فترة الاربعين

**مغليك** · 2015-09-01, 12:04

مرحبا ..
خواتي بغيت اتخبركن ..اللي تقعد فبيت ريلها فالاربعين هل تسوي لها غرفة بروحها ترقد فيها ويا البيبي لين شوي مايكبر البيبي ويخف صياح ..ولا ترقد بنفس الغرفة ويا ريلها ...

نقطة ثانية البعض قاللي لا تخلينه بروحه يرقد وعقب يتعود اني بعيدة عنه وتصير فجوة ..

أنا احاتي أرقد ويا ريلي والبيبي يسوي له حشرة وهو وراه دوام ويستحي يقوللي انه يتضيج ..لانه يقوم من الساعة 5:30.طبعا انتو عارفين حشرة اليهال كيف ..

انتو كيف تسون بها الفترة ..

أنا ابا اسمع آراء المجربات ..اللي تقعد الاربعين ويا ريلها مش اللي فبيت اهلها ..عفوا

المزيد من آخر المواضيع من نفس القسم:

**uae girl22** · 2015-09-01, 12:22

عادي ارقد فحجرتي ليش اطلع منها؟؟؟

وجان على حشرة البيبي اذا نش وتم يصيح وايد شليه واطلعي وياه شوي من الحجره لين يهدا وارجعي... بس تحملي تطلعين من غرفة نومج

**لحنْ #** · 2015-09-01, 12:44

رايي من راي اختي ^
يفضل تقعدين بغرفتج وياه ، وعالبيبي يوم يصيح شليه لبرا

**ام قلبين انا** · 2015-09-01, 12:47

ارقدي ف حجرتج وان جان ع حشره البيبي فهميه ان وداعا لايام الدلع هذي ضريبه العيال
ولوازعجه شو المشكله مع الوقت اصلا الزوج يثقل رقاده يكون تعود ع حشرت عياله

**احلى بعفويتي** · 2015-09-01, 12:48

واي وايد خايفه ع رقاده .. الرياييل رقادهم ثجيل سنطور ما بيقومهم .. المهم تحملي انج تسوين حجره ثانيه او تعطينه مجال يرقد في حجره ثانيه .. بياخذها علثه و ع الدقه بيشل بعمره وبيطلع

انا ثاني نونو تميت 15 يوم عند ماما عقب رديت ..
هو لمحلي اني اتم زياده لين ما اخلص الاربعيتن .. طنشته ..
النونو كنت انومه عدالي وكل ما سوا وااااق حطيته ورضعته .. والتبديل البمبرزس عادي حاطه مثل قطن و غرشه ماي و طشت بلاستيك صغيييير ع صوب بس اغسله على سماط مال النونو خمس دقايق و ارقد ..

**مغليك** · 2015-09-01, 13:55

يعطيكن العافية خواتي ..صدقكن انتو شكلي بتم وبسوي اللي قلتن لي عليه .

**المعآني** · 2015-09-01, 22:42

عادي في البداية بيتضايج عقب بيتعود
ومن يصيح اطلعي ولما يرقد رديه سريره وانتي ارقدي مكانج لاتطلعين

**حرم الحميري** · 2015-09-02, 07:33

محاتاتج حلوه بس دام الريال ما عترض ليش متحسسه وتحاتين انا ريلي عسكري وينش خمس ونص وع فكره الرياييل ما يحبون عيالهم الرضع بعيد عنهم يمكن يحب اليهال اكثر عن حرمته وجان ع صياحه تالي الليل لي صاح خشي مرضعته شو من صياح بيصيحه بو كمن يوم شوي وبيصخ ولريال ولده هذا وملزوم يتحمله ولا بعد جان تعايزتي خليه ينش يشله ويبدله لانه اذا كنتي تسويله رضعه يبالج حد يجابله لين تزهب مرضعته عادي امور عاديه لي كبر شوي سويله غرفه حذاج او حطي الخدامه وياه لانه بيبدا يفطن ومب زين يتم معاكم حاتي بعيدن مب في بدايته فماله داعي تسوين غرفه وتعزلين عمرج ولا تفتحين باب لعمرج وتخلين ريلج يحس انج تفضلين الياهل عليه ترا الريال فالنهايه ياهل عود يغار ويحب الاهتمام

**ليندااااا** · 2015-09-02, 08:20

عادي بتم بغرفتي
وبس يصيح الصغير اشيله برا الغرفة
ولو الريال قام من نومته عادي علشان يقدر تعبي وسهري 😊

**غلآ نفسي** · 2015-09-02, 08:24

تمي فالحجره

كلنا تمينا فالحجره ورياييلنا كانو ويانا

بالتوفيق

ومبرك ما ياج

**Ward-uae** · 2015-09-02, 08:58

انتي في فترة الاربعين بتحتايين ريلج تتناوبون على الصغيرون مثلا انتي ترضعيه وهو يتمشى فيه هذا ولدكم انتو الاثنين ليش تحرميه من ابوته خليه يشوف ويحس فيج مب بس ولادة حتى مجابل العيال والسهر عليه صح انه ضريبة الامومه لكن شعور سبحان الله غير الرحمه تكبر وتزيد
الياهل بهذا العمر يرضع ويرقد واذا ما رقد يعني يباله تغيرين له مب ابو عمر سنة واكثر تشوفيه يوقف على راسج قومي وقومي
اذا تعبان وقالج ابي ارتاح طلعي سيري تحت اتسلي شوفي التلفزيون او اكلي خفايف ورقدي الصغيرون وردي الحجره الحياة حلوه حبيبتي
هي فترة حلوة بتذكرينها حتى ابوه بيتذكر وكل ما الاب حب عياله كل ما تعلق بهم

**الوردة الجورية** · 2015-09-03, 02:07

انا ولادتي الاولى ريلي ما خلاني اروح بيت اهلي
وهو كان يساعدني الصراحة خاصة اول اسبوع وكان وقت شتاء والياهل يصارخ من البرد والمغص وانا ما كنت اعرف السبب، فهو كان يشله بعد يحاول يسكته

معاناه

بس الثاني خذت خبرة، بس قعدت بيت اهلي لانه سافر بعد ماولدت ، حتى لو قعدت مع ريلي اتصور بيكون عادي لاني عرفت كيف اتعامل مع البيبي فماتعبني مثل الاول

ماكنت اخلي الغرفة تسير باردة و ادفيه عدل بس بدون مايعرق ناحية الرقبة، شوفي اذا في عرق يعني حران البيبي، وكنت كل عصر اعطيه انفاكول قبل الرضعة عن المغص وقبل النوم ادلكه بزيت الزيتون فيرتاح ماشاءالله في النوم ولا صريخ ولا شي...

بس وقت رضعاته الليلية واء واء بالخفيف و اعطيه صدري وانا نايمة على جنب.. واء واء بعد كمن ساعة الصدر الثاني و أنام

بعد شي ثاني مهم جداً.. من الفجر شغلي الليتات و شغلي القرآن او التلفزيون او الاذاعة، حتى او ناموا الضحى او الظهر خلي الليتات والاصوات شغالة، المغرب خلي الاضواء خااااافتة و هدوووووء، هذي الحركة سويتها في الاول و الثاني و ماشاء الله من اطلع من الاربعين يتنظم وقت نومهم وارتاح بالليل اكثر، حتى بعد مايكبرون بيتعودون يرقدون من وقت، فتاخذين راحتج اكثر مع ريلج بعد ماينامون

**غرووب 22** · 2015-09-04, 10:38

وَذَا النُّونِ إِذْ ذَهَبَ مُغَاضِباً فَظَنَّ أَنْ لَنْ نَقْدِرَ عَلَيْهِ فَنَادَى فِي الظُّلُمَاتِ أَنْ لَا إِلَهَ إِلَّا أَنْتَ سُبْحَانَكَ إِنِّي كُنْتُ مِنَ الظَّالِمِينَ
فَاسْتَجَبْنَا لَهُ وَنَجَّيْنَاهُ مِنَ الْغَمِّ وَكَذَلِكَ نُنْجِي الْمُؤْمِنِينَ

**s_h_w_a_5_y** · 2015-09-04, 17:26

هههههههههههههههه ذكرتيني ولدي عمره 4 شهور ألحين .. أنا قعدت عند أهلي 20 يوم ورديت عند ريلي فالبدايه كان يقولي أطلعي بالنونوه برع وكان يتضايق من صيااحه وأحيانا يعتذر مني يقولي لانه عندي دوام وكذا قعدت شهر في صاله أنا أنا وولدي ليل ونهار وريلي مش معبرناا يقول انا مرتاح من صيااح ، بس لأنه يضايق من صياح وأول بيبي فهوه مش متعود وصياح يضايقه ومايخليه يقدر ينام أبدا ، بس بعد أربعين رجال يحتاج زوجته وأنا ككنت ازعل صراحه وانام من وقت في صاله أنا وولدي ونظامنا بدا يتعدل كل يوم صار ريلي ما يجوفني وصار بروحه معزول بالغرفه فمل وقال اذا مارجعتوا بالغرفه بزعل ونحن مانقدر على زعله شلينا أغراضنا ورجعنا وشوي شوي بدا يتعود ع بيبي مع انه ينش فالليل يسمع صياح يقولي شليه برى لين يسكت ورجعوا ههههههه أخر شي رجال بيدور رضانا ومابيصبر عنا ولازم يتعود على جدولنا ويحس في زوجته أهم شي وحاليا صار أهوه يمسك بيبي يسده حتى لو بنص ليل ونتساعد الحمدالله وبينا بيبي ثاني ان شاء الله وبيتعلق فيه أكثر واكثر ,,,

**دواء مستخدم** · 2015-09-07, 02:48

..

انا اول بيبي تميت ف بيتي .. كان ما يتحمل صياح البنت و عقب سرت بيت اهلي ..

و الثاني تميت عند ريلي .. ولده مثل ماهو ولدي مجبور يتحمله .. بس كنت اخليه هو يرقد ف الصاله لاني احتاج الحمام باللليل .. و عقب اشوي اشوي رد الغرفه ..

و بالعكس البيبي يقوي علاقة الريال بالحرمه ..

بس شي كنت انحرج منه .. يدخل و يجوفني حاطة حصاا و لا داخله الحمام و طالعه منه بييدي شي 😂😂

الموضوع: فترة الاربعين

أدوات الموضوع

عرض