر يحجز لخواله و عيالهم ... مايقدر يتم وياي بروحنا .. احس مايرتاح لي ..

المزيد من آخر المواضيع من نفس القسم:

• تزوجت مريض نفسي
• مشكلة حالتي بعد الأمومة
• مشكلة تقدم لي خاطب وافد
• مشكله بنتي
• زوجي تعبني بالضرب كليوم💔
• أواجه زوجي بكذباته ولا اسكت
• ريلي احبه ،، بس ماعرف شو الي حصل
• مشكلتي التعلق الزائد
• رفض ريلي للحمل
• عااااجل مشكلة واجهتني

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[المراقبة العامة]

تمت الموافقة

الكلمة الطيبة صدقة

[رسايل غلا]

اختي انتي قلتي نقطة لاحظت ان اغلب الحريم اذا مب كلهن يسونها وهي انها كل ما وحدة منهن زخت ريلها يسولف ويا بنات في موقع سارت وسوت لها حساب فيه ورمسته, ما ادري هل هو زيادة تأكيد انه يرمس بنات ولا عندها فضول تعرف هو في شو يسولف؟!
وآخر شي تيلس تصيح وتسير تواجه ريلها وأول سؤال تسأله اياه: أنا في شو قصرت؟
وكل هذا غلط وما منه فايدة, ليش تواجهينه وهو بينكر حتى لو عندج الف دليل, ثاني شي ليش تكسرين ثقتج في نفسج جدام ريلج؟ انتي لو واثقة انج مب مقصرة في اي شي خلي سؤالج يكون مختلف:
هل فيه شي انت محتاج مني اسويه غير اللي انا اسويه الحين؟
هل تحس فيه خلل في حياتنا وعلاقتنا محتاج لتصليح؟
حسسيه انج انسانة كاملة مكملة وانه اصلا ما عنده سبب مقنع للخيانة والغلط منه هو, اذا هو ماخذ الموضوع تسلية من بنت لبنت وبعيد عن الحرام بس هذرة عالنت ف ممكن تلقين حل , لانه يا حبيبتي دام هو يتسلى وبس ف مب هامنه انتي قصرتي ولا لاء
بيهتم لو ناقشتيه بعقلانية وسألتيه عن السبب المقنع ورى هالشي , ولازم تعرفين انج لو لبستي احسن واغلى لبس و حطيتي من افخر انواع العطور والمكياج هذا مب حل كافي عشان تجذبين ريلج
بدون حوار ونقاش, فيه رياييل حريمهم مبهدلات آخر بهدلة لا تعديل ولا غيره وما يخونها بس يحب ييلس وياها ويسمعها من اسلوبها وطريقة كلامها ورومانسيتها.

دوري على سبب عدم راحته وياج يمكن انتي تسوين شي ما يعيبه بس ما يرمس انتي اسئليه, ودوم ادعي له بالهداية وقولي اللهم رده الي ردا جميلا, اللهم سخره لي, فيه وايد ادعية ادعي بها دوم.

والله يهديه ويصلح احوالكم

[Zayai]

هو كيف يعاملك بصف عامة ?!أشياء فيه كويس انت ترتاحي ليها؟!

[[..دانــة..]]

عذراً بس هالتناقض وايد لاحظته في كذا موضوع "هو ريال ملتزم ودوم يعتمر ويصلي"
بس شكلياً لأنه جوهرياً العبادة مول مب مأثره فيه، هالشي ما أبعده عن الفواحش وفعل المنكر!
.
.
.
الحل مب أنا شوه مقصره؟ يا جماعة مب عذر ، ماحب اللي تحط للريال عذر الخيانة وقلة الأدب عسب والله حرمته مقصرة، ياخي اذا حرمتك فيها عيب ومقصرة واجهها وصلح بيتك مب تلجأ للحرام!
.
.
.
حبيبتي ريلج يباله العين الحمره، وانتي وايد ساكتله ومعطتنه ويه وهو عايش جوه
واجهيه وعطيه كاش فويهه قوليله شوه مشكلتك فالحياة؟ شوه فيك من مرض؟
ليش ترمس بنات جنك مب جايف خير وعندك حرمة وعيال؟
.
.
لأنه يا قلبي العلة مب فيج، العلة في ريلج
وهو لازم يعالج نفسه!
وأنتي لا تلومين نفسج بأي شي
مب غلطتج اذا هو دينه وأخلاقة زفته!
.
.
السموحة لو كان ردي قوي بس الصراحة طفرت من هالنوعية من الرجال
ووايد جفت حريم يشتكون من نفس هالنوعية
حبيبتي أنتي إنسانة كاملة والكامل الله، لازم تناقشين ريلج في مشكلته
لأنه واضح هو عارف غلطته ومستمر فيها ومب خايف منج ولا من ربه!

[احلى بعفويتي]

نفس القصه دوم تتكر

بس انتي لا تعطين مجال انه يمسك فةنه بوجودج برع كيفه بس في البيت نبيه كل مره ع الفون

يوم يكون عندج لازم تنبهينه على هالشي

والله يسرلج

[رباب حمدان]

استغفر الله

[الموهبة]

لو كنت مكانج اول شي اعمله ما فتش بشي عنه ولا ارمس له عن البنات كانه شي ماصار
وعن حساب استقرام حذفيه ولا تعبي نفسج بشي المراقبه بتدمرج وكوني ذكيه كيف تجذبيه لج بحبج وكلمتج الطيبه
ان ما يتصل اتصلي فيه انج مشتاقه له ولما يبغى يطلع قولي له نفسي نتطلع نتمشى مع العيال شوفي مكان حلو لنزه مع ريلج واسحبيه بهدوء عن البنات بذكائج وايضا خليه يسير لربعه لكن بدورج حاولي يخصص ليكم ايام في الاسبوع لنزه مع العيال
وانصحج تقترحى له على سفره لحالكم بدون احد جددي شهر عسل مع ريلج
لما يجى من الدوام خليج مكشخه واكلي معاه لا تفتحى معاه اي مشكله
وحتى لو كان يرغب للعلاقه الحميمه لاتفكري انه بس يبغاج من اجل العلاقه الحميمه لما الزوج يرغب لزوجته بالعلاقه الحميمه معناه هاذا حب
وواضج لما اشترى هديه انه يحبج وايد لكن بتقرارج فتح سالفة البنات بنفسج بتخليه ينفر منج يبحث عن وحده تغمره بالحب اسحريه بانوثتج وذكائج
لم اجد بحياتى كثرة اعادت الهدره والمشكله حلت مشاكل لكن المعامله واغماره بالنواقص هى من تبعده
ابحثي بنفسج عن النواقص فيج هل هو من اللبس او الرمس او الكشخه
وانبهج لنقطه مهمه انج انثى انثى انثى الريال يحب زوجته ابراز كل انوثتها وليسه اسلوب محكمه وحساب
جميل الزوجه تعاتب ريلها في الاخطاء لكن ما تعيد كل مره السالفه اسحبيه بانوثتج واسلوبج الراقي
وبعدج صغيره ابحثي عن اللبس الستايل والموضه واكشخي له في البيت
اللبس ايضا يجذب الريال وحاولي تسيري معاه المول لحالج بدون العيال قولي له خاطري تختار لي لبس على ذوقك من اجل تعرفي ذوقه ورغبته
اشتري له هديه لا تقصري بشي اياه الريال ايضا يحب زوجته تهديه شي
ماهو شرط تكون الهديه ثمنيه حتى لو بسيطه تكون غاليه في قلب الزوج

[سنفورهه]

اتوقع هاذا طبع خاايس في اغلب الريااييل اللي هو يكمل بنات ما ادري شو السبب يعني ...ولا تقولو التقصير من الزوجه ترا لو شو ما تسوي لهم وما تقصر وياهم بشي بعد بيخونو ..اعرف وايد رياييل جي يمكن يحبو يتسلو ومحصلين ناس فاضيه تسولف وياهم ..الله يعينج اختي ويعين الجميع ..

[ماحد شراتي]

اريد اعرف شي واحد كيف هالنوعيه من الحريم تم ساكته وكابته ؟!

ليش انتي ضعيفه جدامه وما يخص مقصرة ولا مب مقصرة .. لو شخصيتج كانت قويه وما طوفين جان سوا لج حساب ومب كل حد يصلي ويعتمر يعني يخاف الله ! شكله يصلي عاده يعني تعود مب مخافه من رب العالمين لانه الصلاه تنهى عن الفحشاء والمنكر ..

نصيحتي تغيري وقوي شخصيتج هذا الحل والوحيد

[Beau Sancy]

اغلب الريايل جذي الحين للأسف .. الا من رحم ربي ..
انا اشوف ان كلا الطرفين غلطانين
هو فاتح المجال للبنات ومعطنهم القرين لايت ..
وهي سكتت وماتكلمت او ماخذت موقف حاسم

انتي اكثر وحده المفروض اتعرفين طبع ريلج وكيف ممكن تواجهينه بطريقه صحيحه ..
مب شرط اتكونين مقصره ، الريايل جي فتره من حياتهم يقضونها لعب وسوالف !
وانتي وشطارتج لازم اتعرفين كيف اتطلعينه من هالوضع السيء ..

صعب اذا كنتي ضعيفه وهو تعود عليج تكونين ساكته ! والحين تواجهينه !
المفروض من اول موقف بينتيله ان هالشي عندج خطط احمرر ! وحطيتيله حد عشان لا يكرر

لكن الحين اشوف الشي صعب ؟

مب مستحيل بس صعب ، لازم تقعدين مع نفسج وتصارحين نفسج
كيف ممكن تغيرين ريلج ؟ لازم اتعرفين هو شو يحب ؟ شو السوالف اللي تجذبه ؟
و وايد اشياء ،، ودوم ادعي ان ربج يسخره لج

الله يعينج يارب ويسخرلج ريلج ويودر عنه هالمنكر

[khaleejiya]

اختي كم لج متزوجه كم سنه كملتوا؟
مادري بس حسيت علاقتج فيه سطحيه نوعا ما يعني مب يالسين تتصرفون مع بعض ك زوج و زوجه يالسين تعاملون بعض ك غرب وفيه بينكم مسافه
المفروض تقربون من بعض اكثر وعلاقتكم تقوى وتكونين انتي وعيالج الشغل الشاغل والوحيد بحياته غير وظيفته
هو يوميا يسير يداوم بإماره ثانيه ويرد البيت؟؟ والا هو ساكن بإماره ثانيه واييكم بالويكند؟

[الحياة صبر]

اولا الراجل ما بيدور بره الا فاقد شئ و اسلم حل انك تعرفي الشئ ده انك تتناقشي معاه و تصارحيه اهم شئ الشفافية في العلاقة لازم تجلسي معاه و تتناقشي ما تخلي الأشياء بدون حل، اذا في شئ صلحي علاقتك و تعاملك معاه اذا مافي شئ و فقط انها غريزة خليه يتزوج بالحلال احسن ليه و ليك اذا قدرتي تستحملي وجود واحدة تانية اما اذا ما قدرتي على الحل ده افضل شئ تريحي نفسك و تطلبي الطلاق صعب الشئ ده بس صدقيني ارحم ليك من الوساوس و التفكير الدايم ومن مشى وين ومع منو قاعد و بيوسي في شنو. بعدين شئ مهم جدا انتي ما تعطيه ابدا احساس انك ضعيفة او ناقصة مطلقاً دايما خليك قوية بأشيائك و خليك واثقة في نفسك ولازم يعرف قيمتك. انا ضد فكرة الطلاق بس عن تجربة غير ما ح تمرضي و تجيبي لي نفسك بلاوي ما ح تجني شئ، الحياة حلوة ليه الواحدة فينا تعمل حساب للناس و هي مجروحة و مكسورة و احيانا بتتهان! ربنا من فوق سبع سموات كرمنا و اعطانا حق نعيش و نسعد علشان يجي شخص يسود حياتك .... عفوا بس شوفي راحة بالك وين..

[Yazi.90]

الله يهديه ويسخره لج ولبيته يارب ،،
مادري شقولج !

[ام هزاع2013]

من خبرتي فهالمواقف احسن حل تطنشينه وتخلينه على كيفه .. وانتي انشغلي بهوايات حلوه وانسي ريلج