تزوجت عن حب

[مشكلتي]

السلام عليكم ورحمه الله وبركاته

انا حرمة خايف ربي والحمدلله جميلة و في مراهقتي تعرفت على شاب من قبيلة غير قبيلتي أهلي رفضوا الزواج لكني أصرت لاني حبيته

للأسف اكتشفت متأخرة انه خذاني عسب أصرف عليه بس

وغير الديون الي حطها على وغير الجفاف العاطفي الي بينا


معروف عني كشيخه ودوم متعطره وميكب روعه وفرفوشة والكل يحبني


حتى بيت ماعندي ساكنه مع أهلي في ااالشهر مرة بس اشوفه ودوم مسافر


كملت على هذه السالفه 10 سنين شبابي ضاع معاه مب عارفة كيف أتصرف أو شو اسوي


أهلي رافضين فكرة الطلاق ومحد واقف معاي كني مقطوعه من شجرة محتارة عندي 5 عيال

شو اسوي مت من المذلة

المزيد من آخر المواضيع من نفس القسم:

• تزوجت مريض نفسي
• مشكلة حالتي بعد الأمومة
• مشكلة تقدم لي خاطب وافد
• مشكله بنتي
• زوجي تعبني بالضرب كليوم💔
• أواجه زوجي بكذباته ولا اسكت
• ريلي احبه ،، بس ماعرف شو الي حصل
• مشكلتي التعلق الزائد
• رفض ريلي للحمل
• عااااجل مشكلة واجهتني

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[المراقبة العامة]

تمت الموافقة

الكلمة الطيبة صدقة

[Yazi.90]

والله مادري شقولج اختي الله يعينج ،،
مهما حبيتي شخص فحياتج مردج فالنهايه لهلج
الحين جدامج حل انج تحاولين تقنعين اهلج وتكسبين رضاهم
بيني لهم انج ندمانه يوم طلعتي عن شورهم ، بيني لهم انج مكسوره
و ان وجودهم فحياتج مهم وانج ماتقدرين بدونهم
ادري مستحيل بسهوله الاهل يرضون خاصة لو ماطعتي شورهم
و الله يعينج ويلين قلبهم عليج يارب

بخصوص ريلج كيف تأكدتي ان خذاج عشان هالشي ،،
احيانا تكون مشاكل ثانيه موجوده بس ماتحسين بها
حاولي تتفاهمين مع ريلج بخصوص هالشي و ان هو الملزوم مب انتي
اذا حسيتي انه معند ويبا فلوسج اقولج تركي الوظيفه اخير ، لانه مستحيل يخليج
ولو مارضختي له بتدخلين فمشاكل مالها اول ولا تالي !

[لحنْ #]

الحين بيقولون هذا اللي شفناه من الحب ومادري شي ، اصابعكن مب سوا
ومب كل حب تكلل بالزواج اهو فاشل .. وايد علاقات ناجحه مثل ماوايد علاقات تقليديه غير ناجحه بعد ،
المشكله بالثنائي مب بالطريقه .
اما بخصوص صاحبه المشكله ف اختيارج خاطىء ي اختي .. ولو ان هالكلام ماعاد يفيد
مادري شقولج ولكن حاولين تكونين جاده وياه وتهددينه بالطلاق ك مجرد تهديد
ولا تعرفينه ان اهلج رافضين الطلاق عشان مايتقوى عليج ...
واذا مانفع دام ان ماوراج ظهر
ماعليج الا تروحين ك اصلاح للعلاقه مب طلاق .. وتطلبينه
يمكن يتعدل
الله يريح بالج حبيبتي

[افناان]

مرحبا عزيزتي ،
الريال لا يشرب و لا عنده خرابيط ولا عنده انحراف خلقي و لا يضربج ، ليش ع طول فكرتي في الطلاق ؟؟؟!!!!!
الطلاق شرع للمشكلات المستعصية اما كونه خذاج عشان تصرفين عليه لا تعطينه هالشي بايدج ، و بالنسبة للجفاف العاطفي انتي تقربي منه و اكسبيه و حاولي بشتى الطرق ، ما ذكرتي في رسالتج عن علاقته بعياله كيف ! اذا كل وحدة عانت من الجفاف العاطفي تطلقت كانت اغلب البيوت الحين تدمرت و العيال تشتتوا !!
فكري في مصلحة عيالج بالدرجة الاولى و ابتعدي عن التفكير في الطلاق و فكري في حلول اخرى ....
عليج بالدعا و الاستغفار و بذل الاسباب عزيزتي

[almal3ka1]

انا اقول فكري بنفسج حبيها و لا تعطينه دوم , لو تبين اتمين معاه

ولو تبين تطلقين و تشوفين راحتج توكلي عالله و عن العيال ترى رب العالمين قاسم رزقهم معاهم و ابوهم ملزوم يصرف علليهم بالطيب او بالقانون

و حقج محفوظ و الله تقول تذللي لاهلج ! نعم اختي وين تبين ! و لله الحمد نحن عايشين بدوله تحترم الصغير قبل الكبير

اللي يباج بيرضى بج شرات ما انتي


و بالنهايه ها راي و القرار لج

[sa7el]

عايشة وياه ماشالله 10 سنوات ويبتي منه 5 تبارك الرحمن والحين ياية تشتكين؟
اختي ها ريلج وبو عيالج
اشتغلي،، دبري عمرج،، اطلبي لج بيت او ارض
سيري خذي لج شؤونة
ريلج يشتغل طبعا،، ولو انتي بعد تشتغلين افصلي حساباتكم

حاولي تقولين ماعندي فلوس داشة مشروع مع الأهل،، وفري فلوسج للمستقبل ولعيالج

يعني ،، سوي اي شي،، ماشالله حرمة وريلج مب ياهل وبينكم عشرة عمر المفروض وصلتوا مرحلة فريتوا هالمشاكل ورا ظهوركم،، حسيت من كلامج ان تزج من فترة معرسة الا تقولين 10 سنوات ماشالله

[احلى بعفويتي]

ماعرف انتي ماكتشفتيه من البدايه فهالمشكله

المهم عندج 5 عيال وهو موب داري عنج ولا عندج بيت مادري على شو صابره
هل في احتما يتغير هل انتي محتاجتنه هل وجوده ماثر بعياله
هو هو شال مسؤوليه كبيره عنج ولا كل هالاشيا تسوينها بروحج
فكري وجوفي هالاسئله تجاوب على قرارج

[mrs.abk]

أنا متأكدة إنج عرفتي مشكلتج من أول سنة .. لكن الحين مالج إلا الطلاق..

الجشع والاستغلال مالهم حل ومافيهم تغيير يرجى من الانسان ما ترك الطمع والجشع لو كان من صفاته

[khaleejiya]

الحب مب غلط خصوصا انه تكلل بالزواج
المشكله مارتبتوا مع بعض موضوع السكن والاستقرار
الاستقرار هو اساس الزواج وبدونه صعب
لازم تلاقون حل واذا احتاج الامر انج تشلين عيالج وترافقينه بسفره روحي وياه

[الموهبة]

شجعيه يطور نفسه في الشغل
شجعيه يطمح يكون عندكم بيت
طبعا اهلج برفضو فكرة الطلاق

جلسي معاه جلسة مصارحه بينج وبينه بدون عصبيه قولي له انج ما بتقصري اياه بشي لكن ابغى منك
تهتم فينى وفي العيال ابغى تطور حياتك ابغى تامن لنا بيت وللعيال

لم توضحى ليش يسافر هل ريلج من خارج الدوله
او السبب الشغل لانه حلقات مفقوده في المشكله والحلول تكون ناقصه
السفر ليش هل السبب الشغل
ان السبب الشغل شجعيه يشوف شغل اخر وانج والعيال مشتاقين له
اتصلي عليه جوال خلي العيال يكلموه وقبل لا يكلموه علميهم كيف يكلموه انه مشتاقين ليه ونحبك بابا متى بتيي
ولما يجى خليه العيال يرتمو في حظنه
الوصال بينج وبينه العيال لما يحن قلبه لهم بتقرب قلبه لج
واقطعى عنه المال قولي له ادعمك لما تبغى تطور حالك

[um mohsin]

مرحبا عزيزتي ،
الريال لا يشرب و لا عنده خرابيط ولا عنده انحراف خلقي و لا يضربج ، ليش ع طول فكرتي في الطلاق ؟؟؟!!!!!
الطلاق شرع للمشكلات المستعصية اما كونه خذاج عشان تصرفين عليه لا تعطينه هالشي بايدج ، و بالنسبة للجفاف العاطفي انتي تقربي منه و اكسبيه و حاولي بشتى الطرق ، ما ذكرتي في رسالتج عن علاقته بعياله كيف ! اذا كل وحدة عانت من الجفاف العاطفي تطلقت كانت اغلب البيوت الحين تدمرت و العيال تشتتوا !!
فكري في مصلحة عيالج بالدرجة الاولى و ابتعدي عن التفكير في الطلاق و فكري في حلول اخرى ....
عليج بالدعا و الاستغفار و بذل الاسباب عزيزتي

كلام عين العقل

[**sara**]

الطلاق مو حل، معقوله قاعده عشر سنوات وتوج تكتشفين انه يبيج تصرفين عليه.
خلاص
لا تصرفين عليه بايدينج هاشي واصلا كان من زمان مفروض تقولين له ها الكلام مو بعد عشر سنين .
بس الأطفال مالهم ذنب تشتتينهم .

[Fa.R]

عايشة وياه ماشالله 10 سنوات ويبتي منه 5 تبارك الرحمن والحين ياية تشتكين؟
اختي ها ريلج وبو عيالج
اشتغلي،، دبري عمرج،، اطلبي لج بيت او ارض
سيري خذي لج شؤونة
ريلج يشتغل طبعا،، ولو انتي بعد تشتغلين افصلي حساباتكم

حاولي تقولين ماعندي فلوس داشة مشروع مع الأهل،، وفري فلوسج للمستقبل ولعيالج

يعني ،، سوي اي شي،، ماشالله حرمة وريلج مب ياهل وبينكم عشرة عمر المفروض وصلتوا مرحلة فريتوا هالمشاكل ورا ظهوركم،، حسيت من كلامج ان تزج من فترة معرسة الا تقولين 10 سنوات ماشالله

[ريم العسووله]

فعلا ليست كل مشكلة لها حل ... او بالاصح ليست كل مشكلة سهلة الحل ...

مشكلتج من المشاكل الي استصعبها ... انا مستصعبة عليج الطلاق بعد عشرة عمر و عيال ... و مستصعبة عليج حياة الديون و المذلة ...

ما عندي غير دعوة من اخت لاختها ... عسى ربي يوفقج و ييسر امورج كلها و يريح بالج ... فهو قادر على كل شيء لا يعجزه شيء ...