يوم حد يسالك كم راتبك؟!

[اشراقة أمل]

السلام عليكم ورحمة الله ...

اريد اسالكم شو رايكم بالشخص يدخل او يسال بامور مثل الراتب وطبيعة عملك ..

مثل تكوني في جمعه وتسالك احدى الصديقات عن عملك .. وكم راتبك .. وشو تشتغلين .. وغيره!!

طبعا كل واحد له الخيار اذا يحب يجاوب او لا ... بس هل تحسين انه تدخل في الشؤون الخاصه! .

او حسب الشخص السائل .... او هو رغبه في تتبع ارزاق الناس! او التفاضل

ولو صار وجاوبتيها بخصوص الراتب بس بصوره مب حقيقيه مثلا اعطيتي مبلغ اقل من راتبك الحقيقي

عشان بس خايفه عن الحسد لانك التمستيه .. من اسلوب السؤال .... او بس حابه تخبي الكمية الحقيقيه ... هل يعتبر غلط!

شو رايكم ؟

المزيد من آخر المواضيع من نفس القسم:

• لأنّه جعل الفقير ييعش مع المؤمنين لا مع...
• الإكتئاب طاعون العصر الحديث بحث مرجعي...
• كيف تكون إيجابيا ؟
• كيف تتعامل مع ذاتك بطريقة صحيحة؟
• كيف تقوي ذاتك؟
• كيفية تطوير الذات بطرق بسيطة
• افضل طرق لتطوير الذات وزيادة الثقة بالنفس
• اهم المهارات التي تحتاجها لتطوير الذات
• طرق تطوير الذات في مجال العمل
• اقتباسات ~ مُهرة القَصر

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[لحنْ #]

هو حسب الشخص ، وحسب مده المعرفه
يعني ممكن اتقبل هالسوال من ربيعتي اللي اعرفها من سنه ، بس علاقتي فيها قويه نوعا ما
لكن مابتقبلها من ربيعتي الثانيه اللي اعرفها من نفس المده ، بس علاقتي فيها سطحيه نوعا ما
ف حسب الشخص + حسب نوع علاقتي بيه
بس انا اشوف سؤال مثل وين تشتغلين وشو تشتغلين عادي .. لكن جم راتبج ها ماحبه ^^ " لو من حد سطحي "
احسه تدخل بالشؤون مايعيبني ، ممكن وقتها تقولين والله مب كبير وتسكتين ..
او تقولين الحمدلله ممشي اموري ف بيفهم غيرج ان ماتبين تقولين ^^
وماشوفه شي غلط انج تخبي لو تحسين ان الشخص اللي قدامج عينه ع هالشي او ماتبينه يعرف

[اشراقة أمل]

شكرا اختي نبض ... صح سؤال الراتب حساس .. بس في ناس تجاوبه عادي ... وفي ناس لا ... وفي ناس نص نص

بس في ناس تظن ان كرامتها مجروحه ... في حال مارديتي ... !! يمكن يعرفونك من زماااان وجي

[ليندااااا]

لو احد سألني هالسؤال
ابتسم واقول مستورة
يعني اخليه يحس بالاحراج شوية😊
لاني اعتبرها من الامور الشخصية

[قلبي بزي]

عليكم السلام ورحمة الله وبركاته
هههه تصدقين هالأسئلة دائما تنطرح وعاد أنا منهن
والي تسألني أجاوب على طول وعادي عندي طبعا

[imane2205]

حطي في راسك مبلغ معين لا كبير ولا صغير يعني كوني مستعدة عشان ماترتبكي قدام الشخص اللي سالك

[عساك تبقى لي]

انا بتكلم عن نفسي.. السؤال عن الراتب مااحب أسأله حتى لأقرب الناس لي ءحسه سؤال شخصي. .وأعتقد الشخص المرتاح لي بيخبرني عن نفسه بدون مااحرجه بالأسئله. وجهة نظري ..
ذكرتيني هالسؤال أحب أسئله بس لزوجي. .يمكن في زيادات. .

وذكرتيني بوحده أعرفها متزوجه من 5 سنين لين الحين ماتعرف راتب زوجها وحتى الرسايل اللي كانت توصله من البنك يخلي إخوانه يستلموها عنه. .

سبحان الله ..بس انا ماأحب أسأل أي أحد أي سؤال خاص أحب الرمسه تطلع من الشخص تلقائي بعد مايرتاح لي..

موضوع حلو أختي حياه بائسه. .

[Yazi.90]

مثل ماقالت اختي نبض الناس الكلوز معايه عادي

بس مثلا وحده غيرهم تسألني مابقولها جم الصراحه !

[مراسيل الوفاآ]

مره سمعت ل شيخ يقول انه عادي ما تقولين للي يسألج عن راتبج الحقيقي
يعني تقولين بحدود هالمبلغ وتسكتين واذا اصروا على انهم يعرفون ف عادي
عن نفسي بقول انه هالسؤال خاص وماحب اجاوب عليه

[سعاده2]

وايد اواجه هالسوال وردي للي اعرفهم سطحي "حمدلله مكفيني" والي مصر يعرف كم اقوله بحدود كذا بس مب لازم بالضبط كم اقول
بس باغلب الاحيان الف وادور واغير الموضوع بسرعه بدون ماعطي فايدة للشخص خاصه لو حد جد معرفتي فيه قليله او سطحيه

[Deeno]

و عليكم السلام و رحمة الله
إذا كان هالشخص كلوز وايد فا عادي لأنها ربيعتي و عشرة عمر و إذا كانت بعد أنا أعرفها أنها إنسانة اتحبلي و تتمنالي الخير و التوفيق بحياتي مب من النوع الحاقد و الحاسد ،أما إذا كانت معرفتي فيها سطحية يعني اتييني وحدة ما تسأل عني خير شر بس تبا تعرف عني كم راتبي و غيره من الأمور أحسه نوع من التطفل و الفضول و حقد و حسد و غيرة و تبدا اتقارن بيني و بينها عالرغم من أنها عندها مواطن قوة أخرى و الله عوضها بأشياء ثانية و مواهب و إبداعات أخرى و مصادر دخل مختلفة و مكتفية ماديا بس طبيعة بشرية فيها و أحسه تدخل فخصوصياتي

يعني حاسدة الكافر على موتة الجمعة "يحسدون الناس على ما آتاهم الله من فضله"

أما بخصوص طبيعة العمل فا أحسه بعد شي عادي لأنها يمكن حابة تكتسب خبرة و خلفية و معلومات منج بس مب كل شي ينقال في بعض الأشياء اتكون حساسة أو أسرار دولة أو خصوصيات عميل مب لازم نذكر الأسماء و الشخوص بحذافيرها

مثل تكوني في جمعه وتسالك احدى الصديقات عن عملك .. وكم راتبك .. وشو تشتغلين .. وغيره!!

ما أحب يوم يكون فجمعة أحلى على انفراد منعا للإحراج لي و الها لأنه مرات في الجمعة في ناس ما أباهم يعرفون لأنه علاقتي فيهم مب قوية و ما أدانيهم
و أحيانا لما أكون فجمعة أخبصلها أي راتب تقريبي من عندي و بعدين أصارحها بالصدق لو حابة

عا كل واحد له الخيار اذا يحب يجاوب او لا ... بس هل تحسين انه تدخل في الشؤون الخاصه! .

او حسب الشخص السائل .... او هو رغبه في تتبع ارزاق الناس! او التفاضل

نعم و لا
و على حسب الشخص السائل
فيه بعض الناس اتحب بس تتجسس على الناس و تتمنى زوال النعم عني

عشان بس خايفه عن الحسد لانك التمستيه .. من اسلوب السؤال .... او بس حابه تخبي الكمية الحقيقيه ... هل يعتبر غلط!


شو رايكم ؟

مب غلط مرات ما أتفيق أقرا أذكار الصباح و المساء كل يوم فا أحسن شي من البداية ما أقولها و إذا خبرتها أنا شدراني أنه هالبنت عينها حارة و لا لأ ؟!
فا أحسن شي من البداية اللي ما ارتاحلها ما أقولها ما سمعت بالمثل اللي ايقول "لا تبح بسرك لعزيز فالكل عزيز" أحيانا بعض الأشياء الخاصة أحب أحتفظ فيها لنفسي فقط و ما أخبر فيها حد أبدا أو للناس المقربين جدا مني مثل صديقاتي الكلوز و أخشها مثلا عن أمي أو أختي أو عمتي لأنه الوحدة ما تعرف من وين اتييها العين

و مشكورة عالطرح القيم و المتميز،و يعطيج الصحة و العافية ، يعجبني ذوقج في اختيار المواضيع و الأفكار فيه اشوية من تفكيري انتي إنسانة مبدعة

و عذراً عالإطالة لازم أفرغ اللي فخاطري كله و أجاوب بصراحة

[almal3ka1]

عاد انا اردهالناس كم حسابكم بالبنك فينحرجون و لا حد يسترجي يسال مره 2

[امل دبي]

انا تعرضت لهالسؤال وجاوبت ماعرفت اتهرب ومنقهره من عمري

[^الدماني^]

يوم وحدة بتسألج : كم راتبج ؟

على طول ردي عليها وقولي : وانتي كم راتبج ؟

بتم دقايق تفكّر تحت وطأة القذيفة المرتدة

اذا ما ردّت فهذا معناته انها انحرجت ... فخير وبركة
واذا ردّت بأي مبلغ (سواء صادقة والا لأ ) ... قوليلها : وأنا بعد في نفس الحدود

ويا دار ما دخلك شر

[Ward-uae]

يوم وحدة بتسألج : كم راتبج ؟

على طول ردي عليها وقولي : وانتي كم راتبج ؟

بتم دقايق تفكّر تحت وطأة القذيفة المرتدة

اذا ما ردّت فهذا معناته انها انحرجت ... فخير وبركة
واذا ردّت بأي مبلغ (سواء صادقة والا لأ ) ... قوليلها : وأنا بعد في نفس الحدود

ويا دار ما دخلك شر

ههههه في الجبهة
مره وحده سألتي كم ريلج يعطيج ؟
ضحكت وقمت اشوف اليهال