اخوي .......

[بنت امارات العز]

السلام عليكم ورحمة الله وبركاته

سافرت له و وصلت المطار واستقبلني ربيعه وزوجته

قلتلهم ودوني المستشفى ابشوفه .. ابحضنه .. ابشمه

قالولي بعدين اصريت وقمت امشي بشوارع المدينة لا شعوري لحقني وقالي تعالي نروح

دخلت من باب المستشفى وياني احساس غريب سالته فلان اخوي بخير؟؟

التفت علي وماقدر يمسك نفسه جلس على الارض وقام يصيح بحرقه وانا اطالعه مصدومه من ردة فعله

ربيعه هذا اخوي الثاني اعرف انه قوي و مايهزه شي استغربت من ردة فعله

قالي اخوج تعبان وايد و الدكاتره ماتبشر بخير .. ركضت في ممر المستشفى ادوره مثل المجنونه

وقفني و وصلني عنده .. يالله قلبي وقف شفته بس مب هو اخوي شفته الاجهزة عليه ولافته عليها ممنوع الدخول

انهرت صحت جلست عالارض عند باب الغرفه وانا اترجى الموجودين بس بدخله لو دقيقه اقرب منه ابي ارتاح شوي

فجأة جرس يطلع من غرفة اخوي والدكاتره تدخل بسرعه والممرضات خفت تلفت ابي اعرف اخوي شفيه

سكروا الستاره قمت اصرخ شفيه اخوي خبروه اني برع اني عنده موجوده خبروه اني انتظره

دقايق وطلع الدكتوره و ماقدر يحط عينه بعيني وقال شي ماسمعته .. التفت على ربيعه قلتله شو قال ؟؟

قالي عظم الله اجرج .......... ماحسيت بشي بعد هالكلمة

يا بنات اخوي راح .. خلاني بروحي وراح .. مب قادرة اتحمل بعدني اتصل على رقمه

اطرشله كل شي على الواتساب .. كل شي يصير معاي بالتفصيل

احس اني ميته بس عايشه بجسد قلبي وعقلي راح معاه .. البارح رجعت

انا وربيعه وزوجته فالمطار تاثروا على حالتي وكل ماصحت صاحوا .. ربيعه قالي شي صدمني وكسرني

قالي اخوج كان عارف انه بيروح وصاني وصية اوصلج ياها

قالي قوللها لاتصيحين .. لاتعبين عيونج .. ادعيلي بالرحمه .. مب راضي عنج اذا زعلتي نفسج وتعبتي

ماقدرت امسك نفسي صحت لين ما اغمى علي في الطياره خافوا علي يحاولون يصحوني وانا واعيه بس ماحس بشي

بنات قلبي بيوقف الدنيا مب حلوة .. لو الانتحار مب حرام كان انتحرت ولحقته ..

ادعولي الله يصبرني

الله يرحمك ياخوي ويصبر قلبي على فراقك

المزيد من آخر المواضيع من نفس القسم:

• عن رواتب الحضانات
• انا دلال ابحث عن صديقتي مها.ج
• ساعدوني
• سَ أبْقى بِلآ عنّوآن ~
• هل من مرحب
• حياكم وردات مدينه محمد بن زايد
• مرحبا انا جديدة معكم هل من ترحيب
• بنات بوظبي مرحبا بكن
• كيف اكتب حلمي
• سلاااام للجميع