كيف ممكن اقدر أساعده ؟

[قلبي أمي]

السلام عليكم خواتي
أنا بصراحه مب عارفه شو اقول و مب عارفه أشكي لمنو او ارمس منو لانه مابي حد من أهلي أو شخص أعرفه يعرف بمشكلتي .. فلجأت لكم يمكن تقدروني تنصحوني بشي ..
خواتي أنا صار لي مخطوبه تقريبا 5 شهور .. و عمري 25 سنه الحمدلله اشتغل و أداري على نفسي .. عندي إلتزاماتي و أسويها أول بأول تمام .. خطيبي اكبر عني ب 8 سنوات و يشتغل الحمدلله هو كان امعرس قبل و امطلق .. نحن نتواصل بشكل معقول عشان نتعرف على بعض .. هو عنده بزنس و صار له 5 سنوات في هالبزنس بس المشكله آخر 4 شهور البزنس ما قام يدخل له مبلغ و الاقساط الي يدفعها للبنك ما تخليه انه يقدر يدفعها فيضطر انه يعطيهم معاشه كامل و ما يتم له مبلغ يصرف فيه ع نفسه .. ما تصدقون اشلون هالموضوع مضايقني .. ما خفي عنكم اني من شهر ساعدته لاني ما قدرت و ما اتحملت اشوفه بهالوضع .. كنت متردده لانه هو مب زوجي على اني اساعده .. بس شسوي والله لاني أحبه ما قدرت أخليه جذي .. و الحين اخر الشهر نفس الموال اتكون نفسيته واااايد تعبانه .. و طبعا هو قرر انه يبيع المحل بإلي فيه و الحين فيه واحد يبي يشوفه و عسى خير ... انا احاول اني اطمنه أقول ان رب العالمين بيسرها أصبر .. بس تدرون وضعه صعب الحين و خصيصا انه الحين آخر الشهر .. انا المشكله مب عارفه شسوي جد .. انا عقلي يقول المفروض اني ما اساعده لانه للحين ما صار ريلي و قلبي مب مطاوعني ..

خواتي الله يخليكم نصحوني شو ممكن اقوله او اسوي معاه نفسيته داون وايد ..

المزيد من آخر المواضيع من نفس القسم:

• مخاطر كثرة ممارسة الجماع على الزوجين
• اسباب عدم الوصول للنشوه اثناء الجماع
• صفات الزوج المتنمر وكيفية التعامل معه
• الفرق بين الضعف والعجز الجنسي
• اهم فوائد الزنك السحرية للصحة الجنسية للرجل
• طريقة تنظيف المنظقة الحساسة بعد الجماع
• طريقة التعامل مع الزوج الصامت
• نصائح لحياة زوجية ناجحه
• فوائد الضحك للعلاقة الحميمة
• الزواج الثاني بين الأيجابيات والسلبيات

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[ام قلبين انا]

مش المفروض انتي تساعدينه
خلي هو يدبر حاله ليش هو اسمه رجل
عشان يتحمل كل شي يواجهه
اصلا بيتعود
حتى لو كانت مساعدتج 1000
قوليله بيع وفك عمرك البزنز ما ينفع سوو شي احسن
خلاص

[مراسيل الوفاآ]

اختي لازم تعرفين انه البزنس ربح او خساره مب شرط خطيبج ينجح خلال هال5 سنوات لازم يصبر
اذا يبا يتم ف مجال التجاره غيره كملوا 10 سنين وبعدهم مكانهم اما اذا ما يبا يصبر ف يترك هالمجال
ويتم ع وظيفته احسن من انج تصرفين عليه، مهما حالته الماديه تدهورت حطي ف بالج هو ريال ولازم
يدبر عمره لا تعودينه ع انه يعتمد عليج من الحينه عشان ما تندمين عقب، حلوه المشاركه بين الزوجين
لكن في حدود المعقول من حيث الادخار وانج تاخذين منه بيزات الاساسيات مثل اغراض البيت ومصروفج
حتى لو مبلغ بسيط ولو ما كنتي محتاجه منه خذي هالمصروف ويمعي له ومن تييه هالايام اللي يحتاج فيها
تقدرين تعطينه من بيزاته

اذا يبا يتم ع البزنس ف قوليله لا يصرف معاشه كامل ع البزنس وولا البنك يجبره ع هالشي يقدر يحط مبلغ
ولو بسيط ف بوكه والباقي يصرفه ع البزنس وبيتم وياه هالمبلغ يصرفه ع نفسه لين اخر الشهر ، لو كل واحد
عرف كيف وعلى شو يصرف بيزاته ما بنلقى ناس نفسيتها تتعب لهالدرجه

لو ما قدرتي تساعدينه من الناحيه النفسيه ف انا اقول الافضل انه ما يكون بينكم تواصل حتى لو مجرد سلام
الا عقب ما تحددون موعد الملجه لانه حالته النفسيه بتسبب لج ضغط نفسي وبتعيشين هالحاله كل شهر بين
انج تساعدينه او ما تساعدينه وبتنجبرين انج تعطينه من كثر ما تسمعينه لكن تذكري انه مهما ساعدتي
وعطيتي وسويتي الريال ما يشوف كل هالتضحيات بيشوف مصلحة نفسه ان ما كانت من الناحية الماديه ف بتكون
من ناحيه المسؤوليه عقب الزواج ما اعمم لكن الاغلب جي ف لا تحطين نفسج ف هالمواقف

[قلبي أمي]

صح كلامج اختي مراسيل الوفاا بس يوم احاول اني ما اتواصل معاه يقولي اني اعدم وجوده و ما اهتم .. أنا فاهمه انه هو يبى اهتمام و أخبره وين سرت وين طلعت .. بس ابي افهمه انه نحن للحين مب متزوجين عشان اخبره كيف افهمه هالشي ؟

[l6afy]

غناتي افصلي موضوع الاهتمام و الارتباط عن موضوع المادة

ولا يكون بيوم ايج يقول والله انتي مب مهتمة فيني عشان وضعي المادي

هني قولي له ستوووووب .. هذا شي و هذاك شي

فهميه ان دامكم مب متزوجين فلازم يكون بينكم حدود و اي شي يصير بينكم لازم بعلم الاهل

مافي شي يتخبى من وراهم الا اذا كان غلط .. ولا تبدين حياتج بغلط

اذا تحبينه وتبينه واستخرتي وارتحتي له .. الله يوفقكم

لكن من رايي تحطين علامات استفهام وتسالين باجر كيف بيصرف على عيالج اذا هذا حاله؟ والا بيترياج تصرفين عليه وعليهم ؟؟

[قلبي أمي]

إختي لطافي أنا وياج و كلامج عين العقل .. و انا امقرره إني ما اساعده لازم أشوفه هو كيف راح يدبر عمره هالمره راح اسمعه صح و اخفف عنه بشكل معنوي

[بسمة أمـل]

صح كلام البنات لا تعودينه انه يآخذ منج لأنه بتم ها حاله بعد الزواج لهذا لا تساعدينه وافضل لو انج تصبرينه من الناحية المعنوية فقط

[اجمل سعوديه]

وعليكم السلام ..
البناي ماشاءالله ماقصروا .. وكلامهم مظبوط ..
الله يوفقك ..

[مالتيزرس]

غناتي لا تخلين الحب يعميج ..اهو ريااال ويصررف عمره ..

عيل باجر شقايل بيعرس من وين له البيزات والمهر والشبكة وكيف بيصرف عليج ؟؟

فكري فيها بالعقل الحب مب كل شي ..انتي بتتزوجين ريااال يصرف عليج وع بيتج وعيالج مش انتي اللي تصرفين عليه ..واايد بنات يشتغلن وسكتو عن رياييلهم فالبداية عن النفقة وعقب قامن يتشكن الريال مايعطيها نفقة ..

فانتي حبيبتي الحين مش ع ذمته عسب تعطينه الله يهديج ..مب مكلفة بالمعنى الاصح ...

اثبتي عمرج من البداية وبغض النظر عن دوامج وانه لج راتب لج الحق فالنفقة ..

الله يوفقج واييسر امركم ..

[ياقوتةخضرا]

ما دام هاي البداية لازم توقفين مع نفسج وقفة مصارحة

أولا شو سبب طلاقه ؟
هاي نقطة مهمة ! لا تعتمدين على كلامه في سبب الطلاق
لأنه مثل ما يقول المثل "محد يكتب عمره شقي"

يمكن المسائل المادية كانت سبب من اسباب الطلاق
تأكدي عدل من هالنقطة

اذا كنتي محرجة الحين من انج تساعدينه ماديا (وانتي غير مطالبة تساعدينه أصلا لأنها مجرد خطوبة)
ممكن تقولين له انه أهلج مب راضين على اتصالاتكم وما تبين تزعلينهم

نقطة ثانية مهمة : سالفة انه يوم تكلمينه آخر الشهر وتكون نفسيته تعبانة
أحس انه هذا نوع من أنواع الابتزاز العاطفي (واسمحيلي على هالوصف)

لأنه كانت عندي ربيعة توهقت في ريل
كان يسوي لها نفس الشي !
وفي النهاية عرفت انها اساءت الأختيار

أنا أقول لج هالكلام لأنج صغيرة في السن وما عندج تجارب
ونحنا اللي اكبر منج ياما شفنا ناس وتجارب تعلمنا منها
ونبغيج انتي بعد تاخذين حذرج


أنا رايي لا تستعجلين في الزواج لين يرتب أموره

[ملكة المملكة]

أنا مو معك بالخطوة اللي سويتيها .

سواء كان زوجك أو خطيبك ماتخلينه يعتمد عليك

حلوة ذي كل ما انقلبت نفسيته تعطينه فلوس

حتى هو مو حلوة بحقه يقبلها اصلا .

المفروض يتحمل ولا يتسلف من الرجال ما أدري بس انك تعطينه خطوة مو كويسة

افرضي بكرى إذا تزوجتي يتعلل بأي شيء عشان ياخذ الفلوس ولا مايصرف عليك .

وافرضي أنه ماخذك عشان إذا خسر البزنس حقه تصرفين عليه

أنا زوجي مايشوف الريال ولا يسألني اصلا لأن من البداية اخليه يصرف كل شيء ولا احاول اساعده بأي شيء

كل خوفي يتكل علي وعلى فلوسي

ويشوفني بدال زوجته . صرافته !

[جنان الفجيره]

اول شيئ قولي له البزنس يحتاي صبر بدايته خساره ونهايته ربح اذا الله راد رفعي معنوياته

خبريه انه انتي تبين تولفين لعمرج للعرس اذا احتيتي شيئ

لو انه المصروف كله يخلص خليه يستخير ويجوف اذا اوكي يكمل المشروع او يوقف لمده زمنيه ويدرس المشروع صح

خبريه انه لازم يجمع للعرس وتكاليف و المشروع لاحق عليه ان شاء الله

ربي يوفقج ويسعدج ويتمم لكم على خير

[المغتربة]

خلي الريال يعتمد ع نفسه
باجر وراكم عيال و بيت و مصاريف

خليه يرتب اوضاعه و البزنس فيه ربح و خسارة
خليه يربح و خليه يخسر و خليه يبيع


حتى لو كنتي متزوجة كنت بقولج خليه يتعلم من تجارته


لا تخربين الريال !!!

[jumana]

مثل ما قالت الأخت اللي قبل إفصلي موضوع الإرتباط بموضوع الماده

والمفروض ما تعطينه لأنع بيتعود وثاني شي إنتي مخطوبه مب مالجه عشان تعطينه وحتى لو مالجه هو ريال.. لو ماكنتي تشتغلين شو بسوي بتشحتين مايصير جي غلط اللي سويتيه و لو كنتوا معرسين شو بسوي...حطي في بالج الريال يقدر يدبر عمره والحرمه مش ملزومه تصرف ولازم يرتب أموره وحياته الماديه أكثر...شو بسوي عقب العرس ان شاء الله ...وأصلا لاحظي كل نهاية شهر بيبتدي يستغل لج ويسوي هالحركات عشان تعطينه

خلج بعيده عن الحب والعواطف إذا بديتي جي حياتج وانتي اللي بتعودينه عالصرف محد بيتعب غيرج وإنتي كبيره وأدرا بمصحتج


وماقول غير الله ايسر اموركم ان شاء الله

[Ward-uae]

وطليقته عندها عيال اذا هيه عادي معاشه يصرفه عليهم حطي في بالج هذي النقطه
بس مستغربة بينكم انا ريلي ملج علي واستحى يفتح هالمواضيع خاف عن اهون فكان يضغط على عمره ويشتغل زيادة والحمدالله عرست ورتبت له جدول كيف ينظم ويرتب المصاريف
حاولي ما ترمسيه باي صفة يرمسج خطيبج وشو يعني ما ابينكم عقد او شي بعد يظل شخص غريب واستخيري مرة ومرتين وثلاث وتوكلي على الله