تعبت والله

[الدلوعة ام حمودي]

السلام عليكم خواتي

اول مرة رمستكم عن مشكلتي وكيف اني متلعوزة ويا ريلي.
ومن كم يوم اتصلي وقالي ردي بيت اهلي قلتله انا مابا ارد ولكن اذا رديت عندي شروط انا ما اخدم حد ولا ارمس حد ولا حد يتدخل بحياتي ولا ابا حد يدق باب حجرتي وعقب نفاسي ابا دوام ولا بيني وبين اهلك غير السلام عليكم . قالي اهلج علموج تتشرطين بعد عيل خلهم ينفعونج ودام فتحولج الباب ويلسوج عندهم خلهم يصرفون عليج وعلى ولدج.

وعقب هالاتصال ما رمسته خير شر
الحين مشكلتي انه مب طايع يوفر شي حق البيبي. رمسته كم مرة والله تعبت منه يقولي ماعندي ودبري امورج وع هالحالة شهريا ماعندي ماعندي وانتي ماتفهمين !!
وفوق هذا مايعطيني مصروفي وان عطاني 500 وماتكفي شي ومب شهريا بس 3 مرات عطاني وع فترات

غير المواعيد اللي تعطيني اياها الدكتورة مايطيع يوديني يتعذرلي بدوامه ولا طالع ويا ربعه واحيان مايرد علي يوم اتصله
واذا رد بيسبني سب . وان طلبت شي منه يقولي خلي اهلج يعطونج مب هم اللي فتحولج الباب .

(( اليوم سرت المستشفى في تكسي بروحي . الدكتورة احتشرت علي تقولي ليش ماتين مواعيدج وانتي فيج وفيج ولازم وووو .
وانا استحي كل مرة اطلب من ابوي ولا من خواتي يودوني واكثر مواعيدي اسير بتكسي ))

واهلي يتصلون فيه ومايرد عليهم ولا يغلق فونه
وانا والله متفضحه ما ارمس حد من اهلي ولا اعرف وين اودي ويهي . والحين بقالي اسبوعين واربي

شسوي دخيلكم خبروني تعبت صرت ادعي ع عمري بالموت👎

المزيد من آخر المواضيع من نفس القسم:

• طرق تجنب الزوجة تدمير حياتها الزوجية
• افضل الطرق للتعبير عن حبكِ لزوجكِ
• جارتهم فرقت بين اخي وبين زوجته
• طرق التعامل مع الزوج الذي يتجاهل زوجته
• افضل طرق التعامل مع الزوج الذي يهين زوجته
• افضل طرق التعامل مع غضب الزوج بذكاء
• اجمل افكار لاستقبال زوجك من السفر
• اهم العادات التي تؤدي الى تدمير الحياة...
• افضل طرق التعامل مع الزوج المستفز
• نصائح مفيدة لنجاح العلاقة الزوجية

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[دانه الكون]

بعد ما قريت بموضوعج القديم
انه يزني و يشرب

حله محاكم و تفرض عليه النفقه
بس شوفي لج حد فاهم بهالاشياء و بالقانون

[مالتيزرس]

الله يعينج ويصبرج ويسهل لج ولادتج ..
اختي شو هو ع كيفه مابيصرف ع ولده عيب عليه يقول هالكلام قوليله ها ولدك وانته ملزوم تصرف عليه ..وان ماصرف عليه حبيبتي جدامج المحكمة لا تسكتين ع حقج والله هالقاصر بعد اهلي ينفقون ع ولدي جيه هو مايستحي ع ويهه يخلي اهلج يصرون ع ولده رياييل اخر زمن

[لحنْ #]

بعد ما قريت بموضوعج القديم
انه يزني و يشرب

حله محاكم و تفرض عليه النفقه
بس شوفي لج حد فاهم بهالاشياء و بالقانون

[almal3ka1]

غصبن عنه بيصرف سيري طالبي بحقوقج للتوجيه الاسري ولو ما يه يسحبونه سحب من الشرطة

[هنايف35]

حبيبتي انتي بنت البلاد دام يزني ويخربط هالانسان ما خاف من رب العالمين بيخاف منج عقي بحر وغصبن عن غشمه بيحطيلج مصروف وبيت وخدامة ودريول والله حرمت ابوي وافدة والوالد طلقها بس شرشحته بالمحاكم حط له شقة ويعطيهم كل شهر 4000 درهم وبعد يعطيها فلوس للخدامه ما عنها ما عندها خدامه ومره تأخر على مصروفهم قالوا لابوي راح نسحبك من البيت لا تسكتين يا قلبي ادبيه وشرشحيه بالماحكم لا تستوين بارده وساكته عن حقوقج وبعدين اذا الله لا قدر اطلقتي يصرفون لج 4200 من الشؤون حرمت ابوي يصرفون لها وهيه مصرية توكلي على الله وخذي حقوقج بالمحكمه وربي يوفقج ..

[سماءالأفق]

يارب يصلح حالك ويهنيك بحياه سعيدة وتشوفين العوض اللي ماكنت تتخيلينه (وحسبك الله ونعم الوكيل)اللهم فرج كربك
فرجا لا يغادر هما.وربنا ينصرك نصر يندمه علي تصرفاته .

[مالتيزرس]

هيه اسمعي من الاخوات ماقصرن اسحبيه المحكمة .لاتنشدين عنه دامه ماينشد عنكم ..وقوليله هذا ولدك انا مب يايبتنه من الشارع عسب تقول مابصرف عليه ..لاتستوين باردة وتخلينه بارد مبرد يقص عليج فوليله وراي رياييل وظهر ..الحين عيب اهلج يصرفون عليج وع ولدج مب مكلفين حبيبتي

[um.khulood]

الله يصلح حالج اختي .
انصحج سيري المحكمه. ريلج ماينفع معاه الطيب
والي مايخاف من الله مابيخاف من الناس

الله يسهل عليج الولادة ويسهل أمورج يارب

[افناان]

الله يسهل ولادتج
عليج بالاستغفار و الدعاء و كثري من حسبي الله و نعم الوكيل ...
اذا مستمر ع الشرب مصيبة لا حول ولا قوة الا بالله

[sa7el]

ليش انتي راضية بالذل؟؟؟ ليش وين عايشة

تترجينه وتتصلين فيه واهلج كلهم يتصلون ولا يرد ولا يراعي،، ويسبج سب؟؟ شو السالفة
ليش أساسا يغلط عليج
سجلي الكالمات او المسجات يوم يسبج وسوي كابتجر حق اللوغ عشان تراوينهم في المحكمة
بيصرف عليج وعلى اللي في بطنج غصبا عنه وعن طوايفه بعد
على باله ماخذ بنغالية يعاملج هالمعاملة،،

اختي صحصحي وراويه انتي منو وشو قادرة تسوين
لو عندج ليسن،، خذي لج سيارة ولو ما تشتغلين اشتغلي
وهو بيفر لج البيت وايجار البيت وراتب الخدامة بعد ومصروفج انتي وولدج بعد

والله،، هاللي كان قاصر،، هو فيه عيوووووووووووب الدنيا ويقول خل اهلج يصرفون عليج دام فتحوا لج الباب
على باله ما وراج رياييل،،،،!!!

[Ward-uae]

ليش تدعين مب زين اذكري الله
انتي شكلج صغيره وتوج عروس وريلج نفس الحال
تقدرين تاخذين اللي تبيه بالطيب
هو بيسب اكيد انتي بتردين عليه بعشر لا تقولي لا لانه مادام قالج خلي اهلج ينفعوج معناته كانت ضرباتكم صراخ وسب
ريحي فترة وعن المراجعات اتصلي له حبيبي وينك؟
خلي رمستج سكر بيذوب وبييج ركض
ادري انه صعب خاصه في مجتمعنا لانه بعض الأهالي يستخدمون اسلوب الامر بين بعض ييب وحط وسوي هذا فصعب شوي بس بالتدريب والتعود بتقدرين
تبين داومين انتي قدمي بس فكري في الياهل اللي بيي وين بتحطيه وكم بيكون صرفج لانه احيانا الوظيفة تصرفين اكثر من انج تجمعين فإنتي احسبي ميزانية الحضانه وميزانيتج وما غير شهادتج اللي بيعتمد عليها الراتب
ساعدي ريلج ووقفي وياه علميه كيف تدفعون دينكم
بيعقل من يشوف ولده وبنته بإيده بيفكر بمستقبلهم صبري عليه
تبين شي سايسيه بيسمعج

[[..دانــة..]]

الحل جدامج مادري ليش مصعبة الموضوع ع نفسج
قلنالج روحي المحكمة وطالبي بحقوقج
وغصبن عنه بيعطيج كل شي!

[موجوع قلبي]

الله يفرج عليج بس من لبدايه ماله خير فيج خليه وبتعيشين وبتطلع حقوقج من المحكمه وقبل كل شيء استخاره وصلاة بجوف اليل ودعااااء وربي يسهل عليج ويعوضج خير يااااارب

[ام احلى بنات]

أختي اول شي جربي الاسلوب الحلو مثل ما قالت لج ward-uae بس اذا ما نفع وياه سيري المحمكة على طول.
اختي انا اعرف خوات وافدات عربيات ماخذات كل حقوقهم من مصروف و بيت و خدامة، اما بالنسبة انج مستحية من اهلج، أنا اشوف ان ما في داعي لها الحرج كله، هذيلا اهلج و اذا هم ما وقفوا وياج فهاي المحنة منو بيوقف وياج؟!

أختي كلها فترة و بتعدي و بتاخذين كل حقوقج بإذن الله سواء بالزين او بالمحكمة بس انتي حاولي تحلين الموضوع بسرعة و ما في داعي للتأخير،،،