ساعدوني خلاص تعبت نفسيا

[كركر]

السلام عليكم
شو اخباركم بنات عساكم طيبين اشتقت الكن صراحة مع أني قلت ما بكتب اي موضوع بس مالي حد غيركم الله يخليكم اللي عندها شي زين او نصيحة تقولها اما انتقادات ما يحتاي
انا وضعي الصحي للأسوأ الحمد الله وعندي يهال صغار اثنين ولا ماكنت احتجت شغالات
مثل ما تعرفن أني يبت 5 شغالات اندونيسيات الاولا مسترجعه تمت 10ايام قالت ودّوني المكتب ما ابغي بدون سبب
الثانية مسترجعه تمت بالعافية 10 شهور بعد ما بهدلتني من اسلوبها الاستفزازي والبرود اللي عندها بس انا كنت أشد عليها الصراحة والسبب انها خلعت أيد بنتي مرتين وكله تصيحها مع انها ما أتم عندها الا لحظات وكنت حامل وتعبانه وكنت ما ابغيها بس ريلي مخسر عليها فكان يقولي صبري فسفرتها اخر شي وكانت تقولي بتشوفي كيف بتكون الخدامة الجديد
وراحت بالخميس ويتني بالسبت غيرهاجديدة كانت أوكيه وتبغي تتعلم بس ما تسمع لما اناديها فرجعتها وندمت أني ما خليتها
يبت غيرها كانت دلوعة ولا تخلص شغلها وكله تقولي تعبانه فشردت ما كملت أسبوعين مع انه ما منكثر الشغل طبخ بروحي واليهال علي بس اذا بتمسكهم او اطالعهم لما انشغل
يتني الرابعة وعلا فكرة كل الثلاث هذيلا الجداد من مكتب واحد وكانت أوكيه وتكلفت عليها وايد كانت كله تقولي مريضة وكنت اوديها الطبيب بس كانت تختلق المشاكل وكل شوي وديني المكتب تعبتني ووديتها المكتب بسبب مشكله تقصيرها فالشغل واتحججت بعمتي
تميت الف المكاتب وتعبت خلاص وريلي بعد تعب فقلنا منييب سيلانية مسيحة وارخص انتظرتها علمتها وكانت أوكيه مع انه اليهال ما حبوها ما تعطيهم سالفة ابدا وشكلها سمرة وايد اختلقت مشكله بدون سبب وقالت وديني المكتب مع أني تحملتها وايد وكنت أمسك أعصابي لأَنِّي محتاجة لها بس قالت وديني المكتب وطولت السانها وقامت تعق خيط وخيط ووديتها بعد شهر
الأسبوع الماضي حصلت اندونيسية مسترجعه قالت بشتغل وشرحت الها وضعي يبتها بالليل الصبح قبل لا تبدأ اي شغل قالت وديني المكتب انا هني استغربت ورجعتها وكفلت اندونيسية غيرها
بس انا عرفت سبب طفرت الشغالات ويدورن حجج عشان أرجعهم
لما سالت راعية المكتب قالتلي السيلانية اونه ما تخليها تتكلم مع الخدامات وتقعد معاهنً وانا أصلا عايشة فابوظبي ما رجعت غير مرتين او ثلاث معاها وانا لا اروح ولا اطلع عند حد
المشكله انه السيلانية قالتلي انتي يبتي ثلاث خدامات ولا وحدة قعدت اونه انتي ما يقعدن عندج الخدامات منوه اللي قالها هالكلام
اكتشفت انه خدامات عمتي هن ورا تحريض خداماتي أنهن ما يقعدن عندي ويقولون الهن روحن المكتب هذي مدام مش أوكيه لأَنِّي انيم خداماتي يومين بالويكند لما ارجع بيت أهل ريلي عندي بالملحق بالمطبخ برع وهن يرضن عادي ويستخدمن حمام بيت عمتي
الحين شورن علي شو اسوي :
وضعي الصحي ما يسمح أتم بدون خدامات
عندي بيت بعده ما خلص يبغيله كم شهر والمشكله ريلي يبغي يروح كل أسبوع هناك والخدامات هناك ادريبهن بيخربن الخدامة وبطلع حجة عشان تروح
ووحدة حرمة قالتلي يمكن وحدة منهن سوتلج سحر فتحتاجي رقية ورش البيت بس ريلي ما يقتنع كيف
فيدوني الله يخليكم انا اكتب لكم واتالم دعواتكم لي بالشفا العاجل والتوفيق بالخدم

المزيد من آخر المواضيع من نفس القسم:

• طلبات تمريض وعماله منزلية
• طريقة تدريب الخادمة على الطبخ
• كيفية السيطرة على غضب الخدمات
• نصائح لتعليم الاطفال كيفية التعامل مع الخدم
• للي محتاجة خدامة
• إتيكيت وفن التعامل مع خادمة المنزل ‏
• خادمة اثيوبية ممتازة جدا للتنازل
• نصائح للتعامل مع الخادمة
• دريول الموظفات وسيدات الأعمال مميز
• افضل طرق التعامل مع غضب الخادمات

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[ضــ،،،،ــى]

الله يوفقج بخدامه زينه .واكيد السبب تحريض من خدامات خارج البيت.الله يشفيج يارب ويعافيج الخدامات شر لابد منه شو نسوي كيف بترومين علي بيت وعيال وومرض 😩

[ميميه88]

الله يعينج يارب
ياختي مستحيل بس من ثحريض الشغالات
يعني وحده يايه فليل الصبح تقول مابا؟!!
يمكن هاذيج اللي قالتلج بتشوفين مسوتلج شي ماتتوفقين فيهن

[المعآني]

الغالية هاتي بالساعات بعقود شهرية اريح لج تييج بس بالنهار وما تبات عندج

[كركر]

مشكورات حبيباتي وما قصرتن
بالساعات غاليات وبعدين ريلي يبغي حد يساعده بالشيل والحط وانا ما اقدر غير الأغراض والتنقل

[Yazi.90]

صراحه صدق الله يعينج ،،

يمكن كلام ربيعتج صحيح يمكن تحتاجين رقيه ،،
معقوله كلهن مب رايمات يكملن عندج سنتين !!

[طيبة*قلب]

ذكرتيني ببيت اخوي ماابا اخوفك

غرفه الشغاله كان فيها بسم الله ومايدرون البيت جديد توهم ساكنين فيه

كل مايجيبون شغاله تبكي تقول مااابا اشتغل او تنام بالمجلس

وكم وحده قالت الغرفه فيها بسم الله يأذونها واهي نايمه

اخوي وزوجته ماصدقوهم

بعد كمن شهر خدامه من الخدامات اتلبست وجلست تصارخ اخوي وزوجته تركوا البيت وهجوا

وغيروا البيت واغراضهم خلت امها تدخل للبيت وترتب اغراضها ونقلوا لبيت ثاني وخدمهم ماشاءالله ماشييين

[delights]

الله يشفيكي يارب ويعينك ويسهل امورك

[أنثـى]

شـــــــــــــــوفي الــــــغاليه أولأ وقبل أي شي داومي عالأذكار كل صباح وماشي احسن من ربة البيت ترقي بيتها بنفـــسها, وأذني أذان كامل كل زاويه في البيت ما عدا وبكرامه للجميع الحمامات , ثـــانيـــأ هاتي لج بنغاليه جديده وبتوصل بسرعه وعن التكاليف ف من مكاتب عيمان او راك ارخص وخلي حد من المكتب يتكلم اللغه البنغاليه ويقولها نيابة عنج بأن يشترط عليها عدم الإحتكاك مع أي خدم مع ملاحظه أنها كلما سمعت الكلام كلما خليتيها تفرح باللي بتسوينه لها ,وطبعأ لا تذكرين الأشياء المفرحه علشان ما ترتبطين وما تناشـــبج عقب , والاشياء الحلوه اللي بتعتمدين تفرحينها فيها واللي هي تفرحينها بهديه بسيطه كلما شفتيها مجتهده ----> وابدا لا تحاتين ترا بعض او اغلب البنغاليات شي بسيط ويفرحون فيه , وعن خبرة كثيريييييين ومنهم نحن بأن العامله البنقاليه لها اسلوب خاص نتبعه معاها وصحيح ان اللي ذكرت لج اياه نتبعه لكل الخدم إلا أن هذي الجنسيه اتبعي معاها اللي خبرتج ,,,وأبدأ لا تعلين صوتج على الخدم وتكلمي ببرود لانه أي جنسيه بتهاب أسلوبج وبتحاول ترضيج إما لو شافت منج الاسلوب الروتيني واللي يحصل في اغلب البيوت واللي هو صريخ وتخويف وتهديد واحيان توصل للغلط اللفظي أوالضرب فتــــأكدي انها ما بتخاف منج , لا تخبرين أي حد لما تشوفين شغالتج زينه وياج واي حد يسألج عنها او عن اموركم الخاصه قولي الحمدلله على كل شي ---> فقــــــــــــط <--- ,وعلميها وعوديها عالأشياء المهمه اللي مفروض تسويها لكل يوم والتحضيرات لثاني يوم وهـــكذا عوديها وعلميها تسويلج مساج ترا الخدامه على ما تعودينها من اول شي وتعب يوم ولا دوم و--->عوديها على ادب المعامله<--- لما تشوفج ولما تروح عنج بتنام يعني السلام عليكم صباح الخير الخ وقبل ماتنام تصبحين على خير او قود نايت الخ يعني نوع من الاتيكيت وظروووري ما تنسين شي هذا لو تبين شغاله مأدبه ومحترمه وأمينه وتعبج بإذن الله ما بيروح هباء ,وظروووري لا تعطين أي خدامه أسرار البيت حتى لو شفتيها بنظرج امور عاديه ,فتشي قبل ما توصل اي خدامه وبعد وصولها بفتره لو صممت ترجع للمكتب وفتشي جميع الاغراض والاثاث بجميع أماكن اللي كان ينامون فيه الخدم ولو تقدرين للبيت كامل يكون احسن وأأمن لأنه احتمال مكتوب شي امسحيه وهذا لأن اغلب الخدامات الحقودات لما يكيدون يكتبون داخل الخزاين الثياب او ورا الخزاين او اي مكان ما تحطين في بالج والمكتوب يكون نوع من تخويف وتحذير اي خدم جدد فما ان يشوفون هذي الرسايل او الكتابه الكاذبه إلا ويصدقون فيتحججون علشان يرجعون المكتب ,,,حطي كاميرا مراقبه تقدرين من خلالها تشوفين كل شي عبر الايفون لو ويييين ماتكونين وتراه العرض موجود في مجله خطوط,ولأن البنغاليات مسلمات فلا تشغلينها عن الصلاه يعني خليها تعرف ان هذا البيت مو بس مسلمين إلا مسلمين وخلوقين وأمناء مع الناس وبالأخير دايمأ ابتسمي بوجه الخدم ولا تسولفين معاهم فقط ابتسامه يعني لا تعطين اكثر منها إلا في حالة تعليمج لها بأمور روتين التنظيف والغسيل وإلخ ومع شغلها في التنظيف اوالغسيل اوالكوي اوالمطبخ من الضروري تلبس قفازات طويله الخاصه بالتنظيف وللطبخ النوع الخاص بالمستشفيات الشفاف وكل هذا تلقينه في كل الجمعيات ---> يعني خلج جديه في كل شي علشان يستوعبون ويتعودون على هذا النظام<--- واحيانأ لو شفتيهم مرضا بصداع او مغص حسسيهم انج حنونه عليهم وداويهم في البيت لا تعودينهم كلما عطست ركضتي فيها العياده هذا غلط لانه اغلبهم يتمرضون علشان ما يشتغلون ف مثل ما قلت واكرر كل شي بالتعود وخلي نومها من الساعه 11 بالليل وخليها تقوم 5 الصبح يعني ويا اذان الفجر وخليها ترتاح تنام الظهر وكـــل شي بالتعوااااااد ترا الخدامه لما تشوفج مهتمه بأنها تكلم اهلها كل شهر ومن ---> تلفــــــونج فقط <--- يعني ما تعطين اي خدامه موبايل وإذا اضطريتي فعطيها موبايل بو خمسين درهم لا كاميرا ولا شي بسسسس مكالمه واقفليه عن تتصل في حد يعني فقط موبايل للرد فقط فقط فقط ,وخبريها بأنها لو سوت شي غلط في بيت الاهل ترا بيخبروج ,,يعني خليها تعرف انك مو نايمه على اذونج وصاحيه ومنتبهه لكل شي حتى لوما كنتي موجوده وتوصلج الاخبار وهذا بس علشان تتفاديين اي شي في المستقبل ,وتأكدي انها تاكل كفايتها يعني من اكل البيت وعادي تطبخ لنفسها هم يحبون جذيه قولي لها اطبخي لنفسج وحددي لها الاشياء اللي تقدر تستخدمها واللي لا ,ولاتعودون الخدم على المطاعم ,ولبسها دوم مرتب ونظيف وسبوحها كل يوم قبل النوم ونصيحه لاحد يخسر ويشتري عطور للخدم يكفي فقط مزيل لرائحه العرق الخاص بالرجال احسسسسسسن من اي شي وبتلطف لج الجو كلما مرت حذالج ,,,بالأخــير ترا اهتمامج بالموضوع وبالطريقه اللي ذكرتها لج هذا اهم شي وصدقيني بيعمرون عندج وكل شي بالسلاسه والحيله والصبر----> لاتنسين بأنه أي شي اللي في اوله شرط اخره نور وتوكلي على الله وسوي نصيحتي وبترتاحين بس الأهـــــم من كل شي سويها نفــــــــــس ماخبرتج بكـــل اللي كتبته لج . الله يوفقج ويوفق الجميع اللهم أمين

[أحاسيس 85]

الله يسامحج اخت أنثى ... شو كنتي بتخسرين لو كبرتي الخط

عيني حرقتي وانا احاول أقرأ كلامج المفيد جدا

[Yazi.90]

ما شاءالله عليج اختي انثى ،،

اختصرتي علينا وعلى صاحبة الموضوع وايد اشيا
و ان شاءالله يارب هالكلام ينفع ويفيد معاها ،،

[كركر]

مشكورات حبيباتي وما قصرتن اخت انثا يزاج الله خير
بالنسبة للخدامة البنجالية صراحة عند امي وحدة بعد مسترجعة ابدا مول مب شغل كله اكل ورقاد وبعدين اذا يبت وحدة بتحتك فيها نفس الشي وبتخربها
انا تقريبا اسوي اللي قلتيه بس مشكلتي العصبية احيانا كثيرة ومرات كثيرة اضحك وأسولف وياهن
انا ما أحب الاهمال من البداية فنظري الخدامة لازم تثبت وجودها وتتعلم وإذا ما عرفت شي تسال كيف هذا أسويه انا. عادي أعيد مية مرة

[ملكة الاحاسيس]

التخريب مصيبه

اهلي للاسف يعانون من خدم الجيران

[ملكة الاحاسيس]

الواحد يصراحه مايقدر يمنع الشغالات يتكلمون صعب انا مجربة والله

واكبر غلط اكبر غلط تعودينها تطلع مل شوي انا مجربه لنه مجرد ماتخلينها بالبيت وتطلعين بتفكر بحقد

صارت وياي والله كثير كثيررر حتى الي كلنت عندي تقولي مدام طلعيني وياكم ! كيف اطلعج وانا وعيالي وزوجي يعني خصوصية شوي عالاقل تراها عايشه ويانا وتشوفنا ونشوفها وبعد تطلع!

مادري والله وش احل

ان قعدنا بدون خدم تعبنا في هالبيوت الكبيرة وعيالنا الصغار
وان يبنا خدم مايبون يشتغلون بضمير يبون طلعات وتلفونات

والحل !!

[ملكة الاحاسيس]

مشكورات حبيباتي وما قصرتن اخت انثا يزاج الله خير
بالنسبة للخدامة البنجالية صراحة عند امي وحدة بعد مسترجعة ابدا مول مب شغل كله اكل ورقاد وبعدين اذا يبت وحدة بتحتك فيها نفس الشي وبتخربها
انا تقريبا اسوي اللي قلتيه بس مشكلتي العصبية احيانا كثيرة ومرات كثيرة اضحك وأسولف وياهن
انا ما أحب الاهمال من البداية فنظري الخدامة لازم تثبت وجودها وتتعلم وإذا ما عرفت شي تسال كيف هذا أسويه انا. عادي أعيد مية مرة

البنقاليات للاسف للاسف من يوصلون المكتب يختربون علي طووول
جربت خمس بنقاليات والي انا اسبتشرت فيها خير قلت هاي بتشيل البيت طلعت راعيه علاقات !