يتحسب جي بيحبوني اكثر .. اذا خدمتهم

[الطواشة]

يا كثر مواضيعي في هالقسم .. والله طلعلي قروووون

حطووو نفسكم وياي في هالمواقف ...

الموقف الاول :
حميتي قاعدة تغسل الثياب لان خدامتها مسافرة و كانت تغسل كمية لان مب لاحقه تغسل كل يوم .. يجوفها ريلي و يقولي يا فلانه سيري ساعدي اختي ...

الموقف الثاني :
رادين من عزيمة و حميتي بتيي ويانا هي و عيالها .. اركب جدام يقولي خله فطوم تركب جدام ... نعععععععععم .. انا سكت وسويت روحي ما سمعت ..

الموقف اللي بعده :
قاعدين في غرفة عمتي اقوله اوووف استغفر الله مكيف عمتي شكله بعد اخترب يقولي نظفي شو تترين .. نعععععم يا بابا قلتله مكيفهم وانا شلي

اتصير عزايم انا اجابل فالمطبخ اشرف ع الخدم .. اتعودوووااا ان الطواشة تحب اتجابل ..

اللي منقهرة منه بعد ان اليوم عمي يقولي اطلعي ويا عمتج يوم هي بتطلع لا تقعدين كله فالبيت ..
و حميتي قبلها بعد قالت هاالكلام ..

يعني ملاحظين ان 24ساعه قاعدة في هالبيت و اذا طلعت لازم حد من ربعه يتصل تعال ابيك ضروري ويردني البيت ..

ابا اقعد وافهمه ان غلط اساعد اخته ف غسل الملابس او اقعد ورا او انظف المكيف و لا اجابل العزايم و خواته ريل ع ريل .. حتى حريم اخوانه يييووووون ريل ع ريل .. ليش لاني بس ساكنه ف بيتهم ..

شورن علي افاتحه بهالشي اني مضايقة من هالمواقف وان غلط

المزيد من آخر المواضيع من نفس القسم:

• طرق تجنب الزوجة تدمير حياتها الزوجية
• افضل الطرق للتعبير عن حبكِ لزوجكِ
• جارتهم فرقت بين اخي وبين زوجته
• طرق التعامل مع الزوج الذي يتجاهل زوجته
• افضل طرق التعامل مع الزوج الذي يهين زوجته
• افضل طرق التعامل مع غضب الزوج بذكاء
• اجمل افكار لاستقبال زوجك من السفر
• اهم العادات التي تؤدي الى تدمير الحياة...
• افضل طرق التعامل مع الزوج المستفز
• نصائح مفيدة لنجاح العلاقة الزوجية

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[رسايل غلا]

يلسي وياه وناقشيه فالموضوع قوليله صح الزوجة لازم تساعد بس مب معناته تسوي كل شي بروحها
ولازم التقدير والاحترام موجود بيني وبينك انا زوجتك مب مدبرة منزل
يعني حاولي بكلام حلو ومرتب تشرحين اللي في خاطرج وان شاء الله يفهمج ويقدر وضعج

موفقة يارب

[لؤلؤه دانه]

بالعكس اشووفه شي وايد حلوو
معناته انج قد الشي وانهم معتمدين عليجج لانهم يشوفون انج قد المسوولييه وكلام عمج وحميتي عااادي جدا من طيبهم يقولولج روحي عند عمتج يعني وايد مرتاحييلج هذا الي اشووفه انا عااد ماادري ودام انج ساكنه عندهم انتي الاولى عن خواته وحريم خوانه قصدي يعني البيت بيتج انتي الساكنه فيه

[Ward-uae]

شو المشكلة في المواقف ؟
لما ريلج طلب منج تساعدين اخته شو فيها؟ اذا هو سار وساعدها انتي شو بيكون ردت فعلج وموقفج ؟ لو سرتي وبس سألتيها تبين اساعدج فيها شي يمكن ما ترضى لانها ملابسها الخاصه بس حلو انه حسيتي فيها؟ او تطرشين خدامتج تساعدها يمكن انتي في يوم يصير العكس خدامتج تسافر وتحتايين احد يساعدج شو بتسوي ذيج الساع
الموقف الثاني مب حلوه ريلج يقولها
لكن عن نفسي من باب الاحترام ابديها على نفسي خاصة لو كانت اكبر مني وانا وحده ارتاح اقعد ورا يمكن لاني اسوق فلما اقعد جدام وريلي او اخواني يسوقون اتوتر
الموقف الثالث لو كنت مكانج بقوله خرخش مخبأك وأشتر مكيف لعمتي فديتها وايد أعزها الله يحفظها
شوفي حبيبتي ريلج شكله يبي يقربج من اهله ويحببهم فيج اما انج ساكنه عندهم اذا كنتي ما تبين ليش ما طلبتي هالشي كشرط للزواج او لما انخبطتي رسمي
اما انه كيف تخبريه ما يحتاي تخبريه هذي التصرفات تنفهم من ردت الفعل حاولي انتي تفهمين شخصيته جيه هو بيحب يكون معاج وما بيسير لربعه

[Jawharah]

أختي نصيحة لاتدققين دام الي يعيبج تسوينه وريلج مايضغط عليج
بالنسبة للمساعدة عادي تراه متأكد أنت شطورة وطيبة
خلي أعصابج كول وعيشي حياة سعيدة بالناقص من قال وقيل.

[المعآني]

لا تفتحين لنفسج باب المشاكل
سايريهم ولا تتريين الريال يفهمج ولا يوقف معاج ضد أهله

[Ro0o07y.ss]

حبيبتي انتي نظام امشي فيه بحيااتك بترتاحين صدقيني عاملي اهل زوجك حسبه اهلك الثانين
صدقيني لو حبيتيهم وعاملتيهم مثل اهلك ماراح تحسين بااي تصرفات تصايقك
لانزعلين مني فديتك بس عطيتك حل حلو وبسيط

[هجير الشمس]

والله المواقف اللي ذكرتيها ترفع الضغط وردود البنات ترفع الضغط اكثر واكثر
الاول ماله حق يامرج تغسلين انتي اذ تبين فها من نفسج اوكي لكن حد يقولج لا ،،،الموقف الثاني حق شو اقعد وراء! المكان مكاني ويخسي يقولي انزلي ،،،المكيف يباله تنظيف يكلم شغالتهم واذ خربان يروح يشتريلها مكيف يديد انا مب ملزومه اييب دير وانظف !!! اجابل الخدم في عزايمهم ليش بالله امه والا خواته يا سلام هم ع كلامج حاطين ريل ع ريل وانا اربع بالبيت والله هاللي كان ناقصني هم الاولى بالشغله هاي انا عندي امور تهمني وتخصني ابديها ،،،والموقف الاخير من يتصلون ربعه يقوم يردج البيت نهائي مب حلوه لنج اساس ما تطلعين ،،صح لما تطلعين وياه ومب مقصر عليج اهني ما فيها شي يردج ويقولج فلانه اسمحلي ربعي يبوني وبعوضج،،،اما انه خير شر ما يطلعجووفوق هاه يقص من وقته وياج عشان خاطر ربعه لا والله ما ارضاها ع نفسي من هم ومن انا !
دوم اقول ونصيحتي لكل وحده قبل لا تعرس تحط شرطها ان يكون لها بيت خاصه
ان شاءالله غرفه وحمام المهم شي لها بروحها وبعيد عن اهله
انا يوم تزوجت علي من ريلي وعيالي وبيتي
والباجين ع قد معاملتهم اعاملهم
زيين اكون مثلهم واحسن
شينين والله لا اعيد تاهيلهم بطريقتي
ما طلعت من عز اابوي ودلاله ومن حضن امي وراحته
عشان اطب في بيوت الناس اخدم
كلميه بالطيب واللين اذ ما نفع وتكررت حركاته خلي حد من اهلج كبير وفاهم يتناقش وياه
وياخذلج بيت مثل العالم خل يعرف انه لج كلمتج ولج اهل يغلونج وما يقبلون اي حد يرخص بج
والله يعينج ويوفقج

[ام قلبين انا]

حبيبتي خليج عاديه لا تكبرين الموضوع في راسج دام ابو اعيالج ما ضايقج باسلوبه خلاص اللي ما ييعيبج اتسوينه طنشي يعني قوليله مشغوله عندي شغل
دام ما زاعج وسوه عمره الاخ المثالي يعني ف السليم
اما يوم يقولون طلعي مع عمتج اعتبريه ابوج اللي يرمسج يمكن يشوفوج ملانه يبوج تطلعين
الظاهر انتي اللي حاطتهم ف راسج موب هم
خذي الكلام اللي يفيدج مو بعض رودود الدفاشه اللي تهد بيتج

[love rak]

حبيبتي مدام انتي بيت أهل ريلج عليج من ريلج واحترام اهله بمعنى
نظفي لريلج فقط اطبخي لريلج فقط لا تعودينهم لا لطبخ ولا غيره بس اذا هم بالمطبخ ادخلي وقوليلهم أي مساعده ... وسوي وياهم سلطة شي خفيف مب عيوش وغيره ...
ريلج أمه كانت بركب سيارتكم وأمه بتركب قوليلها خالو اتفضلي يلسي يدام عشان تكبرين بعينه و بعين أمه ... اخته لا ...بالنسبة للمكيف هو يصلحهم وينظفه مب انتي ..
وبالنسبة لطلعه عوديه يكون لج يوم لطلعه أو يومين بالاسبوع يوم ترفيه ويوم لقضاء حاجات
أما عن طلعاتج وي عمتج ها شي راجع لج ... روحي مثلا وياها اعراس اذا حبت. . أما رايحه راده لا تعودينهم
وانتي شو ميلسنج 24 ساعه بالبيت روحي شوي بيت اهلج
انا اشوف من بجاية الحياة الزوجية خلي لج نظام يتعودون أهل ريلج عليه
لأنه شوفي المنتدى متروس من قصص الي اتعودت تطبخ لأهل ريلها وعودة ريلها وبعدين صارت مشاكل واطلقت والسبه التنظيف والطبخ
شوفي انتي شكلج وايد ترمسين خليج رزينه بيت أهل ريلج الكلام بحدود
نعم .. لا .. شخباركم .. تبون مساعده ... وينكم اشتقت لكم
وريلج خفي شكاوى وتذمر ومرادد .. وعطيه كلام حلو وعسل وهدايا ومفاجات .. وإذا في شي ما عيبج عطيه نظرة هاديه واسكتي هو بيعرف غاطه ... ماله داعي ليش وليش
أتمنى اتكون النصيحه اتفيدج واطبقينها

[future dreams]

سبحان الله في ناس تيها المشاكل بدون سبب
وفي ناس ادور حق عمرها مشاكل
اذا مب عاجبتنج العيشه عند اهل الزوج اطلعي في بيت بروحج
مافي وحده ترضى تكون خدامه في بيت اهل زوجها لكن المساعده مب باب الواجب ...
طرشي خدامتج تساعدها مثلا في غسل الثياب او الكواي ترى ما بتخسرين شي ...
والمكيف بدال لا يقولي نظفيه بقوله له اتصل في العمال يشوفونه ...
واذا ع اليلسه جدام انتي شليتي الدنيا ع مره وحده ركبت فيها اخته جدام وانتي طول الوقت تيلسين جدام اسمحي لي هذا سبب سخيف جدا وموقف عادي شو يعني لو ركبت جدام او ورى !!!!
وبخصوص العزايم ...انا ملاحظه اغلب حريم الاخوان ما تشل كوب ماي ! وحتى ما تصب قهوه او جاهي ...انتي مب ملزومه ...اذا تبغين تساعدين هذا من طيب اصلج واذا بتمين تشتكين عند ريلج عسب انج حااسه انج خدامه عندهم ...فالافضل تطلعين تسكنين بروحج ...

[Ro0o07y.ss]

عَنْ أَبِي هُرَيْرَةَ رَضِيَ الله عَنْهُ قَالَ: قَالَ رَسُولُ اللَّهِ صَلَّ اللَّهُ عَلَيْهِ وَسَلَّمَ: "مَنْ خَبَّبَ خَادِمًا عَلَى أَهْلِهَا فَلَيْسَ مِنَّا وَمَنْ أَفْسَدَ امْرَأَةً عَلَى زَوْجِهَا فَلَيْسَ هُوَ مِنَّا".أخرجه الإمام أحمد ( 2 / 397 ) ، وأبو داود ( 5170 ) ، وابن حبان ( 1319 ). وصححه الألباني في "السلسلة الصحيحة" ( 1 / 580 )

الله يجزاكم خير حبيباتي ف نقول خيرا ينفعها او لنصمت لانزيد الزيت على النار وتولع زياده
،،،

[ام الغزلان]

دام انتي عايشه وياهم في نفس البيت اعتبريه بيت اهلج العزايم لازم توقفين وتشرفين وتبيضين الويه بعد لان انتي حرمه الولد اللي بالصوره بس اكيد في اشياء ريلج بالغ فيها مثلا يركب اخته جدام وانتي ورا لااا هذا من حقج وفتحي وياه هالموضوع وناقشي او يبيها باسلوب مزح وبيفهمها برووحه ومن احسانج اذا حبيتي تساعدي خواته او لاا تقدري تتهربي باي شي الحرمه ذكيه بفطرتها شوفي اللي لج واللي عليج والباقي طنشيه وترا العمه بطبيعتها تحب تشل حرمه ولدها وياها وين ماتسير معناتها تحبج صدقيني وتقدري تسرين مره وتعتذري مره ترا مجامل الاهل شي طيب وبتعيشين مرتاحه

[طيبة*قلب]

والله ياصاحبه الموضوع واللي معاك مبالغات

وزوجك ماشاءالله طيب ع نياته بس فهميه بشويش
اولا بالنسبه موضوع انه يركب اذا كانت اكبر منك من الذوق انتي تقوليلها اركبي قدام احسك شوي انانيه
وبالنسبه للبقيه مع اهل الزوج الافضل يقل الكلام وان شاءالله تسكنين ببيت بروحك ولا القيل والقال وانتوا بغنا عنها وكل واحد يكره الثاني

عاملي عمتك كانها امك والبقيه قولي لزوجك بطريقه حلوه هم ع عيني وراسي بس انا لي وبزوجي وامه وربي يحفظكم لي

[غلآ نفسي]

الصراحه استحي امه او اخته راكبه ويانا وانا اركب جدام عيب وغلط

المفروض تيلسين انتي وياها ورا

اما مكيف عمتج تعالي عيل انا طالعه من بيت عمتي من زمان بس لين يومج هذا انا وريلي نسير بيتها ونظف مكيفها والله حلاته تساعدين حد ..

اما غسيل ملابس اخته هو الصراحه انتي مب مجبوره بس اذا ترومين تجاملين جامليها عشان خاطر ريلج

ماعرف كيف طبيعه بيتكم .. بس سايري ريلج من هالصوب وسايري اهل ريلج من هالصوب

بالتوفيق