ساعدوني

[الدلوعة ام حمودي]

السلام عليكم ..
طالبة مشورتكم خواتي ربي يخليكم .. عندي مشاكل عسى ربي يهونها ويصغرها بعيني ويفرج هم كل مسلمة يارب آمين.


انا من اول زواجي كنت فبيت اهل ريلي وعقب سنة و5 شهور الله كتبلي وحملت وقررت اني اطلع من بيتهم وارد بيت اهلي والسبب اول شي المشاكل اللي تستويلي من اهله ومعاملتهم لي (الله يشهد مثل البشكارة) ونفسيتي بسبب وفاة الوالدة والسبب الاهم ان ريلي ماله شخصية ويسمع كلام ماما وبابا وكل صغيرة وكبيرة يعرفونها منه،،ومراهقته اللي تعبتني سهر ومبيت برع البيت..
كم مرة يلست وياه عسب نتفاهم ولأني طلبت سكن خاص لكن يتعذرلي بأن عنده سلفيات وديون وطبعا كنت بوقف وياه لكن اهله رافضين ان حرمة الولد تتوظف وصبرت وسكت ..اكتشفت انه ريلي يزني ويشرب وهذا اللي يخليه يبات برع مع اني مب مقصرة لكن طلعت السالفة انه من زمان ع هالحال ..وانا ماكنت اخبر اهلي بمشاكلي لكن الخبر وصل لهم عن طريق معارفنا طبعا اهلي في امارة واهل ريلي في امارة ثانية..
ومن وصل الخبر (وطبعا هالشي استوه بعد مايلست عند اهلي) وبعد ماواجهوه قام يتهرب..اهلي والوالد مب مقصرين وياي رغم ظروفهم المادية ولكن هو صار يتمادى ويأجل كل شي ..
والحين كلهم ضاغطين علي لانه مايصرف علي ولاناوي يسكني بروحي ويبوني ارد بيت اهله او اسير ابلغ واشتكي عليه فالمحكمة.
ريلي اتصلي قبل شهر وخبرني انه بيعرس واهله يايبين له حرمة وطبعا بينفذ كلامهم لانهم مايحب يعصي اوامرهم.. وسمعت الوالد يرمسه قبل كم يوم وقاله انه ناوي يطلقني وابوي قاله انا بطردها عيل وخلها تدبر عمرها ونحن غلطنا زوجناها واحد محتاي ام تربيه من يديد مب حرمة يعيش وياها ويعاملها بالمعروف ويحسن عشرتها ويصونها. وانا انهرت بمكاني بعدما سمعت هاكله وماعندي حد افضفض له واشتكيله فالبيت قلت بتوكل ع ربي والله يصبرني وفكرت اكتب مشكلتي هني فالمنتدى.

خواتي بشو تنصحوني..اصبر وايلس فبيت ابوي ولا اسير اطالب بحقوقي من نفقة وسكن ولا اطلب الطلاق؟ بصراحة خايفة ومحتارة ولا اعرف شو اسوي وضعي احسه معقد وايد ونفسيتي وصحتي تعبانه وايد وانا ع وشك ولادة 😔💔

المزيد من آخر المواضيع من نفس القسم:

• طرق تجنب الزوجة تدمير حياتها الزوجية
• افضل الطرق للتعبير عن حبكِ لزوجكِ
• جارتهم فرقت بين اخي وبين زوجته
• طرق التعامل مع الزوج الذي يتجاهل زوجته
• افضل طرق التعامل مع الزوج الذي يهين زوجته
• افضل طرق التعامل مع غضب الزوج بذكاء
• اجمل افكار لاستقبال زوجك من السفر
• اهم العادات التي تؤدي الى تدمير الحياة...
• افضل طرق التعامل مع الزوج المستفز
• نصائح مفيدة لنجاح العلاقة الزوجية

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[إستغفر الله]

الله يكون في عونج يارب
ان شاء الله الله يقدرني وبدعي لج الله يفرج همج


حسبنا الله ونعم والوكيل

[ورقة ناعمة]

الحين شو المشكلة بالضبط مافهمت

انتي طالبتي بسكن خاص وريلج رفض وقال بيعرس عشان اهله طالبين وما يبا يكسر كلامهم

ليش اهله شو طالبين منه يسير مكة وهو رافض ,,, شو هالمنطق وشو هالعقلية ...وشو ماخذه انتي على ما اظن ريلج صغير بالعمر او مب عارف للمسؤوليه

شوفي بداية كل زواج تحصل مشاكل ومشاكل يا تكبر يا تنحل ...

ابوج رده كان غلط يوم قال انا بطردها هل بالفعل ناوي انه يطردج ولا بس عشان معصب ,,, وانتي بقرارة نفسج ماتبين تباتين ببيت اهلج ولا في بيت اهل ريلج

انتي شو اللي تبينه سوي اللي يريحج لان محد يعرف ضروفج الخاصة او أسباب المشكلة الا انتي

حاولي تتفاهمين ويا ريلج وأهله بعد يتفاهمون ويا اهلج ,,, اذا حسيتي ماشي مجال للتفاهم

عندج انج تسيرين المحكمة وتطلبين استشاري توجيه اسري يتكلم معاه واذا مانفع ابدي وطالبي بحقوقج واعتقد المحكمة بيفيدونج بكل شي ,,,

ولاتنسين الصلاه والدعاه يمكن يتغير والله يهديه ,,,ماتعرفين شو اللي كاتب لج المستقبل

[خدن امورد]

احسج ضايعة بين اهلج وريلج واهله ومب عارفة تتخذين قرار
قبل كل شي يلسي ويا نفسج يلسة صراحة وحطي ايجابيات وسلبيات ريلج من اللي قريته من الموضوع ماشفت شي زين منه او يمكن يكون ونحن مانعرف اذا ناوية ترجعين عند ريلج وعادي ياخذ عليج ويدخلون اهله في كل شي وغير انه مايقدر يوفرلج سكن وغير انه يسوي اشيا حرام ارجعي وتعيشين يوميا في ضيج وكابة وحزن وقلق ارجعي اما لو تبين الراحة النفسية وتربين ولدج او بنتج في بيئة طبيعة وتتحررين من هالجو المخنوق اللي عايشة فيه سير طالبي بحقوقج.

اما لو تشوفين انه ريلج يمكن يصطلب وتعطينه فرصة اخيرة ارجعي له ..

في الاخير القرار لج ومحد يدخل فيه

تحياتي

[احلى بعفويتي]

ماعرف يختي شو حل ..
لو تبينه ارجعي له وتحملي
لو جوفين انه ما يسوى سوي كلام اهلج ولا تزعلينهم روحي مع حد وطالبي بحقوقج وعقب ما تربين
ان شالله تحصلين وظيفه تسد فيها مطالبج وجي امورج طيبه

[ام طحنوون]

انا ويا ردود البنات .. كفوا ووفوا

الله يفرجها عليج يارب .. حسبج ونصيرج الله سبحانه وتعالى

[love rak]

انا اقول تتصلين لريلج وتطلعين وياه البحر كلميه بكل حب وحنان .. قوليله انت وأهلك على عيني وراسي بس كل حرمة تبى خصوصية وانا أبى اربي عيالي والي بطني وياك ..ما أبى لعيال يتشتتون .. انا احبك ومن هالكلام
إذا حسيتيه مصر على كلام أهله. . ويبغي يغرس وغيره ... روحي المحكمة وطالبي بحقوقج وغصبن عنه وعن أهله بيجلعون عينه ..
اطلبي بيت مؤقت وبسرعه وطالبي مصرف ويدفع لكل شي كهربا وماي وأكل ومصرف وكل شي ..
بيني للمحكمة انج ما تبغين طلاق وهو أهله مشينه وصبرج على الزنا والشرب ..
وعليج بالدعاء والصبر والاستغفار. .
خليج انتي وعيالج بيت لو إيجار اذا حكمت لج المحكمة وربي عيالج احسن تربية ولا اذمين ابوهم ولا أهل ابوهم ..
ودوري لج شغل

[[..دانــة..]]

أجوف الحل واضح
المحكمة عندج والقانون وياج
وهالنوعية من الرياييل يبالهم هالتأديب
ريلج يشرب ويزني وأهله فوق هذا بعد فرحانين فيه يبون يبلون بنت الناس معاه ويتزوج ثانية!؟

خلاص ليش شاله همه ويايبه الهم لنفسج
اشتري راحتج وسيري المحكمة وغصبن عنه بيعطيج نفقة لج ولعيالج وسكن خاص وخدامة بعد!
يعني ليش حاطه نفسج في جهنم وأنتي قادرة ع عيشة الجنة؟!

[الدلوعة ام حمودي]

مشكورة الغالية ع ردج .. الله يكون في عوني وعون جميع المسلمين يارب اللهم آمين

[الدلوعة ام حمودي]

مشكورة ع ردج اختي .. اول ما رديت بيت اهلي ابوي رمسني ع انه بيسير وبيرمس استشاري لأنه يبا يصلح من بينا لكن ماشي مجال للتفاهم ويرمسهم ع انهم يتيمعون ويتفاهمون بينهم او عند استشاري يصلح بينا ولكن ماشي فايدة اسلوبهم فالرد عليه كان سب وشتم وتهديدات وغسل ابوي ايده من الموضوع وقالي الحل بيدج.

حاولت اتفاهم ويا ريلي قالي اهلي مايبونج اتمين ع ذمتي لأنج تبين سكن وكل خواني وحريمهم فالبيت ولا قالو شي ومن هالكلام قلتله انزين برد بيت اهلك وبتسامح ع اللي صار ولكن ابا وظيفة ضاق وضعك المادي قالي مابا اعصي اهلي وابا رضاهم ودام يبوني اعرس اكيد يبون مصلحتيوانتي حرمة وكل الحريم يستحملون رياييلهم !!!

انا راضية بحكمة ربي والله ماشكيت الحال هني فالمنتدى الا لأن ضاقت فيني ولا اعرف الحل. مشكورة حبيبتي والله يصبرني

[خدن امورد]

مشكورة ع ردج اختي .. اول ما رديت بيت اهلي ابوي رمسني ع انه بيسير وبيرمس استشاري لأنه يبا يصلح من بينا لكن ماشي مجال للتفاهم ويرمسهم ع انهم يتيمعون ويتفاهمون بينهم او عند استشاري يصلح بينا ولكن ماشي فايدة اسلوبهم فالرد عليه كان سب وشتم وتهديدات وغسل ابوي ايده من الموضوع وقالي الحل بيدج.

حاولت اتفاهم ويا ريلي قالي اهلي مايبونج اتمين ع ذمتي لأنج تبين سكن وكل خواني وحريمهم فالبيت ولا قالو شي ومن هالكلام قلتله انزين برد بيت اهلك وبتسامح ع اللي صار ولكن ابا وظيفة ضاق وضعك المادي قالي مابا اعصي اهلي وابا رضاهم ودام يبوني اعرس اكيد يبون مصلحتيوانتي حرمة وكل الحريم يستحملون رياييلهم !!!

انا راضية بحكمة ربي والله ماشكيت الحال هني فالمنتدى الا لأن ضاقت فيني ولا اعرف الحل. مشكورة حبيبتي والله يصبرني

الحل بايدج اختي خلاص اتخذي القرار ليش مترددة كله اللي تبينه يتنفذ للاسف ما بيتنفذ وابوج خلاص غسل ايده منهم خل القرار الاخير لج اذا مرتاحة عالوضع ومتاقلمة ارجعي بس عقب هالرجعه ما بترومين ترمسين او تقولين ابا وابا لانج عارفة ردهم وريلج وضحلج انه ما بيعصي اهله

تحياتي

[دانه الكون]

يزني و يشرب و بعدج تبينه ؟

[الدلوعة ام حمودي]

مشكورة ع ردج اختي ..
تدرين يلست ويا نفسي كم مرة والله مالقيت عمري غير بدوامة خوف وتوتر اسري وزواج مادري شو اخرته..
بيني وبين نفسي اسأل ان صبرت ع ريال يزني ويشرب شو بستفيد واقول الصبر زين ويمكن يتغير والله قادر ع كل شي
وعقب اقول وليش اصبر باجر بييبلي امراض ..
والله كل هالافكار براسي من صوب واقول كرامتي ومابتنازل عن حقي ..
والفرصة اللي قلتيلي عنها فرسالتج هي اخر فرصة بتكون عقب ما اربي .. فكرت اعطيه فرصة يمكن يشوف ولده ويحن قلبه ويفكر يسوي شي عشان الولد قلت بخلي الفرصة الاخيرة هي فترة نفاسي ولكن ظروف اهلي ماروم اتم يالسة عندهم وريلي مايصرف علي درهم..

[الدلوعة ام حمودي]

مشكورة اختي احلى بعفويتي ع ردج ..

[خدن امورد]

مشكورة ع ردج اختي ..
تدرين يلست ويا نفسي كم مرة والله مالقيت عمري غير بدوامة خوف وتوتر اسري وزواج مادري شو اخرته..
بيني وبين نفسي اسأل ان صبرت ع ريال يزني ويشرب شو بستفيد واقول الصبر زين ويمكن يتغير والله قادر ع كل شي
وعقب اقول وليش اصبر باجر بييبلي امراض ..
والله كل هالافكار براسي من صوب واقول كرامتي ومابتنازل عن حقي ..
والفرصة اللي قلتيلي عنها فرسالتج هي اخر فرصة بتكون عقب ما اربي .. فكرت اعطيه فرصة يمكن يشوف ولده ويحن قلبه ويفكر يسوي شي عشان الولد قلت بخلي الفرصة الاخيرة هي فترة نفاسي ولكن ظروف اهلي ماروم اتم يالسة عندهم وريلي مايصرف علي درهم..

خلاص دامج بتعطينه فرصة اخيرة جربي يمكن سبحان الله يتغير بس لو كنك يابوزيد ماغزيت خلاص انهي الموضوع نهائيا

موفقة