ولدي و الحمام

**بنت ظبيه** · 2015-10-25, 11:48

السلام عليكم

شخباركم ؟؟

بخبركم مشكلتي مع ولدي والحمام

الله يسلمكم صار لي تقريبا سنتين أعلم ولدي على الحمام و الحين هو عمره ( 3 سنوات و 4 شهور )

وبعده ما تعلم على الحمام
متخيلين الوضع كبير وللحين يسويها ف ملابسه

الكاكا يسويها ف الحمام ( يقول أبي أروح الحمام وقتها )
أما البول الله يعزكم مب راضي يروح الحمام فيها لازم يسوي ف ملابسه ولو شوي و عقب يكمل ف الحمام
أذكره مرات بالحمام و اقوله شاطر و أقوله بشتريلك لعبه و فعلا أشتريله لعبه , و يرجع يسويها ف ملابسه

مابي أذكره دوم أبي أشوفه تعلم على الحمام و لا

السنه اليايه بيدش روضه بعد

وقت النوم الحمدلله الحمدلله و ما شاء الله عليه أموره طيبه ( أوديه قبل النوم و أول ما يقوم على طول أوديه الحمام أو يروح بروحه مرات ) أستانس

مرات من العصبيه أقعد أضربه على الخفيف بس يعرف إني معصبه و يتم يصيح ,,

بس ليش ف النهار لا ؟؟؟؟؟؟

تعبت والله بعد شهر ونص بربي و بيكون تعب علي اهتم بموضوع الحمام و ابدله كل شوي ...

ساعدوني شو أسوي ؟؟ حاولت معاه بكل الطرق

بنت أختي ما شاء الله عليها بنفس عمره تقريبا و تعلمت على الحمام , أقعد أقول شمعنى ولدي لا

المزيد من آخر المواضيع من نفس القسم:

**مالتيزرس** · 2015-10-25, 12:08

ترا فيه فرق اختي بين العيال .وهو حسب القدرات ولو تدشين ملفي بتجوفين محطية نفس موضوعج ..بس انا العكس بنهار تدش الحمام لكن فليل تعاند وماترضى تدش وتبول فملابسها عادي ولا تحس ع عمرها ..انتي بين فترة وفترة شليه بروحج الحمام لا تتريينه هو يقولج اذا تنشين سوي تذكير كل مرة ولا تعطينه وايد سوائل

**بنت ظبيه** · 2015-10-26, 10:29

بس هو كبير المفروض يعرف الحين ,, مابي أذكره ,, ابي بروحه يقولي أبي أروح الحمام

**[..دانــة..]** · 2015-10-26, 13:51

لا تضغطين ع الطفل وتعقدينه
تراه بيتعلم مع الوقت، وخلي رسالتج وطاقتج وحده تجاه الطفل، جي تخربطينه مره تشجعين ومره تهدمين لا خليج ثابته على نمط واحد
والخطأ وارد تراه عادي، حاله حال أي طفل قدرات حبيبتي
بس أنتي الكبيرة والعاقلة لا تغلطين فالمقارنات بين الأطفال ومن هالسن، ولدج غير عن البقية والبقية غير عنه
بس هالشي ما يعني أنهم أحسن عنه لا بالعكس هذا بس معناه أن كل طفل مختلف

جوفي في محاسن يعني ينام من غير ما يوصخ نفسه، الكاكا فالحمام، حلو استمري بالتشجيع والمتابعة ومع الوقت بيتمكن
الضرب والغضب والمقارنة والتعصيب ما بينفع الياهل
ولازم تذكرينه ، عادي ما فيها شي هذا دورج كأم ، اذا انتي أمه ما ذكرتيه منوه بيذكره يعني؟
بالعكس خليه يعتمد عليج هالشي يعطيه أمان وثقة في أمه أنها بتوقف معاه وبعدين هو بيكبر وبيعتمد ع نفسه عشانج

**بنت ظبيه** · 2015-10-28, 12:00

المشاركة الأصلية كتبت بواسطة [..دانــة..]

لا تضغطين ع الطفل وتعقدينه
تراه بيتعلم مع الوقت، وخلي رسالتج وطاقتج وحده تجاه الطفل، جي تخربطينه مره تشجعين ومره تهدمين لا خليج ثابته على نمط واحد
والخطأ وارد تراه عادي، حاله حال أي طفل قدرات حبيبتي
بس أنتي الكبيرة والعاقلة لا تغلطين فالمقارنات بين الأطفال ومن هالسن، ولدج غير عن البقية والبقية غير عنه
بس هالشي ما يعني أنهم أحسن عنه لا بالعكس هذا بس معناه أن كل طفل مختلف

جوفي في محاسن يعني ينام من غير ما يوصخ نفسه، الكاكا فالحمام، حلو استمري بالتشجيع والمتابعة ومع الوقت بيتمكن
الضرب والغضب والمقارنة والتعصيب ما بينفع الياهل
ولازم تذكرينه ، عادي ما فيها شي هذا دورج كأم ، اذا انتي أمه ما ذكرتيه منوه بيذكره يعني؟
بالعكس خليه يعتمد عليج هالشي يعطيه أمان وثقة في أمه أنها بتوقف معاه وبعدين هو بيكبر وبيعتمد ع نفسه عشانج

حبيبتي أنا أذكره واقوله روح الحمام يقولي مافيني بول ( الله يعزج ) أقوله روح جرب بس ف يروح يجرب ويبول
و مرات اقوله روح الحمام يعاند يقول مافيني بول و اتم ازن عليه روح الحمام و هو يتم معاند و ما يروح ,, بعد ربع ساعه اكتشف انه سواها ف ملابسه و أعصب على اساس من البدايه روح ليش تعاند

شفتي معاناتي مع اني أحاول اشجعه و اقوله انت كبير و اذا تبا تروح الروضه لازم ما تسويها على ملابسك لانهم ما يبون ولد يسوي على ملابسه يقولي ان شاء الله

و اخر شي و لا كأني قلت له شي

لو بقول صار لي شهر او شهرين اعلمه بتحمل ,, بس صارلي فوق السنه أعلمه وماشي فايده

لازم كل ما أروح مكان أشل معاي لبس زياده لانه بيوصخ ملابسه وما بيقول ابي الحمام

تعبت أبي طريقة يديده و تنفع و حل جذري

**Ward-uae** · 2015-10-29, 15:52

بكري لعوزتني يمكن لانه خوانها كانوا صغار وتحب تلعب ويطوفها شي
فعادي كنت امسكها واوديها الحمام بالتدريج صارت تقولي
اما ولدي الأكبر هالشهر كمل ثلاث سنين وبالعكس يسير واذا راح الالعاب او يلعب مع اليهال يمسك عمره وتم يدور واقوله بتسير يقولي لا اضحك اقوله قوم بوديك يقعد يدور واشله
واوديه الحمام بسرعه بسرعه يبول ويقولي يلا بسير العب
هم جيه الله يحفظهم تلهيهم الالعاب واحيانا ما يبون يفوتهم شي بالتدريج روحه بيسير
وولدي الثاني بديت اوديه وما شاء الله عليه احسه تعلم بسرعه فبروحه يسير الحمام ويناديني يمكن خلاص يشوف اخته وأخوه فتعلم بسرعه الله يحفظه

**مونتاج** · 2015-10-29, 18:41

كل طفل غير عن الثاني
ان شاء الله بياخذ وقته و بيتعلم

**المعآني** · 2015-10-30, 00:14

تحمليه مع الوقت بيتعلم والله يقويج
ممكن تستخدمين طريقة حلوة مثلا إذا انتوا طالعين الالعاب قولي له خبرني متى تبا الحمام عشان اذا سويته بعمرك بنرجع البيت و طبقي هالشي مرة عن مرة ب يجاهد نفسه حتى يتعلم تراه طفل والموضوع صعب يستوعبه بالكامل هو مب عناد ولا تقارنين يدامه تقوليله فلان وعلان بيأثر عليه نفسيا يبرمج عقله اللاواعي انه مايعرف فمايتعلم للأسف وان سواها المرة الياية قولي له زعلتني حبيبي شوي ازعلي عقب احضنيه وقولي له ماعليه ولدي شاطر المرة الياية مابيسويها بيحبج وبيسعى يكون على قد توقعاتج ..
في سالفة الحمام كونوا متسامحين لأبعد حد لأن الموضوع بسيط بالنسبة لكم لكن الطفل غير مدرك انه هاللحظة لازم يسير الحمام ولا بيتوهق حليله يبا يلعب وينشغل بمحيطه ومرات يخافون يفوتهم شيء هههههه

موفقة الغلا

**بنت ظبيه** · 2015-11-09, 10:50

مشكورات خواتي على الرد

بترياه و بصبر عليه ,, و ان شاء الله يتعلم بسرعه قبل لا يدخل الروضه و يفرحني
وبطبق الي قلتوه لي

أحس فرحتي يوم بيتعلم ولدي على الحمام بتكون أكبر من فرحتي بعرسه

الموضوع: ولدي و الحمام

أدوات الموضوع

عرض