زواجي تعيس!

[مشكلتي]

السلام عليكم ورحمة الله وبركاته..

ابي احكيلكم عن قصتي واتمنى منكم المشوره والنصيحه

صارلي متزوجه من اكثر من سنه , زوجي سعودي وانا امارتيه بس هو يصيرلي 

المهم قبل الزواج كنت متردده اوافق ولا لا لاني غير مستعده بتاتا اني اعيش خارج الامارات
اخواني ماشجعوني كثير . . بس الوالده هي اللي اقنعتني وكان شرطي الوحيد اني اعيش في بلادي

والزوج وافق على الشرط

تزوجنا . . وصار يجيني بس فالويك اند او انا اروح له .لان نحن الاثنين متوظفين
كل واحد في بلاده

مرت الايام وصرنا نتعب من اسلوب هذي الحياه المتعب وكل ما نتلاقئ لازم تصير خلافات وزعل لاهو فاهمني ولا انا فاهمته علئ اتفه الاسباب .. ومرات تصير خلافات واحسني من داخلي افقد احترامي له وافقد الثقه فيه صرت ما افاحته في اي شي من داخلي مقفل صوبه

ساعات انتظر الويك اند عشان اشوفه واخبره عن اخر اخباري بس من الضيق والزعل ما اقوله عن شي

سائت علاقتنا صرنا حتى بالوتس اب مانكلم بعض مرات يمر اسبوع مانكلم بعض مايدري عني ولا عن هوا داري احس اني كرهته وكرهت زواجي منه

انا خاطري في طفل بس احمد ربي انه ماجبت طفل منه واقنع نفسي انه خيره

بس الحياه معاه لا تطاق فرحتي و سعادتي اشوفها مع اهلي لما اقضي نهايت الاسبوع معاهم

فكرت كثيير بخصوص هالموضوع
واللي معقد الموضوع انه هو غير مستعد بتاتا انه يعيش معي ولا انا مستعده اني اروح هناك وانهي حياتي ومستقبلي عشان زواج غير مستقر

وفي رأيي الخاص

الحل هو انه نشوف طريقه نعيش فيها مع بعض ( واللي اشوفه تقريبا مستحيل)
او انه ننفصل ونحن لسا صغار وكل حد يروح بطريقه ويكون حياته من جديد

ساعدوني

مش قادره حتى افاتح اهلي بهالموضوع


شكرا جزيلا

المزيد من آخر المواضيع من نفس القسم:

• تزوجت مريض نفسي
• مشكلة حالتي بعد الأمومة
• مشكلة تقدم لي خاطب وافد
• مشكله بنتي
• زوجي تعبني بالضرب كليوم💔
• أواجه زوجي بكذباته ولا اسكت
• ريلي احبه ،، بس ماعرف شو الي حصل
• مشكلتي التعلق الزائد
• رفض ريلي للحمل
• عااااجل مشكلة واجهتني

[المراقبة العامة]

تمت الموافقة

الكلمة الطيبة صدقة

[لحنْ #]

طبيعي بتكون حياتج غير مستقره وبيكون زواجج تعيس ..
اجل اثنين معرسين كل واحد ببلاد ؟!
غلط ي ختي ، نحن نعرف البنت يوم تعرس تروح ويا ريلها اي مكان حتى لو المريخ
خلاص يصير طريقهن واحد ومصير مشترك .
هالوضع اللي انتي فيه بديهي وايد وطبيعي جدآ كان مفروض تفكرين بيه قبل ماتعرسين .. ي انج تاخذين واحد اماراتي
او انج تروحين وياه وين ماكان
لكن بتصرفج ها ضيعتي نفسج صراحه
عمومآ ي انج تتنازلين وتروحين وياه وترا ماسمه زواج غير مستقر ، لان اصلآ وين الزواج اللي تتكلمين عنه ؟!
روحي وياه عالاقل ك تجربه
اتفقي وياه تروحي سنه مثلا او شهور حلو تقبلتي كأن بها ماتقبلتي قوليله نرد هني سوا
اما كل واحد ب صوب ، سمعنا كل حد باماراه بس كل حد بدوله يديده هاي
باين انج صغيره وبعده ماعندج خبره ، انصحج لا تتسرعين وفكري اوك قبل اي خطوه
مع احترامي للكل المطلقه حظها اقل من البنت حتى لو سنها صغير
الله يريح قلبج اختي .

[المعآني]

روحي معاه فديتج هذا ريلج حبيبج وعليج طاعته اتعوذي من الشيطان

[وضـــحـــى]

روحي مع زوجج الحرمه تتبع ريلها .. شو انجليز كل واحد في بلاد ويك اند
ومب لازم انتي اصلا تشتغلين خلاص انتي حرمة متزوجة شوفي بيتج وريلج

[وجدان الفجر]

مع الخوات , أختي روحي مع زوجج . الله يوفقكم ويسعدكم .

[غلآ نفسي]

اذا ما لحقتي عليه الحين وسكنتي معاه

بيتعود ع هالحاله وعقب اذا رديتي سكنتي معاه ما بيتحمل الوضع

لان تعود يعيش حياه العزوبيه بس فالويكند متزوج

فهمتي علي ؟

ونحن رياييلنا 24 ساعه ويانا شفنا منهم بلاوي والقسم يقولج جم من خيانه صارت وجم من تعاسه صارت

عيل انتي حياتج معاه مب مستقره شو تتوقعين يعني ؟

سيري مع ريلج واكسبيه وخليج معاه

وان شاء الله تتغير حياتكم للاحسن

بالتوفيق

[almal3ka1]

جربي سكني معاه و ما تدرين عسى يارب تكونين اسعد زوجين

بعد اسمحيلي المفروض ريلج عريله

[sa7el]

هاي يسمونها ناشز

الحرمة تتبع ريلها،، تخيلي ريلج اماراتي ومن شغله طرشوه فرع برع الامارات هند سويسرا يابان وللا اي دولة؟؟ شو بتسوين حزتها بتنفصلين عن ريلج
اسمحي لي انتي غلطانة بكبرج

[احلى بعفويتي]

خذي اجازه من دوامج لمده شهرين
وروحي معاه وجوفي كيف الحياه هناكي وكيف الحياه اليوميه معاه
يمكن تغيرين رايج عقب قريري هل الانفصال احسن مادام ماعندكم اطفال ولا تهدين شغلج وتسكنين معاه

[mouzan7mod]

وفي رأيي الخاص

الحل هو انه نشوف طريقه نعيش فيها مع بعض ( واللي اشوفه تقريبا مستحيل)
او انه ننفصل ونحن لسا صغار وكل حد يروح بطريقه ويكون حياته من جديد

انا ها رايي ، فاتحي أهلج و ان شاء الله بيقتنع زوجج

[الرومانسية89]

اسمحيلي اختي انتي غلطانة من البداية انا ابى افهم لحين شو استفدتي من الزواج جان ماتزوجتي مو احسن لج اذا ماتبين تروحي وياه وتعيشي معاه انا الصراحة مش معرسة بس دايما اشوف بنات يسوون جيه يعني تخيلي اهي تكون من العين وريلها بوظبي وماتبي اتي وهاي الصراحة غلط بما انج عرستي روحي عيشي معاه باي مكان وبالويكند تعالي عند اهلج لازم اهو يتحمل المسؤلية لازم يتعود
ونفس ماقالولج الاخوات تبين جربي اخذي اجازة شهرين بدون راتب مثلا اذا ماعندج اجازات وروحي جربي كيف الوضع بيكون هناك والله بيسر امورج يارب جربي كل المحاولات وعقب قرري بالطلاق لاتتسرعي

[افناان]

الحياة في دول الخليج متقاربة لا تحاتين ..
نفس الاجواء ، العادات ، اللبس ، الماكل ، امور اخرى ...
ثاني شي انتي خلاص تابعه لزوجج حتى لو راح شرق الصين تروحين معاه ، صح انه وافق انج ما تروحين لكن الان انتي بنفسج جربتي المعاناة ، نصيحتي لج : روحي اسكني مع زوجج ، بالبداية بتتعبين عقب بتتعودين ..
((الغربة مع من تحب وطن )) !!

[ظبيانيه 2014]

انا ضد انش تروحين وتعيشين فالسعوديه لانه بلد صعب التعايش فيه والعيشه فيه مختلفه عن بقيه البلدان

[ام طحنوون]

اسمحيلي بس انتي يايبه التعاسة لنفسج
عيل اكييد مابيكون بينكم تفاهم ولاتواااصل دام كل واحد في دولة
اصلا كيف راح تنشأ العلاقة بينكم اذا كل واحد في عالم غير

امركم عجيب .. شلي اغراضج و الحقي ريلج .. هذا اللي نعرفه الحرمة تلحق ريلها يوم تعرس وتروح وياه لو المريخ
عيل ليش مسمينه زواج؟؟ كيف بتعيشون بجو الحب و دفء الاسرة وتيبون عيال وتشتاقون للحظات بينكم وتتشاركون بكل شي !!

انتي ماعندج مشكلة .. مجرد انقطاع بالتواصل .. مجرد ماتكونين وياه بتنحل كلللللل هالاشيا وبتشوفين الحياااة غير .. وبتحسين بطعم الزواج والمسؤولية ..
اما الحين فأنتي زواج على ورق ..

اتخذي القرار واستخيري والحقيه .. ودوري على وظيفة هناك .. واموركم في السليم 10 على 10