إبرة الترجيع .... أفيدوني !

[شغف أنثى]

السلام عليكم ورحمة الله وبركاته
بغيت منكم استفسار خواتي
انا حامل بنص الشهر الخامس ، والبارحة جاني ترجيع شديد حتى الماي كنت استفرغه ع طول وانتو بكرامة ، رحت الحكومي عطتني الدكتورة ابرة الترجيع ، بس خايفه ألحين انها تضر قالتلي ما تضر وتنصرف للحوامل بالشهر الخامس ، علما بأنها مو دكتورة نساء ، هي طبيب عام ، وكنت محتاجة علاج لان عيالي التوأم كانو مريضين ولازم اهتم فيهم ، وانا الترجيع هلكني .
نص ساعة والاعراض راحت عني والحمد لله الترجيع راح . بس خايفة ان الابرة فيها مواد قوية اوقفت الترجيع وممكن تضر الجنين . 
والله من امس بحال سئ جدا
طمنوني اذا في وحدة عندها خلفية عن هذي الابرة وأمانها بفترة الحمل .
بغيت اعرف مكوناتها بس كانت بنتي تعبانه وعالجتها وطلعت بسرعة ، وألحين قاعدة احاتي ....
دعواتكم لي بالجنين السليم المعافى

المزيد من آخر المواضيع من نفس القسم:

• أسباب آلام الركبة بعد الولادة وكيفية علاجه
• ماهو الطلق البارد والطلق الحقيقي والفرق...
• اهم أسباب التهاب الجيوب الأنفية أثناء الحمل...
• افضل طرق الاستعداد لفترة النفاس
• اهم فوائد الحليب للمرأة الحامل
• افضل عشرة طرق طبيبعه لتسريع الولاده خاص...
• اهم نصائح للحامل البكر في الشهور الأولى
• اهم أسباب الجوع المستمر عند الحامل وطرق...
• افضل مسكنات طبيعية تخلصك من الألم أثناء الحمل
• طرق للتخفيف من آلام الظهر بعد الحمل حصري

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[دابشه]

الله يسهل عليج يارب
ماعندي فكرة اتمنى الخوات يفيدونج

[ميميه88]

ماعليج شر ان شاء الله

[ام السنافي]

يا اختى لا تستهمين ولا شي
عندى بنات في دوام ياخذ الابره اكثر من مره وهن في الشهور الاولي والحمدالله رب العالمين مافي بيبياتهن الا العافيه
اختى مافي دكتور بيوصف لج يضرج خاصه وانتي حامل لا دكتور عام ولا نسائي،،،فتوكل ع الله وتعوذي من وساوس ابليس
الله يثبت حملج وتقر عينج بشوفت البيبي بخير ويسهل عليج

[شغف أنثى]

انا كنت اخذ بحملي الاول ابر الترجيع
بس كانت مخصصة للحامل وتصرفها لي دكتورة النسا . الدكتورة اللي صرفتها لي البارحه طبيب عام يمكن ما عندها خلفيه ان مكوناتها ممكن تضرني .
والله العظيم لو ما كان عيالي مريضين ما كنت بتعالج
فقدت ثقتي بكل الاطباء من اللي شفته منهم .

[شغف أنثى]

عندنا فيروس في البيت وكل عيالي مصابين به
اخاف اعطتني ابرة مضاد حيوي
لان ابرة الترجيع اعرفها مفعولها مو سريع
دعواتكم

[شغف أنثى]

البيبي حركته مو كثيرة . بس من بعد الابرة لليوم حركته كثيرة ما وقف الحركه
وانا جدا خايفه ، كان عندي موعد للتصوير الملون في مستشفي الفجيرة ولما رحت عرفت انه يسويه ريال مب حرمة فرفضت اسويه عندهم . ورحت خاص نفس الوضع عندهم ريال
وما عارفه اتصرف الحين
قاعده بروحي بين اربع جدران يضرب الجنين ببطني ضرب
واولادي اثنين تعبانين تاركتهم مالي خلق ايلس معاهم
لاني افكر في البيبي والحركه اللي سويتها
شلون وافقت اخذ ابرة يعطونها لمريض عادي وانا حامل ؟
ما ادري شو صابني البارحه
دعواتكم لي بالجنين السليم المعافي

[لحنْ #]

اختي هذا كله شيطان يوسوس لج ، تعوذي منه
وادعي لربج وبس

[ام طحنوون]

انا كنت اخذ بحملي الاول ابر الترجيع
بس كانت مخصصة للحامل وتصرفها لي دكتورة النسا . الدكتورة اللي صرفتها لي البارحه طبيب عام يمكن ما عندها خلفيه ان مكوناتها ممكن تضرني .
والله العظيم لو ما كان عيالي مريضين ما كنت بتعالج
فقدت ثقتي بكل الاطباء من اللي شفته منهم .

ليش تحاتين هالكثر .. تراها عرفت انج حامل وعطتج الابرة وهي عارفة
عيل حوامل ياخذون مضادات وادوية وماعليهم شر ..
الحامل مش ممنوعه من الادوية نهاائيا .. لكن تنصرف لها ادوية مخصوصة وخفيفة للجسم ماتضر

[Yazi.90]

ماعليج شر ان شاءالله ،،

ترا حتى الطبيب العام عنده خلفيه عن اشيا وايد
و انتي قلتيها بنفسج انها تعرف بإنج حامل ،،