حياتي الوظيفية

**رسايل غلا** · 2015-12-11, 04:50

السلام عليكم ورحمة الله وبركاته
مساء/صباح الخير

عندي مشكلة احترت كيف اتصرف فيها واحس اني بسببها فقدت طاقتي
واستويت مب قادرة اعطي أكثر في شغلي، بحاول اشرحهها وسمحولي لو طولت.

مشكلتي هي اني من توظفت لين اليوم وكملت خمس سنين بالضبط يوم حد يطلب مني شي استحي اقول لا حتى لو مشغولة اقول ان شاء الله بسويها يوم اخلص، وهالشي خلا مديري ومسئولتي المباشرة يستغلوني لدرجة اني يوم خذت اجازة اسبوع واحد عقب إجازة اليوم الوطني هاي قال حق ربيعتي ومسئولتي في اجتماع لهم دام انتي اجازة وفلان عنده امتحانات منو بيمسك الشغل؟ خلاص كنسلوا اجازة رسايل، صدمني وتعرفون شو اللي مضايقني اصلا من كل السالفة هو أنه نحن شغلنا عبارة عن بروجكتات وايدة وانا واللي فالقسم كل حد فينا ماسك بروجكت والشغل فيهن مب سهل يأخذ وقت واضطر يوم حد يغيب اغطي شغله وأحيانا في يوم واحد استلم 3 بروجكتات بس مسئولي ما يقدر تعبي ومجهودي وأحيانا يضغطني بشكل فضيع لدرجة اني أن ابتعدت عن المكتب شوي يقول طلبت منج تساعديني في شغل بسيط وانتي رفضتي مع انج كنتي فاضية!

ما فهمت هل انا مب من حقي ارتاح لو تعبت؟ وهل لازم اتم لاصقة في مكتبي ومجابلة اللاب عسب اثبت اني يالسة اشتغل؟
تعبت وايد حتى الحين مشي ما اروم امشي جني عيوز وانا توني شباب!

شو الحل؟!

المزيد من آخر المواضيع من نفس القسم:

**اشراقة أمل** · 2015-12-11, 12:42

عادي اختي انتي عودتيهم عليك ... خلصي المشاريع بيدك اختي ... وخذي اجازه سنويه مثلا او اجازه مرضيه

بما انك فعلا تعبانه خذي ورقه من الطبيب انك مرهقه بالعمل وخلاص ...

هو مب غلط يعتمدون معناها انتي شاطره ... بس الحين انتي تعتبري قديمه بالعمل يعني خمس سنين

مب اول سنه او ثاني سنه ... فقللي هذا الشي .. بس تعتبرين مرجعيه لهم

ولكن خذي اجازه مرضيه مثلا شهر وخلاص .. ارتاح سافري سوي اي شي

والله يااختي انا احب اشغل لولا مشكلة صداع واذني لو يعطوني شغل للفجر بشتغله وانا واثقه منه

شغل حلو ... انا جربته بس الواحد شو يقول الحمدلله بس اهم شي ان ماحد
يدخل في شغل الثاني

لان هذا هو الدمار ... بالتوفيق

**M-Alshehhi** · 2015-12-12, 11:44

حبيبتي أنصحج إذا عندج أيفون تدخلين برتامج البودكاست من البرامج الأساسية بالايفون تدخلينه وتكتبين بالبحث بودكاست عيش حياتك يتكلم عن تطوير الذات وتنمية الشخصيه وفي وحده من الحلقات أسمها كيف تقول لا أسمعيها وبتتغيرين ان شاء الله عقب ماتسمعينه وطبعاً اول شي التوكل على الله

**sa7el** · 2015-12-13, 09:22

المسالة مب مسالة اجازة اسبوع،، لا،، المسالة هني ان شخصيتج ضعيفة

تبين تطلعين اجازة قدميها وطلعي
وان قالوا لج شي قولي هاي اجازتي وعندي ظروف ماقدر اكنسلها

وان عطوج شغل،، اسالي قولي اولريدي عندي بروجكت وما خلصته،، اي واحد تبونه قبل؟؟؟

واذا قالوا لج الاثنين يبونه في نفس اليوم قولي بحاول بس يباله شغل ما اظن،،، بحاول اذا مب اليوم باجر ان شاء الله وروحي

لازم ترمسين في الدوام،، المسالة في النهاية الشخصية،، الشخصية وااايد مهمة في الشغل

**Jimmy Choo** · 2015-12-13, 15:19

الغالية انتي ما تحتاجين جواب على السؤال اللي طرحتيه
انتي تحتاجين تيلسين مع نفسج و تفكرين و راح تعرفين الحل بنفسج
الشخص ممكن يمر بمواقف يتحملها و يتحملها و يتحملها
لكن طاقته ما تسمحله يستوعب اكثر من هالارهاق سواء جسدي او نفسي
و يوصل مرحلة غصبا عن نفسه يتغير علشان يقدر يرتاح من الضغط اللي يحس فيه

عندج حلين
الحل الاول تطلعين من هالدوام عسى ربج يكتبلج الخير بوظيفه ثانيه يديده
الحل الثاني
انج اتمين مكانج واتداومين لكن تكونين انسانه مختلفه تعرف حقوقها وتعرف اللي الها واللي عليها
و تسوي شغلها وتأديه على أكمل وجه لكن ما تسمح بالمهزله اللي صايره
و ترد بكل وضوح و جرأة و تتكلمين وتعبرين بكل وضوح ان انتي انسانه مب مكينه
ومن يخلص دوامج شلي اغراضج واطلعي
وقدمي على اجازتج و من تبتدي تقفلين تيلفونج موليه وما تسمحين بأي شي يزعجج
وكل مسؤول يلزم حدوده

**Rema28** · 2015-12-15, 17:58

باختصار اختي العزيزه ،،

لا تعودينهم عليج في ناس ماتستحي يشوفج تستحين تردينهم يقولون نعق الشغل عليها وبتخلصه ،، انتي انجزي شغلج بس عسب تكونين مابينج وبين ربج جاده ،، وشغل غيرج قولي يتريا لين يرجعون

ترى مهما كان انتي بشر دم ولحم ولنا طاقه ... ولا يكلف الله نفساً إلا وسعها

ترى بعض المسؤولين اذا حد من موظفينه فاهم الشغل يعق حتى شغله عليه .. وهالكلام من واقع اشوفه

**MEERAHDUBAI** · 2015-12-15, 20:25

ان شاءالله يتغير وضعج للأفضل. ..
بالتوفيج دوووم

الموضوع: حياتي الوظيفية

أدوات الموضوع

عرض

حياتي الوظيفية

المزيد من آخر المواضيع من نفس القسم:

رد: حياتي الوظيفية

رد: حياتي الوظيفية

رد: حياتي الوظيفية

رد: حياتي الوظيفية

رد: حياتي الوظيفية

رد: حياتي الوظيفية

المواضيع المتشابهه

لأم العاملة.. بين المهام الأسرية والهموم الوظيفية

كيف تستمتع بحياتك الوظيفية؟

المسميات الوظيفية بالعربي