غلاء الحدم و الاستغناء عنهم

[احلى بعفويتي]

هلا بنات جميلات اخباركم يا عمري

تدرون بحال الخدامات و الغلا الي استوا فيه
هل تتوقعون انكم تستغنون عنهم في يوم من الايام
وهالسؤال موجهه للي عندها خدامه للان الي ماعندها اوردي انتي مستغنيه وفاكه مخج ..

يله جاوبو

المزيد من آخر المواضيع من نفس القسم:

• قرآن كريم
• هل هو شيء عاديٌّ ..أن نموت !!
• لكم وحشة يا عضوات المنتدي وين ايمكم
• عداوة اهلي لي
• محتاجة حليب الابل ضروري بنت تعبانة
• كيف تتحكم با بيتك عن بعد
• اعطوني نصيحتكم بنات
• وهُم قِطَعٌ في آلة الحياة
• اريد سائقة توصيل من ام القيوين لدبي
• السلام عليكم

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[احلى بعفويتي]

نا عن نفسي حاليا ابدا ما اقدر استغني عن الخدامه مع ان ماعندي شغل وايد بس
وايد عندي اكتفيتيزس يعني الجيم وطلعه بيت ماما كل يوم الصبح و غير ان ويك اند اروح ابات بيت اهل ريلي
لازم في حد يعاوني الصراحه وعيالي كتاكيت .. فمالي بارض على شغل البيت
لو وصلت 30 الف بيبها عادي خخخخخ

بس بعدين لو كبروا عيالي وصارلي بيت مستقل وملك ان شالله هيج الساعه ممكن افكر اني استغني عن وحده بس من الخدامات ..
يعني ممكن استغني عن الي شغلها اقل بس ان ما يكون عندي خدامه احسه كابوس ماااابا افكر فيه

[mouzan7mod]

عن نفسي هي عااااااادي ، لان لو عندي عيال كتاكيت بحطهم عند امي او ام ريلي ، او الحضانة و تنظيف البيت بتساعد مع ريلي أو أحيان ممكن ايب مال تنظيف المنازل اذا التنظيف وايد ، بس مشكلتي عالاكل لان ماعرف اطبخ وايد

[الملكة ديهيا]

عن نفسي عادي استغنى عنها

[[..دانــة..]]

أنا جربت الاثنين
والصراحه الحدامة شي لابد منه
خصوصاً اذا تشتغلين وعندج يهال صغار صعب ترجعين من الدوام تلحقين من تنظيف من طبخ من غسل وكوي
مجهود الصراحة غير العزايم والتجمعات تبين حد يساعدج ويسهل عليج المهام

ما أجوف نفسي استغنى عن الخدامة خصوصاً البيت كبير
بس يوم كنت ساكنة فشقة كنت أقدر لأنه مساحة صغيرة
بس بيت عود وأطفال صعبة!

[تفاحتي]

مابعذب عمري عندي عيال ولازم يلبسون مرتب ع طول واحب اشوف ارضيه بيتي تلمع واحب اصحى من الرقاد اشم ريحه الديتول
ماحب البهدله
وبعدين مالي بارض احط ايدي ف الغسيل والكوي يعني اربي عيالي واجابل عباداتي لربي احسن من اضيع وقتي ف التنظيف وما دام الحال ميسور اكيد وابدا ما ببخل ع صحتي ونظافه بيتي

[اشراقة أمل]

العنده فلوس عادي ... والناس تسترزق


بس يعني الحرمه ليش تبي بيت وعيال ... لازم تساعد فيه وتنظف وتغسل عشان النشاط ويعتبر رياضه

والكوي بليل بس تسوي حقها جدول ...


بس هذا اختيار شخصي ... مالوم حد عليه!


مب حلوه تعرف كل شي عن البيت والعيال ولباس ... يعني قصدي العامله

احسن الحرمه هي تكون مشرفه ... لوتشتغل

اتذكر وانا صغيره مدرساتنا كان عندهن عيال ثلاثه واربعه وعادي يشتغلن في البيت ويترزق ....والصحه عال العال ...

يعني صح الدنيا تغيرت بس .... عادي مب ضروري


بس مره ثانيه اختيار شخصي

[تفاحتي]

والله ماحيد ف خصوصيه ف ملابس سالفه الملابس غير قمصا ن النوم المفروض ماتشوفهن والداخليه
اما شي ثان عادي
واللي بيتها حجرتين وثلاث مايتقارن طبعا بالبيت اللي فيه ثلاث طوابق وحوي كبير


واصلا طبيعي الحرمه تكون غصبن عنها تكون مشرفه لو تبا بيتها نظيف اما اللي ما تبا نظافه اي كلام مابتسال

[احلى بعفويتي]

انا والله ساكنه بشقه بس بعد ما اقدر استغني عن الخدامه ابدا احس واي بموت
جربت يوم سافرت الاولى و تميت اسبوعين من غير خدامه
احس ذبلت واستويت كشه وماعندي وقت اراكض الجيم او اي مكان ثاني
حسيت بتعاسه الهي كيف انا عايشه
لاني اداوم و الصغاريه وحالة .. حتى لو هو يساعد ما يكفي ..

يمكن الظروف تحكم .. لاني هياته شويه وطلعاتي وايد صعبه اتم من غير خدامة

[yummy mommy]

صعبة جداااا واظن صار من ضروب المستحيل ..

خااااصة ان محد بهالزمن يمسك عيال غيره اصلا الحريم ما تحصلونهم فالبيوت الي عندها شغل او دراسة او هياته

[همي اخرتي]

السلام عليكم ورحمة الله وبركاته
عشت كم سنة بدون شغالة.. راحة بال الصراحة
لكن عقب ما انتقلنا لبيتنا.. البيت كبير شوي والعيال ما شاء الله وشغل البيت وايد..
ولولا الصحة التعبانة.. البيت بدونهم راحة
وما ادري احس السنوات الياية الشغالات بيقلون
والسبب زادت مصاريف استقدامهم ومشاكلهم
واعرف بيوت من الحين استغنوا عنهم

[mao]

صح كلام الاخت الي فوقي

[أم محمد1988]

عن نفسي حاليا ما اقدر استغنى عن وجود الخدامه ف البيت والسبب مش شغل البيت لااا ..
عادي شغل البيت أقدر عليه ولكن عيالي كلهم صغار وكتاكيت ما اقدر أروح مكان .. لازم حد وياي .. وريلي يداوم فإمارة ثانيه .. وأهلي بعد بعاد عني .. ف صعبه بالنسبة لي

ف المستقبل ما يندرى على حسب الظروف

[امراه]

اذا اقدر بيبها وبريح عمري هن منهن فايده وايساعدن وخصه فالعزايم بس لو مااقدر اكيد بستغنى عنها والحمدلله

[ام احلى بنات]

مابعذب عمري عندي عيال ولازم يلبسون مرتب ع طول واحب اشوف ارضيه بيتي تلمع واحب اصحى من الرقاد اشم ريحه الديتول
ماحب البهدله
وبعدين مالي بارض احط ايدي ف الغسيل والكوي يعني اربي عيالي واجابل عباداتي لربي احسن من اضيع وقتي ف التنظيف وما دام الحال ميسور اكيد وابدا ما ببخل ع صحتي ونظافه بيتي

نفس التفكير ، الحياة فيها امور اهم عشان الواحد يهتم فيها،،،

يعني عن نفسي بدل ما استغنى عن البشكارة، استغنى عن الدروس الخصوصية اللي سعرها وصل عشر اضعاف راتب البشكارة المسكينة.

يعني البشكارة المسكينة راتبها لا يتعدى الـ1500 و مع ذلك شالة عن ربة المنزل حمل كبير، بس انا ضد ان في البيت يكون اكثر من بشكارة لان احس بكثرتهم خطر ، ممكن يشجعون بعض على المشاكل، حتى اذا البيت عود ، افضل ان اشتريلها ادوات تساعدها في شغلها.

يعني ممكن اشتريلها مكينة غسل مواعين ، و نشافة و بعد الحوش مش لازم عليها، و غيرها افكار ثانية ، و الاهم من هذا كله اعلم بناتي يعتمدون على انفسهم بكثير من الامور،،،